Luqaasa 19
19
Qaraxe gachchisiz Zakkoosa
1Yesuusa Iyarkko gelii aadhiza. 2Ezayid Zakkoosa ginttinttiz qaraxe gachisizitay halaqay yeza. E gaame dure. 3E Yesuusa aayazako be7adayis koyeeza. E haata maaqqeez gishos asii darotithaypp dendeezayid Yesuusa be7adayis danda7ekkaya. 4Yesuusa be7adayis kozhii E yhanigiza ogayis tiina woxxii yhanigii pettii gasare mithal afa kezeeza.
5Yesuusa ye aqa hellittar dhoqqi gi bi7ii, «Zakkoosa, yhayino ta ne kara peezhodayis beeziza gishos ellithii wodhdhoba» yeegeeza. 6E ellis wodhdhii ufayisar Yesuusana mokkeeza.
7Ye aqayid yez as ubbay yeya bi7ii, «Nagaranchcho kara gelii mokinttodayis haniza» yeegii zigireeza. 8Maaqqozin, Zakkiyoosa eqqii Godayiko, «Godayyo, yeezako taas yez shalo ubbaypp bagga manqqitayis immada. Asapp abikka worddor balithii ekkeezbaz maaqqiko oyddii kushe mahoda» yeegeeza.
9Yesuusa ma, «Yha athay Afraame na7a maaqqeez gishos yhayino atotithii yha kara ye7eeza. 10As Na7ay ye7eezay dhabeezana koyodayisinnee ashshodayis» yeegeeza.#Mat. 18:10
Taphphii minaantay aaziso
(Mat. 25:14-30)
11Asay yeya si7ittar yezin Yesuusa Yerusalaame ukkeez gishos Xoossa kaatetithay yhatt ukkeeza aazeez gishos unttis aaziso odeeza.#Mat. 25:14-30 12Yey gishos, Yesuusa, «Pettii damma asii yezay faasi kaatetithii mawute ekkii ye7odayis hara biitta yhanigeeza. 13Ezis oothiz ayllitaypp taphphita xeegii taphphii minaanee#19:13 Minaanee: Minaanay Girike doona. Pettii minaanay pettii gallas ooso asis hayidzii agina damooze maaqqiza. inggii ‹Ta maaqqii ye7od gatho yha miishayir zal7oytta› yeegeeza.
14«Ye gade asay eza ixxiza gishos yha athay nuul afa kawutoda garkk nu koyooya yeegii as e guyer azazeeza.
15«Maaqqozin, ye athay kaat maaqqii fa biitta maaqqeeza. Ye taphphii ayllitay E inggeez miishayir ab garkk zal7i wodhiseezako erodayis kozhii unttan xeegiseeza.
16«Tiinay yi7ii, ‹Godayyo, ne taasi inggeez miishayil hara taphpho wodhdhiseeza› yeegeeza.
17«E Goday, ‹Neno ammaninttiza ayllayyo ne lo77o ootheeza. Neenii xiqqa bazal ammaninttiza gishos neesi taphphii katamitayil afa mawute inggeeza› yeegeeza.
18«Nam7anthaykka yi7ii, ‹Godayyo, ne taasi inggeez miishay hara ichchin wodhdheeza› yeegeeza.
19«Goday eziko, ‹Nessikka ma ichchin katamitayil afa mawute inggeeza› yeegeeza.
20«Yeezako hadzanthay yi7ii, ‹Godayyo, ta qanxxor xaaxii naageez ne miishitta yhannasho. 21Abis giiko, ne gaddekka baz ekkizanannee ne zerekkabaz maxiz iita as maaqqiz gishos neesi ta yashitteeza› yeegeeza.
22«E goday mahii, ‹Neno iita ayllayyo ne doonatiigarkk ta nena pirddoda. Ta gaddekka baz ekkizanannee zerekkabaz maxiz iita as maaqqeeza ne eriko, 23ta yi7ii ta miisha wodher ekkodgarkk zal7iza asis abis inggekkasa?›
24«E goday ye aqayid eqqeezayiko, ‹Ezar yez miisha ekkii taphpho wodhiseezayis inggoytta› yeegeeza.
