Aˇ dahˬ 6
6
Tsawˇ haˬ zaˬ maˬ tsaˬ maˬ dawˇ-eu jeˬ mˇ-euˬ
1Tsawˇ haˬ zaˬ deuˬ miˇ tsaˬ kʼoeˇ taˆ jawˇ byah jiˇ-awˇ, zaˬ miˬ aˬ buˇ zaˬ guˬ deuˬ kʼawꞈ jawˇ myaˬ laˇ-euˬ meh. 2Kʼoeˇ ngeh, mˬ taˆ zaˬ yo deuˬ miˇ tsa zaˬ miˬ kʼoeˇ deuˬ aˇ gʼehˇ muiˬ gaˇ ya mawˇ-awˇ, yawˬ ha kʼaˇ mawꞈ leˇ-eu gʼaˬ-ahˇ sheuˬ geuꞈ-euˬ meh. 3Kʼoeˇ ngeh, Sahˬpaˬ Miˬyehˇ heu loꞈ-ehˇ ehˇ-eu meh. “Tsawˇ haˬ zaˬ-ahˇ aˇ kʼoꞈ gʼawˬ myahˇ ni maˬ paˇ bi dehꞈ ma. Aˬ yawꞈ maꞈ-aˬ, gʼawˬ myahˇ ni maˬ gmˬ-eu shiˬ shaˬ jiˇ gʼawˇ mawˇ pyeuꞈ-eu meh. Aˬ kaˇ naˇ, aˬ yawꞈ maꞈ-ahˇ tiˬ yaˇ nyiˬ tseˇ kʼoꞈ taꞈ-ehˇ maˬ paˇ bi dehꞈ dzehˬ ma.” 4Aˇ nah aˇ yamˬ kʼoeˇ yamˬ laꞈ kʼoeˇ maˬ ehˇ, kʼoeˇ sawˇ miˇ tsa dehꞈ ka leꞈ-euˬ aˇ nah aˇ yamˬ deuˬ laꞈ kʼoeˇ maˬ ehˇ, mˬ taˆ zaˬ yo deuˬ hawˇ-eu miˇ tsa zaˬ miˬ deuˬ sheuˬ dahˬ dzaˬ taꞈ-awˇ dehꞈ le-euˬ, aˇ gahˬ aˇ goˇ muiˬ dui dui-eu tsawˇ haˬ zaˬ deuˬ jawˇ-euˬ meh. Tsawˇ haˬ kʼoeˇ deuˬ-aˬ, huiˬ-eu gaˇ deuˬ mˇ-awˇ tsawˇ myahˇ doˆ dui dui-euˬ, aˇ hu ba-euˬ tsawˇ haˬ deuˬ pyeuꞈ-eu meh.
5Miˇ tsaˬ kʼoeˇ taˆ jawˇ-eu tsawˇ haˬ zaˬ yawˬ gʼaˬ na luꞈ, maˬ tsaˬ maˬ dawˇ-eu jeˬ tehꞈ-ehˇ mˇ-awˇ, aˬ myah luꞈ maˬ muiˬ maˬ jaˬ-eu gaˇ kawˆ tehꞈ-ehˇ shaˇ noeˬ luꞈ gaˇ Sahˬpaˬ Miˬyehˇ ya mawˇ-euˬ meh. 6Kʼoeˇ ngeh, Miˇ tsaˬ kʼoeˇ taˆ tsawˇ haˬ zaˬ-ahˇ maˬ beh taˬ law nmˇ-aˬ, gʼaˬ law hawˇ miˇ-a lehˇ, aˬ yawˇ yawꞈ noeˬ poˆ leˇ dui dui-euˬ meh. 7Kʼoeˇ ngeh, aˬ yawꞈ heu loꞈ-ehˇ ehˇ-eu meh. “Ngaˬ neh beh taˬ-euˬ tsawˇ haˬ zaˬ heu deuˬ dawˬ tawˆ luꞈ-ahˇ ngaˇ laˆ cawˆ byoˆ jiˇ ma. Jeˬ zaˬ hawˇ-eu ho zaˬ nga jiˇ dawˬ tawˆ luꞈ-ahˇ kʼawꞈ, ngaˇ laˆ byoˆ jiˇ ma. Teu deuˬ-ahˇ beh-euˬ baˬ da neh ngaˇ aˇ dzehˬ-ehˇ ya noeˬ shaˬ nya.” 8Ehˇ kʼawꞈ, Noˇaˬ gʼaˬ-ahˇ-aˬ, Sahˬpaˬ Miˬyehˇ nui kʼahˇ shiˇ-eu meh.
Noˇaˬ
9-10Heu-aˬ, Noˇaˬ-euˬ gaˇ kawˆ pyeuꞈ-eu meh. Aˬ yawꞈ-aˬ, Sheˬmaˆ, Haˬmaˇ, Yaˬpahˇ lehˇ myahˇ-euˬ aˬ li smˬ li jawˇ-eu meh. Noˇaˬ-euˬ ziˇ-ahˇ, miˇ tsaˬ kʼoeˇ taˆ iˬ baˇ maˬ mˇ-ehˇ dawˇ coe ni dehꞈ-euˬ tsawˇ haˬ Noˇaˬ tiˬ gʼaˬ jawˇ-eu tehꞈ meh. Aˬ yawꞈ-aˬ, Miˬyehˇ-ahˇ cawˬ cawˬ taꞈ-awˇ dehꞈ-euˬ meh. 11Ehˇ kʼawꞈ, tsawˇ haˬ zaˬ dawˬ tawˆ luꞈ, Miˬyehˇ mehˬ shi maˬ muiˬ maˬ shawˇ-eu tsawˇ haˬ tehꞈ-ehˇ pyeuꞈ jiˇ-awˇ, yawˬ gaˇ na luꞈ yaw cawˆ jeˬ tehꞈ-ehˇ mˇ luꞈ-eu meh. 12Miˇ tsaˬ-ahˇ Miˬyehˇ haw ngeh, cawˆ dui dui-iˇ taˬ-euˬ gaˇ ya mawˇ-euˬ meh. Aˬ jeˬ miˇ neh ehˇ naˇ, tsawˇ haˬ zaˬ dawˬ tawˆ luꞈ yaw haiˬ jeˬ tehꞈ-ehˇ mˇ-awˇ, maˬ tsaˬ maˬ dawˇ-eu jeˬ laꞈ kʼoeˇ tehꞈ-ehˇ yaw dehꞈ dehꞈ luꞈ-eu meh.
