GÉNESIS 4
4
Cainmandapash, Abelmandapashmi villajun
1Adán paipaj huarmi Evapi chayajpi vijsayu tucushpami, Caín shuti churita ungurca. Chai huarmica: “Mandaj Dios carajpimi, jari huahuata tarircani” nijurcami. 2Chaipaj jipaca, Cainbaj huauqui Abeltami ungurca. Abel runaca, llamacunatami michishpa causarca. Caín runaca, alpapimi imatapash rurashpa causarca.
3Huatacuna yalishca jipami, cashna tucurca: Caín runaca, pambapi fucushca granocunatami, Mandaj Diosman carangapaj apamurca. 4Abel runaca, punda huachashca llamatami, tucuilla llamacunamanda ashtahuan vira llamata apamurca. Mandaj Diosca Abeltapash, pai carashcatapashmi alicachishpa ricujurca. 5Ashtahuangarin Caín runatapash, pai carashcatapash, napacha alicachishpa ricurcachu. Chaimandami Caín runaca, ninanda fiñarishpa paipaj ñavipash shujpacha tucurca. 6Chaimandami Mandaj Diosca, Caín runataca cashna nirca:
—¿Imashpata ninanda fiñarishpa, cambaj ñavipash shujpacha tucungui? 7Alita rurashpaca, ¿nacha jatunyachi tucunguiman? Nalita rurajpimi, juchaca pungupi chapanshna, canda mandangapaj shuyajun. Chai juchataca, canmi mishana cangui— nircami.
8Chaipaj jipami Caín runaca, paipaj huauqui Abel runataca: “Jacu, pambapi purishun” nishpa pusharca. Pambapi paicuna purinajushpami, cashna tucurca: Caín runaca, paipaj huauqui Abel runata fiñashpa jatarishpami huañuchirca. 9Shinamandami Mandaj Diosca, Caín runataca:
—Cambaj huauqui Abel runaca, ¿maipita?— nishpa tapurca.
Shina tapujpimi, Caín runaca:
—Na yachanichu. ¿Ñucachu ñuca huauquita cuidana cani?— nishpa tigrachirca.
10Shina nijpimi Diosca, cashna nirca:
—¿Imatata rurashcangui? Cambaj huauquipaj yahuarmi, alpamandapacha ñucata caparijun. 11Cunanga, canga ninanda nalicachi tucushpami, cai alpamanda llujchi tucungui. Cai alpami shimita pascanshna, cambaj huauquipaj yahuarta cambaj maquimanda chasquirca. 12Alpapi can tarpujpipash, na fucungachu. Caru llactamanda runashnami, cai pachapica caita chaita purijungui— nircami.
13Shina nijpimi Caín runaca, Mandaj Diostaca cashna nirca:
—Ñuca llaquita apangapaca, yapa jatun llaquimari. 14Ricui cunanmi, cai alpamanda calpachihuangui. Shinamandami, cambaj ñaupajmanda pacajugrisha. Caru llactamanda runashnami, cai pachapica caita chaita purijusha. Chaipimi cashna tucunga: Pipash ñucata tuparishpaca huañuchihuangami— nijurcami.
15Shina nijpimi Mandaj Diosca, cashna nishpa tigrachirca:
—Caín runata maijambash huañuchishpaca, canchiscaman llaquichi tucungapachami— nircami.
Shinamandami Mandaj Diosca, maijambash tuparishpa ama huañuchijuchun, Caín runapica shuj ricuchinata churarca. 16Caín runaca, Mandaj Diospaj ñaupajmanda llujshishpami, Edén huertamanda indi llujshimuj ladoman tiaj Nod shuti llactapi causagrirca.
17Caín runa, paipaj huarmipi chayajpi vijsayu tucushpami, Enoc shuti churita ungurca. Caín runaca, shuj pueblota shayachishpami, chai pueblotaca, paipaj churipaj shuti Enoc shutita shutichirca. 18Enoc shuti runapaj churica, Irad shutimi carca. Irad shuti runaca, Mehujael shuti churitami charirca. Mehujael shuti runaca, Metusael shuti churitami charirca. Metusael shuti runaca, Lamec shuti churitami charirca. 19Lamec shuti runaca, paipaj huarmi cachunmi ishcai huarmita japirca. Shujca Ada shutimi carca, caishujca Zila shutimi carca. 20Ada shuti huarmica, Jabal shuti churitami ungurca. Jabal shuti runaca, animalcunata viñachishpa, carpacunapi causajcunapaj taitami carca. 21Jabal shuti runapaj huauquica, Jubal shutimi carca. Jubal shuti runaca, arpata, gaitata tocanata yachajcunapaca, tucuicunapajmi taita carca. 22Zila shuti huarmica, Tubal-caín shuti churitami ungurca. Chai runami bronceta, jirruta tucui imamambash tigrachishpa, imatapash ruranata ali yachan carca. Tubal-caín runapaj panica, Naama shutimi carca.
23Lamec shuti runaca, paipaj huarmicunataca cashnami nirca:
“Adapash, Zilapash, ñuca rimashcata uyaichi.
Lamecpaj huarmicuna, ñuca nishcata uyaichi:
Shuj runa ñucata chugrichijpica, huañuchishallami.
Shinallata chairalla viñai shuj huambra ñucata huactajpipash, huañuchishallami.
24Caín runata llaquichishcamanda, canchiscaman llaquichi tucuna cajpica, Lamec shuti runata llaquichishcamandaca, canchis chunga canchiscamanmi llaquichi tucungapacha” nircami.
25Adán, paipaj huarmipi cutin chayajpimi, shuj jari huahuata ungurca. (Chai huarmica): “Abelta Caín huañuchishcapaj randimi, Taita Diosca shuj churiguta carahuan” nishpami, Set shutita shutichirca.
26Shinallata Set runapashmi, shuj churiguta charirca. Paitaca, Enós shutitami shutichirca. Chai punllacunamandapachami runacunaca, Mandaj Diosta mañai callarinajurca.
Селектирано:
GÉNESIS 4: QUII
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Quichua Imbabura Bible © United Bible Societies, 1994.