25«Unttii, ‹Godayyo, ezisi binnikka taphphii minaanay yeza› yeegeeza.
26«Goday, ta yinttis odiza; ‹Yeza ubbayis hara guzhinttoda, zin baazaypp haray atto ezisi yezanakka ekinttoda.#Mat. 13:12; Mar. 4:25; Luq. 8:18 27Maaqqozin, ta unttal afa kawutamay garkk koyeezita ye ta morkkita yhana ta tiina ki7ii wodhoytta› geeza» yeegeeza.#Mat. 25:14-30
Yesuusa damma bonchchor Yerusalaame geleeza
(Mat. 21:1-11; Mar. 11:1-11; Wan. 12:12-19)
28Yesuusa yeya odeezaypp guye unttapp tiina aadhii yedhdhittar Yerusalaame yhanigeeza. 29Debireezeytte Amibal#19:29 Debireezeytte guusay zayite keziz woyira mith kumeez aqo. afa yez Beetefaagennee Bitaana ukkittar fa tamaaritaypp nam7ita yeegii azazeeza: 30«Yi tiina yez heera yhanigoytta, yi ize hellodar oonkka toggibe7ekka accinttii yez hare na7a yi demmada. Eza billii yhana ekkii ye7oytta. 31Oonkka, ‹Abis billee?› gi oyiciko, ‹Goday eza koyiza› yeegoytta» yeegeeza.
32Kiitintteezitay yhanigii E geezay garkk hanin be7eeza. 33Unttikka hare na7a billodar goditay bi7ii, «Hare na7a abis billee?» yeegeeza.
34Unttii mahii, «Godayis e koshshiza» yeegeeza.
35Ezaypp hare na7a Yesuusako ke7eeza. Fa afila hare na7ay zokkayil hixxii Yesuusana togiseeza. 36Asaykka E yhanigiza ogayil afa fa afila hiixeeza.
37Debireezeytte Derell sulleth Yerusalaame wodhisiz ogeko ukkodar tayibor gaame asay unttii be7eez malatayis ufayttii fa qaala dhoqqi udii, Xoossa galata aykkeeza.
38«Goday sunthar yi7iz kaatay anjjintteezaya
salo saro,
ubbappi dhoqqe salo bonchcho,
Xoossayis maaqqo»
yeegii Xoossa galateeza.#Maz. 118:26
39Asay gancceppe pettii pettii Ferisaawe asay Yesuusako, «Asitamaarayyo, ne taamarita hayizisoba» yeegeeza.
40E unttiko, «Unttii si77e giiko shuchchitay uukkoda» yeegeeza.
Yesuusa Yerusaalames yeekeeza
41Yesuusa Yerusalaame ukkittar katama bi7ii izisi yeekkeeza. 42«Nees sarayis maaqqadana yhayino ne erekkaya, yhattekka ne aafaypp qositteeza. 43Ne morkkitay ne kala gasi fa oger oger nena mari un77ithiza wode ye7oda. 44Nenannee ne gase giddo yez ne na7ita dhabisoda. Pettii pettii shuchchi denthii laalloda, abis giiko Xoossay nena ashshodayis yi7iz woda ne erekkazay gishshosi» yeegii izis yeekkeeza.
45Yeyppe guye, Yesuusa Xoossa keethi gelii zal7izita ezaypp bayi7eeza. 46Ma, «‹Ta keethay Xoossa woossiza keethi maaqqada› gi xaafintteeza, zin yi ta keetha paannitay komi7o udeeza» yeegeeza.#Isa. 56:7; Erim. 7:11
47Gallas gallas Xoossa Keetha taamarissiza. Qeese halaqitay, higge asitamaaritaynnee gade cimitay eza wodhodayis oge koyiza.#Luq. 21:37 48Maaqqozin, asii ubbay e timirtta fa wozinas aathii si7iz gishos unttis oothod baz dhabeeza.
Voafantina amin'izao fotoana izao:
Luqaasa 19: MeloNTL
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
The Word for the World Ethiopia
