Chɛ̄nɛ̍se̍ē 2
2
1O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ chīī chi̍e̍ēŋndo̍ tōōsīāā, chōo̍ cho̍o̍ ni̍ a̍ lɛ̄ŋ, a̍ nyɛ̄ o̍ nyɛ̍ cho̍ lēni᷄ŋ. 2O̍ pāa̍le̍ ŋɔ̍mmɛ̍ūle̍ŋ chōo̍, mi̍ Mɛ̄lɛ̄ka̍ mɛ̄ɛ̄lū a̍ wa̍li̍ o̍ wa̍ tōsāa̍ wo̍. O̍ ko̍ŋ, mbo̍ pɛ̄ŋgī a̍ wa̍llo̍ o̍ pāa̍le̍ ŋɔ̍mmɛ̍ūle̍ŋ chōo̍. 3Le̍ he̍ī, mi̍ Mɛ̄lɛ̄ka̍ dūāū pāa̍le̍ le̍ŋ sa̍lā, ndu̍yɛ̍ mbo̍ kɛ̄sī le̍ŋ lēbɛ̄ɛ̄. Kāni̍ fu̍u̍le̍, lēchōo̍ Mɛ̄lɛ̄ka̍ pɛ̄ŋgi̍ a̍ wa̍li̍ o̍ wa̍li̍ o̍ to̍sa̍ o̍ chi̍e̍ēŋndo̍ tōōsi̍a̍a̍ ni᷄ŋ ndo̍ ni̍. 4Nu̍a̍ā Mɛ̄lɛ̄ka̍ Ya̍a̍wɛ̄ɛ̄ lo̍o̍ku̍ chi̍e̍ēŋndo̍ chōo̍ cho̍o̍ a̍ lɛ̄ŋ tōōsīāā ni̍.
Mɛ̄lɛ̄ka̍ kɛ̄si̍ wāna̍ chi̍o̍o̍ I̍dɛ̄ŋ
Bōōndi̍i̍ Mɛ̄lɛ̄ka̍ Ya̍a̍wɛ̄ɛ̄ o̍ to̍o̍si̍a̍a̍ chi̍e̍ēŋndo̍ chōo̍ cho̍o̍ a̍ lɛ̄ŋ nde̍, 5nyɛ̄ o̍ nyɛ̄ bɛ̍ɛ̍ ndu̍ o̍o̍ vi̍l lɔ̍ le̍cho̍o̍ le̍, tɔ̄lɔ̄ɔ̄ bɛ̍ɛ̍, bīl bɛ̍ɛ̍, kāni̍ fo̍ndōle̍ ndu̍ o̍o̍ to̍sa̍ wɔ̍ mī pīɔ̄ɔ̄ ndu̍ o̍o̍ si̍a̍ wɔ̄ o̍ chi̍e̍ēŋndo̍ chōo̍ le̍. Ndu̍yɛ̍ wānā bɛ̍ɛ̍ ve̍ wɔ̍ ō ndu̍ o̍o̍ to̍sā wa̍llo̍ lēcho̍o̍ le̍. 6Lɛ̄ŋ ko̍ mɛ̄ŋnda̍ŋ ma̍a̍ fu̍lā mī ma̍a̍ pɔ̍ɔ̍līāā lɛ̄ŋnde̍ŋ ni̍.
7O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ to̍o̍sīāā wānā pɔ̍nɔ̍ɔ̍ a̍ pūūlōo̍ lɛ̄ŋ. Mbo̍ hūl hūēīyi̍i̍ yɔ̍ŋgū yo̍o̍mōo̍ ve̍ ndu̍ o̍ lāmīli̍ŋ, mi̍ wānā pɔ̍nɔ̍ ko̍ŋ sīmnu᷄ŋ nyɛ̄ yōōmāā.