13Noˇaˬ-ahˇ Miˬyehˇ ehˇ nehˬ-eu, “Tsawˇ haˬ dawˬ tawˆ luꞈ bi shiˇ jiˇ-awˇ, ziˇ dahˬ bi dahˬ-iˇ ma lehˇ ngaˇ noeˬ tsehˆ taˬ-euˬ ma. Aˬ yawꞈ maꞈ dawˬ tawˆ luꞈ piˬ-iˇ byoˆ-iˇ jiˇ ngeh keuˆ ni, ngaˇ jahˇ nehˬ ma. Aˬ jeˬ miˇ neh ehˇ naˇ, miˇ kʼahˬ kʼahˬ lah ni aˬ yawꞈ maꞈ neh yaw haiˬ jeˬ mˇ byah jiˇ taˬ-euˬ meh. 14Daˇ kawˬ yaw muiˬ jeˬ poˆ-awˇ, nawˬ-euˬ gʼaˇ duˬ saˇ baoˬ tiˬ laˇ tsoˆ-awˬ. Laꞈ kʼoeˇ paw aˇ lawˆ gʼawˬ mya lawˆ taw lawˆ-awˇ, laꞈ kʼoeˇ laꞈ nyiˇ nyiˬ pyawˬ luꞈ, aˇ dziˬ neh yaw muiˬ paˬ-ehˇ lehꞈ gʼoeˬ-awˬ. 15Yaw mahˇ paw shiꞈ tseˇ ngaˬ lmˇ, yaw jeˇ paw tseˇ nyiꞈ lmˇ nui paˆ, yaw goˇ paw shiꞈ lmˇ nui paˆ byah ni tsoˆ-awˬ. 16Saˇ baoˬ kʼoeˇ laˇ-euˬ nymˇ mˬ joe ngeh, kaˇ pyawˇ hawˇ-eu behˆ yaw kaˬ maˬ bi tuˆ ni, tiˬ caˆ bi dahˇ-awˬ. Saˇ baoˬ kʼoeˇ laˇ-ahˇ smˬ tiˆ tsoˆ baw-awˇ, pyawˬ ma pyawˬ-ahˇ laˇ gʼoˆ tiˬ gʼoˆ bi dahˇ-awˬ. 17Miˇ tsaˬ kʼoeˇ taˆ kʼaˇ dehꞈ kʼaˇ jawˇ-eu jeˬ dawˬ tawˆ luꞈ-ahˇ laˆ cawˆ-eu gʼaˇ duˬ, iˇ cuꞈ bi dahˬ daˆ laˇ ma. Miˇ tsaˬ kʼoeˇ taˆ kʼaˇ dehꞈ kʼaˇ jawˇ-eu jeˬ dawˬ tawˆ luꞈ shiˇ jiˇ tehꞈ-a. 18Ehˇ kʼawꞈ, nawˬ nehˬ-ehˇ ngaˇ saˇ jaˇ dzaˬ ma. Nawˬ-euˬ miˬ zaˬ, nawˬ-euˬ aˬ li deuˬ hawˇ-eu, nawˬ-euˬ kuiˬ ma deuˬ nehˬ-ehˇ saˇ baoˬ laꞈ kʼoeˇ uˇ leˇ-awˬ. 19Miˇ tsaˬ kʼoeˇ taˆ kʼaˇ dehꞈ kʼaˇ jawˇ-eu jeˬ aˇ jeuˬ maˬ ya shiˇ cuˆ jiˇ ni, tiˬ jeˬ-euˬ tiˬ gu, nawˬ nehˬ-ehˇ saˇ baoˬ laꞈ kʼoeˇ nyehꞈ uˇ gʼeh-awˬ. 20Aˇ jiˇ dawˬ tawˆ luꞈ maˬ ehˇ, jeˬ zaˬ dawˬ tawˆ luꞈ maˬ ehˇ, miˇ tsaˬ-ahˇ joe joe-ehˇ kʼaˇ cah-eu jeˬ dawˬ tawˆ luꞈ maˬ ehˇ, aˇ jeuˬ maˬ ya meh-iˇ ni, tiˬ jeˬ-euˬ aˬ poeˇ aˬ ma tiˬ gu nyehꞈ uˇ gʼeh-awˬ. 21Naw maꞈ gʼaˇ duˬ maˬ ehˇ, jeˬ zaˬ hawˇ-eu ho zaˬ nga jiˇ deuˬ gʼaˇ duˬ maˬ ehˇ, kʼaˇ loˬ-eu dzaˬ-eu dawˇ-eu jeˬ dawˬ tawˆ luꞈ kʼawꞈ, saˇ baoˬ laꞈ kʼoeˇ shaˇ dawˆ-awˬ.” 22Miˬyehˇ neh kʼaˇ ehˇ nehˬ-euˬ loꞈ-ehˇ Noˇaˬ jahˇ-euˬ meh.
Селектирано:
Aˇ dahˬ 6: AHK
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Akha Bible Revision (Latin Script) © Thailand Bible Society, 2011.