Ohabolana 7
7
Aoka tsy ho voasodokan’ny vehivavy mpanitsakitsa-bady
1Anaka, tandremonao ny teniko
ary ataovy raki-tsoa ho anao ny didiko.
2Tandremo ny didiko, dia ho velona ianao;
ary tandremo toy ny anakandriamaso ny fampianarako.
3Ataovy toy ny peratra amin’ny rantsan-tananao ireo
ary soraty ao am-ponao toy ny amin’ny vatofisaka.
4Hevero toy ny anabavinao ny fahendrena
ary toy ny havanao ny fahalalana;
5ireo no hiaro anao amin’ilay vehivavy mpanitsakitsa-bady
dia vehivavy hafa mpanao teny manangoly.
6Raha teo am-baravarankelin’ny tranoko aho
no mba nitazantazana indray andro,
7dia nahita tovolahy maromaro;
ary tamin’ireo no nisy anankiray kely saina,
8dia tanora maivan-doha izay nandeha tamin’ny lalana
akaikin’ny fonenan’izany vehivavy izany
ka nizotra nankany an-tranony.
9Efa somambisamby ny takariva tamin’izay
ary efa manakaiky ny alina sy ny haizina.
10Indro tamy nitsena azy ilay vehivavy
sady nanao fitafin’ny mpivarotena
no feno hafetsifetsena ao am-po.
11Sahisahy sady tsy mahatombin-tsiraka izy
ka tsy mety tafapetraka ao an-tranony.
12Fa mbetika eny an-dalambe, mbetika eny an-kianja
no mamitsaka miandriandry izy
eny amin’ny zoron-trano rehetra eny.
13Dia nisavika ilay tovolahy izy ka nanoroka azy
ary nisolantsolana nilaza taminy hoe:
14«Efa nivoady tamin’Andriamanitra aho
fa hanatitra sorom-pihavanana;
ary androany no nanefako izany#7.14 Ny ampahany amin’ny henan’ny biby natao sorona dia nanaovana fanasan-dehibe. Sakafo toy izany no mety ho nanasan-dravehivavy an’ilay tovolahy..
15Koa nivoaka ny tranoko hitsena anao aho;
te hahalala anao aho, ka dia nahita anao.
16Ny fandriako efa novelarako firakotra,
dia lambam-pandriana avy any Ejipta
17ka nasiako miora sy alôesy
ary kanelina hanamanitra azy.
18Andeha isika hivoky fitia mandra-paharain’ny andro
ka hiara-mankafy ny fahafinaretana vokatr’izany.
19Fa tsy ao an-trano ny vadiko
fa lasa nandeha lavitra.
20Kitapo feno vola no nentiny, ka tsy hiverina izy
raha tsy fenomanana indray ny volana.»
21Teny mamy no nandreseny lahatra ilay tovolahy
ary resaka manodòka nataony no nitaomany azy.
22Koa nanaraka an-dravehivavy teo no ho eo izy
tahaka ny ombilahy entina hovonoina:
adala voafatotra toy izany izy no hofaizina
23mandra-pitsatoky ny zana-tsipîka amin’ny fony;
tahaka ny vorona miriotra mankamin’ny harato izy,
ka tsy mahalala fa hahafaty azy izany.
24Koa ankehitriny henoinareo aho, rey anaka,
ary tandremo tsara ny teny aloaky ny vavako.
25Aoka tsy ho babon’ny vehivavy toy izany ny fonareo,
ary aza mania mankany amin’ny sakeli-dalany.
26Fa maro no efa naratrany ka simbany
ary tsy tambo isaina ireo rehetra efa matiny.
27Ny tranony no lalana ho amin’ny toeran’ny maty,
dia lala-midina any am-ponenan-dRafahafatesana.
Voafantina amin'izao fotoana izao:
Ohabolana 7: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.