Jeremià 6
6
Tandindomin-doza goavana i Jerosalema
1Mandosira faingana hiala ao Jerosalema,
ianareo Benjaminita,
mba hitady fialofana any an-kafa.
Tsofy ao Tekôa ny anjomara,
manaova tsangan’afo ao Bety-Kerèma,
satria misy loza sy fandringanana goavana
mipoitra avy any avaratra#6.1 Jereo 1.14 sy nta..
2Indro rava ianao#6.2 indro rava ianao: dkt hafa nanjary nangina ianao na nataoko nangina ianao. ry Tsiôna,
tanàna tsara tarehy sy miaingitraingitra!
3Fa tonga hatrany aminao ny olona
tahaka ny mpiandry ondry sy ny andian’ondriny.
Manangana toby manodidina hamelezana anao izy
ka mitondra ny andian-tafiny amin’ny tandrify azy.
4Miantsoantso ireo hoe: «Ndao hotafihina izy!
Mitsangàna isika mba haka azy an-keriny
amin’ny mitataovovona!
Indrisy, efa mihilana ny andro
ary efa mandroso aloka ny hariva!
5Mitsangàna isika mba haka azy an-keriny
amin’ny alina;
aoka horavantsika ireo lapany tsara tarehy!»
6Izao no lazain’ny TOMPOn’izao rehetra izao
amin’ireto mpanafika an’i Tsiôna:
«Mikapà hazo hanaovana tovon-tany
mba hamelezana an’i Jerosalema.»
Iharan-tsazy io tanàna io
fa feno fampahoriana ao aminy.
7Mampiboiboika ny faharatsiany
toy ny fantsakana mamoaka rano izy.
Herisetra sy famoretana no mba re ao.
Ratra sy fijaliana no hitako ao mandrakariva.
8Minoa anatra ianao, ry Jerosalema;
raha tsy izany, dia hihatahako ianao,
ka hataoko tanàna lao sy tany tsy honenana.
Famaizana ireo mafy fo
9Izao no lazain’ny TOMPOn’izao rehetra izao:
«Tangosy hatramin’ny farany
toy ny fitango voaloboka
ireo olona sisa amin’i Israely;
averimbereno eny amin’ny rantsany madinika
toy ny an’ny mpioty voaloboka ny tananao!»
(Jeremià)
10Iza no hitenenako,
ary iza no hampandrenesina hihaino ahy?
Indro tsentsina ny sofiny,
ka tsy afaka handre tsara izy.
Manala-baràka azy ny teninao, ry TOMPO,
ka tsy ankamamîny.
11Feno ny fahatezeranao aho, ry TOMPO,
ka tsy mahatsindry izany intsony.
(Ny Tompo)
Afafazo amin’ny ankizy eny an-dalambe
sy amin’ny andian-tanora manontolo
izany fahatezerako tsy tantinao izany.
Fa na lehilahy na vehivavy
na ny antitra na izay efa ela niainana
dia samy hosamborina avokoa.
12Ho lasan’olon-kafa ny tranony
sy ny sahany ary ny vadiny#6.12 And 12-15: ampit Jer 8.10-12.,
satria hahinjitro ny tanako
hamely ny mponina amin’ny tany,
hoy ny teny hentitry ny TOMPO.
13Izy rehetra, na ny kely na ny lehibe,
dia samy mitady tombontsoa avokoa.
Na ny mpaminany na ny mpisorona
dia samy mpamitaka avokoa.
14Alasafay fotsiny no nitsaboany
ny fahavoazan’ny vahoakako
tamin’ny nilazany hoe: «Fiadanana, fiadanana!»;
kanjo tsy nisy fiadanana akory#6.14 Jereo Jer 8.11; Ezek 13.10.!
15Tokony hahamenatra azy
ny zava-maharikoriko nataony;
nefa tsy menatra akory izy
sady tsy mahatsapa ny hadisoany.
