Matio 27:15-31
Matio 27:15-31 Malagasy Bible (MG1865)
Ary isaky ny tonga ny andro firavoravoana dia fanaon'ny governora ny mandefa mpifatotra anankiray ho an'ny vahoaka, araka izay tiany. Ary tamin'izany dia nisy mpifatotra malaza atao hoe Barabasy. Koa nony tafangona teo ny olona, dia hoy Pilato taminy: Iza moa no tianareo halefako ho anareo? Barabasy, sa Jesosy, Izay atao hoe Kristy? Fa fantany fa fialonana no nanoloran'ireo Azy. Ary raha nipetraka teo amin'ny fitsarana izy, ny vadiny dia naniraka hankeo aminy ka nanao hoe: Aza manao na inona na inona amin'izany Lehilahy marina izany, fa nampahory ahy be ihany ny nanofisako Azy any naraina. Ary ny lohan'ny mpisorona mbamin'ny loholona nitaona ny vahoaka mba hangataka an'i Barabasy ary hamono an'i Jesosy. Fa ny governora namaly ka nanao taminy hoe: Iza moa amin'izy roa lahy no tianareo halefako ho anareo? Dia hoy izy: Barabasy. Hoy Pilato taminy: Ka ahoana kosa ary no hataoko amin'i Jesosy, Izay atao hoe Kristy? Dia hoy izy rehetra: Aoka hohomboana amin'ny hazo fijaliana Izy. Fa hoy ny governora: Inona ary no ratsy nataony? Fa vao mainka niantsoantso izy ka nanao hoe: Aoka hohomboana amin'ny hazo fijaliana Izy! Ary raha hitan'i Pilato, fa tsy nahaleo ditra aza izy, fa vao mainka nandroso ihany aza ny tabataba, dia naka rano izy ka nanasa tanana teo anatrehan'ny vahoaka ary nanao hoe: Afaka amin'ny ran'ity Lehilahy marina ity aho, fa asa anareo. Ary ny olona rehetra dia namaly ka nanao hoe: Aoka ny ràny ho aminay mbamin'ny zanakay. Ary dia nandefa an'i Barabasy ho an'ny olona izy; fa Jesosy nasainy nokapohina, dia natolony mba hohomboana tamin'ny hazo fijaliana. Ary ny miaramilan'ny governora dia nitondra an'i Jesosy ho ao anati-rova sady nanangona ny miaramila namany rehetra ho eo aminy. Ary rehefa nanala ny fitafiany, dia nanafy Azy lamba jaky izy. Ary nandrandrana satroka tsilo izy, ka nasatrony ny lohany, ary nampitaniny volotara ny tànany ankavanana, dia nandohalika teo anatrehany izy ka naneso Azy hoe: Arahaba, ry Mpanjakan'ny Jiosy! Dia nororany Izy, ary nalainy ny volotara ka nokapohiny ny lohany. Ary rehefa naneso Azy izy, dia nanala ilay lamba taminy, ka nampitafiny Azy indray ny fitafiany, ary dia nentiny Izy mba hohomboana amin'ny hazo fijaliana.
