Jeremià 7
7
Fianteherana poakaty
1Nisy baiko avy amin’ny TOMPO tonga tamin’i Jeremià ka nandidy azy 2hitsangana eo am-bavahadin’ny tranon’ny TOMPO sy hiantsoantso izao hafatra izao: «Mihainoa ny tenin’ny TOMPO ianareo olon’i Joda rehetra izay miditra amin’ity vavahady ity mba hivavaka amin’ny TOMPO. 3Izao no lazain’ny TOMPOn’izao rehetra izao sady Andriamanitr’i Israely: Ataovy tsara ny fitondrantenanareo sy ny asanareo, dia hamponeniko amin’ity tany ity ianareo#7.3 Rijan-teny hafa tohanan’ny dkt tranainy roa dia hipetraka eo aminareo hatrany Aho. . 4Aza miantehitra amin’ny teny fitaka hoe: ‹Eto no tempolin’ny TOMPO, eto no tempolin’ny TOMPO, eto tokoa no tempolin’ny TOMPO!› 5Fa ahitsio tsara ny fitondrantena sy ny fanaonareo: anaovy fitsarana ara-drariny ny adin’ny olona eo amin’ny fitsarana, 6aza mitsentsitra ny vahiny sy ny kamboty ary ny mpitondratena, atsaharo ny famonoana ny tsy manan-tsiny eto sy ny fifikirana amin’ny andriamani-kafa izay mahatonga loza ho anareo. 7Fa hamponeniko eto#7.7 Jereo ny naoty momba ny and 3. ianareo, dia eto amin’ity tany ity izay efa nomeko ny razanareo hatry ny ela ka ho mandrakizay.
8Kanefa teny fitaka sy tsy misy lanjany akory no ianteheranareo. 9Hay ve ianareo mangalatra sy mamono olona, mijangajanga sy mianiana lainga, mandoro vovo-javamanitra ho an’i Bahala ary mifikitra amin’ireo andriamani-kafa izay tsy fantatrareo akory? 10Nefa ianareo mbola miseho eo anatrehako eto amin’ity trano izay natokana ho Ahy ity ihany ka manao hoe: ‹Voavonjy izahay›; ary avy eo dia tohizinareo indray ireo asa rehetra maharikoriko ireo. 11Moa ataonareo ho zohy fieren’ny jiolahy ve ity trano izay natokana ho Ahy ity#7.11 Jereo Mt 21.13; Mk 11.17; Lk 19.46.? Fa izany no fahitako azy, hoy ny teny hentitry ny TOMPO.
12Mankanesa any amin’ny toerako masina any Silao#7.12 Jereo Jer 26.9; Jos 18.1; 1 Sam 1.3; 3.21; 4.3; Sal 78.60. izay namponenako ny voninahitro fahiny, ka jereo izay nanaovako azy noho ny haratsian’ilay Israely vahoakako. 13Ankehitriny dia manao ireny zava-dratsy rehetra fanaony ireny koa ianareo, hoy ny teny hentitry ny TOMPO. Efa nambarako sy naverimberiko taminareo izany nefa tsy nohenoinareo; efa nantsoiko ianareo nefa tsy namaly. 14Noho izany ity trano izay natokana ho Ahy ity, ity trano izay ianteheranareo ity, ity toerana izay nomeko anareo sy ny razanareo ity dia hataoko tahaka ny nanaovako an’i Silao. 15Ary ianareo kosa horoahiko lavitra Ahy tahaka ny nandroahako ny olona rehetra mpiray firenena aminareo, dia ny taranaka rehetra tao Efraîma#7.15 Efraîma: foko lehibe fototra tao amin’ny fanjakana Israelita tany avaratra fahiny. Ny anarany matetika no nampiasaina hanondroana ny fitambaran’io fanjakana io. Tsy hita teo amin’ny sehatra pôlitika intsony anefa izy efa ho zato taona talohan’ny fiantombohan’ny asan’i Jeremià..»
Vavaka tsy hohenoin’ny Tompo
16Ianao kosa, ry Jeremià, aza mivavaka amiko ho an’ity vahoaka ity intsony na mampakatra fitarainana sy fifonana ho azy, fa tsy hihaino anao Aho. 17Tsy hitanao angaha izay ataony any amin’ireo tanànan’i Joda sy eny an-dalamben’i Jerosalema? 18Ny ankizy mifako kitay, ny rainy mandrehitra afo, ny vehivavy kosa mametafeta koba hatao mofo hatolotra ho an’ny mpanjakavavin’ny lanitra#7.18 ny mpanjakavavin’ny lanitra: fiantsoana ny andriamani-bavy Istara na (Hastôreta), nohajaina fatratra tany Mezôpôtamia ary ampitoviana amin’ny Planeta Venus (jereo Jer 44.7-19).; manao izay mahasosotra Ahy ireo fa manolotra fanatitra divay ho an’ny andriamani-kafa. 19Koa mampahasosotra Ahy tokoa ve izy, hoy ny teny hentitry ny TOMPO. Tsia, fa ny tenany ihany no ampahasosoriny, ka hampahamenatra azy izany.
