Mt 3
3
Yohannes Ndu-bodo akad mbëmbë foe
Mk 1,2-7; Lk 3,3-10.15-17
1Mëlu mëte, ndò Yohannes Ndu-bodo angasò, angayedan Mbëmbë Foe a nkod-nnam ya Yudea 2na: «Vëṅan, edzoe ya yob esubu ya babi.» 3Amu ṅnyè anë e nyò profet Isaias angadzo na: «Kiṅ e nyò ayëdan a nkod-nnam; Komëzan zen Nti, limëṅan mindzòṅ mie.»#3,3Is 40,3 4Yohannes te angabë abëlë ewòman mimvòd mi kamele, ai kanda ekob atii nyè a angëdëg, bidi bie bitoa bëmbasana ai woe mëfan#3,4Bidi ai biyie bi Yohannes bialëdë na anyiṅ enyiṅ profèt, atugu nyòl dzie. Yohannes afulan ai profèt Elias ha, amu profèt Elias angabë asye a Yordan a si.. 5Ndò fò tisòn Yerusalem ai Yudea asë ai sug nnam esë ya Yordan engabë zaag abë nyè, 6ndò bëngabë bëduuban a osoe Yordan abë nyè, bëmëmë minsëm miaban. 7Ayen angayen abui bëfarisea ai bësadukea bëzaa asu ṅduan woe, ndò adzo ai bò na: «A mvòṅ nyòò nyi, za alëb mina na mitub olun wazu#3,7«Olun wazu»: olun Zamba watyan abui biyòṅ na ayi bò bod nkat.?» 8Wuman hm mbëmbë ebuma efòl-minnëm. 9Mibë kë miadzo a minnëm mian na: «Bibëlë esya, Abraham.» Amu madzo ai mina na, Zamba anë ngul ya abò na bòn bëbyali Abraham e ngòg nyi. 10Obaè ontoa ya a tin ele. Ele esë yawum ki mbëmbë ebuma yayi tsigëban, ewoaban a ndoan. 11Ma madu mina a mëndim asu avëṅan, e nyò azu ma a mvus anë ngul alodo ma; masëki nyè dzam tii bësilfas a mëkol. Ṅnyè ayi mina du a Mfufub Nsisim ai ndoan. 12Abëlë esòbòlò a mò, akë a sëgzë ngëṅ, akoan mëkoe moe a angunda. Bivula mbiè ayi tumi e ndoan enë tègè dim.
Ṅduan Yesus
Mk 1,9-11; Lk 3,21
13Ndò Yesus angasò a Galilea, asòò abë Yohannes a Yordan na aduban abë nyè. 14Yohannes angadzègè nyè, nyè na: «Ma mayaṅan na maduban abë wa, wa ongazu ki abë ma nga?» 15Ndò Yesus afèd, nyè ai nyè na: «Dzoge të, amu eyë biayean dzala sosoo asë nala.» Ndò angadzoge nyè. 16Eyòṅ Yesus angaduuban, ndò angabed a kindig etye etye. Antëm na, ndò bibas bi yob bingayaèban nyè, antala Nsisim Zamba osusu anë obëṅ, osò nyè kui a nyòl. 17Ndò kiṅ yasò a bibas bi yob edzoo na: E nyòlò anë mbaṅ mòn wama ya mafuu nnëm#3,17Zamba adzo abui biyòṅ a Bibel na angadiṅ mòn woe (Abonde 22,2; Bësalmen 2,7)..
Селектирано:
Mt 3: NTE12
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
MKPAMAṄ AMVOE Nouveau Testament en langue Ewondo © Bible Society of Cameroon, 2012.