8O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ tu̍āl kpe̍lo̍o̍ o̍ fo̍ndāŋndo̍ dīōla̍ŋ āā I̍dɛ̄ŋ, kūmbū pāa̍le̍ŋ lē chāŋ ndo̍, mbo̍ kɛ̄sī wānā pɔ̍nɔ̍ o̍ to̍o̍si̍a̍a̍ wo̍ lo̍ŋ. 9Mi̍ Mɛ̄lɛ̄ka̍ tōsā mi̍ yɔ̄mnde̍ ī wūl lɛ̄ŋ o̍ kpe̍lo̍o̍ ho̍ō ni᷄ŋ, yɔ̄m o̍ yɔ᷄m na̍ŋ le̍ tōfā ndu̍yɛ̍, mbo̍ nāŋ le̍ dīo̍o̍ mi̍ ī wūl. Mbo̍ tōsā vɛ̄lɛ̄ mi̍ yɔ̄m kōmɔ̄ɔ̄ ndɔ̄ɔ̍ tōsā mī wānā wa̍ yōōmū le̍ fɛ̍ɛ̍ŋ fɛ̍ɛ̍ŋ ndo̍, a̍ yɔ̄m kōmɔ̄ɔ̄ ndɔ̄ɔ̍ tōsā mī wānā si̍na̍ sūɛ̍i̍ wɔ̍ɔ̍ŋnde̍ a̍ ī kɛ̄ndɛ̄i̍ yo̍, ī wūl mi̍ ī sīm o̍ kpe̍lo̍o̍ ho̍ō tɛ̄ɛ̄ŋ.
10Mi̍ Mɛ̄lɛ̄ka̍ tōsā mi̍ pīo̍o̍ hīnī kpa̍la̍ŋ o̍ kpe̍lo̍o̍ ho̍ō ni᷄ŋ I̍dɛ̄ŋ, le̍ ndu̍ pɔ̄ɔ̄līa̍a̍. Mɛ̄ɛ̍ pīo̍o̍ ho̍ō ō kēlū I̍dɛ̄ŋ tɛ̄ɛ̄ŋ, mbo̍ pīɔ̄ū lɛ̄ūwo̍ŋ o̍ kpe̍lo̍o̍ ho̍ō ni᷄ŋ sa̍lā hīɔ̍ɔ̍lu̍. 11Lɛ̄ūvīī tāse̍i̍ dīōla̍ŋ āā, Pi̍sīɔ̄ŋ. Mi̍ lɛ̄ūve̍ he̍ī tūūsū mi̍ ī kūā a̍ tūūnɔ᷄ŋndo̍ mi̍ ī kīālū lɛ̄ŋndē Ha̍vi̍lāle̍ŋ tɛ̄ɛ̄ŋ kpa̍li̍. 12Lo̍ŋ ko̍o̍līi̍ŋ kɛ̍ndɛ̄ kɛ̍ndɔ᷄ŋ ŋ̄ chō ni̍, nyɛ̄m chūŋ kɛ̄ndɔ᷄ŋ, a̍ pōūtā kɛ̄ndɛ̄lā nda̍ vēēlū āā ɔ̍nɛ̍sī la̍ŋ bɛ̍ɛ̍ lā chō lo̍ŋ. 13Lɛ̄ūvīī dīi̍ŋ ndūɛ̍i̍ dīōla̍ŋ āā Ki̍hɔ̄ŋ. Mi̍ lēūve̍ he̍ī kīālū lɛ̄ŋndē Ku̍sīle̍ŋ tɛ̄ɛ̄ŋ. 14Lɛ̄vīī yāa̍ ndūɛ̍i̍ dīōla̍ŋ āā Ti̍ki̍li̍sī. Ndi̍ tu̍u̍su̍ mi̍ ī kēēkū o̍ lɛ̄ŋndē Āsi̍i̍līāāle̍ŋ bā pāa̍le̍ŋ lē chāŋ ndo̍ ni̍. Lɛ̄ūvīī hīɔ̍ɔ̍lu̍e̍i̍ dīōla̍ŋ āā, Yūfi̍lu̍a̍tīī.
15Mi̍ Mɛ̄lɛ̄ka̍ Ya̍a̍wɛ̄ɛ̄ o̍ kɛ̍sī wānā pɔ̍nɔ̍ o̍ to̍sa̍ wo̍ I̍dɛ̄ŋ, le̍ mbō wa̍ wa̍llo̍ lēni᷄ŋ ndu̍yɛ̍, mbō wa̍ ndu̍ māndāa̍. 16O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl po̍ o̍ to̍o̍si̍a̍a̍ wo̍ āā, “Yɔ̄m o̍ yɔ᷄m cho̍ o̍ kpe̍lo̍o̍ ho̍ō ni᷄ŋ ā dīā. 17Kɛ̍ yɔ̄m kōmɔ̄ɔ̄ ndɔ̄ɔ̍ tōsā mī wānā si̍na̍ sūɛ̍i̍ wɔ̍ɔ̍ŋnde̍ a̍ ī kɛ̄ndɛ̄i̍ yo̍, di̍ā ndu̍ le̍ pa̍. O̍ pāa̍le̍ŋ ni᷄ŋ bɛ̍ɛ̍ tē ā dē ndu̍ pɛ̍ ā vī.”
