Asa 18:1-18
Asa 18:1-18 Malagasy Bible (MG1865)
Ary rehefa afaka izany, dia niala tany Atena Paoly ka nankany Korinto. Ary izy nahita Jiosy anankiray atao hoe Akoila, izay teraka tany Ponto, vao avy tany Italia, ary Prisila vadiny (fa Klaodio efa nandidy ny Jiosy rehetra hiala tany Roma), dia nankeo amin'izy mivady Paoly. Ary satria niray raharaha taminy izy, dia nitoetra tao aminy ka niasa; fa ny manao lay no raharahany. Ary niady hevitra isan-tSabata tao amin'ny synagoga izy ka nampanaiky ny Jiosy sy ny jentilisa. Ary rehefa tafidina avy tany Makedonia Silasy sy Timoty, dia voaterin'ny teny Paoly ka nanambara tamin'ny Jiosy fa Jesosy no Kristy. Ary nony nanohitra sy niteny ratsy ireo, dia nanopakopa-damba izy ka nanao taminy hoe: Aoka ho ao an-dohanareo ny ranareo; afaka aho; ary amin'izao sisa izao dia hankany amin'ny jentilisa aho. Ary raha niala teo izy, dia niditra tao an-tranon'ny lehilahy atao hoe Titosy Josto, izay nivavaka tamin'Andriamanitra; ary ny tranony nifanolotra tamin'ny synagoga. Ary Krispo, mpanapaka ny synagoga, mbamin'ny ankohonany rehetra dia nino ny Tompo; ary maro koa ny Korintiana, raha nandre, dia nino ka natao batisa. Ary ny Tompo niteny tamin'i Paoly tamin'ny fahitana nony alina ka nanao hoe: Aza matahotra, fa mitenena ihany, ka aza mangina; fa Izaho momba anao, ary tsy hisy olona hihazona anao hanisy ratsy anao; fa manana olona maro amin'ity tanàna ity Aho. Ary izy nitoetra teo herintaona sy enim-bolana ka nampianatra ny tenin'Andriamanitra teo aminy. Fa raha Galio no governora tany Akaia dia niray tetika hisambotra an'i Paoly ny Jiosy, ary nitondra azy nankeo amin'ny fitsarana, ka dia nanao hoe: Ilehio mampanaiky ny olona hivavaka amin'Andriamanitra, nefa tsy araka ny lalàna. Ary raha hiloa-bava Paoly, dia hoy Galio tamin'ny Jiosy: Ry Jiosy, raha misy heloka, na zavatra ratsy natao, dia mety raha mandefitra aminareo.aho; fa raha ady hevitra sy anarana ary ny lalànareo kosa, dia ataovinareo ihany; fa izaho tsy te-hitsara izany raharaha izany. Ary nandroaka azy hiala teo anoloan'ny fitsarana izy. Ary izy rehetra nisambotra an'i Sostena, mpanapaka ny synagoga, dia nikapoka azy teo anoloan'ny fitsarana. Nefa tsy nahoan'i Galio izany zavatra izany. Ary Paoly mbola nitoetra teo andro maromaro ihany, ary rehefa nanao veloma ny rahalahy izy, dia niondrana an-tsambo nankany Syria, ary Prisila sy Akoila niaraka taminy koa; ny volon-dohany nohetezany tany Kenkrea, satria efa nivoady izy.
