Yʉánɛs 16
16
1«Mě lɛ́ɛ́ bɨ́n mekǎn mbi wɨ̂ʼ ó, bɨ̌n sá abɨm ébɔ̌ʼ ɨ́ miléme, nkʉ̂ sâ syóm. 2Bé óso bɨ́n ɨ́ mempáh mínjɨʼla mɔ́ɔ́. Yé ópyâl ntémé jɔʼ bʉ̂r, bé ójʉ̂ bɨ́n, lɨ́ ejwɨʼ ó, bé séá ó Nzyɛ̌m syɛ́ɛ́ yɨ́. 3Bé ósɨsâ nó ó, ebě, bé á bé agʉ́a, damá be Sɔ́ŋ wǎm, damá be mê. 4Mě boó lɛ́ɛ e bɨ̌n nó ó, ɨ́ jɔ̌ʼ jɔʼ yaá, yé ókǎ pyâl yɨ́, bɨ̌n nkʉ̂ tʉtoŋlo ó, yé ó sá mé á boo lɛ́ɛ bɨ̌n yɨ́.»
Syɛ́ɛ́ Sísǐm mé Nzyɛ̌m
«Me á bé aboó lɛ́ɛ bɨ́n lɔ̌b nɨ̌ ó, ebě, mɨná gá ó b'á be. 5Báánâ, me múo nzě bérě nko mʉ̂r á ntɨh me nyá dí yɨ́. Damá jóʼo nó, mʉr ɨ́ sɔ́má yɨ́n, nyé adî e me ó: “Gǒ tó wó?” 6Damá jóʼo nó, menyʉ̂l, mɨ́ tyɛʼ bɨ́n ebe mé mû sí lwib e bɨ̌n mpʉ́nʉ̌. 7Mě lɛ́ɛ́ bɨ́n lɨ́ otyeetye ó, embɨa, lé ɨ́ páʼ wɨ́n ó, me tôʼ. Mé bé atô nɛ́ɛ: lɛ́ɛ́, kɔmlʉ wɨ́n, nye ánze kwá nyɨ́n. Nó ó, mé sí tô nɛ́ɛ: me ntɨh bɨ́n nyǎ. 8Jɔʼ nyé ópyâl yɨ́, nye ónzě dwe bʉ̂r ó sí yɨ̂ʼ milɛ́ʼlá ó:
ɨ́ sá dí “syóm” yɨ́;
ɨ́ sá dí “otîtyěl” yɨ́;
le ɨ́ lɔ̌b “tíʼá mílɔ̌b”.
9Nye ólɛ̂ʼle bʉ̂r syóm wɔ́ɔ́. Syɛ́ɛla yaá ó yɨ̂: bé adyɛ̂ʼwo e me. 10Nye ólɛ̂ʼle bé sá dí tîtyěl yɨ́, ebě, mě búlá ó, tô nko Sɔ́ŋ wǎm dí yɨ́. Bɨ̌n bé ákǎ bee mê. 11Nye ólɛ̂ʼle bé tíʼá mílɔ̌b mé Nzyɛ̌m, ebě, Nzyɛ̌m, nyɨ́ boó tíʼě lɔ̌b me njwɨ́ɨ sí yɨ̂, le edwe nyé mebě.
12«Me dína ó, ɨ́ buo bísá bí élɛ́ɛ bɨ́n. Sâ gwár, bɨ̌n bé apǎ be e nkul edûhwo byé ɨ́ báánâ. 13Jɔ̌ʼ Sísǐm Ótyeetye ópyâl ɨ́ bɨ̌n yɨ́, nye ólɛ̂ʼle bɨ́n otyeetye wɨ́wɛ̂h. Nye álwib e nkul nyé nye omér. Nye ólɨlɛ́ɛ ó, sá nyé á pa jóʼo yɨ́. Nye ólɛ́ɛ bɨ́n sá yé ósyɛ́ɛ yɨ́. 14Nye ódwe mé kûm, ebě, nye ónʉa ótyeetye dí eduho e me wɨ́, ntɔ̂ʼ lɛ́ɛ bɨ́n wǎ. 15Sá yɨ́yɛ̂h Sɔ́ŋ wǎm dí e yé yɨ́, yé ó sá yâm. Sá tɨ̂ʼ ó mê lɛ́ɛ́ e bɨ̌n ó, Sísǐm mé Nzyɛ̌m ónʉa ótyeetye dí eduho e me wɨ́, ntɔ̂ʼ lɛ́ɛ bɨ́n wǎ yɨ́.»
