MATEO 14
14
Juan ona iñajeanobiajji poanaje dejja piqui jajasejjajeameeca'yapoa
(Mc 6.14-29; Lc 9.7-9)
1Ma shequiajajotiiya aje Herodesya provincia Galileacuiñajjicuanaja etii poaniya shajja-ajjacapoa queahuisocuana esohui queapame mimiani Jesosajo. 2Emeshimese Herodesya ma ojo chacochacoanicuana jama acapoa ba'a: —Jiquio dejja ma yahuajo Juan ona iñajeanobiajji poa dejjaya eshequi'yo nequi. Jamajjeya oya queaca'anee poani dejjaja ajjima'neinei eajji— ma posoya acapoa ohuaya.
3-4Yahuajopishana emeshimese Herodesya oja chahua Felipeja ehuanase Herodías bajjani huanaca'yapoa. O jama poaje shajja-ajjamajje Juanya Herodes huohuimajamajacapoa jama ba'a: —¡Miya queapame pojjeama mique chahuaja ehuanasejo ejjahuanaqui'yojji!— Jamajjeya emeshimese Herodesya Juan iñameecapoa ejeanobiameejji ohua esohui ojo jama amajamajacajo.
5Emeshimese Herodesya Juan quecuamee'yosa-acapoa. Jamatii ojaya Juan quecuamee'yojjima poa so'o ona yajjajo, queahuisocuaa oya Juan Eyacuiñajjija esohuihuohuijji poani bacanijojoya. 6Majoya aje quijje emeshimese Herodes o cuayajji epojja poe'yajo fiesta aca'yoquijotii Herodiasja ebacuase majamajanequiapoa emeshimese Herodesja iyaacuana cojjaneijo oja bajji. Emeshimese Herodesya queabihuineeya oya majamajanequiani bacapoa. 7Jamajjeya ohuaya epona ahuema' ani ma majamajanequinaje jama acapoa ba'a: —E'ejojonei eyaya miya huohuiaña cua miya saña eyaya miya quiaje.— 8Oja nae Herodiasya oja bacuase niñeshe-acuajicapoa ae ojaya sacajji. Jamajjeya oja bacuaseya emeshimese Herodes jama huohuiajjame acapoa ba'a: —Eya Juan ona iñajeanobiajji poanajeja esapa ejajasejjajea'yo quiacue platoaijo iya.—
9Epona ahuema' aniya esohui jama acajje emeshimese Herodes queacojjayenonee ponanapoa. Ohuaya e'ejojonei quiacaje cua epona ahuema' aniya sacaje esohui oja iyaacuaa shajja-ajjapea-aicapoa. Jamajjeya emeshimese Herodesja esohui pea ea'yojji pojjeama poa. Jamajjeya ohuaya soldadocuana huoojeacapoa epona ahuema' anija esohui jama eamee'yojjijo. 10Herodesya huoojeacapoa cuana ejjajeanobiaquijji equiyasijje majo ani Juan piqui jajasejjajea'yohua. 11Majoya quijjepishana Juanja sapa platoaijo iya dojocapoa cuaa epona ahuema' ani quiaa. Oja sapa jjeshemajje ebacuaseya oja nae quiacapoa.
12Majoya aje Juan shajja-ajjajji poanajecuana poeapoa. Juanja yami jjeshe'yomajje oya mojeaquiapoa. Majoya poquicapoa cuana Jesosa huohuiñaqui'yohua Juanjo.
