MATIUS 5
5
Yesus atakam sikon op amememtamef
1Yesus e ow arke aporefen. Ar masirin, e sikon op aaptometefen. Aram aneypwikapefen. E amamkawi owam aramat ipicpu aenawomfesen. 2Aramat ipic masirin, e ow inim atakam amememtamefen:
Asan akat aemapmes ow
(Luk. 6:20-23)
3“E Tuhan jirey cowok aemes ow e Onam Op Pemerintah Asan afiwcemes. Inimas e ow asan akat aemapmes. 4Allah e jak pwicak aemapmes ow, jak akat atatamcema. Inimas e ow asan akat aemapmes. 5E arma batawsicim opok ow, a capinmi takas atowopcemes. Inimas e ow asan akat aemapmes. 6Allah, e ow tarowat memem jak aserememames ow, ow tarowat atamemcema. Inimas e ow asan akat aemapmes. 7Allah kawey ow serow ajiomames ow, serow ajiomcema. Inimas e ow asan akat aemapmes. 8E jursumec opok jak ow, Allah bi aporcemes. Inimas e ow asan akat aemapmes. 9Allah, ow damos boam bemapom ow, ‘E ow dotiperes ara,’ inim aecema. Inimas e ow asan akat aemapmes. 10Wun ow, ow tarowat aemapmes. Ow nat, inim ow apormesnew, wunam ar e ow ajurusumamesnew, bare, e ow tarowat, asan akat aemapmes. E Onam Op Pemerintah Asan, bare aras ara.
11Ow car do mamkawi ow aporcan, wunam ar cemew car aatcannew, ar car ajurusumcannew, ar ‘Car pwicakas aemamokom,’ inim suw atakam aotawcesnew, bare asan akat aemapcomokom. 12E Allah onam op car atatamcanas, bare akatnakut ara. Inimas jak akatnakut emapey. Bap ara, ow e Allah atakam botaw owam ajurusumfesen. Ca nat, asep ow ara.”
Garamam, sereasam, atakam
(Mrk. 9:50; Luk. 14:34-35)
13“Car, asmat ow agaram inim cimin ara. E nat, garam jema opok aemamescownew, ow e garam jemaas bwemokenemapom asan opok. E garam, bare pwicak ara. Ow e garam ajiwosomcemes. Aram e garam bwey aopowjarcemes.
14Caram asmat ow e asereas aememamokom. Ow, kota, sikon op aeapomces, ar e kota bwemcukumapom asan opok. 15Ow pelita ateremapomces, ar e pelita ember aman bwemkapimapom asan opok. Ar e pelita, pelita asan atewapomcemes. Erasan e pelita e cem aman ow takas sere aemtamcema. 16Inimasam ara, caram pelita cimin, ow bipu sere ememey. Ow masirin, e aemamokom akatas aporcemes. Aram, e onam op caricipic, asicimcemes.”
Musa tulis aeapomef Jirmec atakam
17“Ca nat, ‘E Yesus, e Musa tulis aeapomef Jirmecam, e Allah atakam botaw ow tulis aeapomfes atakamam, biwosom aenawef,’ inim bi binip arapok. Dor eras biwosom bwenaw opok. Do nat, e atakam jipu bwemkurum aenawof. 18Atakamnak ara, e onam opam, a capinmiam, banios opok aemames ara, ow e Jirmec atakam huruf kanimnakapnew, e Jirmec atakam titik cowoknakapnew, bwemjiwosom asan opok. Ow e atakam takas jipu bap a takam aemcemes. E onam opam, a capinmiam, asep aanioscemes. 19Inimas ara, ow e Jirmec kanimnakap aopowcesam, ar kawey ow e Jirmec kanimnakap bopow amememtamcesam, bare, ar e Onam Op Pemerintah Asan, juwas opok aememcemes. E nat, ow e Jirmec ji aecesam, ar kawey ow e Jirmec ji bwe amememtamcesam, bare, ar e Onam Op Pemerintah Asan, juwas emcomnak ow aememcemes. 20E Allah Jirmec mamememtam owam, e Parisi owam, tarowat opok ara. Caram inim tarowat opok ememcokomnew, car e Onam Op Pemerintah Asan bwemfiw asan opokman.”
Bifan bafayomas
(Luk. 12:57-59)
21“Ow atakam e bapnak ow aotawfes, ‘Daw catiwcokom. E daw ow, e salah atakam basakamtiw ipic bipu aememcemes.’ Inim aefesen. Caram inimas jen emcajifokom. 22Ca nat, jakaperey. Ow bifan e ajowow afayomces, ar e salah atakam basakamtiw ipic bipu aememcemes. Ow cemew atakam e ajowow aotawces, ar e salah atakam basakamtiw ow awut bipu aememcemes. Ow atakam e ajowow aotawces, ‘Or Dat! Or o! Or pi!’ inim cemew aatces, bare ar e neraka jismak aman afiwapcemes. 23Car pok Allah batetam aememcokom, wunam e pok jis bafamtam jowsepu ememcokom, e masirin, car, ‘Dojowow ipic jak amop dor ara,’ inim bi binip acomomcokom, car e Allah atetamcokom pok, e pok jis bafamtam jowsepu desen mamtatiwey. 24Car masirin, e cojowow ipicpu mamtakamapeney. Caram e ipic damos mamtakamamjiomey. Damos atakamjiomcokom masirin, mamofasiey, wunam e pok Allah mamtetamey.”