Ebúʼ lɨ́n, lé óliŋa bísʉhʉʉ
16«Yɨ́ lîʼ njɨ bá mâ jɔʼ, bɨ̌n bé ákǎ bee mê. Yé óbáʼǎ lɛŋ mâ jɔʼ, bɨ̌n bé obáʼǎ bee mê.»
17Bʉ́ʉ́ ómpʉ́n nzě táare édíila métíá páʼ nyɔ́ɔ́. Bé ó: «Nó yɨ́ɛ̌ dǐ lɛ́ɛ yé ɛ́? Ó “Yɨ́ lîʼ njɨ bá mâ jɔʼ, bɨ̌n bé ákǎ bee mê. Yé óbáʼǎ lɛŋ mâ jɔʼ, bɨ̌n bé óbáʼǎ bee mê.” Nyě kpɛ̌l élɛ́ɛ yé ɨ́ jɔʼ nyé lɨ́lɛ́ɛ́ ó: “Yé ó ebe mé dí ebúla, tô nko Sɔ́ŋ wǎm dí yɨ́”?»
18Bê nzě lɛ́ɛla ntémé ó: «Ekǎn é “mâ jɔʼ” lɨ̂, lé lɨ́ elɛ̂ʼle yé? Mɨná bé akǎ jóʼo gá sá nyé dí elɛ́ɛ yɨ́.»
19Yésʉs ntɔ̂ʼ gʉ́a ó, bé á be ó lɨ́ egwɨ̂m édî nyé metíá. Nye ó: «Me sí gwîh bɨ́n ó: “Yɨ́ lîʼ bá mâ jɔʼ, bɨ̌n bé ákǎ bee mê. Yé óbáʼǎ lɛŋ nyʉ́ʉ́ mâ jɔʼ, bɨ̌n bé óbáʼǎ bee mê.” Nzê ɨ́ lɔ̌b waá ó bɨ́n dí edíila métíá páʼ nyɨ́n wɨ́ ɛ́? 20Mě lɛ́ɛ́ bɨ́n lɨ́ otyeetye ó, bɨ̌n bé ójɨ médwê, bʉr ó sí bɨ́ɛ, bé óbe lɨ́ esoho. Menyʉ̂l, mé ótyɛʼ bɨ́n. Sâ gwár, ebúʼ lɨ́n laá, lé ókǎ liŋa ó bisʉhʉʉ. 21Jɔʼ mʉ́má mû lɨ́ enzě byâ mwân yɨ́, nyʉ̂l, nye lɨ́ etyɛʼ nyê, ebě, jɔʼ mín, yɨ́ pyâl nyê. Jɔʼ mwân óbe, nye mû sí byɛ̂l yɨ́, nyɔ̌ŋ, nye lɨ́ ejɨha mékpaa mé, ebě, nye lɨ́ esoho ó, mʉr, nyɨ́ byɛ̂l ɨ́ sí yɨ̂. 22Jwɨʼ gwár, ɨ́ báánâ, menyʉ̂l, mɨ́ tyɛʼ bɨ́n. Nó ó, me óbáʼǎ bee bɨ́n, bɨ̌n bé ojóʼo bísʉhʉʉ. Abe e mʉr ókǎ pɛʼ bɨ́n byǎ ɨ́ miléme.
