Yʉánɛs 6
6
Yésʉs lɨ́ edwe bʉ̂r otɔ́ɔ́sin otɛ̂n mede
(Matthieu 14.13-21; Marc 6.30-44; Luc 9.10-17)
1Jɔʼ bé á duho náǎ yɨ́, Yésʉs nzě ntaa máŋ mé Galilê, tô lɨ́ ebʉ̂m e kɔ́m nkɛ́ɛ́. (Bé á jɨjébe mâŋ maá ó, “Mâŋ mé Tiberiâs”.) 2Bʉr ɨ́ buo buo, bé á be ó lɨ́ edû nyê, ebě, bé á be ó lɨ́ ebee nyé lɨ́ etiʼ mímbêl ɨ́ nzɨ̌ mesimá. 3Yésʉs nzě tó bére lɨ́ ecwɨ̂ʼ, bé le ompʉ́n bé, bê nzě di sí. 4Páska, nzɔɔ oYúden, á be ó, nye mû kúno ebwalɔɔ. 5Yésʉs ká dwɛ̂ʼ nɛ́ɛ: nyě beé ó, sɔ́má bʉ̂r lɨ́ enze kwá nyé. Nó nyé á nze dî e Philippe ó: «Mɨná bé óbwâm gá mede mé édwe bʉ̂r bâʼ bɨ́bɛ̂h wó?»
6(Nye á dî nó ó, lɨ́ ebóblǒ Philippe, ebě, nye á be ɨ́ boó gʉ́ǎ sá nyé ngá sâ yɨ́.)
7Philippe, nye e né ó: «Mɨná damá jána gá minzaŋ mí mɔnɨ́ minter mimbá, mɨná bé á bé agwá be e nkul ebwâm gá mede, bím dí ó, mʉr nyɨnyɛ̂h bíʼee pêh dœʼ yɨ́.» 8Nyʉ́ʉ́ mpʉ́n wé, díe André, mɨ́ɔɔ́ mé Simon Pétrus, nye e né ó: 9«Nyʉ́ʉ́ mâ ntwǒm, nye ó wâ. Nyě e biblér bí orge bitɛ̂n le osú óbá. Bím bʉ̂r bâ, bé ódira wáǎ nyɔm ɨ́ bím méde yaá?»
10Yésʉs, nye e bé ó: «Dilɨɨ gá bʉr bɨ́bɛ̂h sí!» (Dáá, lé á be ɨ́ buo ɨ́ gúmo yaá.) Bɨ́bɛ̂h nzě di sí. Ɨ́ bʉr baá, bʉrʉ̂m, bé á be ó, bɛ̌m pyâl ótɔ́ɔ́sin otɛ̂n. 11Yésʉs nzě nʉa bíblêr byaá, nzě dwě Nzyɛ̌m nzyǒo. Jɔʼ nyé á bě sí dwě Nzyɛ̌m nzyǒo yɨ́, nye nzě kab bʉ̂r bɨ́bɛ̂h bé á be tɨ̂ʼ mindîndǐl bá. Nye nzě dwe bé ntémé osû, mʉr nyɨnyɛ̂h lɨ́ enʉǎ bím yɨ́yɛ̂h nyé á kpɛl yɨ́. 12Jɔʼ bɨ́bɛ̂h, bé á bě sí de, díle yɨ́, Yésʉs, nye le ompʉ́n bé ó: «Syɛŋɨɨ gá bipéh méde mû sí buʼo bí, mbi dí ó, sɔ̂ʼ, yé ayɨ́ dwě ntuʼ yɨ́!»
13Bê nzě syɛŋ bípéh bí blêr byé á buʼo ɨ́ biblér bí orge bitɛ̂n bí. Bíbyɛ̂h nzě lóŋlo mékwám kám e mebá.
14Bʉr o b'á bee esimá Yésʉs á sâ lɨ́ bá, bê nzě lɛ́ɛ ó: «Mʉr nyâ, nye kʉ́ bě tyeetye ó ngwíha milɔ̌b á jala le enze ɨ́ sí yɨ̂ʼ nyá.»
15Yésʉs ntɔ̂ʼ gʉ́a ó, bé á be ó lɨ́ egwɨ̂m énzě mɛ̂r nyê, lɨ́ etó tyélɔɔ nyé njwɨ́ɨ wɔ́ɔ́. Nye nzě báʼǎ dulo nyʉ̂l nyé, tó di lɨ́ ecwɨ̂ʼ nye omér.
