Gẹnẹsisi 3
3
1ODAN sọ yín zìnzìntọ hú kanlin ogbémẹtọn lẹpo he OKLUNỌ Jiwheyẹwhe dá. E sọ dọ hlan yọnnu lo, dọmọ, Oje, Jiwheyẹwhe ko dọmọ Mì ma na dù to atin lẹ mẹ he tin to ojipa mẹ lẹ depope?
2Yọnnu lọ sọ dọ hlan odànlọ, dọmọ, Mí sọgan dù to sinsẹ́n atin he to jipa mẹ tọn lẹ mẹ. 3Ṣigba sọn sinsẹ́n atin he tin to ojipa ṣẹnṣẹn tọn mẹ, Jiwheyẹwhe ko dọmọ, Mì ma na dù sọn e mẹ, mọ mì ma na doalọ e go, mì nikã kú.
4Odàn lọ sọ dọ hlan yọnnu lọ, dọmọ, Mí ma na kú dándán gba: 5na Jiwheyẹwhe yọ́nẹn dọ azán he gbè mìwlẹ dù to e mẹ te, whenẹnu wẹ yè na hùn nukun mìtọn, bọ mìwlẹ na tin di Jiwheyẹwhe, bo nọ yón onú dagbe po oylan po.
6Whenuena yọnnu lọ mọ dọ atin lọ yón na núdùdù, podọ é sọ yọ̀nwhanpe to nukunta, podọ atin he yè na jlo nado hẹn mẹde yọ̀nnuin, é yí sọn sinsẹ́n etọn mẹ, bo dù, bo sọ na asú etọn po e po, ewọ sọ dù.
7Nukun yé omẹ awe lẹ tọn hùn, yé sọ yọ́nẹn dọ omé wẹ yé ko te; yé sọ tò amà ovotin tọn dopọ bo basi vantẹ na yéde. 8Yé sọ sè ogbè OKLUNỌ Jiwheyẹwhe tọn he to zọnlinzin to ojipa mẹ to whèjai pleplẹ, sunnu lọ po asi etọn po sọ yéde whlá sọn OKLUNỌ Jiwheyẹwhe nukọn, to atin ojipa mẹ tọn lẹ ṣẹnṣẹn.
9OKLUNỌ Jiwheyẹwhe sọ dlangbe hlan sunnu lọ, bo dọ hlan en, Fie wẹ hiẹ te?
10E sọ dọmọ, Yẹn sè ogbè towe to ojipa mẹ, obú sọ di mi, na omé wẹ yẹn ko te wutu; yẹn sọ whlá dẽ.
11E sọ dọmọ, Menu wẹ dọ na we dọ omé wẹ hiẹ ko te? hiẹ ko dù to atin lọ mẹ, ehe tọn yẹn dosẹ́n na we dọ hiẹ dù blo?
12Sunnu lọ sọ dọmọ, Yọnnu he hiẹ na nado nọ̀hẹ mi, ewọ wẹ na mi sọn atin lọ me, yẹn sọ dù 13OKLUNỌ Jiwheyẹwhe sọ dọ hlan yọnnu lọ, dọmọ, Eté wẹ hiẹ ko basi he? Yọnnu lọ sọ dọmọ, Odàn wẹ blu mi, bọ yẹn sọ dù.
14OKLUNỌ Jiwheyẹwhe sọ dọ hlan odàn lọ, dọmọ, Na hiẹ ko basi ehe wutu, mẹhodèdo we hiẹ hú whékanlin lẹpo tọn podọ hú gbekanlin lẹpo tọn; ohòto towe ji wẹ hiẹ na nọ gbọnyì, kègudu wẹ hiẹ na nọ dù to azán ogbè towe tọn lẹpo mẹ. 15Yẹn nasọ yí okẹ́n do hiẹ po yọnnu lọ po ṣẹnṣẹn; podọ do okún towe po okún etọn po ṣẹnṣẹn: ewọ na só ota towe, hiẹ na só afọgbẹn etọn.
16Hlan yọnnu lọ e dọmọ, Yẹn na hẹn awúfiẹsa towe po hòmimọ towe po zùn susugege, to awúfiẹsa mẹ wẹ hiẹ na nọ jivi te; awúvivi towe na tin to asú towe de, ewọ wẹ nasọ dugán to oji we.
17E sọ dọ hlan Adam, dọmọ, Na hiẹ ko dotó ogbè asi towe tọn wutu, bo ko sọ dù to atin lọ mẹ, ehe tọn yẹn ko dosẹ́n na we, dọmọ, Hiẹ ma na dù to e mẹ; mẹhodèdo wẹ aigba yín na towe wutu, dẹ́nkúnkún towe mẹ wẹ hiẹ na no dù sọn to gbèzán towe lẹpo mẹ; 18owùn lẹ ga po vẹwùn po wẹ na nọ wú jẹgbonu hlan we; omá dangbo tọn wẹ hiẹ na nọ dù; 19tò odén nukun towe mẹ tọn wẹ hiẹ na nọ dùnú, kaka hiẹ nado gọ̀ do aigba de; na e mẹ wẹ yè ko dè we sọn: na kọ̀gudu wẹ hiẹ, hlan kọ̀gudu de wẹ hiẹ na sọ gọ̀ do.
20Adam sọ ylọ oyín asi etọn tọn dọ Evi; na ewọ wẹ onọ omẹ to ogbẹ̀ lẹpo tọn wutu.
21Podọ hlan Adam po asi etọn po wẹ OKLUNỌ Jiwheyẹwhe basi awù ayu tọn, bo dona yé.
22OKLUNỌ Jiwheyẹwhe sọ dọmọ, Dayi e go, sunnu lọ ko lẹzun di dopo to míwle mẹ nado yọ́n dagbe po oylan po: dinvie ewọ mahà dè alọ etọn jẹgbonu bo yí to atin ogbè tọn mẹ ga, bo dù bo sọ nò ogbè kakadoi:— 23enẹwutu OKLUNỌ Jiwheyẹwhe yàn ẹn jẹgbonu sọn ojipa Edeni tọn mẹ, nado pò aigba he mẹ ye ko dè e sọn. 24Mowẹ é yàn sunnu lọ jẹgbonu; é sọ dè do whèzẹtẹn ojipa Edẹni tọn Kelubimi lọ po jiji ohi de tọn po he to juju pó, nado họ̀ aliho jẹ atin ogbè tọn kọ̀n.
Селектирано:
Gẹnẹsisi 3: BWL23
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Holy Bible in Gun-Alada © Bible Society of Benin and Bible Society of Nigeria, 1923.