Yʉánɛs 9
9
Mʉr á byɛ̂l ántím nyá
1Yésʉs lɨ́ ekǎ laa yʉ́ʉ́ gúmo nɛ́ɛ: nye nzě bee nyʉ́ʉ́ mʉ̂r á byɛ̂l e ntím nyá. 2Ompʉ́n bé, nzě dî e né ó: «Lɛ̂ʼla, mʉr nyâʼ á byɛ̂l e ntím ɨ́ yé? Nzê ɨ́ lɔ̌b syóm wé, nye mʉr tɨ̂ʼ ɛ̌? Nzê ɨ́ lɔ̌b syóm óbyɛ́l bé, bé á sâ wɨ́ ɛ́?»
3Yésʉs, nye e bé ó: «Yé abe ɨ́ lɔ̌b syóm wé, nkʉ̂ waá óbyɛ́l bé. Nye á byɛ̂l e ntím ó, lɨ́ esú ó, bisyɛ́ɛla mé Nzyɛ̌m, byé nyɨ́nɨɨ e né. 4Mɨná sâʼ gá syɛ́ɛla me Mʉ̂r á ntɨh me nyá, yé dína móhó, ebě, pum, wé mû ó lɨ́ enzě dwíne, mʉr akǎ be e nkul eséa. 5Jɔʼ yɨ́yɛ̂h mé dína ɨ́ sí yɨ̂ʼ yɨ́, me ó dí njʉl dí ɨ́ sí yɨ̂ʼ wɨ́.» 6Jɔ̌ʼ Yésʉs á be ɨ́ lɛ́ɛ nó yɨ́, nye nzě syɛɛ métyéelé sí, nzě pulo bwá bíbwǎh e metyéelé mé, ntɔ̂ʼ lœm ántím byǎ ɨ́ mîh. 7Nye e né ó: «Tóʼ, tó jwɨɨ mîh ɨ́ béh Siloâm.»
(Díe laá, lé páʼlɔ́ɔ́ ó: “Lʉ́mlʉ́.”)
Ántím nzě tó jwɨɨ mpóm. Nyé ká búla nɛ́ɛ: nye mû ó lɨ́ ebee.
8Jyɛɛ́ yé ndu e baá bé á bɨbee nye ɨ́ diá nkóó bá, bé ó: «Ɔ́ɔ! Ntʉ mʉ̂r á didi wâʼ ndîndǐl lɨ́ egwâm bísâ nyâʼ ɛ̌?»
9Bâʼ bʉ̂r, bé ó: «Nye ó nɨ̌ ʉ.»
Bʉ́ʉ́, bé ó: «Yaá! Yé abe nyê. Bé e nɔ́ɔ́, bé nwɨɨla yɨ́ɛ ó, nwɨɨláa.»
Mʉ̌r nɨ̌, nye e bé ó: «Yé ó mɛm mʉr tɨ̂.»
10Bê nzě gɔ́na le edî nyé metíá. Bé e né ó: «Míh mô, mé á bɔ́a nyá?»
11Mʉ̌r nɨ̌, nye e bé ó: «Mʉr dí e díe ó, Yésʉs nyá, nye bé ɨ́ pulo bwá bíbwǎh, lœm mé byǎ ɨ́ mîh. Nye e me ó, me tôʼ ɨ́ béh Siloâm, tó jwɨɨ mpóm. Me ntɔ̂ʼ tô. Jɔʼ mê jwɨɨ mpóm yɨ́, me ntɔ̂ʼ kʉ́ táare ébee ɨ́ sʉ́lʉ́lʉ́.»
12Bê nzě dî e né ó: «Mʉr waá, nye nkoó?»
Nye ó: «Mé agʉ́ǎ nko nyé dí yɨ́.»
OFarizyɛ̂n, bé lɨ́ edî ántím metíá
13Bʉr baá nzě nʉa mʉ̂r á bɨbe e ntím nyá, tô e né súm óFarizyɛ̂n, bé á be yɨ́. 14Náǎ yé ó, Yésʉs á pulo bibwǎh, jomo mʉ̂r nɨ̌ mîh ó ɨ́ móhó sábat. 15Nó yaá ó óFarizyɛ̂n bé á dî e mʉ̌r nɨ̌ sá yé á sâ ó, nye béyɨɨ yɨ́. Nye ó: «Nye bé ó sí lœm mé bwá bíbwǎh ɨ́ mîh. Me nzě tó jwɨɨ mpóm. Nó ó, báánâ, me mû ó lɨ́ ebee.»
