Jeremià 25
25
Feno 23 taona nitorian-teny i Jeremià
1Nisy hafatra azon’i Jeremià ho an’ny vahoaka rehetra ao Joda tamin’ny taona fahefatra nanjakan’i Jôiakima, zanakalahin’i Jôsià sady mpanjakan’i Joda#25.1 nanjakan’i Jôiakima: jereo 22.13 sy nta. –taona fahefatra: tamin’ny taona 605 tal J.K.; ampit Dan 1.1-2., dia ny taona voalohany nanjakan’i Nebokadnetsara, mpanjakan’i Babilôna. 2Ka hoy i Jeremià mpaminany tamin’ny vahoaka rehetra ao Joda sy ny mponina rehetra tao Jerosalema:
3«Manomboka amin’ny taona faha-13 nanjakan’i Jôsià, zanakalahin’i Amôna sady mpanjakan’i Joda, ka mandraka androany, izany hoe efa 23 taona izao, no nanambarako sy namerimberenako taminareo ny hafatra nampitondrain’ny TOMPO ahy, nefa tsy nihaino ianareo. 4Tsy nitsahatra naniraka ny mpaminany mpanompony#25.4 Jereo 7.25 sy nta. tany aminareo ny TOMPO nefa tsy nihaino na niraharaha akory ianareo. 5Hoy Izy taminareo: «Samia miala amin’ny fitondrantena sy fanao ratsiny avy ianareo, dia haveriko honina ao amin’ny tany izay nomeko anareo sy ny razanareo hatrizay ka ho mandrakizay ianareo. 6Aza mifikitra amin’ireo andriamani-kafa hivavaka aminy na hiankohoka eo anatrehany, ary aza mampahatezitra Ahy amin’ny fanaovana sampy; dia tsy hahatonga loza aminareo Aho. 7Nefa tsy nihaino Ahy ianareo, hoy ny teny hentitra avy amiko TOMPO; fa vao mainka aza nampahatezitra Ahy tamin’ny fanaovana sampy mba hahatonga loza aminareo.»
8Koa izao no lazain’ny TOMPOn’izao rehetra izao: «Satria tsy nihaino ny teniko ianareo, 9dia hampaniraka haka ireo fokom-pirenena rehetra any avaratra Aho#25.9 Jereo 1.14 sy nta., ary hiantso an’i Nebokadnetsara mpanjakan’i Babilôna sady mpanompoko. Hasaiko tonga izy hamely ity tany ity sy ny mponina eo ary koa hamely ireto firenena rehetra manodidina anareo ireto; samy haringako tokoa ireo ka hampahonena sy hampivarahontsana ary ho tonga oha-pandatsana mandrakizay. Teny hentitra avy amiko TOMPO izany. 10Hofoanako tsy hisy eo aminareo ny tabataban’ny fety, ny horakora-pifaliana sy ny hiran’ny mpanambady, ny fidilotry ny vato fikoseham-bary ary ny fahazavan’ny jiro#25.10 Jereo Jer 7.34 sy nta.. 11Ho rava sy hampahonena ny tany manontolo ary hanompo ny mpanjakan’i Babilôna mandritra ny fitopolo taona#25.11 Jereo 2 Tan 36.21; Jer 29.10; Dan 9.2. ny firenen-kafa rehetra.
12Rehefa tapitra ny fitopolo taona, dia hirotsaka an-tsehatra Aho hamaly an’i Nebokadnetsara sy ny vahoakany noho ny helony, hamely ny taniny Aho ka hanao azy ho taniefitra rava mandrakizay. Teny hentitra avy amiko TOMPO izany. 13Hataoko mihatra amin’izany tany izany ny loza rehetra izay efa nolazaiko. Voasoratra ao anatin’ity boky ity ireny, dia araka izay efa nambaran’ny mpaminany Jeremià ny amin’ny firenena rehetra. 14Anjaran’ny Babilônianina kosa amin’izay ny hanompo firenen-dehibe sy mpanjaka mahery. Havaliko azy ny ratsy rehetra nataony.
Famaizana ho an’ny firenen-drehetra
15Izao no voalazan’ny TOMPO Andriamanitr’i Israely tamiko: «Raiso etỳ an-tanako ity tsangambava izay feno ny divaim-pahatezerako ity, ka ampisotroy ny firenena rehetra izay anirahako anao. 16Hisotroany anie izany ka hampivembena sy hahavery saina azy eo anoloan’ny fandringanana izay halefako eo anivony.»
17Dia noraisiko ny tsangambava izay teny an-tanan’ny TOMPO, ary nampisotroiko ny firenena rehetra izay nanirahan’ny TOMPO ahy. 18I Jerosalema sy ireo tanànan’i Joda mbamin’ireo mpanjaka sy mpanapaka teo aminy no nanombohako izany mba hahatonga ireo toerana ireo ho rava ka hampahonena sy hampivarahontsana ary ho tonga oha-panozonana, araka izao toe-javatra ankehitriny izao.