Matio 27:15-31 La Bible en Malgache (MRV)
Isaky ny tonga ny andro firavoravoana dia fanaon’ny governora ny manafaka mpifatotra iray ho an’ny vahoaka, araka izay tiany. Ary tamin’izany nisy mpifatotra malaza iray antsoina hoe Barabasy. Koa nony tafangona teo ny olona dia hoy i Pilato: Iza moa no tianareo hafahako ho anareo, i Barabasy sa Jesosy izay lazaina hoe Kristy*? Fantany mantsy fa fialonana no nanoloran’ireo Azy. Ary rehefa nipetraka teo amin’ny fitsarana izy dia nandefa iraka hankeo aminy ny vadiny hilaza aminy hoe: Aza manao na inona na inona amin’izany Lehilahy marina izany fa nampahory be ahy androany ny nanofisako Azy. Ny lehiben’ny mpisorona mbamin’ny loholona anefa dia nitaona ny vahoaka mba hangataka an’i Barabasy ka hampamono an’i Jesosy. Fa hoy ny governora tamin’izy ireo: Iza amin’izy roa lahy moa no tianareo hafahako ho anareo? Dia hoy izy rehetra: I Barabasy. Ary hoy i Pilato: Ahoana kosa ary no hataoko amin’i Jesosy izay lazaina hoe Kristy? Dia hoy izy rehetra: Aoka hohomboana amin’ny hazofijaliana Izy. Fa hoy ny governora: Inona ary no ratsy nataony? Fa vao mainka niantsoantso izy rehetra hoe: Aoka hohomboana amin’ny hazofijaliana Izy! Ary rehefa hitan’i Pilato fa tsy nisy hevitra, fa vao mainka nitombo ihany ny tabataba, dia naka rano izy ka nanasa tanana teo anatrehan’ny vahoaka sady niteny hoe: Tsy manan-tsiny amin’ny ran’ity Lehilahy ity aho fa raharahanareo. Ary hoy ny olona rehetra hoe: Aoka ny rany ho aminay sy ny zanakay. Dia nanafaka an’i Barabasy ho an’ny olona izy; fa Jesosy kosa dia nasainy nokaravasina ary natolony mba hohomboina amin’ny hazofijaliana. Ary ny miaramilan’ny governora dia nitondra an’i Jesosy ho ao anaty lapa sady nanangona ny miaramila namany rehetra ho eo Aminy. Ary nanala ny akanjon’i Jesosy izy ireo dia nampitafy Azy lamba jaky. Dia nandrandrana satroka tsilo ho Azy izy ireo ka nasatrony ny lohany, ary nampitanany volotara ny tanany havanana dia nandohalika teo anatrehany izy ireo ka naneso Azy hoe: Arahaba, ry Mpanjakan’ny Jiosy*! Dia nororany Izy, ary nalainy ny volotara ka nokapohiny ny lohany. Rehefa naneso Azy avy izy ireo dia nanala ilay lamba jaky Taminy ka nampiakanjo Azy indray, ary noentiny mba hohomboana amin’ny hazofijaliana Izy.
Matio 27:15-31 Baiboly Protestanta Malagasy (MBP)
Ary isaky ny tonga ny andro firavoravoana dia fanaon’ny governora ny mandefa mpifatotra anankiray ho an’ny vahoaka, araka izay tiany. Ary tamin’izany dia nisy mpifatotra malaza atao hoe Barabasy. Koa nony tafangona teo ny olona, dia hoy Pilato taminy: Iza moa no tianareo halefako ho anareo, Barabasy sa Jesosy, Izay atao hoe Kristy? Fa fantany fa fialonana no nanoloran’ireo Azy. Ary raha nipetraka teo amin’ny fitsarana izy, ny vadiny dia naniraka hankeo aminy ka nanao hoe: Aza manao na inona na inona amin’izany Lehilahy marina izany, fa nampahory ahy be ihany ny nanofisako Azy any naraina. Ary ny lohan’ny mpisorana mbamin’ny loholona nitaona ny vahoaka mba hangataka an’i Barabasy ary hamono an’i Jesosy. Fa ny governora namaly ka nanao taminy hoe: Iza moa amin’izy roa lahy no tianareo halefako ho anareo? Dia hoy izy: Barabasy. Hoy Pilato taminy: Ka ahoana kosa ary no hataoko amin’i Jesosy, Izay atao hoe Kristy? Dia hoy izy rehetra: Aoka hohomboana amin’ny hazofijaliana Izy. Fa hoy ny governora: Inona ary no ratsy nataony? Fa vao mainka niantsoantso izy ka nanao hoe: Aoka hohomboana amin’ny hazofijaliana Izy! Ary raha hitan’i Pilato, fa tsy nahaleo ditra azy izy, fa vao mainka nandroso