Yésʉs lɨ́ etye ɨ́ medíbé kʉ́
(Matthieu 14.22-27; Marc 6.45-52)
16Jɔʼ bíí kʉ̌ʼ, yé á pyâl yɨ́, ompʉ́n bé nzě tô ɨ́ nkpâh mâŋ. 17Bê nzě kalwo ɨ́ byɛ̂l. Bé mû lɨ́ entaa mâŋ, lɨ́ etóŋɔɔ̌ Kapernáʉm, lɨ́ ebʉ́m é mâŋ e kɔ́m nkɛ́ɛ́ nɛ́ɛ: pum nzě dwíne, Yésʉs dína apǎ kœb bê. 18Bé ká bee nɛ́ɛ: obóʼó ó mâŋ, wé mû ó lɨ́ ebére, ebě, nkúo á be ó lɨ́ ekʉ́ kwoolo e nkul. 19Bé á be ó, bé osí dúʼo, bɛ̌m be ókíloméra otɛ̂n, nkʉ̂ ósaman. Bé ká bee nɛ́ɛ: Yésʉs mû lɨ́ ekúnwo e byɛ̂l, nyɨɛ lɨ́ etye ɨ́ medíbé kʉ́. Bê kʉ́ nzě jóʼo bʉ́á. 20Nye ó: «Ayɨ́ jóʼo gá bʉ́á. Yé ó me!»
21Bé mû lɨ́ edǐ kɛl nyé ɨ́ byɛ̂l nɛ́ɛ: bé kǎ twɨra ó, byɛ̂l, nyɨ́ syela ɨ́ pɨ̌n. Bé á be mû ó lɨ́ ebʉ́m bé á be lɨ́ etô lɨ́.
Yésʉs, nye ó mede mé twiʼ
22Ɨ́ mɛ́n tɨ̂, entumo e bʉ̂r lé á lîʼ lɨ́ ebʉ́m é mâŋ e kɔ́m nkɛ́ɛ́ lɨ́, lê nzě bee ó, yé á jaa bɨbe ó, njɨ byɛ̂l ngwár lɨ́ ebʉ̂m, waá ómpʉ́n mé Yésʉs, bé á tô tɨ̂ʼ nyá. Bé á be lɨ́ egʉ́a ntémé ó, Yésʉs á bé akalwo ɨ́ byɛ̂l waá. Ompʉ́n bé, bé á kalwo tɨ̂ʼ ó, bé omér. 23Mʉ́ʉ́ mɛ̂l ntɔ̂ʼ pyâl, duhǒ Tiberiâs. Mɨ́ nzě pyâl kúnókúno e gúmó bé á de blêr píe jɔʼ Tî Yésʉs á dwe Nzyɛ̌m nzyǒo yɨ́. 24Jɔʼ éntumo e bʉ̂r, lé á bee ó, táare e Yésʉs, kumo le ompʉ́n bɨ́bɛ̂h, bé akǎ be tɨ̂ʼ yɨ́, bê nzě kalwo ɨ́ mɛ̂l maá, nzě tóŋɔɔ ɨ́ Kapernáʉm, tô le esáŋɔɔ nyé gʉ̂.
25Bê nzě tó kœ̌b Yésʉs lɨ́ ebʉ́m é mâŋ lé á be kɔ́m nkɛ́ɛ́ lɨ́. Bé e né ó: «Lɛ̂ʼla, go ka nzé kâʼ ɨ́ yáǎ jɔʼ?»
26Nye nzě yala e bé ó: «Mě lɛ́ɛ́ bɨ́n lɨ́ otyeetye ó, bɨ̌n sáá mé ó, ebě, bɨ̌n bé á si de blêr, díle. Bɨ̌n bé asáa mé ɨ́ lɔ̌b mésimá bɨ́n á bee má. 27Ayɨ́ séa gá lɨ́ esú é méde me dí e nkul ekaʼ, nkʉ̂ bo má, njɨ lɨ́ esú é maá me dí edi, tó pyâl ɨ́ twǐʼ njʉ̌m dǐ má. Mé ó dí maá Mwân mé Mʉr ódwe bɨ́n má, ebě, nye ó waá Nzyɛ̌m Sɔ́ŋ á gbâ jwɨʼ yé nyá.»
