Lioka 8:40-56
Lioka 8:40-56 Malagasy Bible (MG1865)
Ary nony tafaverina Jesosy, dia nandray Azy tsara ny vahoaka, fa niandry Azy avokoa izy rehetra. Ary, indro, dia tonga ny lehilahy atao hoe Jairo, mpanapaka ny synagoga; dia niankohoka tamin'ny tongotr'i Jesosy izy ka niangavy taminy hiditra ao an-tranony. Fa nanana zanakavavy tokana tokony ho roa ambin'ny folo taona izy, ary efa ho faty razazavavy. Ary raha nandeha Jesosy, dia nanety lalana Azy ny vahoaka. Ary nisy vehivavy anankiray narary roa ambin'ny folo taona, izay efa nandany ny fananany rehetra tamin'ny mpanao fanafody, nefa tsy nisy nahasitrana azy akory. Dia nankao ivohon'i Jesosy ravehivavy ka nanendry ny somotraviavin-dambany, ary niaraka tamin'izay dia nijanona ny aretiny. Ary hoy Jesosy: Iza moa no nanendry Ahy? Ary rehefa samy nandà izy rehetra, dia hoy Petera sy ny namany: Tompoko, ny vahoaka betsaka mifanety ka manizina Anao. Fa hoy Jesosy: Nisy olona nanendry Ahy; fa fantatro fa nisy hery nivoaka avy tamiko. Ary rehefa hitan-dravehivavy fa tsy takona Azy izy, dia nangovitra izy ka nankeo aminy sady niankohoka teo anatrehany, dia nanambara teo anatrehan'ny vahoaka rehetra izay anton'ny nanendreny Azy sy izay nahasitranany niaraka tamin'izay. Ary hoy Jesosy taminy: Anaka, ny finoanao no nahasitrana anao; mandehana soa aman-tsara. Ary raha mbola niteny Jesosy, dia tonga ny anankiray avy tany amin'ilay mpanapaka ny synagoga ka nanao hoe: Maty ny zanakao-vavy; aza manahirana ny Mpampianatra. Fa Jesosy, raha nahare, dia namaly azy ka nanao hoe: Aza matahotra; minoa fotsiny ihany, dia ho velona izy. Ary raha tonga tao an-trano Izy, dia tsy nisy olona navelany hiara-miditra taminy, afa-tsy Petera sy Jaona ary Jakoba mbamin'ny ray aman-drenin-drazazavavy. Ary ny olona rehetra nitomany sy nisaona azy; fa Jesosy nanao hoe: Aza mitomany; fa tsy maty izy, fa matory. Dia nihomehy Azy fatratra ny olona satria fantany fa efa maty razazavavy. Ary Jesosy dia nandray ny tànany ka niantso hoe: Ry zazavavy, miarena. Dia nody indray ny ainy, ka niarina niaraka tamin'izay izy; ary nasainy nomena hanina izy. Ary dia talanjona ny ray aman-dreniny; fa Jesosy nandrara ary tsy hilazalaza amin'olona ny zavatra efa natao.
Lioka 8:40-56 La Bible en Malgache (MRV)
Nony tafaverina Jesosy dia nandray Azy tsara ny vahoaka, fa niandry Azy avokoa izy rehetra. Ary indro, tonga ny lehilahy atao hoe Jairo, mpanapaka ny sinagoga*; dia niankohoka teo amin’ny tongotr’i Jesosy izy ka niangavy Azy mba hiditra ao an-tranony. Fa nanana zanaka vavitokana tokony ho roa amby folo taona izy, ary efa ho faty Razazavavy. Ary raha nandeha Jesosy dia nifanizina Taminy teny an-dalana ny vahoaka. Ary nisy vehivavy iray narary nandeha ra nandritra ny roa amby folo taona, izay efa nandany ny fananany rehetra tamin’ny mpitsabo, nefa tsy nisy nahasitrana azy akory ireny. Dia nankao aorianan’i Jesosy Ravehivavy ka nikasika ny morontongotr’akanjony, ary niaraka tamin’izay dia nijanona ny fandehan’ny ra taminy. Ary hoy Jesosy: Iza moa no nikasika Ahy? Rehefa samy nandà izy rehetra dia hoy i Petera sy ny namany: Tompoko, mifanositosika ny vahoaka betsaka ka manery Anao. Fa hoy Jesosy: Nisy olona nikasika Ahy; fantatro fa nisy hery niala avy tamiko. Rehefa hitan-dRavehivavy fa tsy afaka niafina izy dia nangovitra izy ka nankeo Aminy sady niankohoka teo anatrehany ary nanambara teo anatrehan’ny vahoaka rehetra izay anton’ny nikasihany Azy sy izay nahasitranany niaraka tamin’izay. Ary hoy Jesosy taminy: Anaka, ny finoanao no nahavonjy anao; mandehana amin’ny fiadanana. Ary raha mbola niteny Jesosy dia tonga ny iray avy tany amin’ilay mpanapaka ny sinagoga ka niteny hoe: Maty ny zanakao vavy; aza manahirana ny Mpampianatra intsony. Fa Jesosy, raha nahare, dia namaly azy hoe: Aza matahotra; minoa fotsiny ihany, dia ho voavonjy izy. Rehefa tonga tao an-trano Izy dia tsy nisy olona navelany hiara-miditra taminy afa-tsy i Petera sy i Jaona ary i Jakoba mbamin’ny ray aman-drenin-dRazazavavy. Ary nitomany sy niteha-tratra noho ny aminy ny olona rehetra; fa Jesosy niteny hoe: Aza mitomany, tsy maty izy, fa matory. Dia nihomehy Azy fatratra ny olona satria fantany fa efa maty Razazavavy. Ary nandray ny tanany Izy ka niantso hoe: Ry zazavavy, miarena! Dia nody indray ny ainy ka niarina niaraka tamin’izay izy, ary nasainy nomena sakafo. Dia talanjona ny ray aman-dreniny; fa Jesosy nandrara azy tsy hilazalaza amin’olona ny zava-nitranga.