ihany aza ny tabataba, dia naka rano izy ka nanasa tànana teo anatrehan’ny vahoaka ary nanao hoe: Afaka amin’ny ran’ity Lehilahy marina ity aho, fa asa anareo. Ary ny olona rehetra dia namaly ka nanao hoe: Aoka ny rany ho aminay mbamin’ny zanakay. Ary dia nandefa an’i Barabasy ho an’ny olona izy; fa Jesosy nasainy nokapohina, dia natolony mba hohomboana tamin’ny hazofijaliana. ARY ny miaramilan’ny governora dia nitondra an’i Jesosy ho ao anati-rova sady nanangona ny miaramila namany rehetra ho eo aminy. Ary rehefa nanala ny fitafiany, dia nanafy Azy lamba jaky izy. Ary nandrandrana satroka tsilo izy, ka nasatrony ny lohany, ary nampitaniny volotara ny tànany ankavanana, dia nandohalika teo anatrehany izy ka naneso Azy hoe: Arahaba, ry Mpanjakan’ny Jiosy! Dia nororany Izy, ary nalainy ny volotara, ka nokapohiny ny lohany. Ary rehefa naneso Azy izy, dia nanala ilay lamba taminy, ka nampitafiny Azy indray ny fitafiany, ary dia nentiny Izy mba hohomboana amin’ny hazofijaliana.
Matio 27:15-31 DIEM PROTESTANTA (DIEM)
Ary fanaon’ny governora isaky ny fankalazana ny Paska ny mandefa mpigadra anankiray, dia izay tian’ny vahoaka. Nisy mpigadra malaza atao hoe [Jesoa] Barabasy tamin’izay; koa dia ny vahoaka tafavory no nitenenan’i Pilato hoe: –Iza no tianareo halefako ho anareo, i [Jesoa] Barabasy sa i Jesoa ilay atao hoe Kristy? Fantatr’i Pilato fa fialonana no nanoloran-dry zareo an’i Jesoa, ilay atao hoe Kristy. Ary raha mbola nipetraka teo amin’ny fitsarana iny i Pilato, dia naniraka olona ny vadiny hilaza aminy hoe: «Aza manao na inona na inona amin’io olo-marina io, fa nampahory ahy be ihany izay nanofisako Azy any naraina izay!» Ny lohandoha-mpisorona sy ny loholona kosa dia nitaona ny vahoaka mba hitaky ny handefasana an’i Barabasy ary ny hamonoana an’i Jesoa. Dia niteny tamin’ny vahoaka indray i Pilato nanao hoe: –Iza amin’izy roa lahy ireto no tianareo halefako ho anareo? Ka hoy ny vahoaka: –I Barabasy! Dia nanontany azy ireo i Pilato hoe: –Ahoana kosa àry no hataoko amin’i Jesoa, ilay atao hoe Kristy? Fa novalian’izy rehetra hoe: –Aoka Izy hohomboana amin’ny hazofijaliana! Dia hoy ny governora: –Fa inona ary no ratsy nataony? Kanjo vao mainka koa niantsoantso mafy ny vahoaka nanao hoe: –Aoka Izy hohomboana amin’ny hazofijaliana! Nony hitan’i Pilato fa tsy nahomby izy fa vao mainka nitombo aza ny tabataba, dia naka rano izy ka nanasa tanana teo anatrehan’ny vahoaka sady nanao hoe: –Afa-tsiny amin’ny hahafatesan’io Lehilahy io aho! Raharahanareo ny anareo. Dia izao no navalin’ny vahoaka rehetra: –Aoka ho zakainay sy ny taranakay ny fahafatesany! Tamin’izay dia nalefan’i Pilato ho azy ireo i Barabasy; fa i Jesoa kosa nasain’i Pilato nokapohina ary natolony mba hohomboana amin’ny hazofijaliana. Tamin’izay dia nentin’ny miaramilan’i Pilato ho any amin’ny lapan’ny governora i Jesoa ary novorîn’ireo hankeo amin’i Jesoa ny tarika miaramila iray manontolo. Dia nendahin’ireto miaramila ny fitafian’i Jesoa, ary akanjobe jaky no nampitafîny Azy; avy eo dia nandrandrana fehiloha tsilo ry zareo ka nasatrony teo an-dohany, ary nampitazona volotara ny tanany ankavanana. Dia nandohalika teo anatrehan’i Jesoa ireto miaramila sady naneso Azy hoe: –Arahaba, ry Mpanjakan’ny Jiosy! Dia nororan-dry zareo Izy ary nalainy ilay volotara ka nikapohany ny lohany. Nony avy naneso Azy toy izany ireo miaramila, dia nesorin’ireo ny akanjobe teny aminy ka nampanaoviny Azy indray ny fitafiany; ary dia nentiny Izy hohomboana amin’ny hazofijaliana.
