MATEO 12
12
Ejomishocajji epojjajotii anosoai oepojji sajacananapoa cuaa
(Mc 2.23-28; Lc 6.1-5)
1Majoya aje quijje ejomishocajji sábado epojjajotii Jesosa o shajja-ajjajji poanicuananijje anosoai ani queyiyesamaneijje poquiapoa. Majje poquijeya o shajja-ajjajji poanicuaa queashoe pomajje anosoai oepojji sajacananapoa majotii oja ijjiajji. 2Beca fariseo dejjacuaa o shajja-ajjajji poanicuaa anosoaiso' ijjiacani bamajje Jesosa huohuiajjacapoa jama ba'a: —¿Apiojji shai mi shajja-ajjajji poanicuaa anosoai sajacani? Miquiana ejomishocajji epojja shahuaba'yoajja.—
3Jesosaa fariseocuana saja-acapoa jama ba'a: —¿A'a miquianaja epajea'yo esohuicuana etehue jaa ma yahuajonei Davidya, onijje nequicapoa dejjacuaa pea-ai acapoa queashoenee pomajje? 4David nobiquiapoa Eyacuiñajjija daquiequi aniyasijje. Ma daquiequijo ani pahuicuana Eyacuiñajjiyasijje quia Davidya ijjiacapoa. Ma onijje nequica dejjacuana ohuaya quiapea-aicapoa. Eyacuiñajjija esohui Moisesja tehuecuana ca jama poani ba'a: “Eyacuiñajjija equi-aijo chacochacopoquiani dejjacuanajanei ma pahui ijjiacajji.” Jamaya Eyacuiñajjija esohui poani. Ma pahui ca Davidja, onijje nequicaja pea-ai ijjiaca-ajja poa. 5Oya jayojja miquianajaya eba Moisesja tehuecuana Eyacuiñajjija esohui. Eyacuiñajjija equi-aijo echacochacopoquijji poanicuana ejomishocajji sábado epojjajotii chacochacopoquiani Eyacuiñajji anijji equi-aijo ani jamatii oya queamimishi pojjeama poani. 6Bacue, jjeya quiana eyaya pea esohui huohuije queapamenee jiquio ecua esohui Eyacuiñajjija equi-aijo nequiya achajja chacome acajji huohuicani cuaa jama pojjeama. 7Jiquio esohui eyacua queapamenee jama poani ba'a: “Miquianaja quia ehuone enaa jehui'yo mahuisoneitii pojjeama eya basapoani.” Eyaya bapea-aisa-aña miquiaaya ojjañacuana queapame apoquiaña joya queamimishi poanaje pea-ai. Jiquio esohui queapamenee miquianajaya queaja'a poanijojjemo jiquio e shajja-ajjajji poanicuaa anosoai sajacajo miquianajaya oya niñebajjima pome. 8Ejomishocajji sábado epojjajo ae pocajji, ae poca-ajja eyaya Dejjapojji epohua huohuipoquiajetii— jamaya poa Jesosa.