19Dia tonga ny anjaran’ny firenen-kafa:
–Ny Farao mpanjakan’i Ejipta sy ireo tandapany ary ny mpifehiny mbamin’ny vahoakany rehetra, 20miaraka amin’ireo firenena madinika samihafa monina any Ejipta;
–ireo mpanjaka rehetra amin’ny tany Hotsy#25.20 Ao atsimon’ny Ranomasina Maty, ao amin’ny tanin’i Edôma no nisy an’i Hotsy.;
–ireo mpanjaka rehetra amin’ny tanin’ny Filistinina: dia ny tao Askelôna sy tao Gazà sy tao Hekrôna ary tao amin’ny faritra sisa eo Asdôda;
21–ny Edômita sy ny Môabita ary ny Hamônita;
22–ireo mpanjaka rehetra tao Tiro sy tao Tsidôna ary tao amin’ny tany amorontsiraka any ampitan-dranomasina any;
23–ny mponina any Dedàna sy Temà ary Bozỳ mbamin’ireo olona rehetra mpiharatra fihirifana#25.23 Dedàna, Temà, Bozỳ: saha lonaka mitsitokotoko any Arabia. –mpiharatra fihirifana: jereo 9.25.;
24–ireo mpanjaka rehetra any Arabia sy any amin’ireo foko samihafa monina any an-taniefitra;
25–ireo mpanjaka rehetra any Zimrỳ#25.25 Zimrỳ: tany tsy fantatra mazava, fa misy mihevitra azy ho tanin’ny Simerianina na Armenia. sy any Helama ary any Media;
26–ireo mpanjaka rehetra any avaratra, na ny lavitra na ny akaiky.
Izany hoe ny fanjakana rehetra teto amin’izao tontolo izao, manerana ny velaran-tany, dia samy tsy maintsy nisotro tsirairay tamin’izany tsangambava feno ny divaim-pahatezeran’ny Tompo izany; ary ny mpanjakan’i Sesàka#25.26 Sesàka: mety ho fanoratana an-kolaka amin’ny teny hebreo ny anaran’i Babilôna. no nisotro namarana azy.
27Nanafatra ahy ny Tompo hilaza amin’izy rehetra hoe: «Izao no lazain’ny TOMPOn’izao rehetra izao, Andriamanitr’i Israely: Misotroa ianareo ka mimamoa sy mandoava ary mianjerà amin’ny tany mihitsy; ka tsy ho tafarina intsony ianareo noho ny fandringanana izay halefako eo anivonareo.» 28Ary nampiany hoe: «Raha misy mandà tsy hisotro amin’ny tsangambava izay atolotrao azy, dia ilazao hoe: Izany no baikon’ny TOMPOn’izao rehetra izao ka tsy maintsy misotro ianareo. 29Ireo tanàna izay natokana ho Ahy aza no nanombohako nandefasana loza, ka ianareo ve no hataoko afa-maina? Tsia, tsy hataoko afa-maina ianareo, fa hiantso sabatra hamely ny mponina rehetra eo amin’ny tany Aho. Izany no teny hentitra avy amiko TOMPOn’izao rehetra izao.»
30Ary hoy koa ny Tompo tamiko:
«Ijoroy ny maha-mpaminany anao ny amin’ireo mpanjaka rehetra ireo araka ny teny voalazako teo ka ampio hoe:
Avy any ambony any ny TOMPO no manerona,
avy ao amin’ny fonenany masina Izy no manandra-peo.
Eny, manerona mafy amin’ny toeram-pitsaharany Izy
ka mihorakoraka toy ny mpanosihosy voaloboka.
31Tonga amin’ny mponina rehetra amin’ny tany
izany feo mitrena ataon’ny Tompo izany,
ary tafapaka hatrany amin’ny faran’ny tany.
Manana ady atao amin’ireo firenena ny TOMPO
ka miantso ny olona rehetra ho eo amin’ny fitsarana.
Izay olon-dratsy dia hatolony haringana.
Izany no teny hentitry ny TOMPO.»
32Izao no lazain’ny TOMPOn’izao rehetra izao:
«Indro miainga ao amin’ny firenena iray ny loza
ka mihanaka any amin’ny firenena hafa;
misy tafio-drivotra mahery
mipoitra avy any am-paran’ny tany.»
33Amin’izany andro izany,
manomboka amin’ny tendron-tany ankilany
ka hatrany amin’ny tendron-tany andaniny,
izay nasian’ny TOMPO ho faty dia tsy hisaonana;
tsy hangonina na halevina izy ireny,
fa ho tonga zezika eo amin’ny velaran-tany.
34Midradradradrà, ianareo mpitondra,
manaova antsoantsom-pitarainana;
mihosinkosena amin’ny tany,
ianareo mpiandraikitra andian’ondry,
fa tonga ny andro hamonoana anareo ho faty!
Hataoko montsamontsana ianareo,
ka ho toy ny fanaka sarobidy nianjera.
35Tsy manan-kisitrihana intsony ny mpitondra;
tsy manan-kialofana ny mpiandraikitra andian’ondry.
36Reko ny antsoantsom-pitarainany
sy ny fidradradradrana ataony,
satria efa simban’ny TOMPO
ireo kijana fiandrasany.
37Nirehitra ny hatezeran’ny TOMPO
dia gina ilay kijana niadanana.
38Tahaka ny liona tanora
nandao ny kirihitra fiereny
no fahalasanan’ireo mpitondra
Efa tonga lao ny taniny
satria mahatsiravina ny ady
ary mirehitra ny hatezeran’ny Tompo.
Voafantina amin'izao fotoana izao:
Jeremià 25: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.