16Bâʼ óFarizyɛ̂n, bé ó: «Mʉr sá mbǐ syɛ́ɛla wɨ̂ʼ nyá, nyé abe e nkul eduho kwá mé Nzyɛ̌m, ebě, nyé adû mémpéné mé móhó sábat.»
Bʉ́ʉ́, bé ó: «Nyá? Syɛ̂l misyóm, nyé abe e nkul esâ mbi ésimá wɨ̂.»
Bʉr ntɔ̂ʼ bɔ́ʼa ménkɔb mebá.
17OFarizyɛ̂n nzě báʼǎ díŋɔɔ mʉ̂r á tiʼɔɔ nyá ó: «Guá lɛ́ɛ́ yé, dumo e mʉr bɛ́ɛ́ gó mîh nyá?»
Nye ó: «Yé ó ngwíha milɔ̌b mé Nzyɛ̌m.»
18(OYúden, bé á be ɨ́ jɔʼ yaá ó, akpɛl ébûʼla ó, nye á bɨbe ó ántím, nye ntɔ̂ʼ kǎ bee.)
Bê nzě jébe sɔ́ŋ ndu e nyɔ̌ŋ wé, 19nzě díŋɔɔ bé metíá. Bé e bé ó: «Nzê yê tyeetye ó, mʉr nyâ, nye ó mwân wɨ́n ɛ̌? Nó ó, bɨ̌n kʉ́ bánǎ lɛ́ɛ ó, nye á byɛ̂l ó e ntím ɛ́? Nó ó, yê ka sá ó, nye béyɨɨ ɨ́ báánâʼ mpʉʼ yɨ́ ɛ́?»
20Obyɛ̂l bé nzě yala e bé ó: «Bɨ̌h bé lɨ́ egʉ́a ó, yé ó mwân wɨ́h. Bɨ̌h bé lɨ́ egʉ́a ntémé ó, nye á byɛ̂l ó e ntím. 21Sâ gwár, bɨ̌h bé agʉ́ǎ sâ sá ó, nye béyɨɨ yɨ́. Bɨ̌h bɨɛ, bé agʉ́a mʉ̂r bɛ́ɛ́ nyé mîh nyá. Jíʼéé gá nye mʉr tɨ̂. Nye mû ó mbi mʉ̂r jálá le ebɛ̂ʼ myé mílɔ̌b wɨ́.» 22(Náǎ yé ó, Sɔ́ŋ ndu e nyɔ̌ŋ, bé á lwilwib nó ó, ebě, bé á be ó lɨ́ ekpɛ́ɛ óYúden, ebě, oYúden baá, bé á bě sí di twíí páʼ nyɔ́ɔ́ ó, mʉ̂r sí lɛ́ɛ ó, Yésʉs, nye ó Mʉ̌r Nzyɛ̌m á lœm múló mé jwɨ́ɨ nó, nye sóŋɔɔ ɨ́ mpáh minjɨʼla nyɔ́ɔ́. 23Nó yaá ó óbyɛ́l bé, bé á lɛ́ɛ ó: “Nye mû ó mbi mʉ̂r jálá le ebɛ̂ʼ myé mílɔ̌b wɨ́. Jíʼéé gá nye mʉr tɨ̂ʼ” yɨ́.)
24OFarizyɛ̂n nzě báʼǎ jébe mʉ̂r á tiʼɔɔ nyá. Bé e né ó: «Lɛ́yɨ́ɨ́ ótyeetye ɨ́ míh mé Nzyɛ̌m. Bɨ̌h bé lɨ́ egʉ́a ó, mʉ̌r nɨ̌, nye ó syɛ̂l misyóm.»
25Nye ó: «Mɛm mé agʉ́a yâm nkʉ̂ nye syɛ̂l misyóm, nkʉ̂ nyé abe nyê. Sá mé dí ejaá gʉ́a yɨ́, yé ó njɨ gwár: me á bɨbe ó ántím. Nó ó, ɨ́ báánâ, me mû ó lɨ́ ebee ɨ́ púúm.»
26Bê nzě báʼǎ dî e né ó: «Nye pa sá gó nyá? Nye bɛ́ɛ́ gó mîh nyá?»