Jesosaa dejja meshahuama'yo meshahuajji pomeeca'yapoa ejomishocajji epojjajotii
(Mc 3.1-6; Lc 6.6-11)
9Majo ani Jesosa nobiquiapoa majo ba'eca judiocuanaja equi-ai ejjachichaquijji aniyasijje. 10Ma equi-ai ejjachichaquijjijoya aje oe dejja meshahuama'yo poani aniapoa. Majoya a'a oya Jesosa shajjama' jayojja poaje ebajji, etii poanicuanaja enapameejji pea-ai huohuiajjacapoa majo nequicacuaa jama ba'a: —¿A'a acuae dejja queamano jaa jjeya jiquio ejomishocajji sábado epojjajotii jja-ajameequica'yojji? ¿Yajja Moisesja tehuecuana poani emanocuana jja-ajameequi'yojjijo quio epojja sabadojo?—
11Jesosaa saja-acapoa cuana jama ba'a: —Miquianaja oe jiquio anija oveja oquequiajo jjani queadoeyasijje ejomishocajji sábado epojjajotii, ¿yajja quiaa aje'yo? ¿A'a miquiana poquije o jjequisohua'yohua jamatii ejomishocajji epojja poanijotii? E'e, poquije quiana. 12Esenijje dejjacuana caca oe queanahuenee poani, ovejacuana ca nahueamapishana. Jamajjeya oe peacuana queapame acapoquijji ejomishocajji epojjajo pea-aitiiya.—
13Majoya Jesosaa dejja meshahuama'yo poani jama acapoa ba'a: —¡Miquea eme jeaapihuihuicue!— Ohua oja eme jeaapihuihuicajeahuajotii oya meshahuajji ponana'yapoa. Ma ecua pea mejje queapamenee nequi jama pea-aiya Jesosaa pomeeca'yapoa pea emejje meshahua'yojji. 14Majo aniya fariseo dejjacuana oopana cuayaqui'yomajje jjaquecuapanacooquiapoa Jesosajo o manomee'yojjijo.
Jesosa Eyacuiñajjija babaca e'ejojonei
15Majoya aje Jesosa fariseo dejjacuaa oya quehuajje quecuapanacani shajja-ajjamajje pea meshiyasijje poquiapoa. Queahuisocuaa oya equijje acapoquiapoa ma meshiyasijje. Ojjaña majo emano jaacacuana Jesosaa jja-ajameequica'yapoa. 16Jesosaa huohuineicapoa oja jja-ajameequi'yocuana oya Jesosaja jja-ajameequi'yo ja'anei huohuipojjima'tii epojji. 17Jamaya Jesosaa huohuineicapoa cuana ma ecua yahuajonei Eyacuiñajjija esohuihuohuijji poa Isaías dejjaa tehuecapoa esohui jamaya. Jama tehuemeya ohuaya acapoa ba'a:
18“Eyacuiñajji jama poani:
Jiquio yani ejo chacochacopoquiani dejja ecue babaca e'ejojonei.
Ecuea oya queajeaneenee poani.
Eya ojo queabihuinee poani pea-ai.
Eyaya ecue Dojjoshahuapame huoojeanobiaje oque.
Jamajjeya ohuaya ecuea ejjashahuabaquijjicuana queaja'anee huohuicaje ojjañajaajjicuanahuasijje.
19Ohuaya jjamimicuiajeanobiaquijjimaneiya sohuihuohuicaje cuana.
Oya taaajjima poaje pea-ai ona ejjachichaqui ani queaquene pomeejji.
Ejeojjijje poquianicuaa oya shajja-ajjajjima acaje oya queamimisajea epojji pojjeamajojoya.
20Joya queayenonee poanicuana ojaya etecueajji pojjeama poaje.
Pea joya ca'a-ama poanicuana ojaya ejaabichameequi'yojji pojjeama poaje pea-ai.
Ohuaya Eyacuiñajjiija esohui queaja'a bameesahuacapoquijetii cuana ojo jjashajja-ajjaqui'yajo.
21Ojjaña meshiyasijje majo ba'ecacuana queahuiso e'ejojonei jjashahuabaquicaje'yo ojo,
quijje ohuaya comacuanaya nahuecaje'yo”
jamaya tehuecapoa Isaiasya yahuajonei.