Jesosaa queahuisonee 5.000 huisome dejjacuana bobiacapoa oepojjinei bobijo
(Mc 6.30-44; Lc 9.10-17; Jn 6.1-14)
13Majoya aje Jesosa esohui Juanjo oya chama'yo, piqui jajasejjameeca'yonaje, shajja-ajjamajje majo aniya oya oenei besapoquiapoa bishe'aijje se-ejjama'nei meshiyasijje. Ma meshijo ba'ecacuaa Jesosa cuamaya besapoquije shajja-ajjamajje queahuisonee poquicapoa ejeojjijje Jesosa baa. Ma poquicapoacuana ebionei aniñacooquiapoa Jesosa ba'eñaquijjimahuajo. 14Jesosaa bishe'aijo ani nequisohuaquimajje queahuisonee epoe ani bacañaquiapoa. Oya queayenonee jjashahuabaquiapoa ma ejjachichaqui anicacuanaja eba'ejji queacamajanee poani bamajje. Jamajjeya ma oja ye emano jaacuana Jesosaa queahuiso jja-ajameequica'yapoa. 15Majoya aje sineajo o shajja-ajjajji poanicuaa Jesosaque jjanequichipiquimajje jama acapoa ba'a: —Sinia' aje. Jiquio meshi se-ejjama'. Jamajjeya jiquio anicacuana jjeyanei huoojea'yocue peaja meshicuanahuasijje bobi jjesheya oja bejjojo.—
16Jesosa jama poa ba'a: —Chojja de, jiquio anicacuana jjeya epoquijji pojjeama cuama. Miquiaayatii oe bobiacue cuana.—
17O shajja-ajjajji poanicuaa saja-acapoa jama ba'a: —Chama'neinei esejaya bobi jiquiojo queahuisoneecuana bobiajji. Che caca oe cinco huisomenei pahui ani, dos nahuoosisi jaa, mahuisoneiya.—
18Jesosaa jama acapoa cuana ba'a: —Jiquiacua oe bobi jjequicue; eya oe quiacue.—
19Majoya Jesosaa ma queahuisoneenee ojo ejjachichaqui nequicacuana huohuicapoa ona siponebiajjetii eanioquejji. Jesosa cinco huisome pahui, beca nahuoosisi pea-ai jjeshemajje eyahuasijje jjabajeasohuaquiapoa Eyacuiñajjinijje emimijji. Eyacuiñajji bobijo bihuiamajje Jesosaa pahui mijicapoa o shajja-ajjajji poanicuanaja majo anicacuana quiapoquiajji. Nahuoo pea-ai quiacapoquiapoa cuaa ma eanioque anicaja eijjiajji. 20Majoya ojjaña ma eanioque anicacuaa bobi ijjiacapoa, jejjecapoa.#14.20 Nota: Jesosa shajja-ajjajjicuaa quiacapoquijejotii pahui, nahuoocuana pea-ai Eyacuiñajjiya jjahuisomeecuajiquicapoquiapoa ojjañacuanaja eijjiajji.* Majo ejjachichaqui anicacuaa ijjiajeyocajo Jesosa shajja-ajjajji poanicuaa onaja ijjiajeyojjima ani bobi chichaca'yapoa eshaja-aijo. Doce huisome eshaja-ai cuatajeameecapoa majo anicacuanaja ijjiajeyojjima ani pahuiya, nahuoohua pea-ai. 21Queahuisoneeneecuaa bobi ijjiacapoa ma pojjajotiiya. 5.000 huisome dejjacuaa ijjiacapoa. Eponacuana, esho'iquiana pea-ai ca sicojjima poa.