Asa 18:1-18 La Bible en Malgache (MRV)
Taorianan’izany dia niala tany Atena i Paoly ka nankany Korinto. Nahita Jiosy* iray antsoina hoe Akoila avy any Ponto, vao tonga avy tany Italia, niaraka tamin’i Prisila vadiny izy; i Klaodio mantsy dia efa nandidy ny Jiosy rehetra hiala tany Roma; dia nankao amin’izy mivady i Paoly. Koa satria nitovy raharaha taminy izy ireo, dia nipetraka tao aminy i Paoly ka niasa satria mpanao tranolay no raharahan’izy mivady. Niady hevitra isan-tSabata tao amin’ny sinagoga* i Paoly ka nandresy lahatra ny Jiosy sy ny Grika. Rehefa tafidina avy tany Makedonia i Silasy sy i Timoty dia nanokan-tena ho amin’ny teny i Paoly ka nanambara tamin’ny Jiosy fa Jesosy no Kristy*. Nony nanohitra sy niteny ratsy ireo dia nanopakopa-damba izy ka niteny taminy hoe: Aoka ho eo an-dohanareo ny ranareo; afaka aho; amin’izao sisa izao dia hankany amin’ny Jentilisa* aho. Rehefa niala teo izy dia niditra tao an-tranon’ny lehilahy antsoina hoe Titosy Josto izay nivavaka tamin’Andriamanitra; ary ny tranony dia teo akaikin’ny sinagoga. I Krispo, lehiben’ny sinagoga mbamin’ny ankohonany rehetra dia nino ny Tompo; maro koa ny Korintiana, raha nandre, no nino ka natao batisa. Ary niteny tamin’i Paoly tamin’ny fahitana ny Tompo nony alina hoe: Aza matahotra, fa mitenena ihany ka aza mangina; fa Izaho momba anao ary tsy hisy olona hihazona anao hanisy ratsy anao; fa manana olona maro amin’ity tanàna ity Aho. Naharitra herintaona sy enim-bolana teo izy ary nampianatra ny tenin’Andriamanitra teo aminy. Fony i Galiona governora tany Akaia dia niray tetika hisambotra an’i Paoly ny Jiosy* ary nitondra azy nankeo amin’ny fitsarana ka nilaza hoe: Ilehio dia mampanaiky ny olona hivavaka amin’Andriamanitra nefa tsy araka ny lalàna. Ary raha iny handray fitenenana iny i Paoly dia hoy i Galiona tamin’ny Jiosy: Ry Jiosy, raha misy heloka na zavatra ratsy natao dia ho niaritra nihaino ny teninareo aho; fa raha adihevitra momba ny teny sy ny anaran’olona ary ny lalànanareo kosa dia ataovinareo ihany; fa izaho tsy te hitsara izany raharaha izany. Ary nandroaka azy hiala teo anoloan’ny fitsarana izy. Dia nisambotra an’i Sostena lehiben’ny sinagoga* izy rehetra ka nikapoka azy teo anoloan’ny fitsarana. Nefa tsy nahoan’i Galiona izany zavatra izany. Mbola nijanona teo andro maromaro ihany i Paoly, ary rehefa nanao veloma ny rahalahy izy dia niondrana an-tsambo nankany Siria; niaraka taminy koa i Prisila sy i Akoila; dia nohetezany tany Kenkrea ny volony satria efa nivoady izy.
Asa 18:1-18 Baiboly Protestanta Malagasy (MBP)
ARY rehefa afaka izany, dia niala tany Atena Paoly ka nankany Korinto. Ary izy nahita Jiosy anankiray atao hoe Akoila, izay teraka tany Ponto, vao avy tany Italia, ary Prisila vadiny (fa Klaodio efa nandidy ny Jiosy rehetra hiala tany Roma), dia nankeo amin’izy mivady Paoly. Ary satria niray raharaha taminy izy, dia nitoetra tao aminy ka niasa; fa ny manao lay no raharahany. Ary niady hevitra isan-tSabata tao amin’ny synagoga izy ka nampanaiky ny Jiosy sy ny jentilisa. Ary rehefa tafidina avy tany Makedonia Silasy sy Timoty, dia voaterin’ny teny Paoly ka nanambara tamin’ny Jiosy fa Jesosy no Kristy. Ary nony nanohitra sy niteny ratsy ireo, dia nanopakopa-damba izy ka nanao taminy hoe: Aoka ho eo an-dohanareo ny ranareo; afaka aho; ary amin’izao sisa izao dia hankany amin’ny jentilisa aho. Ary raha niala teo izy, dia niditra tao an-tranon’ny lehilahy atao hoe Titosy Josto, izay nivavaka tamin’Andriamanitra; ary ny tranony nifanolotra tamin’ny synagoga. Ary Krispo, mpanapaka ny synagoga, mbamin’ny ankohonany rehetra dia nino ny Tompo; ary maro koa ny Korintiana, raha nandre, dia nino ka natao batisa. Ary ny Tompo niteny tamin’i Paoly tamin’ny fahitana nony alina ka nanao hoe: Aza matahotra, fa mitenena ihany, ka aza mangina; fa Izaho momba