Salamo 89
89
SALAMO Aiza ireo fampanantenana nataonao tamin’i Davida?
1 Tononkalo fananarana nataon’i Etàna zanakalahin’i Zerà # 89.1 Etàna zanakalahin’i Zerà: jereo Sal 88.1 sy nta. Araka ny 1 Tan 6.16-29; 15.17-19, i Etàna dia anankiray amin’ireo mpiandraikitra ny hira sy ny mozika litorjîka tao an-tempolin’i Jerosalema, faha-Davida. .
2Ireo mari-pitiavanao, TOMPO ô,
no hohiraiko mandrakizay;
ho an’ny taranaka rehetra ho avy
no hampahafantarako ny toetranao mahatoky.
3Hambarako fa miorina mandrakizay ny fitiavanao,
mamahatra any an-danitra ny toetranao mahatoky.
4Fa hoy Ianao hoe:
«Nanaovako fanekempihavanana ilay voafidiko,
dia i Davida mpanompoko izay nianianako hoe:
5Hisy taranakao hajoroko
ho mpanjaka hatrany hatrany;
amin’ny taona rehetra ho avy
no hanorenako ny fiandriananao#89.5 Jereo 2 Sam 7.12-16l 1 Tan 17.11-14; Sal 132.11-12; Asa 2.30..»
Fiatoana
6TOMPO ô, aoka hidera Anao ny anjely any an-danitra
noho izany zava-mahagaga nataonao izany;
aoka hidera Anao ireo amin’ny fivoriany,
indrindra koa noho ny toetranao mahatoky!
7TOMPO ô, tsy misy tahaka Anao any an-danitra;
ary tsy misy mitovy aminao ireo andriamanitra.
8Fa Andriamanitra mampitolagaga Ianao
eo amin’ny fivorian’ny anjely,
ka lehibe sy hajaina kokoa
noho ireo rehetra manodidina Anao.
9Ry TOMPO Andriamanitr’izao rehetra izao ô,
iza moa no mahery toa Anao?
Ny toetranao mahatoky no mipariaka manodidina Anao.
10Ianao no mamolaka ny avonavon’ny ranomasina
sy mampangina ny hatezeran’ny onjany.
11Ianao no nahafaty sy nanorotoro an-dRahaba#89.11 Rahaba: ao amin’ny tantara tranainy babilônianina momba ny fahariana an’izao tontolo izao dia trozonabe an-dranomasina no antsoina hoe Rahaba, ka resin’ilay Andriamanitra mpahary izy io. Eto amin’ny Sal 89 kosa dia ny Tompo no lazaina fa nandresy azy.;
ary ny herinao mahefa no nentinao
hampielezana ny fahavalonao.
12Anao ny lanitra, Anao koa ny tany;
Ianao no nanorina izao tontolo izao
sy izay rehetra mameno azy.
13Ianao no namorona ny avaratra sy ny atsimo;
mihoby Anao ny tendrombohitra Tabôra sy Hermôna#89.13 Tabôra sy Hermôna: dia tendrombohitra roa nivavahan’ny Kanahanîta..
14Anao ny hery tsy hay tohaina;
azo antoka ny fifehezanao,
tsy refesi-mandidy ny fahefànao#89.14 Tamin’ny fivavahana kanahanîta dia ny andriamanitra Bahala mazàna no aseho ho tsy refesi-mandidy amin’izy manangan-tanana ankavanana; eto amin’ity Sal 89 ity kosa dia ny Tompo no lazaina fa tsy refesi-mandidy ny fahefàny..
15Rariny sy hitsiny no fototry ny fanjakanao;
fitiavana sy toetra mahatoky no mandeha eo alohanao.
16Sambatra ny vahoaka mahay mankalaza Anao;
TOMPO ô, ao anatin’ny hazavanao no hiainany;
17ny aminao no hifalifaliany isan’andro,
ary ny fahamarinanao no hampitraka azy.
18Ianao no hery lehibe ho anay
ary ny fitiavanao no hireharehanay,
19satria miankina aminao TOMPO ilay mpanjaka ampinganay,
miankina aminao izy, ry ilay Masin’i Israely.
20Indray andro dia niteny tamin-tsindrimandry Ianao
ka nilaza tamin’ireo mpivavaka aminao hoe:
«Nanaiky hanampy sy hanandratra olo-mahery fo iray aho,
dia tovolahy anankiray avy tao amin’ny vahoakako.