20Noho izany dia izao no lazain’ny Tompo ANDRIANANAHARY: Indro ny fahatezerako amam-pahavinirako hatobako amin’ity tanàna ity amin’ny olona sy ny biby fiompy, ary amin’ny hazo eny an-tsaha sy amin’ny vokatry ny tany; ka ho toy ny afo tsy mety maty izany.
Firenena tsy mihaino ny Andriamaniny
21Izao no lazain’ny TOMPOn’izao rehetra izao sady Andriamanitr’i Israely: Ny henan’ny sorona dorana manontolo dia ampio ny henan’ny sorom-pihavanana nataonareo, ka mahereza mihinan-kena. 22Fa raha nitondra ny razanareo niala tany Ejipta Aho, dia tsy nilaza taminy akory na nangataka azy hanao sorona dorana manontolo na sorom-pihavanana. 23Fa izao kosa no nandidiako azy: Henoy izay lazaiko, dia ho Andriamanitrareo Aho ary ianareo ho vahoakako. Araho ny lalàna izay nandidiako anareo, dia hahita soa ianareo. 24Kanjo tsy nihaino sady tsy niraharaha Ahy izy fa nanaraka ny heviny araka ny ditran’ny fony. Tsy nitodika tamiko izy fa niamboho Ahy. 25Hatry ny nialan’ny razanareo tany Ejipta ka mandraka androany, dia tsy nitsahatra Aho naniraka ny mpaminany mpanompoko rehetra tany aminareo isan’andro tsy tapaka#7.25 Ampit 25.4; 26.5; 29.19; 35.15.. 26Nefa tsy nihaino Ahy ianareo sady tsy niraharaha Ahy fa nanamafy hatoka sy nanao ratsy mihoatra noho ny razanareo aza.
27Ary ianao, ry Jeremià, na dia hilaza izany teny rehetra izany aminy aza, dia tsy hihaino anao izy; ary na dia hampita ny antsoko aminy aza ianao, dia tsy hamaly anao akory izy. 28Koa ambarao aminy hoe: «Ianareo no firenena tsy mba mihaino ny feon’ny TOMPO Andriamaniny sady tsy mety mandray anatra. Efa very teo aminareo ny toetra mahatoky ary efa niala teo am-bavanareo izany.»
Ny lohasaham-pandringanana
29Hoy ny TOMPO hoe: «Ry vahoakan’i Joda,
hetezo ka ario ny volonao lava
izay marika fa voatokana ho Ahy ianao#7.29 Jereo Nom 6.1-21, indrindra fa ny and 5-9..
Manaova hira fisaonana
eny amin’ny havoana mangadihady;
fa hariako sady ho laviko ianao,
satria taranaka mahatezitra Ahy.»
30Nanao izay ratsy eo imasoko ny vahoakan’i Joda, hoy ny teny hentitry ny TOMPO. Nametraka sampy maharikoriko tao amin’ny trano izay natokana ho Ahy izy, ka nandoto azy. 31Nanorina toeram-panasinana atao hoe Tôfeta tao amin’ny lohasahan’i Hinôma izy mba handoroany ho sorona ny zanany lahy sy ny zanany vavy#7.31 Ny lohasahan’i Hinôma: ao atsimon’i Jerosalema; jereo 19.2-6; 32.35. –momba ny sorona ankizy: jereo Lev 18.21; 2 Mp 23.10.. Nefa zavatra tsy nandidiako azy akory izany, sady tsy mba tonga tao am-poko velively.
32Noho izany, hoy ny teny hentitry ny TOMPO, indro avy ny andro izay tsy hilazana intsony hoe «Tôfeta» na «Lohasahan’i Hinôma» fa «Lohasaha Famonoana». Ao no handevenana ireo maty fa tsy misy toerana intsony any an-kafa#7.32 Ny fisian’ny faty ao dia hahatonga io toerana io ho maloto, izany hoe tsy mendrika na dia amin’ny fivavahana fanompoan-tsampy aza.. 33Ny fatin’ireo olona ireo dia ho sakafon’ny voromahery sy ny bibidia izay tsy hisy hanaitaitra hampiala azy. 34Ary eny an-tanàn-dehiben’i Joda sy eny an-dalamben’i Jerosalema dia hatsahatro ny kotabam-pifaliana amin’ny fety sy ny horakora-piravoana ary ny hiran’ireo mpanambady satria ho lao ny tany#7.34 Ampit Jer 16.9; 25.10; Apôk 18.23..
Voafantina amin'izao fotoana izao:
Jeremià 7: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.