Isaià 37
37
Naka torohevitra tamin’i Isaià mpaminany i Hezekià
(Jereo 2 Mp 19.1-7)
1Raha vao nandre izany tatitra izany i Hezekià mpanjaka, dia nandriatra ny fitafiany ka nitafy gony ary lasa niditra tao an-tranon’ny TOMPO. 2Avy teo izy naniraka an’i Eliakima mpiandraikitra ny lapa sy i Sebnà mpitantsoratra ary ireo mpisorona tranainy indrindra izay samy nitafy gony, mba hankany amin’i Isaià mpaminany zanakalahin’i Amôtsa, 3hanao aminy hoe: «Izao no lazain’i Hezekià: Andro fahoriana sy famaizana ary fahafaham-baràka ho antsika ity andro ity! Tonga amin’ny fitenenana hoe: ‹Efa ho teraka ny zaza nefa tsy misy hery hiterahana azy ny reniny.› 4Angamba ho ren’ny TOMPO Andriamanitrao ny tenin’ilay dekà asirianina izay nirahin’ny mpanjakan’i Asiria tompony hanevateva an’Andriamanitra velona; ka hofaizin’ny TOMPO Andriamanitrao izy noho izany. Fa manandrata vavaka ianao ho an’ireo sisa tavela amin’ny vahoakany.»
5Rehefa tonga tany amin’i Isaià ireo irak’i Hezekià mpanjaka, 6dia nilazany hoe:
–Ambarao amin’ny tomponareo izao hafatry ny TOMPO izao: Aza matahotra eo anatrehan’ny teny renao nanevatevan’ireo manamboninahitry ny mpanjakan’i Asiria Ahy. 7Fa indro Aho hanoro hevitra azy hiverina any amin’ny taniny, rehefa handre siosio izy; ary any no hampamonoako azy ho fatin-tsabatra#37.7 Jereo ny and 38..»
Fandrahonana hafa nataon’i Saneheriba
(Jereo 2 Mp 19.8-13)
8Dia niverina ilay dekà, ka nankany Libnà#37.8 Libnà: jereo 2 Mp 8.22 sy nta. izay nataon’ny mpanjakan’i Asiria fahirano tamin’izay; satria reny fa efa nandao an’i Lakisy ny mpanjaka. 9Kanjo henon’i Saneheriba fa efa an-dalana hamely azy i Tirihakà mpanjakan’i Etiôpia; koa rehefa nahare izany izy, dia naniraka hankany amin’i Hezekià 10mpanjakan’i Joda indray izy, mba hitondra izao hafatra izao: «Aoka tsy ho voafitaky ny Andriamanitra itokianao ianao amin’ny filazany fa i Jerosalema dia tsy hatolotra ho eo an-tanan’ny mpanjakan’i Asiria. 11Indro ianao mihitsy no efa nandre ny nanaovan’ireo mpanjakan’i Asiria ny tany hafa rehetra sy ny nandravany azy; ka dia ianao kosa ve no ho voavonjy? 12Fony nandrava an’i Gôzàna sy i Haràna ary i Retsefa mbamin’i Telasara renivohitry ny Hedenita ireo razako, moa nahavonjy ireny firenena ireny ve ny andriamaniny? 13Aiza izao ny mpanjakan’i Hamata sy i Arpada ary i Lahîra, aiza izao ny mpanjakan’i Sefarvaîma sy i Henà ary i Hivà#37.13 Gôzàna, Haràna (and 12) ...Hamata (and 13)...: jereo 2 Mp 17.24; 18.34 sy nta.?»
Vavak’i Hezekià
(Jereo 2 Mp 19.14-19)
14Ary noraisin’i Hezekià ny taratasy nentin’ireo iraka asirianina ka novakiny; avy teo izy dia niakatra tao an-tranon’ny TOMPO ka namelatra izany taratasy izany teo anatrehan’ny TOMPO, 15ary nivavaka tamin’ny TOMPO nanao hoe:
16Ry TOMPOn’izao rehetra izao sady Andriamanitr’i Israely ô, Ianao Izay mipetraka eo ambony kerobima#37.16 eo ambony kerobima: jereo Eks 25.22., Ianao irery no Andriamanitry ny fanjakana rehetra eto an-tany, satria Ianao no nanao ny lanitra sy ny tany. 17TOMPO ô, mba atongilano ny sofinao ka mihainoa; TOMPO ô, mba ahirato ny masonao ka mijere; ary aoka ho renao ny teny rehetra izay nampitondrain’i Saneheriba hanevatevana Anao Andriamanitra velona. 18TOMPO ô, marina fa ireo mpanjakan’i Asiria dia nandringana ny hafa firenena sy nandrava ny taniny; 19ary nodorany tamin’ny afo sy nosimbany aza ny andriamanitr’ireny firenena ireny satria tsy tena Andriamanitra ireo fa zavatra nataon-tanan’olona, eny, vato aman-kazo ihany. 20Fa ankehitriny kosa, ry TOMPO Andriamanitray ô, vonjeo tsy ho azon’ny tanan’i Saneheriba izahay mba hahafantaran’ny fanjakana rehetra etỳ an-tany fa Ianao irery ihany no TOMPO.»
