Jôba 4
4
Fidiran’i Elifaza:
Sambatra ny olona izay anarin’Andriamanitra
1Dia nandray fitenenana i Elifaza avy any Temàna ka nanao tamin’i Jôba hoe:
2Tsy misy sahy miteny aminao, satria sorena mafy ianao#4.2 Dkt hafa: Raha mba miteny aminao aho, moa ho zakanao ve? Vao zahan’Andriamanitra toetra ianao, dia indro fa sorena!;
nefa tsy azo atao ny hangina ela intsony.
3Indro efa nanabe olona maro ianao
ary nampahery ireo niraviravy tanana.
4Ny teninao no nampitraka ireo efa saiky lavo;
efa nampatanjaka lohalika mangozohozo ianao.
5Ankehitriny, tojo izany ianao ka kivy,
mby an-koditrao ka mahaketraka anao!
6Satria nanaja an’Andriamanitra ianao
sy nanana fitondrantena mendrika,
ka moa tsy hatoky sy hanantena va?
7Tsarovy izao: efa nahita tsy manan-tsiny
na olo-marina maty nahantra ve ianao?
8Hitako tsara fa izay mamboly tsy fahamarinana
sy mamafy fahoriana no hijinja ny vokany.
9Ny fofonain’Andriamanitra no andringanana azy;
ny fahatezerany no toa rivo-mahery mahalevona azy;
10na mierona toa liona izy na minaonaona toa tigra,
dia tapatapahiny nify ireo toa biby masiaka ireo.
11Lany remby ny bibidia ka maty;
ary ny zanaky ny liom-bavy kosa miparitaka.
*
12Nisy teny izay tonga tamiko mangingina;
ary bitsika malefaka no reko taminy.
13Noho ny eritreritra misafotofoto
vokatry ny nofy amin’ny alina
raha sondrian-tory ny olona#4.13 Ampit Jôb 33.15.,
14dia nangovitry ny tahotra aho
ka nipararetra ny taolako rehetra.
15Ary nisy rivotra nisafo ny tavako
ka nampihoron-koditra ny tenako.
16Nisy endrik’olona mitsangana nefa tsy fantatro,
fa manjavozavo izy no teo anoloan’ny masoko.
Dia nangina aloha, vao nisy niteny hoe:
17«Ho marina sy ho madio ve ny olona
eo anatrehan’Andriamanitra Mpahary azy?
18Indreo ny mpanompony aza tsy atokiany,
ary ny anjeliny mbola ahitany tsininy;
19koa mainka fa izay olombelona
mora potika toa tanimanga,
sady vovo-tany no fiaviany!
ka mety voaporitra tahaka ny fositra.
20Indray andro monja no hahamontsana
sy hahalevona azy mandrakizay;
ka tsy hisy hahatandrintandrina akory.
21Tsy efa tapaka va ny kofehin-dainy?
Ho faty tsy manam-pahendrena izy.»
Voafantina amin'izao fotoana izao:
Jôba 4: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.