San Mateo 15

Tlan kiyolijtlakoa se tlakatl

(Mr. 7:1-23)

1Ijkuakó sikimeh fariseos iwa non kitemachtiah n tlanawatílistli non owalajkeh de Jerusalén, omijkuanijkeh inawak Jesús iwa okilijkeh:

2—Motlamachtijkawah kixpanawiah tlan otechititijkeh totatawah. Yejwah amo momajtekiah ijkuak kikuah paj kemi otechmachtijkeh totatawah.#15:2 N fariseos okajxitilijkeh itlanawatil Moisés se tlanawátili: achto de se tlakuas kipia se momajtekis miak welta.

3Pero Jesús okintlajtlani:

—¿Tleka noiwa nomejwah nonkixpanawiah itlanawatil Dios, iwa okachi nonkimopantiah tlan yowejka okichiwayah nomotatawah? 4Dios okijto: “Xiktlakita mota iwa mona”, iwa “akin fiero kitenewas ita noso ina, kuali makimiktikah.” Éx. 21:17 5Pero nomejwah nonkijtoah se tlakatl weletis kilis ita noso ina: “Mach weletis nimitspalewis, porke tlan nikpixtok, yonikxelo para Dios.” 6Ijkuak nomejwah ijkó nonkijtoah, kijtosneki mach ok moneki se kimpalewis n tetajmeh. Nomejwah ijkó nonkijtlakoah itlanawatil Dios porke nonkichiwah tlan yowejka okichiwayah nomotatawah. 7¡Íxkopteh! Yompa tlan onomechilih n profeta Isaías ijkuak okijto:

8Ninteh tlakah ika inkamak kijtoah nechtlakitah,

pero amo nechtlakitah ika inyolo.

9Sanenka nechweyijkatlaliah,

porke tlan kitemachtiah,

san intlanawatil n tlakah. Is. 29:13

10Ijkuakó Jesús okínnotski n tlakah iwa okinmili:

—Techkakikah iwa xikkajsikamatikah tlan nomechilis: 11Amo kiyolijtlakoa n tlakatl tlan kalaki itech ikamak, yej teyolijtlakoa tlan kisa itech ikamak n tlakatl.

12Ijkuakó itlamachtijkawah n Jesús omijkuanijkeh inawak iwa okilijkeh:

—¿Yotikma n fariseos okualankeh ijkuak okikakeh tlan otikijto?

13Pero Ye okinnankili:

—Nochi tlatookali non amo okitookak Notajtsi non kajki ilwikak, kiwiwitlaskeh ika nochi inelwayo. 14Xikinkawakah, yejwah noiwa amo tlachiah iwa kinyakanah oksikimeh kemi yejwah. Tla se non amo tlachia kiyakanas ok se kemi ye, san ken ome wetsiskeh itech tékochtli.

15Ijkuakó Pedro okili n Jesús:

—Techajsikamatilti non tlapoálistli.

16Jesús okijto:

—¿Nomejwah noiwa ayamó nonkajsikamatih? 17¿Amo nonkajsikamatih nochi tlan kalaki ijtik ikamak se tlakatl, kalaki san ijtik itlalax, iwa satepa kisa kala? 18Pero tlan kisa ijtik ikamak se tlakatl, kisa ijtik iyolo, iwa ye tlan kijtlakolia iyolo. 19Porke ijtik iyolo n tlakatl kisa tlan amo kuali kiyejyekolia, ijkuak

temiktia, noso

momekatia, noso

tlajtlakolchijtinemi ika ikuerpo,

tlachteki,

kisentlalia tlan amo milák,

noso tepojpoa.

20Nochi ni ye tlan kinmijtlakolia inyolo n tlakah, pero tla se tlakatl amo moyekmapajpaka ijkuak tlakua, noni amo kiyolijtlakoa.

