Yowani 2
2
Karama ꞌBa Gbe Mï Kana
1Di pötö töꞌdö dɔ rïyö tine karama ꞌba gbe ëdï Kana mï dɔyayi ꞌba Galilaya. Ma ꞌba Yësu ni ëdï bi ꞌba gbe nima yayi. 2Kina Yësu ni ëdï gbï yayi ti bɔ kösö gɔ bo ga. 3Kina layi kote rönï ŋgï, tine na ma ꞌba Yësu ni kënyï kari kiya zi bo, iya te, “Oŋgɔ te, layi inza kpe.”
4Bo iya te, “Iya, nï na dë ꞌdɔ kiya ndɔbɔ zö. Kada ꞌba tileme ma ömö dë gba.”
5Ma bo iya zi ya ame ga këdï koja laja mï gɔ bi ꞌba karama yayi ne, iya te, “Oꞌdɔke wa pili ame ga bo këdï kiya ziye ne.”
6Dömïrï ꞌba kete mini ma löbulöbu ëdï modɔɔkɔtɔ yayi ame kose ꞌdeni di mï döku ne. Dömïrï naga nima ma kɔtɔ ëdï koto sapiya ŋbö muyï. Kete naga nima na gɔ dölëtï ꞌba Yudayi ni rɔ a ꞌba turögö rɔ wa. 7Kina Yësu kiya zi bɔ koja laja naga nima, iya te, “Oꞌdeke mini koso mï wa naga nime.”
Kina lïjë koꞌde mini ŋgï mï kete tönë ga koso koriya ti kpamo. 8Kina bo kiya zïnnï, bo iya te, “Unöke di mï kete naga nima kotoke kari zi bɔ dɔ gbe nime ꞌdë.”
Kina lïjë kunö ŋgï koto kari. 9Bɔ dɔ gbe nima inene mini tönë Yësu kuyï ꞌdeni rɔ layi ne ŋgï, tine bo ikali dë unö di yala. Bɔ koja laja naga nima na ŋge kikali. Kina bɔ dɔ gbe nima kënyï kiya zi mëꞌdë ꞌba nyiti, 10iya te, “Bilaka pili ëdï koja layi ma kata na titi dɔgba zi ŋba ꞌbënnï ga. Kina ɔdɔ layi kaꞌda ŋba ꞌdeni tine na ꞌjaa këdï koja siŋga ma këpï mo. Ne ꞌbeye tɔ nime layi ma laka na za kusuke dɔmo ŋbö koꞌja kabate.”
11Yësu oꞌdɔ gɔ kotɔ ma dɔgba abo nime ꞌdeni di Kana. Kina bɔ kösö gɔ bo ga kikali bo ŋgï gɔmo rɔ kole ꞌba Bɔkoꞌba.
Tɔdɔ ꞌBa Yësu Mï Reki ꞌBa Rö Löbu
(MT 21:12-13; MK 11:15-17; LK 19:45-46)
12Di pötö lende nima na Yësu ni kënyï ŋgï ti ma bo ni ti löndö bo ga ti bɔ kösö gɔ bo ga kari Kaparanoma. Lïjë kari koloma mbowa yayi.
13Kina ɔdɔ kada ꞌba karama ma löbu ꞌba Yudayi ni ame kïdëkï möyï mo rɔ Pasaka ne kola ꞌdeni ŋgɔsi tine, Yësu ni ënyï ŋgï kari Yerosalema. 14Tine ɔdɔ bo kömö ꞌdeni yayi, bo iteli ŋgï kari mï reki ꞌba rö löbu ꞌba Bɔkoꞌba. Bo ari koꞌja bɔ ndögö ni kotɔtɔ rönnï ꞌdeni yayi këdï ga rɔ tugö sa ni ti kamölö ni ti matukpuru ni. Ya mɔtɔ ga këdï ꞌbënnï tutë gïrïsï. 15Kina bo kogba kabi ŋgï koli rɔ nyɔꞌbɔ bo kari koga lïjë timo yaga di yayi ti kamölö ni ti sa ꞌbënnï naga nima. Kina bo kïtïŋï dɔ tarabiza ꞌba bɔ kutë gïrïsï ni ŋgï bërï. Gïrïsï mo ga kolɔdɔ kïyëyï rönï mï yayi. 16Bo iya zi ya ma këdï ꞌbënnï rɔ tugö matukpuru naga nima, bo iya te, “Ënyïke yaga ti eꞌbe naga nima di bine. Rö ꞌba ꞌbu ma nime kinza koꞌdɔke dë kpe rɔ bi ꞌba ndögö.”
17Lende nime iꞌdi bɔ kösö gɔ bo ga ŋgï komeri lende ma tönë kugu ꞌdeni mɔlo mï buku ꞌba Bɔkoꞌba ne, ame kiya te, “Lende ꞌba gɔ rö ꞌbï nime Bɔkoꞌba oŋma dökïꞌdï ma ŋgï kɔzɔ paꞌdo tara.”
18Kina turu ꞌba Yudayi ni kënyï kititi bo, lïjë iya te, “Nï, lende ꞌbï naga nime koꞌdɔ ne, waꞌdi ga na ti koꞌdɔ tɔne ame ꞌdɔ dikali yi timo rɔ ma laka omba Bɔkoꞌba na ŋgï koja yi tako toga bilaka naga nime yaga?”
19Bo ënyï kileki kiya zïnnï, bo iya te, “Rö ꞌba Bɔkoꞌba nime, ɔdɔ kitikɔke yaga, ti moꞌdɔ kileki teyi rɔ ma laꞌja mï töꞌdö dɔ mota.”
20Lïjë iya te, “Rö nime toꞌba mo oto bilaka ŋbö kɔmɔ kɔɔ ꞌbutë sowɔ döömu dɔɔkɔtɔ. Ti kɔꞌbɔ toꞌba mo kileki teyi rɔ ma laꞌja ŋge mï töꞌdö dɔ mota?”
21Dëmba lïjë ikali ꞌjɔ ꞌba lende abo nima dë. Bo ëdï za kiya yida rɔ bo. 22Kina ɔdɔ bo kënyï kɔdɔ ꞌdeni yaga di mï tölë tine, kina ꞌjaa bɔ kösö gɔ bo ga kënyï tomeri gɔ lende tönë ga. Kina lïjë kikali ꞌjaa omba lende nime ëdï ꞌdeni ŋgï rɔ ma laka kɔzɔ lende ma tönë kugu mï buku ꞌba Bɔkoꞌba ne.
23Koꞌja bo këdï Yerosalema yayi mï kada ꞌba karama ꞌba Pasaka nima, bo oloma ꞌdeni toꞌdɔ lende mɔtɔ ga ame lende mo kigayi bilaka ne, kina lïjë kikali ŋgï bo ako di zi Bɔkoꞌba. 24Tine bo ikali lende ꞌbënnï ga me rɔ kɔtɔkɔtɔ. Kina bo oꞌdɔkɔ dë tiya lende abo ga pili zïnnï. 25Bo ikali lende ꞌba dökïꞌdï bilaka me rɔ kɔtɔkɔtɔ kinza ma bɔtɔ kiya zi bo.
Селектирано:
Yowani 2: BEK
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
© 1998, Wycliffe Bible Translators, Inc. All rights reserved.