Noho izany, hoy ny TOMPO,
dia anisan’ireo ho lavo izy;
ka amin’ny andro hamaliako azy,
no hitrosenany amin’ny tany.
16Izao no lazain’ny TOMPO:
Mijanòna eny an-dalana ianareo ka mandiniha;
ary anontanio ny sakeli-dalana fahiny.
Tadiavo ny lalana ho amin’ny fahasambarana;
araho izany, dia hahita fitsaharana
ho an’ny fanahinareo#6.16 Ampit Mt 11.29. ianareo!
Kanefa hoy izy hoe: «Tsy hanaraka izahay!»
17Nametrahako mpitily teo aminy,
hampaneno ny anjomara fanairana.
Kanefa hoy izy hoe: «Tsy ahoanay izany!»
18Koa henoy àry izao, ry firenen-kafa,
fantaro tsara izay hanjo azy.
19Mihainoa, ry mponina rehetra eran-tany:
Indro hahatonga loza ho an’io firenena io Aho,
dia loza vokatry ny hevi-dratsiny ihany,
satria tsy niraharaha ny teniko izy
sady naniratsira ny fampianarako.
20Nahoana moa Aho no anafarana
vovo-javamanitra avy any Sebà
sy veromanitra avy any an-tany lavitra?
Tsy sitrako ny sorona dorany manontolo
ary tsy teliko ny sorona hafa ataony ho Ahy.
21Koa izao no lazain’ny TOMPO:
Hasiako zava-mahasolafaka
eo anoloan’ity firenena ity;
ka samy ho solafaka sy ho faty eo
na ny raiamandreny na ny zanany
na ny namany sy ny mpiara-monina aminy.
Tonga avy any avaratra ny fahavalo
22Izao no lazain’ny TOMPO:
Indro misy vahoaka tonga
avy any amin’ny tany avaratra#6.22 Jereo 1.14 sy nta; ampit 5.15.,
dia firenen-dehibe iray
miainga avy any am-paran’ny tany.
23Mampirangaranga tsipîka sy lefona
ireo miaramilany lozabe sady tsy mamindra fo.
Mirohondrohona toy ny ranomasina ny feony.
Mitaingin-tsoavaly izy ary milahatra
toy ny andian-tafika hiady
mba hamely anao, ry Tsiôna.
(Ny vahoaka)
24Renay izany vaovao izany
ka niraviravy tanana izahay,
sady tratry ny fanaintainana
toy ny vehivavy raha miteraka.
25Aza mivoaka ho any an-tsaha,
aza mandeha eny an-dalam-be
fa ao ny fahavalo mirongo sabatra;
ka horohoro hatraiza hatraiza#6.25 Jereo 20.3,10; 46.5; 49.29; Sal 31.14..
(Ny Tompo)
26Ry vahoakako, misikìna lamba fisaonana
ka mihosena amin’ny vovoka;
ataovy ny fombafomba rehetra fanao
amin’ny fisaonana zanaka lahitokana,
ka mitomania fatratra ianareo
fa ho avy tampoka ny fahavalo mpandringana.
Metaly tsy azo diovina i Israely
(Ny Tompo)
27Hataoko toy ny misedra vy ianao, ry Jeremià,
mba hizaha toetra ny vahoakako:
hofantarinao sy hotombananao ny fitondrantenany.
(Jeremià)
28Mpikomy maditra avokoa izy rehetra,
ka mandehandeha manaratsy;
mafy noho ny vy na ny halimo izy,
ary samy mpanao ratsy avokoa.
29Efa sempotra dia sempotra ny tafoforana,
ka tokony ho levona ny firaka noho ny hafanana;
nefa very maina ny nandrendrehana ny volafotsy
fa tsy mety miala ny taindrendrika.
30Volafotsy tsy misy ilana azy
no ilazana ireny olona ireny,
satria tsy ilain’ny TOMPO.
Voafantina amin'izao fotoana izao:
Jeremià 6: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.