Beelzebuhua Jesosa queaca'a pomeecani niñebame acapoa cuaa
(Mc 3.20-30; Lc 11.14-23; 12.10)
22Majoya aje quijje dejja cojjama'yo, mimi'yoajja pea-ai eshahuamase yamijji yecapoa cuaa Jesosaque. Ma pojjajotiiya Jesosaa oya jjacojjaja'ameequica'yapoa, mimimeepea-aica'yapoa. 23Majo anicacuana Jesosaa dejja mimimeeca'yonaje bamajje jjabaneineiquicapoa ojo. Jama mimime poa cuana oopana ba'a: —¿A'a shai joya Davidja osecua Eyacuiñajjija huoojea jiquio eseya ishoa-ajjañaya?—
24Fariseo dejjacuaa majo anica jama mimime poani Jesosajo shajja-ajjamajje jama acapoa cuana ba'a: —Beelzebuhua, e-eshahuamasecuanamese poaniya, Jesosa queaca'a pomeecani eshahuamasecuana cuayameequi'yojji dejjacuanaja yamijo nequi.—#12.24 Nota: Judiocuaa ebionei eshahua Satanás bajjani pea bajjani acapoa, Beelzebú bajjani.*
25Jesosaja ca ebatii poa o niñebajjicuanaja ejjashahuabaquijji ojo. Jamajjeya Jesosa jama poa ba'a: —Chojja de, majo pojjeama eyaya eshahuamasecuana huoojeacuayajea'yaña. Bacue, oecuiñajjicuana onijjejaajjineinijje jjaquecuaquimajje jjachamaquipoquije'yo cuana. Enequitiijji pojjeama oya pea jjashahuabaquime poanijjejojo. Oya jayojja pea-aiya dejja oja huapa pojjeamacuananijje jjaquecuaquimajje jjachamaquipoquije'yo. 26Ebionei eshahua Satanás bajjani ojayanei eshahuamasecuana huoojeacuaya'yojji poanijjemo, oya Satanás queaca'a ojjañacuana huoojeapoquiajji pojjeama pome. Oya jamajjemo queaca'atii pojjeama pome. 27E'ejojonei miquianaya ejo jjaniñebaquiani jama ba'a: “Beelzebuhua oya Jesosa queaca'anee pomeecani eshahuamasecuana huoojeacuaya'yojji epojji” jamaya quiana poani ejo queaquehuaneenee. Miquiaaya eya jama aña Beelzebuya eya queaca'a pomeecani. Jamajjeya, ¿aya shai mi shajja-ajjajji poanicuana queaca'a pomeecani eshahuamasecuana cuayameequi'yojji epojji? Mi shajja-ajjajji poanicuanaja eba miquianaya caca oe queaquehuatii jjashahuabaquiani ejo. 28Eyacuiñajjija Edojjoshahuapameya caca oe eya queaca'a pomeecani eshahuamasecuana huoojeacuayajea'yojji epojji, Beelzebuhua pojjeama. Ohuaya eya queaca'a pomeecani bamajje miquiaa queaja'a bapea-aije Eyacuiñajji ojjañacuana huoojeapoquiatiisapoani jjeya.
29—Bacue, ¿yajja pomajje dejja queaca'a poanija equiyasijje nobiquicajji oja aquiana siiya? Ebionei dejja queaca'a poani jeyocajji. Majoya oja aquianacuana siicajji. Jamatii jeyojjima nequiya ohuaya oja aquiana siimeejjima acaje.
30—E'ejojonei eyaya quiana huohuiaña. Ojjaña joya ecuea ejjashahuabaquijji asapo-ajjanei poanicuaa ecuea echacojji pea-ai ameejjima acani. Joya peacuana eque poemeesapo-ajja poanicuaa comaaya peacuana quea-ehueshatii nequimeecani pea-ai.
