Lioka 20:1-19

Indray andro, dia nampianatra ny vahoaka teo an-kianjan’ny tempoly i Jesoa sady nanambara ny Vaovao Mahafaly taminy. Tonga kosa ny lohandoha-mpisorona sy ny mpahay lalàna mbamin’ny loholona ka nanao taminy hoe: –Mba lazao kely hoe: fahefana ahoana moa no anaovanao an’izao zavatra izao? Iza no nanome Anao izao fahefana izao? Dia novalian’i Jesoa hoe: –Izaho koa mba hanontany anareo zavatra anankiray, ka lazao kely hoe: iza no naniraka an’i Jôhany hanao batisa, Andriamanitra sa olombelona? Dia niara-niady hevitra ry zareo ka nifampiresaka hoe: –Raha lazaintsika hoe: «Andriamanitra no naniraka azy», dia hataony hoe: «Koa nahoana no tsy ninoanareo i Jôhany?» Raha lazaintsika hoe: «Olombelona no naniraka azy», dia indray hitora-bato hamono antsika ny vahoaka, satria nekeny ho mpaminanin’Andriamanitra i Jôhany. Ka hoy ny navaliny an’i Jesoa hoe: –Tsy hitanay izay holazaina ny amin’izany! Dia hoy i Jesoa taminy: –Izaho koa mba tsy hilaza aminareo izay fahefana anaovako an’izao zavatra izao. Dia nitodika tamin’ny vahoaka kosa i Jesoa nanao izao fanoharana izao: –Nisy lehilahy nanamboatra tanimboaloboka ka nampanofa azy tamina mpamboly ary lasa niorim-ponenana any an-tany hafa. Nony tonga ny taom-piotazana dia nanirahany mpiasa ireo mpamboly, hiangavy azy ireo hanome ampahany amin’ny vokatry ny tanimboaloboka; kanjo nokapohin’ireo mpamboly ilay mpiasa ary nalefany nody maina. Dia nanirahany mpiasa fanindroany, fa io koa nokapohin’ireo mpamboly sy notevatevainy ary nalefany nody maina. Dia mbola nanirahany mpiasa fanintelony; io indray koa nataon’ireo mpamboly naratra, izay vao noroahiny. Ary hoy ny tompon’ny tanimboaloboka: «Inona re no hataoko? Ndeha hirahiko ity zanako malalako, fa angamba izy hananan’ireo hena-maso!» Vao nahita azy kosa ireo mpamboly, dia niara-nidinika sady nifampiresaka hoe: «Ny mpandova ity; aoka hovonointsika mba hahazoantsika ny lova.» Dia natosiny tany ivelan’ny tanimboaloboka ilay io ka novonoiny. Dia nofaranan’i Jesoa hoe: –Inona àry no hataon’ny tompon’ny tanimboaloboka amin’ireo mpamboly? Ho avy izy ka haringany ireo mpamboly ireo ary homeny olon-kafa ny tanimboaloboka. Raha nandre izany ireo mpanohitra an’i Jesoa, dia niteny hoe: –Sanatria izany! Fa nojeren’i Jesoa ry zareo sady nataony hoe: –Inona àry no dikan’ity andinin’ny Soratra Masina ity: «Ny vato nolavin’ny mpanao trano no nanjary vato fehizoro»? Izay rehetra mianjera amin’izany vato izany dia ho torotoro, ary izay ianjerany kosa ho montsamontsana. Nitady hisambotra an’i Jesoa tamin’izay ireo mpahay lalàna sy lohandoha-mpisorona, satria nahatsiaro tena ho niantefan’iny fanoharana nataony iny. Saingy natahotra ny vahoaka ry zareo.