Mpitsara 15
15
Ny valifaty nataon’i Samsôna
1Nony afaka andro vitsivitsy, tamin’ny fotoam-pijinjana varimbazaha, dia nandeha nitsidika ny vadiny i Samsôna, ka nitondra zanak’osy ho azy#15.1 Nanao mariazy i Samsôna, kanefa mariazy karazan’ilay mbola mijanona any an-tranon-drainy ihany ilay vehivavy. Tsy mandoa vodiondry ny mpampakatra; fa rehefa mitsidika ny vadiny iny, dia mitondra fanomezana ho azy.. Ary nangataka izy mba hahazo hiditra ao amin’ny efitrano misy ny vadiny, fa nolavin’ny rafozan-dahiny 2nataony hoe:
–Noheveriko ho tsy tianao intsony izy, ka dia nomeko an’ilay tovolahy namanao. Moa tsy tsara noho izy ve ny zandriny? Azonao alaina ho solony izy.
3Dia hoy i Samsôna taminy:
–Amin’izao indray mandeha izao dia afa-tsiny aho raha hanao ratsy amin’ny Filistinina.
4Ary lasa i Samsôna nisambotra amboahaolo telonjato. Naka zavatra hatao tsolo koa izy, dia nafatony tsiroaroa ny rambon’ny amboahaolo, ary nafatony teo anelanelan’ny rambony ny tsolo iray. 5Dia narehiny ny tsolo ary nalefany ireo amboahaolo ireo hankeny amin’ny tanimbarin’ny Filistinina ka nandoro ireo amboara sy salohim-bary ary koa ireo voly voaloboka sy voly ôliva. 6Koa nifanontany ny Filistinina ny amin’izay nanao an’izao; ary nisy nilaza hoe:
–I Samsôna, vinantolahin’ilay Timnita, satria ity rafozany no nisintona indray ny vadiny ka nanome azy ho an’ny namany.
Dia niakatra ny Filistinina ka nandoro an-dravehivavy sy ny ankohonan-drainy. 7Ary hoy i Samsôna tamin’ireo:
–Satria nanao izany ianareo, dia tsy hijanona aho raha tsy efa mahavalifaty izay nataonareo.
8Koa namely azy i Samsôna ary nampitondra faisana azy tanteraka. Rehefa izany, dia lasa izy nonina teo an-tsefatsefak’ilay harambato tao Hetama#15.8 Hetama: toerana be tsefatsefa-bato ao anatin’ny faritr’i Joda. Ny anaran-tanàna hoe Lehỳ, izay teo akaikin’ny faritany filistinina, dia midika hoe valanorano. .
I Samsôna sy ilay valanoranom-boriky
9Ary niakatra ny Filistinina ka nitoby tany Joda, ary nitandahatra hamely ny tanàna Lehỳ. 10Dia nanontany azy ny vatan-dehilahy tao Joda hoe:
–Nahoana no niakatra hanafika anay ianareo?
Fa novalian’ireo hoe:
–Mba hamatotra an’i Samsôna ka hanao aminy araka izay nataony taminay.
11Dia nandeha nankany amin’ny tsefatsefak’ilay harambato tao Hetama ny vatan-dehilahy andiany telo tamin’ny fokon’i Joda ka niteny tamin’i Samsôna hoe:
–Moa tsy fantatrao ve fa ny Filistinina no manjaka amintsika? Koa inona izao nataonao taminay izao?
Dia novaliany hoe:
–Araka izay nataony tamiko no nataoko taminy.
12Fa hoy kosa ireo hoe:
–Tonga izahay mba hamatotra anao ary hanolotra anao amin’ny Filistinina.
Ka hoy i Samsôna taminy:
–Mianiàna amiko àry fa tsy hamono ahy ianareo.
13Dia namaly azy indray ireo hoe:
–Tsy manam-pikasana hamono anao izahay fa ny hamatotra anao fotsiny mba hatolotray ny Filistinina.
Dia nafatotr’ireo tamin’ny mahazaka roa vaovao i Samsôna ary nentiny niala tao an-dava-bato. 14Ary nony tonga tao Lehỳ izy, dia nitsena azy tamin’ny horakora-pandresena ny Filistinina. Tamin’izay kosa no nilatsaka tamin’i Samsôna ny Fanahin’ny TOMPO, ka nivaha mora foana toy ny tady rongony main’ny afo ireo tady mahazaka namatorana ny sandriny sy ny tanany. 15Nahita valanoranom-boriky iray vao novonoina i Samsôna; ary noraisiny izany ka namonoany ho faty arivo lahy tamin’ny Filistinina. 16Dia hoy i Samsôna hoe:
–Valanoranom-boriky no nahafatesako arivo lahy, valanoranom-boriky no nampivangongoako ireo faty.
17Rehefa izany, dia natsipiny terỳ ilay valanoranom-boriky teny an-tanany; izany no niantsoana io toerana io hoe Ramata-Lehỳ na Havoanan’ny Valanorano. 18Ary nahatsiaro nangetaheta mafy i Samsôna ka niantso vonjy tamin’ny TOMPO nanao hoe:
–Ianao no nanome ahy izao fandresena lehibe izao; koa ankehitriny ve dia havelanao ho fatin-ketaheta aho, ka ho latsaka eo an-tanan’ireo tsy mifora ireo?
19Dia notresahin’Andriamanitra ny vatolampy holoka tao Lehỳ ka nampiboiboika rano; dia nisotro i Samsôna ka nody indray ny heriny. Izany loharano izany dia nantsoina hoe Haîna-Kôrà na loharanon’ilay niantso vonjy, ary mbola ao mandraka androany.
20I Samsôna no nitondra ny Israelita nandritra ny roapolo taona tamin’ny andron’ny Filistinina.
Voafantina amin'izao fotoana izao:
Mpitsara 15: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.