31—Jamajjeya eyaya quiana huohuiaña ojjaña pea pea mimishicuana, esohui queatai dejjacuaa acani pea-ai Eyacuiñajjija cuijeaca'yojji. Joya queatainee mimiani Eyacuiñajjija Edojjoshahuapamejo caca oe comaja mimishi ecuijea'yojjitii pojjeama poaje. 32Dejjacuaa eya Dejjapojji epo niñebacajo Eyacuiñajjija coma mimishi cuijeaca'yojji. Eyacuiñajjija Edojjoshahuapame niñebacajo caca oe coma mimishi ecuijea'yojjitii pojjeama poaje'yo jjeya, quijjenei pea-ai.—
Acuicuana bacajji oja ejjajjajo
(Lc 6.43-45)
33Jesosaa huohuitiicapoa cuana jama ba'a: —Acui queapame nequianija oja jjajja queapame queabiquia pea-ai poani o jayojjaya. Ojjaña acuicuana joya peajja nequianija ojaya ejjajja pea-ai peajja poani, ijjiaca-ajja. Ojjaña acuicuana bacajji oja ejjajjajo. 34¡Miquianaya peyo quease'nee poani jayojja! ¿Achajjajo quiaa queaja'a huohuije cuana queamimishitii poaniya? Achajjapishana. Miquianajaya ejjashahuabaquijjinei queaquehua queahuisonee nequiani esapadojjojo, jamajjeya esohui queaquehua jeacuayapoquiañatii quiaa enabajje. 35Dejjacuaa joya queapame ba'yaniya esohui queapame acapoquiani oja ejjashahuabaquijji queaja'a poaniyajjejojoya. Dejjacuana joya queamimishi poani ca esohui queatai mimipoquiani oja ejjashahuabaquijji queaquehua poanijjejojoya. 36E'ejojonei eyaya quiana huohuiaña. Quijje epojja ojjaña meshijo ba'ecacuanaja oja mimishi ja'anei Eyacuiñajjiya huohuicaje'yo o queaneenee pomee'yojji poeajo miquiaaya shajja-ajjaje'yo achehuiso esohui queatai mimica-ajja quiaa apoquianaje eshe nequiya quijje queaneenee epo'yojji. 37Jamajjeya quiana Eyacuiñajjiya bacaje ehuohui'yojji ma miquiaaya eshe nequiya apoquianaje miquianaja enabaa a'a queapame, a'a queamimishi quiana ba'epoquinaje.—
Fariseocuaa Jesosa dejjaja ajjima'neinei ameesa-acapoa
(Mc 8.12; Lc 11.29-32)
38Majoya aje fariseo dejjacuaa, Moisesja tehuehuohuijji poanicuaa pea-aiya Jesosa huohuicapoa jama ba'a: —Esohuihuohuijji, ecuaaya miya pea dejjaja ajjima'neinei aje basa-ao'oyaña.—
39Jesosaa saja-acacuanapoa jama ba'a: —Miquianaya caca oe jjeya jiquio meshijo ba'e queamimishica'anee poani. Eya quiaa huohuiajjamajamajaña ecuea dejjaja ajjima'neinei ecuea eajji miquianajaya a'a eya e'ejojonei Eyacuiñajjija huoojea poani ebajji. Chojja, Eyacuiñajjiya eya jama ameejjima acaje. Oenei caca oe eyaya aje. Ma ecua yahuajonei esohuihuohuijji Jonás acapoa jama pea-aiya eya poaje. 40Yahuajonei Jonás jai-aija see-aijo ba'yapoa tres cahuime huiso majotiiya. Oya jayojja pea-ai eya Dejjapojji epo jaaje tres cahuime huiso meshidojjojo. 