Jesosa bae enabiajjetii jeojeoapoa
(Mc 6.45-52; Jn 6.16-21)
22Majoya majo anicacuana bobiajeyomajje Jesosaa o shajja-ajjajji poanicuana huohuicapoa bishe'aiyasijje eanisohuaquijji oya oopana ebionei ebesapoqui'yojji bae ojjemijiyasijje. Jesosaa ca ma meshijo nequiya majo ejjachichaqui anicacuana esohui ona queapame poqui'yojji huohuicapoa so'o. 23Majoya ona queapame poqui'yojji esohui huohuijeyomajje Jesosa eyiyohuasijje jaasohuaquiapoa Eyacuiñajjinijje mimiya oenei. Sinepoquianijo Jesosa majotiiya oenei anichichapoa. 24O shajja-ajjajji poanicuana bishe'aijo ani queabaesahuahuesha ebesapoqui'yo poa. Majoya o shajja-ajjajji poanicuana besapoquianijotii beni queaquemonee ponequiapoa. Enashajo queaquemohua bishe'ai cuiajjochicabesapoquiapoa cuanaja. 25Majoya aje Jesosa quea-aapojotii jjapojjaquiyasijje poquiapoa o shajja-ajjajji poanicuana besapoquijeyasijje. Bae enabiajjetii oya jeojeonequiapoa. 26O enabiajjetii jeojeojebeje bamajje o shajja-ajjajji poanicuana queameteneenee ponanapoa. Jamajjeya metejo taaapoa cuana jama ba'a: —¡Coya ecuiquia emano'yoja shahua poeje enabiajje!— jama posoya acapoa.
27Jesosaa oya jama poani shajja-ajjamajje huohuicapoa cuana jama ba'a: —¡Queaca'a oe pocue! ¡A'a quiana oe queamete pojji! Eya ca iña quio Jesosaya.—
28Majoya Pedrohua jama huohuime acapoa Jesosa ba'a: —Emeshimesenei, miya e'ejojonei poeyanijo eya pea-ai poquimeecue enabiajjetii mi nequiyasijje.—
29Jesosaa oya saja-acapoa jama ba'a: —Ee, poeajja eque.— Majoya aje Pedro bishe'aijo ani bae enahuasijje nequioquequinanapoa. Oya bae enabiajjetii jeojeopoquiajjapoa Jesosa nequiyasijje. 30Beni queaquemohua enashajo jeasohuacaje bamajje Pedro queametenee ponanapoa, jaanobiquipoquije'yo jjabaquiapoa. Majoya oya hui'ije'yo jjabaquimajje Pedro taaapoa jama ba'a: —¡Emeshimesenei, eya hui'i'ya, nahuecue mo!—
31Oya jama taaame pojeahua Jesosaa me iñacapoa. Majoya onijje mimiapoa jama ba'a: —Miya oepojjinei jjashahuabaquiani ejo. ¿Yajjajje shai ejo mijjashahuabaqui'yanitii mi enabiajje ecue jeomeejjijo?—
32Majoya Jesosa Pedro pea-ai bishe'aiyasijje anisohuaqui'yajo beni queaquemonee enashajo queaquemonee pea-ai nequioquenanaquiapoa, jeca ponana'yapoa. 33Majoya Jesosa bishe'aiyasijje anisohuaqui'yajo o shajja-ajjajji poanicuana o cojjaneijo oja ecuioshajjajo nequicapoa o huohuijji. Jama huohuime acapoa cuaa ba'a: —Miya Jesosa e'ejojonei Eyacuiñajjija Bacuaejja poani.—
Jesosaa Genesaret meshijo emano jaacacuana jja-ajameequica'yapoa
(Mc 6.53-56)
34Majoya aje Jesosa o shajja-ajjajji poanicuananijje bae enajje besapoqui'yomajje Genesaret meshiyasijje ba'eñaquiapoa. 35Ma meshicuiñajjicuaa Jesosa e'ejojonei oja meshijo ani shajja-ajjamajje onijjejaajji dejjacuana huoojeacapoa huohuipohua ojjaña emano jaacacuana oja Jesosaque eyejji. 36Jama huohuiajjaneime Jesosa acapoa macuiñajjicuaa ba'a: —Jiquiojo emano jaacacuana mique daqui-aocuema che napameecue o jja-ajaqui'yojji.— Jamajjeya ojjaña ma o daqui-aocuema napajji poanaje huisotii emano jaacuana Jesosaa jja-ajaquimeeca'yapoa.
Селектирано:
MATEO 14: ESE
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Copyright Mision Nuevas Tribus, 2006