Nehemià 11
11
Lisitr’ireo Jiosy voatendry honina ao Jerosalema
1Niorim-ponenana tao Jerosalema ireo lehiben’ny vahoaka; ary nanaovana antsapaka ny vahoaka sisa mba hahatonga ny ampahafolony honina ao Jerosalema tanàna masina, fa ny sivy toko kosa dia ho any amin’ny tanàna hafa. 2Nisaoran’ny vahoaka manokana ny lehilahy rehetra izay nanolo-tena honina ao Jerosalema.
3Ireo lohandohany teo amin’ny faritany no niorim-ponenana tao Jerosalema; fa ny Israelita sarambabem-bahoaka, ny mpisorona sy ny levita, ireo mpanampy ny levita sy ireo taranaky ny mpanompon’i Salômôna dia samy tao amin’ny zarataniny aman-tanànany avy. 4Kanefa niorim-ponenana tao Jerosalema koa ny olona sasany tamin’ny taranak’i Joda sy i Benjamîna.
Tamin’ny taranak’i Joda dia ireto avy: i Hataià, anisan’ny terak’i Peretsa noho izy zanakalahin’i Hozià sy zafin’i Zakarià sy zafiafin’i Amarià sy zafin-dohalik’i Sefatià ary zafin-kitrokelin’i Mahalalela; 5ary i Mahaseià, anisan’ny terak’i Selà noho izy zanakalahin’i Baròka sy zafin’i Kôla-Hôze sy zafiafin’i Hazaià sy zafin-dohalik’i Hadaià sy zafin-kitrokelin’i Jôiariba ary zafim-paladian’i Zakarià. 6Lehilahy olombanona 468 no tontalin’ny terak’i Peretsa tonga nonina tao Jerosalema.
7Tamin’ny taranak’i Benjamîna dia ireto avy: i Salò, zanakalahin’i Mesolama sy zafin’i Jôheda sy zafiafin’i Pedaià sy zafin-dohalik’i Kôlaià sy zafin-kitrokelin’i Mahaseià sy zafim-paladian’i Itiela ary zafin-dorian’i Jesahià, 8mbamin’ireo lehilahy olombanona mpiray foko aminy: dia 928 no tontalin’ny Benjaminita. 9I Jôela, zanakalahin’i Zikry, no mpifehy azy; ary i Joda, zanakalahin’i Senaà, no lefitry ny komandin’ny tanàna. 10Tamin’ny mpisorona dia ireto avy: i Jedahià, zanakalahin’i Jôiakima; 11i Seraià, zanakalahin’i Hilkià sy zafin’i Mesolama sy zafiafin’i Tsadôka sy zafin-dohalik’i Meraiôta ary zafin-kitrokelin’i Ahitoba mpisorombe; 12ary koa lehilahy 822 iray tarika amin’i Jedahià sy i Seraià, izay mpiasa teo amin’ny fanaovana ny tranon’Andriamanitra; i Hadaià, zanakalahin’i Jerôhama sy zafin’i Pelahià sy zafiafin’i Ametsy sy zafin-dohalik’i Zakarià sy zafin-kitrokelin’i Pasehora ary zafim-paladian’i Malkià, 13ary koa lehilahy 242 iray tarika amin’i Hadaià, izay samy loham-pianakaviana avy; i Hamasay, zanakalahin’i Hazarela sy zafin’i Ahezay sy zafiafin’i Meselemôta ary zafin-dohalik’i Imera, 14ary koa lehilahy tomady 128 iray tarika amin’i Hamasay, ka ny mpifehy azy dia i Zabdiela zanakalahin’i Gedôlima.
15Tamin’ny levita dia ireto avy: i Semahià, zanakalahin’i Hasoba sy zafin’i Hazrikama sy zafiafin’i Hasabià ary zafin-dohalik’i Bony; 16i Sabetahy sy i Jôzabada, anisan’ny lohandohan’ny levita sady tonian’ny raharaha teo ivelan’ny tranon’Andriamanitra; 17i Matanià zanakalahin’i Mikà sy zafin’i Zabdy ary zafiafin’i Asafa ka izy no mpiventy ny hira fiderana amin’ny fotoam-pivavahana; i Bakbokià rahalahin’i Matanià sady mpanampy azy amin’ny hira; ary i Habdà, zanakalahin’i Samoa sy zafin’i Galala ary zafiafin’i Jedotona. 18Ny levita rehetra, tao amin’ny tanàna masina, dia 284.
19Ny mpiandry varavarana dia i Hakoba sy i Talmôna mbamin’ny namany izay niambina ny vavahady, ka 172 no isany.
20Ny sisa tamin’ny Israelita sy ny mpisorona ary ny levita dia teny amin’ny tanàna rehetra tao Joda, samy teo amin’ny zarataniny avy. 21Fa ireo mpanampy ny levita#11.21 mpanampy ny levita: jereo Hez 2.55 sy nta. –Hôfela: jereo 2 Tan 27.3 sy nta. dia nonina teo amin’ny faritr’i Hôfela, ka i Tsihà sy i Gispà no nifehy azy.
22Ny mpifehy ny levita tao Jerosalema dia i Hozy, zanakalahin’i Banỳ sy zafin’i Hasabià sy zafiafin’i Matanià ary zafin-dohalik’i Mikà; i Hozy dia anisan’ny tarik’i Asafa, ilay tarika mpihira miadidy ny fanompoana ao an-tranon’Andriamanitra. 23Fa nisy didin’ny mpanjaka ny amin’ireo mpihira ireo, dia ny handraiketana izay anjara asa hataony isan’andro.
24I Petahià, zanakalahin’i Mesezabela sady anisan’ny terak’i Zera zanakalahin’i Joda, dia teo anilan’ny amperôra mba hiandraikitra ny raharaha rehetra momba ny vahoaka israelita.
Ny Jiosy monina ivelan’i Jerosalema
25Ny sasany tamin’ny taranak’i Joda dia nonina tany amin’ireto tanàna teny anivon-tsaha ireto: i Kiriata-Arbà sy ireo tanàna kely miankina aminy, i Dibôna sy ireo tanàna kely miankina aminy, i Kabitseela sy ny tanàna mifanila aminy, 26i Jesoa, i Môladà, i Bety-Peleta, 27i Hatsary-Sohaly, i Beera-Seba sy ireo tanàna kely miankina aminy, 28i Tsiklaga, i Mekônà sy ireo tanàna kely miankina aminy, 29i Haîna-Rimôna, i Tsôrehà, i Jarmota, 30i Zanôa, i Hadolama sy ny tanàna mifanila aminy, i Lakîsy sy ny saha manodidina azy, i Hazeka sy ireo tanàna kely miankina aminy. Nonina hatrany Beera-Seba any atsimo ka hatramin’ny lohasahan’i Hinôma any avaratra ireo taranak’i Joda ireo.
31Ny sasany tamin’ny taranak’i Benjamîna kosa dia nonina tamin’ireto tanàna ireto: i Geba, i Mikmasy, i Haià, i Betela sy ireo tanàna kely miankina aminy, 32i Hanatôta, i Nôba, i Hananià, 33i Hatsôra, i Ramà, i Gitaîma, 34i Hadida, i Tsebôhima, i Nebalato, 35i Lôda, i Onao ary ny lohasahan’ny mpahay taozavatra.
36Tamin’ireo levita, dia nisy ankolafiny tao Joda lasa nankany Benjamîna#11.36 Manjavozavo ny RM eto amin’ity and 36 ity..
Voafantina amin'izao fotoana izao:
Nehemià 11: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.