23«Jɔ̌ʼ móhó waá, wé ópyâl yɨ́, bɨ̌n bé ákǎ dî mé tíá ɨ́ gúú lɔ̌b e gúú. Mě lɛ́ɛ́ bɨ́n lɨ́ otyeetye ó, Sɔ́ŋ wǎm ódwe bɨ́n sá yɨ́yɛ̂h bɨ́n ngá gwâm, lɨ́ ejɨʼla e né, le epɨr e díé lâm yɨ́. 24Nzě kumo ɨ́ báánâ, bɨ̌n bé apǎ gwâm sɔ̂ʼ, lɨ́ ejɨʼla e Sɔ́ŋ wǎm, pɨr e díé lâm. Gwámáá gâ, bɨ̌n bé óbi. Bisʉhʉʉ bín, byé díʼee ntinɨ̂ e ntinɨ̂.
Yésʉs, nyɨ́ ntaǎ Sátan
25«Me á lɨlɛ́ɛ bɨ̌n milɔ́ɔ mínɨ̌ mímyɛ̂h ó, ɨ́ nzɨ̌ bikɨkɛna. Yé ópyâl jɔʼ mé óbe, akǎ lwib e bɨ̌n ɨ́ nzɨ̌ nyaá yɨ́. Me ókʉ́ lwilwib e bɨ̌n, dumo e Sɔ́ŋ wǎm ó, lɨ́ epâʼla mékǎn. 26Jɔ̌ʼ móhó waá, wé ópyâl yɨ́, bɨ̌n bé ógûgwam bísá bín ó, lɨ́ ejɨʼla e Sɔ́ŋ wǎm, pɨr e díé lâm. Nó ó, mé alɛ́ɛ ó, me ódî nyé byǎ lɨ́ esú lɨ́n. 27Ebě, Sɔ́ŋ wǎm mʉr tɨ̂, nye lɨ́ ekpɛl bɨ́n. Nyě kpɛ̌l bɨ́n ó, ebe bɨ́n ntémé dí ekpɛl mê. Bɨ̌n bɨ́ bûʼla ntémé ó, me á duho ó kwá nyé. 28Me á duho ó kwá Sɔ́ŋ wǎm, me nzě pyâl ɨ́ sí yɨ̂. Me óbáʼǎ mɔa, líʼě sí yɨ̂, bérě nko Sɔ́ŋ wǎm dí yɨ́.»
29Ompʉ́n bé, bé e né ó: «Ááʼ! Paá bee: gʉ́ lwib báánâ, pâʼla mékǎn, abe ɨ́ nzɨ̌ bikɨkɛna! 30Ɨ́ báánâ, bɨ̌h bɨ́ gʉ́a ó, gʉ́ gʉ́ǎ sá yɨ́yɛ̂h, ndu e ntémé ó, yé ajɨ ó, mʉr díʼee go tíá. Nó yaá ó bɨ́h dí ebúʼla ó, go á duho ó kwá mé Nzyɛ̌m yɨ́.»
31Yésʉs nzě dî bé tíá ó: «Nzê bɨ̌n bɨ́ bûʼla ɨ́ jɔʼ yɨ̂ʼ ɛ̌? 32Jwɛ́ʼɛ́ɛ́ gâ, jɔʼ, yé múo nzě pyâl. Yé ntémé, yɨ́ pyâl: jɔʼ bɨ́n ngá gbɛha, mʉr e mʉr asyɛŋa nzɨ́ yɨ́. Bɨ̌n bé ólíʼe mé me omér. Me ákóʼó be yɨ́ɛ me omér, ebě, bɨ̌h e Sɔ́ŋ wǎm ó dí. 33Mě lɛ́ɛ́ bɨ́n milɔ̌b mîʼ ó, bɨ̌n nkʉ̂ di ɨ́ mpúhlá e me, milémé mín nkʉ̂ lóno ɨ́ mepyɛbla. Bɨ̌n bé ósia e mitúú lɨ́ edi ɨ́ sí yɨ̂. Damá jóʼo nó, biʼee gá menyan ɨ́ milémé mín. Mɛm, mɨ́ ntaǎ sí yɨ̂ʼ ɨ́ nkul.»
Селектирано:
Yʉánɛs 16: ozm
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се