Matio 26:1-5
Matio 26:1-5 Malagasy Bible (MG1865)
Ary rehefa vitan'i Jesosy izany teny rehetra izany, dia nilaza tamin'ny mpianany hoe Izy: Fantatrareo fa raha afaka indroa andro, dia ho tonga ny Paska, koa ny Zanak'olona dia hatolotra hohomboana amin'ny hazo fijaliana. Ary tamin'izany dia nivory ny lohan'ny mpisorona sy ny loholona tao an-kianjan'ny tranon'ny mpisoronabe atao hoe Kaiafa. Ary niara-nihevitra izy hisambotra an'i Jesosy amin'ny fitaka ka hamono Azy; kanefa hoy izy: Tsy amin'ny andro firavoravoana, fandrao hisy tabataba amin'ny olona.
Matio 26:1-5 La Bible en Malgache (MRV)
Rehefa vitan’i Jesosy izany teny rehetra izany dia nilaza tamin’ny mpianany Izy hoe: Fantatrareo fa raha afaka indroa andro dia ho tonga ny Paska, koa ny Zanak’Olona* dia hatolotra hohomboana amin’ny hazofijaliana. Ary tamin’izany ny lehiben’ny mpisorona sy ny loholona dia nivory tao amin’ny lapan’ny Mpisoronabe antsoina hoe Kaiafa. Ary niara-nihevitra ny hisambotra an’i Jesosy amin’ny fitaka izy ireo ka hamono Azy; kanefa hoy izy: Tsy amin’ny andro firavoravoana, fandrao hisy tabataba eo amin’ny vahoaka.
Matio 26:1-5 Baiboly Protestanta Malagasy (MBP)
ARY rehefa vitan’i Jesosy izany teny rehetra izany, dia nilaza tamin’ny mpianany hoe Izy: Fantatrareo fa raha afaka indroa andro, dia ho tonga ny Paska, koa ny Zanak’olona dia hatolotra hohomboana amin’ny hazofijaliana. Ary tamin’izany dia nivory ny lohan’ny mpisorona sy ny loholona tao an-kianjan’ny tranon’ny mpisoronabe atao hoe Kaiafa. Ary niara-nihevitra izy hisambotra an’i Jesosy amin’ny fitaka ka hamono Azy; kanefa hoy izy: Tsy amin’ny andro firavoravoana, fandrao hisy tabataba amin’ny olona.
Matio 26:1-5 DIEM PROTESTANTA (DIEM)
Rehefa vitan’i Jesoa avokoa ireo fampianarana ireo, dia izao no teniny tamin’ny mpianany: –Fantatrareo fa indroa andro sisa tsy hahatongavan’ny fankalazana ny Paska; ary ny Zanak’olona dia hatolotra hohomboana amin’ny hazofijaliana. Tamin’izay ireo lohandoha-mpisorona sy ireo loholon’ny vahoaka jiosy dia nivory tao amin’ny lapan’ny mpisorombe atao hoe Kaiafa. Ary niara-nioko izy rehetra hisambotra an’i Jesoa am-pitaka sy hamono Azy. Nefa hoy ry zareo hoe: –Aoka tsy ho amin’ny andro fankalazana, mba tsy hampitabataba ny vahoaka!
Matio 26:1-5 Baiboly Katolika (MBC)
Ary rehefa tapi-niteny izany rehetra i Jesoa, dia nilaza tamin’ny mpianany hoe: «Fantatrareo fa raha afaka indroa andro dia tonga ny Paka, ary ny Zanak’olona hatolotra hofantsihana amin’ny Hazofijaliana.» Tamin’izay dia nivory tao an-tranon’ny lehiben’ny mpisorona atao hoe Kaifa ny lohandohan’ny mpisorona sy ny loholona. ary niara-nioko hisambotra an’i Jesoa am-pitaka, sy hamono Azy izy ireo; «kanefa aoka tsy ho amin’ny andro fety, hoy izy ireo, fandrao mitabataba ny vahoaka.»