anao, ary tsy hisy olona hihazona anao hanisy ratsy anao; fa manana olona maro amin’ity tanàna ity Aho. Ary izy nitoetra teo herintaona sy enim-bolana ka nampianatra ny tenin’Andriamanitra teo aminy. Fa raha Galio no governora tany Akaia dia niray tetika hisambotra an’i Paoly ny Jiosy, ary nitondra azy nankeo amin’ny fitsarana, ka dia nanao hoe: Ilehio mampanaiky ny olona hivavaka amin’Andriamanitra, nefa tsy araka ny lalàna. Ary raha hiloa-bava Paoly, dia hoy Galio tamin’ny Jiosy: Ry Jiosy, raha misy heloka, na zavatra ratsy natao, dia mety raha mandefitra aminareo aho; fa raha ady hevitra sy anarana ary ny lalànareo kosa, dia ataovinareo ihany; fa izaho tsy te-hitsara izany raharaha izany. Ary nandroaka azy hiala teo anoloan’ny fitsarana izy. Ary izy rehetra nisambotra an’i Sostena, mpanapaka ny synagoga, dia nikapoka azy teo anoloan’ny fitsarana. Nefa tsy nahoan’i Galio izany zavatra izany. ARY Paoly mbola nitoetra teo andro maromaro ihany, ary rehefa nanao veloma ny rahalahy izy, dia niondrana an-tsambo nankany Syria, ary Prisila sy Akoila niaraka taminy koa; ny volon-dohany nohetezany tany Kenkrea, satria efa nivoady izy.
Asa 18:1-18 DIEM PROTESTANTA (DIEM)
Taorian’izany, dia tafala tao Atena i Paoly ka tonga tany Kôrinto. Hitany tao ity Jiosy atao hoe Akoilà izay teraka tany Pônto; vao tonga avy any Italia i Akoilà mbamin’i Prisila vadiny, satria nodidian’ny amperôra Klaody hiala tany Rôma daholo ny Jiosy. Nanatona azy mivady i Paoly; ary satria mitovy asa tanana aminy rahateo i Paoly (fa samy mpanao lay izy ireo), dia nitoetra tao amin-dry i Akoilà sy i Prisila izy ary nifarimbona asa taminy. Isaky ny andro sabata, dia nifanakalo hevitra tao amin’ny sinagôga i Paoly ary niezahany horesen-dahatra na ny Jiosy na ny Grika. Rehefa tonga avy any Masedônia i Silasy mbamin’i Timôty, dia ny toriteny no nimasoan’i Paoly, ary nambarany tamin’ny Jiosy fa i Jesoa no ilay Mesia. Kanefa nanohitra sy nanevateva azy ry zareo; ka dia nanopakopa-damba i Paoly sady nanao taminy hoe: –Anareo ny andraikitra raha toa ka manalavitra an’Andriamanitra ianareo, fa afaka adidy aminareo aho. Manomboka anio dia any amin’ny hafa firenena no halehako. Dia niala teo i Paoly ka nankao amin’i Tisio Josta, mpanaja an’Andriamanitra, izay nanan-trano nifanolotra tamin’ny sinagôga. Kanefa nino ny Tompo i Krispo, lehiben’ny sinagôga, mbamin’ny ankohonany manontolo; ary maro koa ny Kôrintianina nihaino an’i Paoly no tonga mpino ary natao batisa. Indray alina dia nisehoam-pahitana i Paoly, ka nilazan’ny Tompo hoe: –Aza matahotra, fa mitenena hatrany ary aza mangina. Fa momba anao Aho, ary tsy hisy olona afaka hihazona anao mba hampahorîna, satria vahoaka maro no voatokana ho Ahy amin’ity tanàna ity. Nitoetra herintaona sy tapany tao Kôrinto i Paoly, ka nampianatra ny tenin’Andriamanitra tamin’ny olona. Fony i Galiôna no governora tany Akaîa, dia niara-nioko namely an’i Paoly ny Jiosy ary nitondra azy teo amin’ny fitsarana ka nanao hoe: –Mitaona ny olona hanaraka fivavahana mifanohitra amin’ny lalànan’i Mosesy io lehilahy io! Efa ndeha hiteny indrindra i Paoly no nilaza tamin’ny Jiosy i Galiôna hoe: –Ry Jiosy, raha momba ny hoe heloka bevava na zavatra ratsy natao, dia vonon-kihaino anareo aho. Fa raha voambolana sy anarana ary lalànanareo manokana no iadianareo hevitra, dia raharahanareo; fa izaho tsy te hitsara an’izany. Dia noroahin’i Galiôna hiala teo amin’ny fitsarana ny Jiosy. Fa nosamborin’izy rehetra kosa i Sôstena, lehiben’ny sinagôga, ka nokapohiny teo anoloan’ny fitsarana. Nefa tsy nisy nahoan’i Galiôna izany. Mbola tafajanona elaela tao Kôrinto i Paoly. Avy eo dia nanao veloma ny havana iray finoana izy ka niondrana nankany Siria, niarahan-dry i Prisila sy i Akoilà. Talohan’ny hiondrana, dia niharatra volon-doha tao Senkrea i Paoly, satria nisy voady nataony.
