Jeremià 11
11
Vahoaka nivadika ny fanekempihavanana
1Izao no hafatra avy amin’ny TOMPO nampitondraina an’i Jeremià:
2–Hajaonareo ny tenin’ity fanekempihavanana ity! Hitenenanao kosa, ry Jeremià, ny olon’i Joda sy ny mponin’i Jerosalema 3ka hilazanao hoe: «Izao no lazain’ny TOMPO, Andriamanitr’i Israely: Voaozona ny olona izay tsy manaja ny tenin’ity fanekempihavanana ity, 4izay nandidiako ny razanareo. Fony izy navoakako avy tany Ejipta, avy tao amin’ny memy fandrendreham-by, no nilazako hoe: Henoy ny feoko, ka araho izay rehetra andidiako anareo; dia ho vahoakako ianareo, ary Izaho kosa ho Andriamanitrareo. 5Izany no hitanako ny fianianana izay nataoko tamin’ny razanareo, dia ny hanome azy ny tany tondra-dronono sy tantely izay misy anareo ankehitriny.»
Dia novaliako hoe:
–Eny tokoa, ry TOMPO.
6Fa hoy indray ny TOMPO tamiko:
–Antsoy any an-tanànan’i Joda sy eny an-dalamben’i Jerosalema izao hafatra rehetra izao hoe: «Hajaonareo ny tenin’ity fanekempihavanana izay nampanaoviko anareo ity, ary araho. 7Fa nananatra mafy ny razanareo aho hatramin’ny andro izay nampiakarako azy hiala tany Ejipta ary manao izany mandraka androany; eny, nananatra tsy an-kiato aho milaza hoe: henoinareo izay lazaiko. 8Nefa tsy nihaino na niraharaha akory izy fa samy nikiry tamin’ny ditram-pony mahatsiravina ka nampiharako ny teny rehetra tao amin’ity fanekempihavanana ity, satria tsy nanaraka izay nodidiako harahiny izy.»
9Ary hoy koa ny TOMPO tamiko:
–Misy tetika fikomiana hita ao amin’ny olon’i Joda sy ny mponin’i Jerosalema. 10Niverina amin’ny fahadisoan’ireo razany taloha izay tsy mety nihaino ny teniko izy, ka lasa nanaraka andriamani-kafa mba hanompo azy. Nivadika tamin’ny fanekempihavanana izay nataoko tamin’ny razany ny olon’i Israely sy ny olon’i Joda.
11Koa izao no lazain’ny TOMPO: «Indro Aho hahatonga loza aminy ka tsy ho azony ialana. Raha miantso vonjy amiko izy, dia tsy hihaino azy Aho. 12Dia handeha hitaraina any amin’ireo andriamanitra izay nandoroany ditin-kazo manitra ny mponina amin’ny tanànan’i Joda sy i Jerosalema nefa tsy hahavonjy azy mihitsy ireny rehefa hiharan’ny loza izy. 13Fa araka ny isan’ny tanànany no isan’ireo andriamanitr’i Joda; ary araka ny isan’ny lalamben’i Jerosalema no isan’ny alitara naorinareo mba handoroana vovo-javamanitra ho an’i Bahala, ilay henatrareo.» 14Ary ianao, ry Jeremià, aza mivavaka amiko ho an’ity vahoaka ity intsony na manandratra fitarainana na fifonana ho azy; satria rehefa hiharan’ny loza izy, ka hiantso vonjy amiko ianao, dia tsy hihaino Aho.
I Israely, hazo ôlivan’ny Tompo
15Hoy ny TOMPO hoe: «Ilay vahoaka malalako
dia manao zavatra tsy amin-kitsim-po.
Inona moa no ataony atỳ an-tranoko?
Moa ny voady sy ny sorona ataony amiko ve
hampandositra ny loza hiala aminy
ka hahafahany mihodivitra tsy ho azony#11.15 araka ny dkt Grika.?
16Izy io dia nataoko hoe
«Hazo ôliva maitso,
misy voany mahafinaritra».
Kanjo ao anatin’ny kotaba lehibe
no andrehetako afo handoro ny raviny;
ary dia hotapatapahina ny rantsany.
17Ny TOMPOn’izao rehetra izao no namboly azy; fa ankehitriny Izy dia manambara ny loza hamelezana azy noho ny ratsy nataon’ny olon’i Israely sy ny olon’i Joda taminy. Nanao izay nampahasosotra Azy manko ireny tamin’ny nandoroany fanatitra ho an’i Bahala.
Ny fianakavian’i Jeremià ihany no nandrahona azy
18Nampahafantarin’ny TOMPO aho ka mahalala, ary nasehony ahy ankehitriny ny fanaon’ireo. 19Fa toy ny zanakondry bonaika nentina hovonoina aho ka tsy nahalala ny tetika nataony hamelezana ahy. Hoy ireo hoe: «Andeha hosimbantsika ny hazo ao anatin’ny fitsiriany; aoka hofongorantsika hiala amin’ny tanin’ny velona izy, ka tsy hotsarovana intsony ny anarany.»
20Nefa Ianao, ry TOMPOn’izao rehetra izao,
dia mitsara ara-drariny, ka mamantatra
ny ao an’eritreritra sy ao am-po#11.20 Jereo 17.10; 20.12; Sal 7.10; Apôk 2.23..
Ho hitako hanafay azy Ianao,
satria nankiniko taminao ny adiko.
21Koa izao no lazain’ny TOMPO hamelezana ny mponin’i Hanatôta#11.21 Hanatôta: tanàna niavian’i Jeremià; jereo 1.1; 32.7. izay nitady hamono ahy ka nanao tamiko hoe: «Aza maminany amin’ny anaran’ny TOMPO, fandrao ho fatin’ny tananay ianao.» 22Eny, izao no lazain’ny TOMPOn’izao rehetra izao ny amin’ny mponin’i Hanatôta: «Hirotsaka an-tsehatra hamely azy Aho: ho fatin-tsabatra ny tovolahiny, ary ho faty mosary ny zanany lahy sy vavy. 23Tsy hisy sisa velona amin’ny mponin’i Hanatôta amin’ny taona hirotsahako an-tsehatra hamely azy ka handefasako loza aminy.
Voafantina amin'izao fotoana izao:
Jeremià 11: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.