Nampita ny valin-teny avy amin’ny Tompo i Isaià
(2 Mp 19.20-34)
21Ary i Isaià, zanakalahin’i Amôtsa, dia naniraka hankany amin’i Hezekià nanao hoe: «Izao no lazain’ny TOMPO Andriamanitr’i Israely ho valin’ny vavaka nataonao ny amin’i Saneheriba mpanjakan’i Asiria. 22Izao no teny tononin’ny TOMPO hamelezana azy:
Manao tsinontsinona sy maneso anao
ny tanàna kanton’i Tsiôna, ry Saneheriba;
mihifikifi-doha ho fanamavoana anao
ny tanànan’i Jerosalema.
23Fa iza moa no voatevatevanao sy nompanao?
Ary iza no nanaovanao lela miakatra
sy niandranandranan’ny masonao?
Tsy iza fa Izaho Ilay Masin’i Israely!
24Tamin’ny alalan’ny mpanomponao
no nanevatevanao Ahy Tompo.
Hoy ianao hoe: ‹Izaho Saneheriba
dia ny kalesiko marobe no niakarako
teny an-tampon-tendrombohitra
hatreo afovoan-tanin’i Libano
mba hikapa ny sedera mijoalajoala
sy ny kipreso voafantina eo aminy.
Hiakarako ao ny tendrombohitra faran’izay avo
sy ny tahirin’alany matevina indrindra.
25Izaho no efa nihady vovo fantsakana
sy nisotro ny ranon’ny firenen-kafa#37.25 ranon’ny firenen-kafa: Ampit 2 Mp 19.24.;
ary horitiko ny sakeli-drano rehetra any Ejipta
raha vao migadona any ny faladiako!›
26Moa tsy fantatrao va, ry Saneheriba,
fa efa hatry ny ela no nanomanako
an’izao zava-nitranga tato ho ato izao?
Efa hatramin’ny ela be no namolavolako azy,
ary ankehitriny dia manatanteraka azy Aho.
Voatendriko handrava ireo tanànamimanda ianao
ka hahatonga azy ho korontam-bato.
27Dia miraviravy tanana ny mponina ao aminy,
sady raiki-tahotra no safo-kenatra;
toy ny vilona any an-tsaha izy ireo
sy tahaka ny ahi-maitso eny an-jaridaina
ary tahaka ny zava-maniry eny an-tampon-trano
ka main’ny rivotra avy any atsinanana.
28Fantatro avokoa ny momba anao, ry Saneheriba,
na mipetraka ianao na mitsangana,
na mivoaka ny trano ianao na miditra,
sy rehefa tezitra misafoaka amiko.
29Eny, efa tezitra nisafoaka tamiko tokoa ianao
ary efa tafakatra an-tsofiko ny fireharehànao;
koa hasiako farango ny oronao
ary hasiako lamboridy ny vavanao,
dia hampivereniko any an-taninao ianao
amin’izay lalana niavianao ihany.
30Izao kosa no famantarana ho anao, ry Hezekià: Amin’ity taona ity dia hihinana izay vary maniry ho azy ny olona; ary amin’ny taona manaraka dia mbola ho toy izany koa. Fa amin’ny taona fahatelo kosa dia hamafy vary sy hijinja ianareo ary hamboly voaloboka sy hihinana ny vokatra avy aminy. 31Ary izay sisa velona amin’ny taranak’i Joda dia ho toy ny hazo hamaka lalina indray ary ho feno voa ny rantsany; 32satria ao Jerosalema no hipoiran’ny sisa tavela, ary ao an-tendrombohitra Tsiôna no hiarenan’ny sisa velona.»
Dia hoy ihany i Isaià hoe: «Izany no hataon’ny TOMPOn’izao rehetra izao noho ny fitia miredareda manesika Azy. 33Izao kosa no lazain’ny TOMPO ny amin’ny mpanjakan’i Asiria: ‹Tsy hiditra amin’ity tanàna ity izy, na handefa zana-tsipîka hamelezana azy na hiady aminy ombàn’ny ampinga na hanangana tovon-tany hanafihana azy. 34Ny lalana izay niaviany ihany no hiverenany, fa tsy hiditra amin’ity tanàna ity izy. Izany no teny hentitra avy amiko TOMPO. 35Harovako i Jerosalema ary hovonjeko noho ny amin’ny tenako sy i Davida mpanompoko.› »
Fialàn’ny Asirianina, fahafatesan’ny mpanjakan’i Asiria
(Jereo 2 Mp 19.35-37)
36Dia niainga hankao an-tobin’ny Asirianina ilay anjelin’ny TOMPO ka nisy 185 ny antoko-miaramila naripany; ary raha vao nifoha ny sisa velona tamin’ny maraina, dia nahita fa efa maty avokoa ireo. 37Koa niainga teo i Saneheriba mpanjakan’i Asiria mba handeha hiverina any Ninive ary nijanona tany. 38Kanjo raha iny izy niankohoka tao amin’ny tempolin’i Nisrôka andriamaniny iny indrindra, no avy namono azy tamin’ny sabatra ny zanany roa lahy, dia i Adramelèka sy i Saretsera; avy eo lasa nandositra any amin’ny tany Ararata izy mirahalahy#37.38 Jereo 2 Mp 19.37 sy nta. fa i Esara-Hadôna zanakalahin’i Saneheriba no nanjaka nandimby azy.
Voafantina amin'izao fotoana izao:
Isaià 37: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.