Lioka 8:40-56 Baiboly Protestanta Malagasy (MBP)
ARY nony tafaverina Jesosy, dia nandray Azy tsara ny vahoaka, fa niandry Azy avokoa izy rehetra. Ary, indro, dia tonga ny lehilahy atao hoe Jaïro, mpanapaka ny synagoga; dia niankohoka tamin’ny tongotr’i Jesosy izy ka niangavy taminy hiditra ao an-tranony. Fa nanana zanakavavy tokana tokony ho roa ambin’ny folo taona izy, ary efa ho faty razazavavy. Ary raha nandeha Jesosy, dia nanety làlana Azy ny vahoaka. Ary nisy vehivavy anankiray narary roa ambin’ny folo taona, izay efa nandany ny fananany rehetra tamin’ny mpanao fanafody, nefa tsy nisy nahasitrana azy akory. Dia nankao ivohon’i Jesosy ravehivavy ka nanendry ny somotraviavin-dambany, ary niaraka tamin’izay dia nijanona ny aretiny. Ary hoy Jesosy: Iza moa no nanendry Ahy? Ary rehefa samy nanda izy rehetra, dia hoy Petera sy ny namany: Tompoko, ny vahoaka betsaka mifanety ka manizina Anao. Fa hoy Jesosy: Nisy olona nanendry Ahy; fa fantatro fa nisy hery nivoaka avy tamiko. Ary rehefa hitan-dravehivavy fa tsy takona Azy izy, dia nangovitra izy ka nankeo aminy sady niankohoka teo anatrehany, dia nanambara teo anatrehan’ny vahoaka rehetra izay anton’ny nanendreny Azy sy izay nahasitranany niaraka tamin’izay. Ary hoy Jesosy taminy: Anaka, ny finoanao no nahasitrana anao; mandehana soa aman-tsara. Ary raha mbola niteny Jesosy, dia tonga ny anankiray avy tany amin’ilay mpanapaka ny synagoga ka nanao hoe: Maty ny zanakaovavy; aza manahirana ny Mpampianatra. Fa Jesosy, raha nahare, dia namaly azy ka nanao hoe: Aza matahotra; minoa fotsiny ihany, dia ho velona izy. Ary raha tonga tao an-trano Izy, dia tsy nisy olona navelany hiara-miditra taminy, afa-tsy Petera sy Jaona ary Jakoba mbamin’ny ray aman-drenin-drazazavavy. Ary ny olona rehetra nitomany sy nisaona azy; fa Jesosy nanao hoe: Aza mitomany; fa tsy maty izy, fa matory. Dia nihomehy Azy fatratra ny olona, satria fantany fa efa maty razazavavy. Ary Jesosy dia nandray ny tànany ka niantso hoe: Ry zazavavy, miarena. Dia nody indray ny ainy, ka niarina niaraka tamin’izay izy; ary nasainy nomena hanina izy. Ary dia talanjona ny ray aman-dreniny; fa Jesosy nandrara azy tsy hilazalaza amin’olona ny zavatra efa natao.
