LUKE 17
17
Nuan
(Mt 18.6-7,21-22; Mk 9.42)
1Jesu niu pakhommai khuga din-e, “Maidungniu nuan ga kaokhaira bamme, chiudi sise pipad khaibo maira dejiuga san salo! 2Kasiambo nahmai khat haitu pijiu nuan ga kaokhaira kambo suang, tatupen kadibo khat pawongga khinkhai lujiu duipuiga thonkhai miboniu paleng wi-nkiu-e. 3#Mt 18.15.Sijengniu, naliuniu kambo hinaga ningting silo!
“Nasingnaniu nakhuga mao khaisai, patu rukhai bilo; sichiujiu paniu palung liwang lansai, patu kuakkhai bilo. 4Paniu nakhuga naikhat maolon chinnia midi, paniu nakhuga wangjiu, “I alung limide,’ chiusai nangniu patu kuak khaibi rabo-e.”
Malumbo
5Khommaidung siniu Rapiu khuga din-e, “Aliu malum pidi khailo.”
6Rapiu niu paokakge, “Naliu malumse njengsiu langga bamsai, naliuniu haibo marebang haitu, haigasu npad lujiu uibo duipuiga lungmilo chiujiu dinsai, sise padmi rabo-e.
Kavang Khatgu Ngiudon
7“Naliu mai khat vangpiu siniu chalu phujiu bamme, maksai milytu khuanjiu bamme chiukhe. Paniu chalu lamsu wangboga, naliuniu patu kalangjiu katiu tiusulo chiu din rama? 8Sichiu lakge! Sibosung haichiu dinrabo-e, ‘Nakhen n-hang lujiu aleng katiu kaden khailo khatdi Iniu tiuloi-sakloi makthen khuanlo, sibo sainiu nang tiulo chiujiu dinrabo-e.’ 9Sichiujiu kavang siniu sibo chamtanse majaibo donniu patu thuonbo chamse din rama? 10Naliudi haise kumbo-e; naliutu kamraleng pikhaibose kamloi dasai, haichiu dinno, ‘Aliu hai wadi makbo vangdung-e, aliuniu kamrabo hina kamloi lude.’”
Jesu Niu Ka-Nphenmai Khang Kariutu Wikhaibo
11Jesu niu Jerusalem lam tadra chiujiu Samaria nai Galilee kakga tadpadle. 12Paniu nam khatga ngutboga ka-nphenmai khang kariuniu patu adao-e, siga paliuniu chap npen lujiu, 13senjiu din-e, “Paohubo, Jesu yo! Aliutu lungsa khailo!”
14 #
Lev 14.1-32. Jesu niu paliutu ngaolujiu paliu khuga din-e, “Tadsulo, singkudung khuga naliutu phuira lenkhai bilo.”
Sichiujiu paliuniu tadkinboga, paliuse masan mide. 15Paliu ruangga khangkhat siniu wimide chiubo siluboga, malanwang paniu Tingwang tu pakhuan tanjiu thuon sude. 16Sichiujiu paniu Jesu phibangga makhum kiujiu patu thuonkiude. Haise Samaria maipiu-e. 17Siga Jesu niu din-e, “Khang kariutu wikhai mibo-e; khang chakiu sira delam bammilo? 18Haibo sangdiumai nakhaniu dechiujiu Tingwang tu thuonra wangjiulo?” 19Sichiujiu Jesu niu pakhuga din-e, “Sulujiu tadsulo, nagu malum siniu natu wikhai mide.”
Tinggen Kadih Wangrabo
(Mt 24.23-28,37-41)
20Pharisee maidung khangsianiu Tingwang gu Chawangdihse dedaoniu wangralo chiubo Jesu khuga maniu-e. Paniu haichiu paokakge, “Tingwang gu Chawangdih sira haichiujiu wangne chiubo ngaolakge. 21Mai khatniu, ‘Phuilo, haiga bamme!’ Maksai ‘Siga bamme!’ chiujiu dinlakge; palamra Tingwang gu Chawangdihse naliu ruangga bambo-e.”
22Sibosai paniu pakhommaidung khuga din-e, “Naliuniu Chamai Nahpiu wangbo tingmiktu ngaoni sune, chiudi naliuniu sise ngaolakge. 23Siga maidungniu naliu khuga ‘Phuilo, siga bamme!’ Maksai ‘Phuilo, haiga bamme!’ chiu dinsune. Chiudi sise phuira tadtulo. 24Hengri kalikboga ting pake khat lamniu pake khatlam ngaochiabo kumjiu, Chamai Nahpiu wangbo tingmikdi sichiu rabo-e. 25Chiudi raiboga pase magenthiu khengrabo-e, khatdi haibo ken-ga lungmaidung siniu patu lukhai lakge. 26#Chab 6.5-8.Noah ken-ga padmibo kumjiu Chamai Nahpiu Tingmik gadi padsu rabo-e. 27#Chab 7.6-24.Mai hinaniu tiujiu-sakjiu, khatdi tanao-tanah thiujiu bamboga Noah niu malee lungga ngutmibo sai tadui diwangjiu paliu mathiutu kamshat mibo-e. 28#Chab 18.20; 19.25.Maksai, haise Lot ken-ga kumrabo-e. Mai hinaniu tiujiu, sakjiu, khatdi chali-alijiu, khatdi chaky chalu thiujiu bambo-e. 29Chiudi Lot niu Sodom tu phutlujiu tadmibo naise tinggen lamsu chami nai chaganmipiu siniu riukiu khaijiu paliu mathiutu kamshat kam mibo-e. 30Sise kumjiu Chamai Napiu tingmik sidi maduwang rabo-e. 31#Mt 24.17-18; Mk 13.15-16.Sibonai mai khatniu paky npom riga bamdi pagu mania khoira nkum mak rabo-e; sise kumjiu chalulam tadmibo paniudi paky lam malanwang mak rabo-e. 32#Chab 19.26.Lot naotu maningtaolo! 33#Mt 10.39; 16.25; Mk 8.35; Lk 9.24; Jn 12.25.Mai khatniu paringting ranlura matansai hami rabo-e; mai khatniu paringtingse hakhai misai, ranlu rabo-e. 34Iniu naliu khuga dinbo-e, “Sibonai nchunse mai khangnia tazi khatga jijiu bamdi, khang khattu lumine, khang khattu saodiak sune. 35Maipui khangnia athao bam niudi, khang khattu lumine, khang khattu khaidiak sune. 36Maipiu khangnia chaluga changam kambam niudi, khang khattu lumine, khang khattu khaidiak sune.
37Khommaidung siniu maniu-e, “Rapiu yo, dega dechiu padsu ralo?”
Jesu niu paokakge, “Kashaibo phaw bambo gase, chamitiuleng wang madui rabo-e.”
Селектирано:
LUKE 17: LIANBSI
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Liangmai Naga (Re-Edited) - Masanbo Bible
Copyright © 2014 by The Bible Society of India
Used by permission. All rights reserved worldwide.