25Ow, ‘Or inim salah aemfan,’ inim aetotorcan, caram e ow damos aynam mamjiomey— car e salah atakam basakamtiw ipic asan bajarem opok ara. E ow car e salah atakam basakamtiw ipic batasimemtamasin. E ow car e salah atakam basakamtiw ipic aotasimemtamcan, e ipic car polisi aootasimemtamceman. E polisi masirin, car e penjara cem aman afimimceman. 26Atakamnak ara, car e penjara cem aman aemapawarcomokom— e pok abwitamkurumcokom jofay ajiwar.
Jursumecas bwem
27“Ow atakam aotawfes, ‘Okore emcokom,’ inim aefes. Caram inim atakam jen emcajifokom. 28Ca nat, jakaperey. Jipic, cowoc manmok atiwcow, wunam ar e cowoc jursumecas bwem jak asinomcow, bare e ipic e ajak aman okore aemapma. 29E cabo manmok, car dosa bwem aomcan, e manmok mamweremtewey. E camanmok daniwis aemamescow, bare car asan akat inim. E nat, Allah e cadam epcom neraka aman ajiwimcam, bare car asan pwicaknakut aemapcomokom. 30Wunam, e caban bo car dosa bwem aomcan, e ban mamsakamosomey. E caban daniwis aemamescow, bare cae asan akat inim. E nat, e cadam anakat epcom e neraka afiwapcokom, bare car asan pwicaknakut aemapcomokom.”
Cepes bajiwapom
(Mat. 19:9; Mrk. 10:11-12; Luk. 16:18)
31“Ow atakam aotawfes, ‘Jipic e arem ajiwapomcow, ar e cowoc bajiwapom surat batetamcow,’ inim aefesen. 32Ca nat, jakaperey. Arem, kawey cemen ban opok emcow, e nat armipic e arem ajiwapomcow, ar e cowoc kawey cemen ban cowoc aemapomcema. Kawey ipicam e cowoc atewetcow, e ipic cen osom ipic aememcema.”
Atayi bwe
33“Wunam, ow atakam e ametnak ow aotawfes, ‘Car atayi faknakut Tuhan aetotorcokom. “Dor e atayi aeminas jipu aemcimin. Pate opok cowok. Oram manmok tiwapem,” inim atayi aetotorcokom, bare e atayi aecokomas biwosom arapok.’ Inim aefes. 34Do nat, atakam car aotawmin. Caram, ‘Dor e atayi aeminas jipu aemcimin. Pate opok cowok. Allah manmok tiwap,’ inim baji arapok. Caram, ‘Pate opok cowok. E onam op capinmi awames,’ inim baji arapok. Bare, e onam op capinmi Allah afa bemap asan inim cimin ara. 35Caram, ‘Pate opok cowok. A capinmi awames,’ inim baji arapok. Bare, a capinmi, Allah abweyko inim cimin ara. Caram, ‘Pate opok cowok. E kota Yerusalem awames,’ inim baji arapok. Bare, e Yerusalem e Raja awut akota ara. 36Caram, ‘Pate opok cowok. Dokus awap ara,’ inim baji arapok. Caram e cakus fin fwesak cowoknakapam, fin sosok bwemjaworom asan opok. Caram e cakus fin sosok cowoknakapam, fin fwesak bwemjaworom asan opok. 37Car atayi aecokom, car, ‘Owo,’ inim cowok mamjiey. Caram, ‘Opok,’ inim cowok mamjiey. Car wun atakam aokawimcokom, er e Jursumec Ipic inim bi binip car atetamcanas ara.”
Jokmenas bic baji arapok
(Luk. 6:29-30)
38“Ow atakam aotawfes, ‘Ow, wun ow amanmok daniwis aemapomces, ow e ow amanmokam daniwis baemapomces. Ow, wun ow asis ajakamces, ow e ow asisam bajakamces.’ Inim aefes. 39Ca nat, jakaperey. Ow jokmen car aomomcannew, bic baji arapok. Ow e cabo ak aempocannew, e poman akam mamofirimtamey. 40Ow e cabaju kaus batewet aememcesnew, inimas ar car e salah basakamtiw ipic bipu atowocencannew, bare e cabaju kemejaam e ow mamtetamey. 41Ow, car e apok kilometer cowok ajiwar jec bomostam jen opok aomcannew, bare e apok kilometer jamnuk ajiwar jec mamomostamey. 42Ow pok janim car aanimcannew, e pok e ow mamtetamey. Ow e capok batew aememcesnew, caram acuw arapok.”
E cajewew ow damos ajiomey
(Luk. 6:27-28,32-36)
43“Ow atakam aotawfes, ‘E cajowow damos ajiomey. E cajewew owam bifan afayomey.’ Inim aefesen. Caram inim atakam jen ajifokom. 44Ca nat, jakaperey. E cajewew ow damos ajiomey. Caram Allah, asan akat, e ca jurusumaman ow bom, janim manimtamey. 45Inimas aecokom, car e onam op caricipic atiperes aememcomokom. Aramat ipic e ajopok, e jursumec owpuam, e tarowat owpuam, awcawor atewnemtamama. Aram e te, e tarowat owpuam, e fasi owpuam awcawor atewnemtamama. 46Car damos e damos car ajiomaman ow cowok ajiomamokomnew, ucim asan akat emapmokomnew? E pemerintah uang batawanimapom owam inimas aemames. 47Caram selamat atakam e cajowow cowok aotawmokomnew, ucim akatnakutas aemamokomnew? E Allah amsom opok owam inimas aemames. 48Inimas ara, caram ow tarowat ememey— e onam op caricipic tarowat aememamar inim cimina.”
Селектирано:
MATIUS 5: LAICNS
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
LAI 1985