18O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ di̍mī āā, “Ō ni᷄ŋ mī wānā pɔ̍nɔ̍ɔ̍ ō wa̍ ndu̍ pīlɛ̍ kpe̍ le̍. I̍ cho̍ wānā ma̍lāa̍ tōōsīāā le̍ ndu̍, o̍ bɛ̍nda̍ le̍ ndu̍ wo̍.” 19Vīsī o̍ vīsī a̍ yōū o̍ yōū Mɛ̄lɛ̄ka̍ Ya̍a̍wɛ̄ɛ̄ o̍ to̍o̍si̍a̍a̍, a̍ pūūlōo̍ lɛ̄ŋ o̍ to̍o̍si̍a̍a̍ nda̍ ni̍. Mbo̍ hūŋ a̍ nda̍ nāa̍ pōo̍ chūā mi̍ pōo̍ kē nda̍ dīōla̍ŋ. Ndu̍yɛ̍, lādīō o̍ lādīō pōo̍ ho̍ō ō ke̍ nyɛ̄ o̍ nyɛ̄ yōōmāā, la̍ŋ la̍ lo̍ nda̍ chōo̍ ni̍. 20Mi̍ pōo̍ ho̍ō kē vīsīāā chi̍e̍e̍ ni̍ŋnda̍ dīōla̍ŋ, a̍ yōūwa̍, a̍ vīsī o̍ vīsī yōndō. Kɛ̍ ndu̍yɛ̍, pōo̍ ho̍ō ndu̍ o̍o̍ sɔ̍la̍ wɔ̍ wa̍nā ma̍lāā ō ndu̍ o̍o̍ bɛ̍nda̍ le̍ ndu̍ wo̍ le̍.
21Le̍ he̍ī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ hi̍vī pōo̍ o̍ lūa̍a̍ŋ pu᷅ŋ. Hīvīo̍o̍ ndu̍ o̍ lūa̍a̍ŋ, mbo̍ sōlī ndu̍ kpɛ̄ndɛ̄i̍ ī pīlɛ̍, mbō mīŋgī vīsīe̍i̍ o̍ fo̍ndāŋ kōŋ. 22Mi̍ Mɛ̄lɛ̄ka̍ Ya̍a̍wɛ̄ɛ̄ chu̍ā kpɛ̄ndɛ̍i̍ o̍ so̍li̍ pōo̍ o̍ ŋ̄dīāl le̍, mbo̍ tōōsīāā wānā la̍nɔ̍ɔ̍ a̍ ndi̍. Mbo̍ hūŋ a̍ chūa̍a̍ ho̍ō nāa̍ pōo̍ chūā. 23O̍ ko̍ŋ kɔ̍ɔ̍lī, mi̍ pōo̍ dīmī āā,
“Mi̍ chē, ho̍ō cho̍ ni᷄ŋ pāa̍ fu̍la̍ o̍ pāālā nīla̍ŋ ni᷄ŋ ndo̍ ni̍,
dīālle̍ i̍ fu̍la̍ o̍ dīāllūŋ nu᷅ŋ ni᷄ŋ nde̍ cho̍ he̍ī ni̍.
Dīōlā ndɔ̄la̍ŋ āā, ‘Wānā la̍nɔ̍ɔ̍’ kāni̍ fu̍u̍le̍, pōo̍ o̍ ŋ̄dīāl nda̍ sōli̍ ndu̍ ni̍.”
24Le̍ sa̍bōo̍ ho̍ō pōo̍ mɛ̄ī fi̍nyā ndɔ̍ a̍ kāla̍ ndɔ̄ mbō chālnu̍ŋ nda̍ la̍a̍ ndɔ̄ ni̍, mā sīmnu᷄ŋ di̍ālle̍ ī pīlɛ̍.
25A̍ bōōndi̍i̍ ke̍ŋ pōo̍ ni̍, la̍a̍ ndɔ̄ ni̍, ā wa̍ tūūlā fo̍ndō, kɛ̍ si̍ɔ̍mbu̍la̍ ve̍ nda̍ le̍.
Селектирано:
Chɛ̄nɛ̍se̍ē 2: YM
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Kisi Bible © Bible Society in Liberia, 2015.