Lioka 8:40-56 DIEM PROTESTANTA (DIEM)
Nony tafaverina i Jesoa, dia noraisin’ny vahoaka tsara fa efa niandry Azy rahateo izy rehetra. Ary indro nisy lehilahy atao hoe Jaîro, lehiben’ny sinagôga, tonga niankohoka teo an-tongotr’i Jesoa sady niangavy Azy mba ho any an-tranony, fa nanan-janaka vavy tokana tokony ho 12 taona ity lehiben’ny sinagôga ary narary efa ho faty razazavavy. Teny an-dalana ho any amin’i Jaîro, dia nifanety tamin’i Jesoa ny vahoaka. Ary nisy vehivavy marary mitsi-dra hatramin’ny 12 taona, efa nandany ny fananany tamin’ny dokotera nefa tsy nisy nahasitrana azy na iray aza. Nanatona an’i Jesoa avy ao ivoho ravehivavy ka vao nikasika ny somotraviavin-dambany, dia nijanona avy hatrany ny ra mitsika tao aminy. Ary hoy i Jesoa: –Iza moa no nikasika Ahy teo? Samy nandà avokoa izy rehetra, fa i Petera no niteny hoe: –Mampianatra ô, vahoaka be anie no mifanety sy mifanizina aminao! Fa hoy indray i Jesoa: –Nisy nikasika Ahy teo satria tsapako fa nisy hery niala avy amiko. Ravehivavy kosa, nony nahita fa tsy afa-niafina, dia nangovitra no nankeo amin’i Jesoa; ary niankohoka teo anatrehany sady nanambara teo imason’ny olona rehetra izay anton’ny nikasihany Azy sy izay nahasitranany teo no ho eo ihany. Ary hoy i Jesoa taminy: –Ny finoanao, anaka, no nahasitrana anao. Ndeha àry ka veloma finaritra! Raha mbola niteny i Jesoa, dia nisy iraka tonga avy any an-tranon’ity lehiben’ny sinagôga nanao tamin’i Jaîro hoe: –Efa maty ny zanakao vavy, ka aza sahiraninao intsony ny Mpampianatra. Henon’i Jesoa izany ka hoy Izy tamin’i Jaîro: –Aza matahotra; minoa fotsiny ihany, dia ho velona ny zanakao! Nony tonga tao an-trano i Jesoa, dia tsy nisy navelany hiara-miditra aminy afa-tsy i Petera sy i Jôhany ary i Jakôba mbamin’ny ray aman-drenin-drazazavavy. Nitomany sy nandondòn-tratra nisaona an-drazazavavy ny olona rehetra teo, ka hoy i Jesoa hoe: –Aoka izay ny ranomaso! Tsy maty akory izy fa matory. Dia nihomehezan’ny olona i Jesoa satria fantatr’izy rehetra fa efa maty razazavavy. I Jesoa kosa nandray ny tanan-drazazavavy sady niantso hoe: –Razazavavy, mifohaza! Dia nody indray ny ainy ka niarina avy hatrany izy, ary nasain’i Jesoa nomena sakafo. Talanjona tokoa ny ray aman-dreniny nefa nohafaran’i Jesoa tsy hilaza ny zava-nitranga na amin’iza na amin’iza.
Lioka 8:40-56 Baiboly Katolika (MBC)
Rehefa tafaverina i Jesoa dia nandray Azy tsara ny vahoaka, fa niandry Azy rahateo izy rehetra. Ary indro nisy lehilahy anankiray atao hoe Jaîra, izay lehiben’ny sinagoga, nanatona Azy, dia niankohoka tamin’ny tongony sy nangataka Azy hiditra ao an-tranony, fa nanan-janaka vavy tokana tokony ho roa ambin’ny folo taona, narary ho faty izy. Nony nandeha i Jesoa dia nifanety tamin’ny vahoaka; ary nisy vehivavy anankiray nitsì-dra hatramin’ny roa ambin’ny folo taona, efa nandany ny fananany rehetra tamin’ny dokotera, fa tsy nisy nahasitrana azy na dia iray aza, nanatona avy ao ivohony, dia nanendry ny morontongotr’akanjony, ka nijanona niaraka tamin’izay ny fitsìhany. Dia hoy i Jesoa: «Iza moa no nanendry Ahy?» Samy nandà avokoa izy rehetra, fa i Piera sy ny namany no nanao hoe: «Ry Mpampianatra ô! vahoaka be no mifanety sy mifanizina aminao, ka Ianao manontany hoe: ‹Iza no nanendry Ahy?› » Ary hoy i Jesoa: «Nisy nanendry Ahy, satria reko fa nisy hery nivoaka tamiko.» Nony hitan-dravehivavy fa tsy takona Azy izy, dia tera-kovitra izy ka inty tamy niankohoka teo amin’ny tongony, sady nanambara teo imason’ny vahoaka ny anton’ny nanendreny Azy sy ny nahasitranany niaraka tamin’izay. Ary hoy i Jesoa taminy: «Anaka, ny finoanao no nahavonjy anao; mandehana amim-piadanana.» Raha mbola niteny Izy, dia nisy olona anankiray avy any amin’ilay lehiben’ny sinagoga tonga nilaza taminy hoe: «Efa maty ny zanakao vavy, fa aza manasatra ny Mpampianatra.» Ren’i Jesoa izany ka hoy Izy tamin’ny rain’ilay zazavavy: «Aza matahotra fa minoa fotsiny ihany, dia ho velona ny zanakao.» Nony tonga tao an-trano Izy, dia tsy nisy navelany hiara-miditra aminy afa-tsy i Piera sy i Jakôba ary i Joany, mbamin’ny ray aman-drenin-drazazavavy. Nitomany sy ory azy ny olona rehetra, fa hoy i Jesoa: «Aza mitomany ianareo; tsy maty izy fa matory.» Dia nihomehezan’izy ireo Izy, satria fantany tsara fa maty razazavavy. Ary i Jesoa nandray ny tanany ka niantso hoe: «Ry zazavavy, mitsangàna.» Dia nody indray ny ainy, ka nitsangana niaraka tamin’izay izy, ary nasainy nomena hanina. Talanjona ny ray aman-dreniny, fa i Jesoa nandrara azy tsy hilazalaza amin’olona izay natao.