Matio 27:15-31 Baiboly Katolika (MBC)
Ary isaky ny fetin’ny Paka dia fanaon’ny governora ny mandefa mpifatotra anankiray tian’ny vahoaka. Ary tamin’izay dia nisy mpifatotra anankiray malaza atao hoe Barabasy, ka rehefa nivory ny vahoaka, dia hoy i Pilaty taminy: «Iza no tianareo halefako ho anareo, i Barabasy sa i Jesoa Izay atao hoe Kristy?» satria fantany fa fialonana no nanoloran’izy ireo an’i Jesoa. Ary raha nipetraka teo amin’ny fitsarana izy, dia nampaniraka taminy ny vadiny hilaza hoe: «Aza manao na inona na inona amin’io Lehilahy marina io ianao, fa nampahory ahy be ihany izay nanofisako Azy halina izay.» Tamin’izay ny lohandohan’ny mpisorona sy ny loholona nahatarika ny vahoaka hangataka an’i Barabasy sy hampamono an’i Jesoa. Dia niteny indray ny governora nanao hoe: «Iza no tianareo halefako ho anareo amin’izy roa lahy?» «I Barabasy» hoy izy ireo. Ary hoy i Pilaty taminy: «Ahoana kosa àry no hataoko amin’i Jesoa Izay atao hoe Kristy?» «Aoka hofantsihana amin’ny Hazofijaliana Izy,» hoy izy rehetra. «Fa inona àry no ratsy nataony e?» hoy ny governora. Dia vao mainka nihorakoraka izy nanao hoe; «Fantsiho amin’ny Hazofijaliana Izy» Nony hitan’i Pilaty, fa tsy nahomby izy fa vao mainka nitombo aza ny tabataba, dia nampaka rano izy ka nanasa tanana teo anatrehan’ny vahoaka ary nanao hoe: «Afa-tsiny amin’ny Ran’io Lehilahy marina io aho; fa raharahanareo.» Dia namaly ny vahoaka rehetra nanao hoe: «Aoka ho aminay sy amin’ny zanakay ny Rany.» Tamin’izay dia nalefany i Barabasy, ary i Jesoa nony efa nasainy nokapohina dia natolony azy hofantsihana amin’ny Hazofijaliana. Tamin’izay dia nentin’ny miaramilan’ny governora ho any amin’ny toerana fitsarana i Jesoa sady novoriny hanodidina Azy ny miaramila namany. Dia nendahany ny fitafiany ka nampitafîny kapaoty jaky Izy; ary nandrandrana fehiloha tsilo izy ireo, dia nasatrony ny lohany, sady nampitanany volotara ny tanany ankavanana; raha efa izany dia nandohalika anila teo anatrehany izy ary naneso azy hoe: «Arahaba, ry mpanjakan’ny Jody.» Dia nororany Izy, ary nalainy ny volotara ka nikapohany ny lohany. Nony efa nolalaoviny toy izany Izy, dia noesoriny ilay kapaoty ka nampitafîny Azy indray ny fitafiany, ary nentiny hofantsihana amin’ny Hazofijaliana Izy.