GÉNESIS 6
6
Runacunaca, jatun nalitami rurashca
1Runacunaca, tucui cai pachapi ninandapacha mirai callarishpami, ushicunatapash charirca. Chai punllacunapimi, cashna tucurca: 2Chai runacunapaj ushicunataca, juyaillagucuna cajta Taita Diospaj churicuna ricushpami, tucui chai huarmi puramanda agllashpa, paicunapaj huarmi cachun japinajurca. 3Chaimandami Mandaj Diosca, cashna nirca: “Ñuca Espirituca, na causaita causaicaman runacunahuan macanajunshna catingachu. Paicunaca huañuna aichapachamari. Ashtahuangarin paicunaca, patsaj ishcai chunga huatacamanllami causanga” nircami.
4Chai punllacunapica, manllanayai jatun runacunami cai pachapica tiarca. Shinallata Taita Diospaj churicuna, runacunapaj ushicunapi chayashca jipapashmi, churicunata charirca. Paicunami, punda huatacunamandapacha tucuicuna rijsishca, ninan shinlli runacuna carca.
5Cai pachapi causaj runacunataca, ashtaca jatun nalicunata ruranajujtami, Mandaj Diosca ricurca. Paicuna tucui imatalla rurangapaj paicunapaj shungupi yarinajushpapash, nalitalla ruranatami yarinajurca. 6Mandaj Diosca, cai pachapi runata rurashcamandaca, ninandapacha llaquirishpami, paipaj shungupipash nanachinshna llaquirirca. 7Shinamandami Mandaj Diosca, cashna nirca: “Cai pachapi ñuca rurashca runacunataca, runamanda callarishpa animalcunacaman, llucashpa purij animalcunacaman, jahuata rij alasyu animalcunacamanmi tucuchisha. Caicunata rurashcamandaca, ninandapachami llaquirini” nircami.
8Ashtahuangarin Noé runaca, Mandaj Diospaj ñaupajpica, alimi ricurirca.
Noé shuti runaca, yacupi huambuchunmi jatun huasita rurashca
9Noé shuti runapaj miraicunaca, caicunami: Noé runaca, paihuan mirai purapica, imatapash cashcatapacha ruraj, ima pandatapash na ruraj runami carca. Noé runaca, Taita Dioshuanga aligutami purijurca. 10Noé runaca, quimsa churicunatami charirca: Paicunaca Sem, Cam, Jafet shuticunami carca.
11Cai pachapi causajcunaca, Taita Diospaj ñaupajpica ninandapachami huaglinajurca. Shinamandami cai pachapica, ninandapacha llaquichinahuanlla junda causanajurca. 12Taita Diosca, cai pachapica huaglicunapacha cajtami ricurca. Causaita tucui charijcunami, cai pachapica huaglicuna causanajurca. 13Chaimandami Taita Diosca, Noetaca cashna nirca: “Cai pachapica, paicunamandami ninan llaquichinahuanlla junda. Chaimandami, causaita tucui charijcunata tucuchingapaj yarishcani. Ricui, paicunataca cai alpandimi tucuchisha. 14Canga, gofer nishca caspicunahuan, huambuna jatun huasita rurai. Chaitaca, shican shican ucucunahuan rurashpa ucumambash, canllamanbash brea nishcahuan quilpangui. 15Chaitaca cashna rurangui: Patsaj quimsa chunga picha metro largota, ishcai chunga ishcai metro chaupi anchota rurangui. Shinallata chunga quimsa metro chaupi jatunda rurangui. 16Huambuna chai huasipica, jahua manñamanda chaupi metrota medishpa, shuj ventanata rurangui. Chai ladopillata, pungutapash rurangui. Chai huasitaca, quimsa altibajohuan rurangui. 17Ricui, ñucami ninambacha tamiata, cai pachaman cachamugrini. Causaita cuj espirituta charij, cai pachapi tucui causajcunata tucuchingapajmi, chashna cachamugrini. Cai pachapi ima tiashcapash, tucuillami huañunga. 18Ashtahuangarin ñuca ari nishpa canhuan pactachingapajmi callarichigrini. Chaimandami cambash, cambaj churicunapash, cambaj huarmipash, cambaj churicunapaj huarmicunapash, huambuna jatun huasiman canhuan yaicunga. 19Cai pachapi causaita tucui charijcunataca, tucui causajcunata, ima animalcuna cajpipash, pai puralla shuj jari, shuj huarmi huambuna jatun huasi ucuman churangui. Paicunapash canshnallata causachun, chashna churangui. 20Alasyu animalcunamandaca, ima animalcuna cashpapash pai puralla, shuj animalcunamandaca, ima animalcuna cashpapash pai puralla, alpata llucashpa purij animalcunamandaca, ima animalcuna cashpapash, pai purallami yaicunajunga. Ima animalcuna cashpapash pai purallami, ishcai ishcai canhuan yaicunajunga. Paicunapash causangapajmi, chashna yaicunajunga. 21Shinallata tucui ima micunacunatapash tandachishpa alichingui. Chai micunami cambash, animalcunapash micushpa shinlli tucungapaj canga” nijurcami.
22Shina nijpimi Noé runaca, Taita Dios imashna mandashcashnallata tucuita rurarca.
Селектирано:
GÉNESIS 6: QUII
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Quichua Imbabura Bible © United Bible Societies, 1994.