Salamo 147
147
SALAMO Ny Tompo no mpanohana izao rehetra izao
1Miderà ny TOMPO ianareo fa tsara Izy;
mankalazà ny Andriamanitsika fa mamy Izy.
Mendrika Azy tokoa ny fiderana.
2Manangana an’i Jerosalema ny TOMPO:
ao no hamoriany izay efa niely tamin’i Israely.
3Manasitrana ny torotoro fo Izy
sy mamehy ny ferin’ireo.
4Manisa tsirairay ny kintana Izy
sy miantso azy amin’ny anarany avy.
5Lehibe ny Tompontsika sady mahery;
tsy misy fetra ny fahalalàny.
6Manarina ny ory ny TOMPO
fa manetry ny olon-dratsy hatramin’ny tany.
7Mihirà fiderana ho an’ny TOMPO ianareo;
mankalazà an’Andriamanitsika amin’ny lokanga:
8Izy no manaron-drahona ny lanitra
manomana orana ho an’ny tany,
mampitsiry ahitra ny tanety,
mamokatra anana ho an’ny olona,
9manome sakafo ny biby fiompy
sy ny zana-goaika mitoreo.
10Tsy ny herin’ny soavaly#147.10 soavaly: jereo Sal 33.17 sy nta. na ny hakingàn’ny olona
no tena sitraky ny TOMPO sy ankamamîny,
11fa izay manaja Azy ka matoky ny fitiavany.
12Ry Jerosalema ô, mankalazà ny TOMPO;
ry Tsiôna ô, miderà an’Andriamanitrao.
13Izy no manamafy ny hidim-bavahadinao,
mitahy ny zanakao ao anatinao,
14manisy fiadanana ny faritaninao
sy mamoky anao amin’ny vary tsara indrindra,
15mandefa ny baikony eto an-tany
ka faingam-piely tokoa ny teniny.
16Izy no mandatsaka orampanala toa volon’ondry,
sy mamafy fanala toa lavenona,
17manipy ranomandry toa sombi-mofo
ka tsy misy mahazaka ny hatsiakany.
18Alefany ny teniny, ka miempo ireny;
atsokany ny rivotra, dia mandriaka ny rano.
19Izy no manambara ny teniny amin’ny taranak’i Jakôba,
ny didiny sy fitsipiny amin’ny vahoaka Israely,
20fa tsy mba nanao izany tamin’ny firenen-kafa
ka ny fitsipiny tsy mba fantatr’ireo.
Haleloià!
Voafantina amin'izao fotoana izao:
Salamo 147: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.