28Bê nzě dî e né ó: «Bɨ̌h sâʼ nyá, ó bɨ̌h lóŋlaa bisyɛ́ɛlǎ Nzyɛ̌m dí edî bí?»
29Yésʉs, nye e bé ó: «Syɛ́ɛlǎ Nzyɛ̌m dí edî bɨ́n yɨ́, yé ó, bɨ̌n dyɛ̂ʼwaa e mʉr nyé á ntɨh bɨ̌n nyá.»
30Bé e né ó: «Láa ésimá gó dí ɨ́ pǎ lɛ̂ʼle bɨ́h, ó bɨ̌h béyɨɨ, bɨ̌h nkʉ̂ dyɛ̂ʼwo e go? Yé gó dí ɨ́ pǎ sâ yɨ́? 31Bimpám gá bíná, byé á si de mân ɨ́ lʉá. Yê cɛmá ɨ́ Mekaná mé Nzyɛ̌m ó: “Nye á si dwe bé mede, blêr, yé á duho ɨ́ jʉ́o kʉ́ yɨ́.”»
32Yésʉs, nye e bé ó: «Mě lɛ́ɛ́ bɨ́n lɨ́ otyeetye ó, ntʉ̌ Moyɨ̂z á dwe bɨ̌n mede mempâ mé á duho ɨ́ jʉ́o kʉ́ má. Sɔ́ŋ wǎm ó dí entɨh méde mempâ me dí eduho ɨ́ jʉ́o kʉ́ má. 33Ebě, medě Nzyɛ̌m dí edwe má, mé ó mʉr á duho ɨ́ jʉ́o kʉ́ nyá. Nye ó mʉr dí edwe bʉ̂r twiʼ nyá.»
34Bé e né ó: «Yé bé nó wá, Dâ ɛ̌, dwídwéʼ bɨ́h mede maá melú mɨ́mɛ̂h.»
35Yésʉs, nye e bé ó: «Me ó dí mede dí etiʼ bʉ̂r má. Mʉr nyɨnyɛ̂h dí enze kwá nyǎm nyá, nyé abe e nkul ekǎ jóʼo nzâ. Mʉr nyɨnyɛ̂h dí edyɛ̂ʼwo e me nyá, nyé abe e nkul ekǎ jóʼǒ dwéh médíbé. 36Me á si lɛ́ɛ bɨ̌n ó, bɨ̌n bɨ́ bee mê, adyɛ̂ʼwo yɨ́ɛ e me. 37Mʉr nyɨnyɛ̂h Nzyɛ̌m Sɔ́ŋ dí elómlo mé nyá, ónze kwá nyǎm. Mɛm ntémé áso waá nyɨnyɛ̂h dí enze kwá nyǎm nyá. 38Ebě, me á bé aduho ɨ́ jʉ́o kʉ́, lɨ́ enzě sâ gwɨ́má yâm, njɨ gwɨ́má mʉ̂r á ntɨh me nyá. 39Mʉr á ntɨh me nyá, nyě gwɨ́m ó, me ayɨ́ dímle mʉ̂r ngwár ɨ́ sɔ́má bʉ̂r o nyé á dwe me bá. Nyě gwɨ́m ó, me pɛ́ʼɛɛ bé lɨ́ eswie, pɛh bé ɨ́ móhó ésúʼlá é kʉ́ e sí. 40Ebě, Sɔ́ŋ wǎm gwɨ́m ó, bʉr bɨ́bɛ̂h ngá bee Mwân wé, dyɛ̂ʼwo e né bá, bé níʼee ɨ́ twǐʼ njʉ̌m dǐ. Mɛm, me ópɛh bé ɨ́ móhó ésúʼlá é sí yɨ̂.»
41OYúden nzě táare élwib ɨ́ bébe bébe dumo e Yésʉs, ebě, nye á lɛ́ɛ ó: “Me ó dí mede, maá mé á duho ɨ́ jʉ́o kʉ́ má.” 42Bé ntɔ̂ʼ díila ó: «Ntʉ̌ Yésʉs, mwân mé Yóseb nyâʼ ɛ̌? Mɨná bé lɨ́ ekʉ́ gʉ́a gá sɔ́ŋ wé, bé e nyɔ̌ŋ wé. Wáǎ mbi nyé dí elɛ́ɛ e mɨná gá báánâʼ ó, nye á duho ó kʉ́ yɨ́ ɛ́?»