Se siwatl de Canaán kineltoka n Jesús

(Mr. 7:24-30)

21Ijkuakó Jesús okiski de ompa, iwa oyá kan tlalmeh de Tiro iwa Sidón. 22Se siwatl de Canaán non ik ompa ochantitoka owala kojtsajtsitiwits inawak Jesús iwa okili:

—¡Noteko, tekone de David, techiknomati! Nochpoch kipia se espíritu amokuali iwa sa ik panoa kitlaijyowiltia.

23Jesús mach okinankili. Ijkuakó itlamachtijkawah omijkuanijkeh inawak iwa okitlatlautijkeh:

—Xikpalewi neká siwatl porke kojtsajtsitiwits tokuitlapah.

24Jesús okijto:

—Dios onechaltítlanki sanwel manikimpalewiki n tlakah de Israel non moixpolojtinemih kemi ichkameh.

25Pero n siwatl omijkuani iwa omotlankuaketski ixpa n Jesús iwa okili:

—¡Noteko, techpalewi!

26Iwa Jesús okili:

—Amo kuali se kinkixtilis intlakual n pípilteh iwa makinmakakah n chichimeh.

27N siwatl okinankili:

—Milák tlan tikijtoa Noteko, asta n chichimeh kikuah n kamapáyaxtli non wetsi itlampa mesa keman tlakuajtokeh intekowajkeh.

28Ijkuakó Jesús okili:

—¡Siwatl, kema weyi motlaneltokalis! Mamochiwa kemi te tikneki.

Ijkuakó, ichpoch non siwatl owalpajtik non ora.

Jesús kimpajtia miakeh kokoxkeh

29Jesús okiski de ompa iwa oyá itempa n lago de Galilea. Otlanki otlejkok ipan se tepetl iwa ompa omotlali. 30Ijkuakó, miakeh tlakah okalakitoh inawak Ye, iwa okinwikilijkeh

non koxomeh,

non amo tlachiah,

non oikximijmiktokah,

non amo otlajtoayah,

iwa miakeh oksikimeh kokoxkeh.

Okintlalijkeh ikxitla n Jesús, iwa Ye okimpajti. 31Ijkuakó n tlakah omotlajtlachialtiayah ken okitakeh akimeh amo otlajtoayah otlajtojkeh, non oikximijmiktokah opajtikeh, non koxomeh onejnenkeh iwa non amo otlachiayah otlachixkeh. Iwa nochteh opé kiweyijkatlaliah iwa motlasojkamatih inawak Dios de Israel.

Jesús kintlakualtia nawi mil tlakah

(Mr. 8:1-10)

32Ijkuakó Jesús okonínnotski itlamachtijkawah iwa okinmili:

—Semi nikinmiknomati ninteh tlakah, porke yopanokeh eyi tonati nowa iwa amo kipiah tlan kikuaskeh. Amo nikneki nikintitlanis incha maapismiktiwiah, amo kichiwa wetsitiweh itech ojtli.

33Ijkuakó itlamachtijkawah n Jesús okilijkeh:

—Ik nika amaka chanchiwa. ¿Kan tikkuitiweh tlákuali para tikintlakualtiskeh nochteh ninteh tlakah?

34Jesús okintlajtlani:

—¿Kech paj nonkipiah?

Yejwah okinankilijkeh:

—Chikomeh pameh iwa kanaj kechmeh michintsitsinteh.

35Ijkuakó Jesús okinnawati mamotlajtlalikah ipan tlali. 36Jesús okinmónanki n chikome pameh iwa n michimeh iwa omotlasojkama inawak Dios. Otlanki okintlatlajkotlapanki iwa okinmajmák itlamachtijkawah makinxejxelilikah nochteh n tlakah. 37Nochteh otlakuajkeh iwa kuali oixwikeh. Iwa tlan ayakmó okikuajkeh okoololojkeh iwa okintetemitijkeh chikome chikimeh. 38Kemi nawi mil tlakah otlakuajkeh, ixkoya n siwameh iwa n pípilteh. 39Satepa Jesús okinmaaka nochteh n tlakah, otlejkok itech se barka iwa oyá kan tlali de Magdala.

Voafantina amin'izao fotoana izao:

San Mateo 15: npl

Asongadina

Hizara

Dika mitovy