Luka 16
16
Umweneleli unniongafu
1Popapo alinkubabula bope abafundigwa bake alinkuti: Aliko umundu yumo unkabi, uyu ali numweneleli; yo balimohile kumyake ukuti ikubululusya ikyuma kyake.
2Popapo alinkumbilikila, alinkuyoba nagwe alinkuti: Kali sya fiki isi nikusipilika? Mbalilaga ifya pabweneleli bwako;
3namanga ukabagila ukuya mweneleli gwangu kangi. Umwene umweneleli alinkwinogona munda alinkuti: Mbombe fiki, buno umalafyale gwangu ikupoka ubweneleli bwangu? Uku-
4lima ko ndi monywa, ukusuma ko ndi nisoni. Nsyagile isi nikubombaga, ko kuti bo ngagigwe pabweneleli bwangu, bise
5banyambililege munyumba syabo. Popapo alinkubabilikila yumoyumo aba nongwa ba malafyale gwake, alinkundalusya ugwa kwanda alinkuti: Ugwe kumeleligwa filinga numalafyale
6gwangu? Umwene alinkuti: Ifipake fya nyemba imia jimo (100). Umwene alinkumbula alinkuti: Ega kalata gwako,
7tugala mbibimbibi, usimbege amalongo mahano (50). Kangi alinkundalusya uyungi alinkuti: Nanungwe kumeleligwa fiki? Umwene alinkuti: Ifisukilo imia yimo (100) ifya ngano. Alinkumbula alinkuti: Ega kalata gwako, usimbege amalongo
8lwele (80). Popapo umalafyale alinkuntufya umweneleli unniongafu yula, ukuti abombile isya mahala; namanga abanya kisu kikiki, mungulilo yabo babo, bali namahala
9ukubakinda abanya lumuli. Nikubabula une nikuti: Amwikabilege abamanyani nikyuma kya buniongafu, ukuti linga siku bo kimalike, bisebabambililege muhema sya bwila bwila.
Injila inunu mbubombelo nikyuma
10Uyu linga mwikili pafinandi, yo ikuyaga mwikili na pafingi. Uyu linga nniongafu pafinandi, yo ikuyaga nniongafu na
11pafingi. Lelo linga mukali bikili pakyuma ikya buniongafu,
12po ywani atʼabapege ikyuma ikya naloli? Lelo linga mukali bikili pakyuma ikya bangi, po ywani atʼabapege ikyuma iki kyo
13kyinu? Nayumo umbombi uyu abagile ukubabombela abanyafyale babili; buno isakumbengaga yumo, nukungana uyungi; pamo isakumumililaga yumo, nukunsyokela uyungi. Mukabagila ukumbombela Kyala pamopene nukukibombela ikyuma.
AbaFarisai bikukemeligwa
14Syo balinkupilika syosa sisisi nabaFarisai abaganandalama,
15balinkumwilamwa. Popapo alinkubabula alinkuti: Yo umwe mukwipa ubugolofu yuyumwe nkyeni mbandu, loli Kyala asimenye indumbula syinu. Buno aka linga kimikigwe
16nabandu, kumaso ga Kyala kinyanyasi itolo. Ululagilo nabakunguluka fyalipo ukufika pa pa Yohani. Ukufuma papo, inongwa inunu isya butwa bwa Kyala sikulumbililigwa,
17kangi umundu gwesa ikwiyingisya kumaka. Kupepepo ukuyonga nikya kumwanya nikya pasi ikisu, ukukinda akanyu-
18suli kamo aka lulagilo ukuti komokege. Gwesa uyu linga ikundeka unkasi, ikwega uyungi, bo ikulogwa; na uyu linga ikumwega unkikulu uyu alekigwe nundume, bo ikulogwa.
Unkabi na Lazaro undondo
19Aliko umundu yumo unkabi, uyu afwalaga imyenda imifubifu-ubutitu, nimyenda imyelu, alinkwangala mbununu bwila.
20Loli alipo undondo yumo uyu ali yo Lazaro ingamu, yo alambalalaga pakifigo kya nyumba ya nkabi, ali nifilonda fi
21fingi. Alinkunyonywa ukwikuta utubululukisya, utu twasatukaga pakitalati kya nkabi; syope nimbwa silinkwisa kuku-
22myanda ifilonda fyake. Popapo lelo undondo alinkufwa, abandumi balinkumpimba, balinkwakumbika ndupagato lwa
23Abrahamu; yope unkabi alinkufwa, alinkusyiligwa. Lelo bo ali mbusyuka ikutamigwa, popapo alinkwinula amaso, alinkumbona Abrahamu kubutali na Lazaro ndupagato lwake.
24Alinkukolela alinkuti: Gwe tata Abrahamu, ulimbakisyaga, untumege Lazaro ayubikege ulobe lwake kusulo mmisi, ukuti alutalalisyege ululimi lwangu, buno ngutamigwa ndulapi
25ulu. Umwene Abrahamu alinkumbula alinkuti: Gwe mwanangu, kumbukaga ukuti gwalyambilile ngani ifinunu fyako mbumi bwako, yope Lazaro bububo alyambilile ilibibi; lilino lelo umwene ikusubisigwa apa, ugwe loli kukubilwa.
26Pamwanya pali isi, pakati pamyitu nanumwe lulipo ulupanga ulutali; ukuti aba bikulonda ukutumusania ukufuma kuno ukwisa kumyinu batoligwege; kangi nukuti aba uko, bangalo-
27bokaga ukwisa kumyitu. Popapo umwene alinkuti: Lelo nikupyelesya kuli gwe tata, ukuti uniumege kunyumba ya tata,
28namanga ndi nabo abamyitu bahano; akabasisimikisyege,
29ukuti bope bangisaga mbuyo ubu ubwa lukubilo. Popapo Abrahamu alinkumbula alinkuti: Abene bali nabo Mose
30nabakunguluka, bo babapilikege babo. Umwene alinkuti: Himma gwe tata Abrahamu, loli linga yumo ikufuma mbafwe
31ikubuka kumyabo, po bisakupindukaga. Umwene alinkumbula alinkuti: Linga batikubapilika ba-Mose nabakunguluka, pope sitisakubakolaga napa linga yumo asyukile mbafwe.
Селектирано:
Luka 16: NYY
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Nyakyusa Ngonde New Testament (Ulwitikano Ulupya) © United Bible Societies, 1966.