43Yésʉs nzě yala e bé ó: «Ayɨ́ nyimla gá páʼ nyɨ́n! 44Sɔ́ŋ wǎm á ntɨh me nyá, óbe, adulo mʉ̂r nó, mʉr waá, nyé abe e nkul enze kwá nyǎm. Me ópɛh waá nyé ngá dulo nyá ɨ́ móhó ésúʼlá é sí yɨ̂. 45Ogwíha o mílɔ̌b, bé á cɛma ɨ́ Mekaná mé Nzyɛ̌m ó: “Nzyɛ̌m ó ngá lɛ̂ʼle bɨ́bɛ̂h.” Me lɨ́ elɛ́ɛ ó, mʉr nyɨnyɛ̂h ójóʼǒ Nzyɛ̌m Sɔ́ŋ, le enʉa mílɛ́ʼlá nyé ódwe mí nyá, ónze kwá nyǎm. 46Nó ó, yé alɛ̂ʼle ó, nyʉ́ʉ́ mʉ̂r á be ɨ́ beě Nzyɛ̌m Sɔ́ŋ. Waá á duho kwá mé Nzyɛ̌m nyá nyɨɛ, nye omér ó b'á bee nye. 47Mě lɛ́ɛ́ bɨ́n lɨ́ otyeetye ó, mʉr dí edyɛ̂ʼwo e me nyá, nyɨ́ bǐ twǐʼ njʉ̌m dǐ. 48Mɛm ó dí mede mé twiʼ. 49Bimpám bín, bʉr o b'á de mân ɨ́ lʉá bá, bíbyɛ̂h, byé á si síe lɨ́ edwe ɨ́ lʉá waá tʉ́ŋlʉ̌. 50Sâ gwár, mede, maá me dí eduho ɨ́ jʉ́o kʉ́ má mɨ́ɛ, mé ó mbi méde me dí: mʉ̂r sí de mé nó, nye ákóʼó kǎ dwe má. 51Me ó dí mede me dí etiʼ bʉ̂r, maá mé á duho ɨ́ jʉ́o kʉ́ má. Mʉ̂r sí de méde maá nɛ́ɛ: nye ótiʼě njʉ̌m dǐ e njʉ̌m dǐ. Mede mé ódwe nyé má, mé ó bipúnó byâm. Mě dwé bʉ̂r ó sí yɨ̂ʼ byǎ ó, lɨ́ esú ó, bé bíʼee twiʼ.»
52Jɔʼ óYúden bé á jóʼo nó yɨ́, kʉ́ nzě táarɔɔ épére mékǎn páʼ nyɔ́ɔ́. Bé ó: «Mʉr nyâ, nyě e nkul edwe mɨ́ná gá bipúnó byé ó, mɨná dêʼ gá byé nyá?»
53Yésʉs, nye e bé ó: «Mě lɛ́ɛ́ bɨ́n lɨ́ otyeetye ó, mʉ̂r bé ade bípúnó bí Mwân mé Mʉr le ede métié mé nó, lɛ́ɛ́, nyɨ́haá mʉ̂r abǐ twiʼ. 54Mʉr nyɨnyɛ̂h dí ede bípúnó byâm ndu e metié mâm nyá, óbǐ twǐʼ njʉ̌m dǐ. Me ópɛh nyé lɨ́ eswie, pɛh nyé ɨ́ móhó ésúʼlá é sí yɨ̂. 55Ebě, bipúnó byâm, byé ó mede mempâ. Metié mâm, mé ó mpǎŋ sá ébɛble. 56Mʉr dí ede bípúnó byâm ndu e metié mâm nyá, nyě tiʼé ó, ɨ́ mpúhlá e me; mɛm ntémé ɨ́ mpúhlá e né. 57Sɔ́ŋ wǎm, mʉr á ntɨh me nyá ó dí enó é twiʼ. Mě tiʼe ó ɨ́ nye. Jwɨʼ gwár e gwár yaá, mʉr óde mé nyá, ótiʼe ó ɨ́ me. 58Mede mâ, mé ó mede mé á duho ɨ́ jʉ́o kʉ́ má. Mé anwɨɨla e maá bímpám bín, byé á de, bíbyɛ̂h síe lɨ́ edwe má. Mʉr nyɨnyɛ̂h ngá de méde mâʼ nyá, ótiʼě njʉ̌m dǐ e njʉ̌m dǐ.»
