MARIKO 16
16
Lisimuguka lia Yeso
(Mat. 28:1-8; Luk. 24:1-12; Yoh. 20:1-10)
1Lwi Lisabato liali ni liakavita, Maria Magadalena, Maria mama wa Yakobo na Salome, vaagura amaguta gafunyaa umwayu kuzia kuvaka umuviri gwa Yeso. 2Mugambazuri ku lidiku lia Jumapili, iliuva nilitongaa, vaduuka ha kilindwa. 3Kunzira vateevana, “Nivwaha waza akogomagominyiri iligina lituli ha kiliango chi kilindwa?” 4Navuzwa lwa vahenza, valora iligina liali ilinene ni limali kogomagominywa. 5Lwa vingira mu kilindwa, valora umusoleri niyiviiki inguvu indavu, yikaye kolovega lwu mukono mulungi; vagenya ligali.
6Umusoleri oyo yavavolera, “Mutagenya mba. Inzi manyi vuzwa mwenya Yeso wa Nazareti uwaavambwa. Umali kusimuguka! Siaveeye hano mba. Heenzi havundu ahavamuta. 7Navuzwa muzie mu volere aviigi veve harara na Petero ndi umali kwimilira imbiri winyu kuzia Galilaya. Mu lamulolera yo kuli yamuvolera.”
8Kunangwa vaatura mu kilindwa izimbiru kigira vaali ni lidegera, kandi niligenya. Sivavoolera umundu woosi ikindu mba kigira vaatia.
Yeso alolekaa ku Maria Magadalena
(Mat. 28:9-10; Yoh. 20:11-18)
[ 9Lwa Yeso yasimuguka mu mavwevwe lidiku lia Jumapili, yaloleka kutanga ku Maria Magadalena, wa Yeso yaali ni yaatuliza amademoni saba. 10Maria Magadalena naye yazia navolera avalina va Yeso. Ing'inga yene yeyo vaali nivakisioma nu kulira; 11Lwa vahulira Yeso aveeye mwoyo kandi Maria Magadalena umuloli, si va suuvira mba.
Yeso yaloleka ku aviigi vaviri
(Luk. 24:13-35)
12Inyima wa yaga Yeso yaloleka ni ligondo lindi ku aviigi vaviri. Aviigi yavo vaali ni vegendagendiza mu lidaala. 13Navo viirana kandi ni vavoolera avandi, navuzwa sivavasuuvira mba.
Yeso yaloleka ku vigi likomi na mulala
(Mat. 28:16-20; Luk. 24:36-49; Yoh. 20:19-23; Vik. 1:6-8)
14Lwukumaliriza Yeso yaloleka ku aviigi likomi na mulala lwa vaali nivalizaa. Yaavalemba kigira sivali nilisuvira mba kandi kigira uvudinyu vwi mioyo jaavo. Kigira sivasuuvira yavo avaari nivamuloli lwa yaali namali kusimuguka mba. 15Yavavolera, “Muzie mu lirova liosi kandi mwilwaze Ivangeri ku avandu vosi. 16Ku vosi usuviraa na abatizwi alahonywa. Ku vosi uvula kusuuvira, alakalagirwa. 17Avasuuviraa valahevwa izingulu kokora ivilolekizu. Mu lieta liange valakunga amademoni; valamoloma mu zinimi zimbia. 18Niiva valagumira ku zinzoka anoho ni vanwa ikindu choosi chukwita, sikilavasaliriza mba. Valaviika amakono ku valwaye, navo valahona.”
Yeso yavugurwa kuzia mwigulu
(Luk. 24:50-53; Vik. 1:9-11)
19Lwu, Mwami Yeso yaali niyakamoloma navo, yavugurwa kuzia mwigulu, ni yikala ha mukono mulungi gwa Nyasaye. 20Aviigi vazia kwilwaza muvivala viosi. Mwami yayinzira harara navo, nadinyiriza amakuva gaavo ni vilolekizu vialondekana navo.]
Селектирано:
MARIKO 16: LOGOOLI
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
©Bible Society of Kenya, 2019