21I Davida mpanompoko no efa hitako
ka nohosorako ilo masina ho mpanjaka#89.21 Jereo 1 Sam 13.14; Asa 13.22; 1 Sam 16.12-13..
22Ny fiarovako no homba azy
ary ny heriko no hampahatanjaka azy.
23Tsy hahatratra azy ny fahavalo
ary tsy hampahory azy ny mpikomy.
24Eo imasony no hanapotehako ny mpanohitra azy
ary hamelezako izay mankahala azy.
25Ny toetrako mahatoky sy ny fitiavako no hiaraka aminy
ary Izaho no hampitombo ny fahefàny.
26Homeko azy ny fifehezam-panjakana
hatramin’ny ranomasina sy ny ony.
27Izy hiantso Ahy hoe: ‹Raiko Ianao,
Andriamanitro, Vatolampy mamonjy ahy›,
28Izaho kosa hanao azy ho lahimatoako,
sady ambony indrindra amin’ireo mpanjakan’ny tany#89.28 Jereo Apôk 1.5..
29Hitahirizako mandrakizay ny fitiavako izy
ary hitazonako izao fanekempihavanako izao:
30Hisy hajoroko ho mpanjaka hatrany ny taranany;
ary haharitra toy ny lanitra ny sezafiandrianany.
31Raha mahafoy ny lalànako ny taranany
ka tsy manaraka ny fitsipiko,
32raha manevateva ny baiko avy amiko
ka tsy mitandrina ny didiko,
33dia hofaiziko tsorakazo ny fikomiany
ary hosazîko kapoka ny heloka vitany;
34kanefa tsy hofoanako ny fitiavako azy
ary tsy hivadihako ny toetrako mahatoky.
35Tsy hotsoahako ny fanekempihavanako
ary tsy hovako izay nampanantenaiko.
36Efa nanao izao fianianana izao Aho fahiny;
tamin’ny fahamasinako no nanaovako izany
fa tsy hamitaka velively an’i Davida Aho:
37Hisy hatrany hatrany ny taranany;
ary tahaka ny aharetan’ny masoandro
no haharetan’ny sezafiandrianany eo anatrehako;
38hitombina hatrany izany, raha mbola eo koa ny volana
izay vavolombelona mahatoky eny amin’ny rahona.»
Fiatoana
39Saingy narianao sy nolavinao
ilay mpanjaka voahosotrao,
satria tezitra taminy Ianao.
40Nofoananao ilay fanekempihavanana
izay nataonao tamin’ity mpanomponao;
natsipinao tamin’ny tany ny satroboninahiny
ka nolotoinao hahavery fahefana azy.
41Narodanao ny fefiny rehetra
ary noravanao ny màndany.
42Norobain’ny vahiny rehetra mandalo izy,
ary lasa fihomehezan’ireo firenena mifanila.
43Nampirisika ny fahavalony Ianao
ary nampifaly ny mpifanandrina aminy.
44Nataonao tsy nahomby ny fiadian’ilay voahosotrao
ary tsy notohananao akory tamin’ny ady izy.
45Notapahinao ny tehim-panjakàny
ary naonganao ny sezafiandrianany,
ka nadabokao ho amin’ny tany.
46Nohafohezinao ny androm-pahatanorany
ary norakofanao henatra izy.
Fiatoana
47TOMPO ô, mbola ho ela ve no hiafenanao?
Mandra-pahoviana ny fahatezeranao
no mbola hirehitra tahaka ny afo?
48Tsarovy fa fohy loatra ny fiainako!
Toa zava-poana dia zava-poana
no naharianao anay olombelona.
49Olona iza no velona ka tsy hiharam-pahafatesana,
na hahavotra aina tsy voatanan’ny toeran’ny maty?
Fiatoana
50Tompo ô, nankaiza irony mari-pitiavanao fahiny
izay nianiananao marimarina tamin’i Davida?
51Tompo ô, diniho ny latsa manjo ahy mpanomponao
izay itambesaran’ny fanalam-baràkan’ireo vahoaka,
52satria latsain’ny fahavalonao, TOMPO ô,
izaho mpanjaka voahosotrao;
eny, latsain’ny fahavalonao aho
na aiza na aiza andehanako.
53Hisaorana mandrakizay anie ny TOMPO!
Amen! Amen!
Voafantina amin'izao fotoana izao:
Salamo 89: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.