59Yésʉs á dwe metwɨ́ɨ́ ménɨ̌ ó ɨ́ mpáh minjɨʼla ɨ́ Kapernáʉm.
Bilwǐb bí twǐʼ njʉ̌m dǐ
60Jɔʼ bʉ̂r ɨ́ buo buo ɨ́ sɔ́má ómpʉ́n bé, bé á jóʼo lɔ́ɔ́ Yésʉs á lɛ́ɛ wɨ́ yɨ́, bê nzě lɛ́ɛla páʼ nyɔ́ɔ́. Bé ó: «Lɛ́ʼlá wɨ̂, wé ɨ́ buú kɔbla. Nzé dí e nkul ejóʼo wê?»
61Yésʉs nzě gʉ́a ó, ompʉ́n bé, bé á be ó lɨ́ elwǐb lɔ̌b waá minyimla. Nye ó: «Nzê lɛ́ʼlá wâm nɨ̌, wé ó ebɔ̌ʼ e dí ebɨma bɨ́n ɨ́ miléme lɨ́ ɛ́? 62Yé ókǎ sâ bɨ́n nyá, ɨ́ jɔʼ bɨ́n óbee Mwân mé Mʉr lɨ́ ebúla, bére, swîʼ, tô nko nyé á nyɛɛ bɨbe yɨ́? 63Sísǐm mé Nzyɛ̌m ó dí edwě twiʼ. Mʉr ákóʼó bǐ twiʼ mpâ lɨ́ edû bígwɨ́má bí nkûl bipúno. Bilwǐb mé dí elwib e bɨ̌n bîʼ duho ó ɨ́ Sísǐm. Byé ntémé, byé ó dí etiʼ bɨ́n. 64Sâ gwár, bʉ́ʉ́ bʉ̂r ó sɔ́má yɨ́n, bé adyɛ̂ʼwo e me.»
(Yésʉs á si lɛ́ɛ nó, ebě, nye á be ó lɨ́ eboó gʉ́a, duho ɨ́ menyɛ̌l, baá bé á be adyɛ̂ʼwo e né bá, ndu e waá óbɛ́ma nyé nyá.)
65Nye ntɔ̂ʼ báʼǎ lɛ́ɛ e bé ó: «Sá tɨ̂ʼ ó mê lɛ́ɛ́ e bɨ̌n ó, mʉr, nyé abe e nkul enze kwá nyǎm, nye l'apǎ nyɛɛ́ bi nkûl nyaá kwá mé Sɔ́ŋ wǎm yɨ́.»
66Táare ɨ́ jɔʼ yaá ó bʉ́ʉ́ ómpʉ́n bé, bé á nze gɔ́na le ebúla ɨ́ twíaaa e metyɛʼ me nyʉ̂l, akǎ dúŋɔɔ nyé yɨ́. 67Yésʉs, nye le ompʉ́n kám le obá bé ó: «Nzê bɨ̌n bɨɛ ntémé múo nzě búla píhe ɛ̌?»
68Simon Pétrus, nye e né ó: «Dâ ɛ̌, bɨ́h sá nó wá, bɨ̌h bé ókǎ tô kwá mé nzé? Gua ó dí e milɛ́ʼlá me dí edwě twǐʼ njʉ̌m dǐ mí. 69Ɨ́ báánâ, bɨ̌h bɨ́ bûʼla le egʉ́a ó, go ó dí kwahaá Mʉr mé Nzyɛ̌m dí ti nyá!»
70Yésʉs, nye e bé ó: «Ntʉ mɛ̂m mʉr tɨ̂ʼ á twâr bɨ̌n kám le obá ɛ́? Damá jóʼo nó, nyʉ́ʉ́ mʉ̂r ɨ́ sɔ́má yɨ́n, nyě le eleme.» 71(Nye á lwib nó ó, dumo e Yʉ́das, mwân mé Simon Iskariôt, ebě, Yʉ́das, damá jóʼo ó mpʉ nyé á be mpʉ́n ɨ́ sɔ́má ómpʉ́n kám le obá yɨ́, nye á be e jwɨʼ ó, nye óbɛ́ma nyê.)
Селектирано:
Yʉánɛs 6: ozm
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се