27Nye ó: «Me bé ó sí boó lɛ́ɛ bɨ́n. Nó ó, bɨ̌n bé akpɛl éjóʼo. Bɨ̌n kǎ kpɛl ó, me báʼa lɛ́ɛ bɨ̌n yé swîh ɛ̌? Nzê bɨ̌n ntémé mû ó lɨ́ egwɨ̂m édi ómpʉ́n bé ɛ́?»
28Bê nzě táare élwɨ́ɔɔ nyê. Bé e né ó: «Gua, go óbɛ̌m di mpʉ́n wé. Sâ gwár, bɨ̌h bɨɛ, bé ó ompʉ́n mé Moyɨ̂z. 29Bɨ̌h bé lɨ́ egʉ́a ó, Nzyɛ̌m á be ó sí lwib e Moyɨ̂z. Sâ gwár, mʉr nyâ, bɨ̌h bé agʉ́ǎ nko nyé á duho yɨ́.»
30Mʉ̌r nɨ̌, nye e bé ó: «Sá ékâm, yé ó bɨ̌n bé agʉ́ǎ nko nyé á duho yɨ́, nyɨɛ bé yɨ́ɛ ó sí bɛ́ɛ mé mâm mîh. 31Mɨná bé lɨ́ egʉ́a gá ó, Nzyɛ̌m, nyé abe lɨ́ ejóʼo ósyɛ̂l o mísyóm. Nyě jaá jôʼlo ó, njɨ mʉr dí edwe nyé kûm, waá dí esâ gwɨ́má yé nyá. 32Mɨná bé apǎ jóʼo gá lʉ́ʉ́ dʉ́o bé lɨ́ elɛ́ɛ ó, kɛl, nyɨ́ pǎ tiʼ mʉ̂r á byɛ̂l e ntím nyá. 33Yé bé mʉr waá, nyé aduho kwá mé Nzyɛ̌m nó, lɛ́ɛ́, nye bé abe e nkul esâ sɔ̂ʼ nó.»
34Bé e né ó: «Gbaa gó á byɛ̂l, go ó njɨ témé misyóm. Gǒ lɛ́ɛ́ ó, gǒ lɛ́ʼlé ó, bɨ̌h ɨ́?»
Ntɔ̂ʼ soŋɔɔ nyé ɨ́ mpáh minjɨʼla nyɔ́ɔ́.
Mʉr nyɨnyɛ̂h dí esâ syóm nyá, nye ó ántím
35Yésʉs ntɔ̂ʼ jóʼo ó, mʉr nyé á tiʼ nyá, bé á be ɨ́ so nyé ɨ́ mpáh minjɨʼla nyɔ́ɔ́. Nye nzě bɔma e né. Nye e né ó: «Nzê go lɨ́ edyɛ̂ʼwo e Mwân mé Mʉr ɛ̌?»
36Nye e né ó: «Dâ ɛ̌, lɛ́yɨ́ɨ́ mé waá dí ejébɔɔ “Mwân mé Mʉr” nyá, ó me dyɛ̂ʼwaa e né.»
37Yésʉs, nye e né ó: «Go lɨ́ ebee nyê. Nye ntémé ó dí elwib e go ɨ́ báánâʼ nyá.»
38Mʉ̌r nɨ̌, nye e né ó: «Dâ ɛ̌, mɨ́ dyɛ̂ʼwo e go!»
Nye ntɔ̂ʼ bɨʼ mébóó sí ɨ́ mpǒm mé Yésʉs.
39Yésʉs, nye ó: «Me á nze ɨ́ sí yɨ̂ʼ ó, lɨ́ enzě tíʼe bʉ̂r milɔ̌b. Me á nze sâ ó, baántím, bé béyɨɨ; baá o dí ebee bá, líŋaa baántím.»
40Bʉ́ʉ́ óFarizyɛ̂n, bé e boo nɔ́ɔ́ bé á be bá, nzě jóʼɔɔ̌ lwǐb nɨ̌. Bé ntɔ̂ʼ dî e né ó: «Nzê bɨ̌h bɨɛ ntémé bé ó baántím ɛ́?»
41Yésʉs, nye e bé ó: «Yé bé bɨ̌n bé á bɨbe ó baántím nó, lɛ́ɛ́, bɨ̌n á gwa be ó mbɨ̂mbɨá, syóm akǎ be. Nó mpʉ bɨ́n lɛ́ɛ́ ó, bɨ̌n bé lɨ́ ebee yɨ́, nó yaá ó bɨ́n dína lɨ́ edi e misyóm mín yɨ́.»
Селектирано:
Yʉánɛs 9: ozm
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се