Asa 18:1-18 Baiboly Katolika (MBC)
Taorian’izany, dia niala tao Atenina i Paoly ka nankany Kôrinty. Ary tao izy dia nahita Jody anankiray atao hoe Akilasy teraka tany Pônto, vao tonga avy tany Italia, niaraka tamin’i Prisila vadiny fa nodidian’i Klaody hiala tany Rôma ny Jody rehetra, ka nanatona azy mivady. Iray raharaha taminy izy, fa ny manao lay no raharahany, ka dia nitoetra niasa tao izy. Nampianatra isan-tsabata izy tao amin’ny sinagoga ary nampanaiky ny Jody sy ny Jentily. Nony tonga avy tany Masedônia i Silasy sy i Timote, dia nahery nitory teny i Paoly, ka nanamarina tamin’ny Jody fa i Jesoa no Kristy. Ary noho izy notoherin’ny Jody sy notevatevainy, dia nakopany ny lambany, ka hoy izy tamin’ireo: «Aoka ho eo amin’ny lohanareo ny ranareo, fa afa-tsiny aho, ary hatramin’izao dia any amin’ny Jentily no halehako.» Nony niala teo izy, dia niditra tao an-tranon’ny olona anankiray atao hoe Tito ilay Marina; lehilahy natahotra an’Andriamanitra izy io, ary nifanolotra tamin’ny sinagoga ny tranony. Ary nino ny Tompo i Krisposa lehiben’ny sinagoga mbamin’ny ankohonany rehetra; ka nisy maro ny tao Kôrinty no nino sy natao Batemy koa, nony efa nihaino an’i Paoly. Indray alina, dia hoy ny Tompo tamin’i Paoly tamin’ny tsindrimandry: «Aza matahotra, fa mampianara, ka aza mangina. Satria momba anao Aho, ka tsy hisy olona hahazo hanisy ratsy anao, sady be ny vahoakako amin’ity tanàna ity.» Dia nitoetra tao herintaona sy enim-bolana izy, nampianatra ny tenin’Andriamanitra tao. Ary nony i Galiôna no governora tao Akaia, dia niray tetika hamely an’i Paoly ny Jody, ary nitondra azy teo amin’ny fitsarana, ka nanao hoe: «Ilay ity mitaona ny olona hanaraka fombam-pivavahana mifanohitra amin’ny Lalàna.» Nony niloa-bava ndeha hamaly i Paoly, dia hoy i Galiôna tamin’ny Jody: «Ry Jody, ny amin’ny ratsy natao, na ady heloka no ihainoako ny fitorianareo; fa raha izay ady hevitra momba ny fampianarana sy ny anarana, ary ny lalànareo kosa, raharahanareo izany, ka tsy te hitsara an’izany aho.» Dia noroahiny hiala teo amin’ny fitsarana izy ireo. Tamin’izay dia nosamborin’izy rehetra i Sôstena lehiben’ny sinagoga, ka nokapohiny teo anoloan’ny fitsarana; fa tsy nahoan’i Galiôna akory izany. Mbola nitoetra tao Kôrinto andro maromaro ihany i Paoly, vao nanao veloma ny havana iray finoana, ka niondrana nankany Siria, niaraka tamin’i Prisila sy i Akilasy, ary nohetezany tao Senkrea ny volon-dohany, fa nisy voady nataony.