41Quijje epojja ojjaña meshijo ba'ecacuanaja oja mimishi ja'anei Eyacuiñajjija ehuohui'yojji poeajo Ninivecuiñajjicuaa ma yahuajonei Jonasja esohui shajja-ajjacapoa cuaa shequi'yomajje jiquio jjeya eshe queamimishitii ba'ecapoquianicuana huohuicaje'yo ja'anei oja mimishi. Macuiñajjicuana yahuajonei eshe nequiahua Jonasya sohuihuohuicajje pea jjashahuabaquime poca'yapoa oja mimishijo. Bacue, jiquio jjeya eya huohuiaña esohui queaja'anee ma ecua yahuajonei Jonasya huohuicapoa jama pojjeama, queaja'apishana. Jamatii quiana ecuea esohui shajja-ajjasapo-ajjanei poani. Jamajojoya aje quiana macuaaya miquianaja mimishi ja'anei huohuicaje'yo 42Quijje epojja ojjaña meshijo ba'ecacuanaja oja mimishicuana ja'anei Eyacuiñajjija ehuohui'yojji poeje. Ma pojjajo emeshimese eponaa ma yahuajonei ba'yapoa shequi'yomajjeya, jiquio jjeya eshe queamimishitii ba'ecapoquianicuana huohuicaje'yo ja'anei oja mimishi. Ma epona yahuajonei eshe aniahua queahueshaneenee eeno poeanimijijje poeapoa emeshimese Salomonya esohui queaja'anee huohuicaje shajja-ajjaa. Jiquio jjeya eya huohuiaña esohui ca queaja'anee poani ma ecua yahuajonei Salomonya emeshimese epona huohuicapoa esohui jama pojjeama, queaja'apishana.—
Eshahuamase dejjaja yamijo ecuayaqui'yo nequi huacuaya poeo'oyapoa nobiqui'yohua
(Lc 11.24-26)
43Jesosaa huohuitiicapoa cuana jama ba'a: —Oe eshahuamase dejjaja yamijo nequi ehuoojeacuaya'yo poquiani meshi queajabohuasijje majotii ani'yohua nisho. Majoya o ani'yojji epojji meshi chama' bamajje oya jjashahuabaquiani jama ba'a: 44“Eya huacuaya poquije'yo dejjaja eyamiyasijje, ma e anicoojji poanajeyasijje.” Ma o anicoojji poanaje dejja ojaya equi jayojja bacani. Jamajjeya oya huacuaya epoqui'yojji o anicoojji poanaje dejja shahuaba'yomajje poquije'yo. Jiquio ecua equi ecuiashaba'yo queaboejea ani jayojja eshahuamaseya dejjaja yami se-ejjama'yo ani bacañaje'yo. 45Jamajjeya ma eshahuamaseya pea onijje eshahuamasecuana, siete huisome queamasenee, ma dejjaja yamiyasijje ojee onijje enobipea-aiquijji dojocaje. Majoya dejjaja eyamiyasijje nobiqui'yomajje queacamajanee, queanee pea-ai dejja acaje eshahuamasecuaa, ma ecua ebionei oya oenei eshahuamase yamijji poanaje jama pojjeama oya acaje. Oya jayojja jiquio jjeya queamimishitii ba'ecapoquiani cuana queanee, queacamaja pea-ai ba'epoquije.—
Jesosaja enaese, oja chahuacuana pea-ai poeapoa Jesosa baa
(Mc 3.31-35; Lc 8.19-21)
46Majotii Jesosaa ona sohuihuohuicaquijotii oja nae, oja chahuacuana pea-ai poeapoa o baa. Oya esecuejotii nequiñapoa Jesosanijje emimijji. 47Majoya aje oe dejjaa Jesosa huohuicapoa oja naejo. Jama acapoa ba'a: —Mique nae, mique chahuacuana pea-ai poeyanaje, esecuejo nequi, mi basapoani.—
48Jesosaa ca dejja ma o huohuijji poanaje jama acapoa ba'a: —Eyaya huohuije ache ecue nae poani, ache ecue chahuacuana poani pea-ai.—
49Majoya Jesosaa me huohuicapoa o shajja-ajjajji poanicuana. Jama acapoa o shajja-ajjajji poanijo ba'a: —Jiquio anicacuana caca oe ecue nae jayojja, ecue chahuacuana jayojja poani pea-ai. 50Ojjaña joya ecue Chiija Eyajo nequija esohuijo jjashajja-ajjaquijji poanicuana comaya caca oe ecue nae jayojja, ecue chahuacuana jayojja, ecue jjo'icuana jayojja pea-ai poani— jamaya poa Jesosa.
Селектирано:
MATEO 12: ESE
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Copyright Mision Nuevas Tribus, 2006