Isaià 14
14
Ny fiverenan’ireo babo
1Fa hamindra fo amin’ny taranak’i Jakôba ny TOMPO; eny, mbola hifidy an’i Israely ihany Izy, ka hampiorina azy indray eo amin’ny taniny. Hikambana amin’ireo ny vahiny mpifindramonina ka hitambatra amin’ny ankohonan’i Jakôba.
2Ny vahoakan’ny firenen-kafa no handray adidy hampody azy any an-tanindrazany. Ary eo amin’ny tanin’ny TOMPO, dia ho fananan’ny taranak’i Israely ireo hafa firenena, ka hataony ankizilahy sy ankizivavy; ireo namabo azy no hobaboiny, ary ireo nampahory azy no hataony mpanompo.
Ny fiafaran’ny mpanjakan’i Babilôna
3Ary rehefa homen’ny TOMPO fitsaharana ianao, ry Israely, ka afaka amin’ny fijaliana sy ny tebiteby ary ny fanompoana mafy izay nampanaovina anao, 4dia horedoninao izao hira fanarabiana ny mpanjakan’i Babilôna izao:
Fa ahoana no niafaran’ilay mpanjakazaka
ary koa niafaran’ny famoretany!
5Nopotehin’ny TOMPO ny fahefana mandoza,
dia ny tehin’ilay mpanjakazaka,
6izay nikapoka ny vahoaka tamim-pahavinirana;
nikapoka azy tsy an-kiato izy
ka namolaka azy tamim-pahatezerana
sady nanenjika azy tsy nisy indrafo.
7Mandry fahalemana ny tany tontolo
ka velon-kiram-pihobiana ny olona.
8Ny kipreso sy ny sederan’i Libano koa,
noho izao manjo ilay mpanjakazaka izao,
dia samy faly ka nanao hoe:
«Hatrizay nahafatesanao izay,
dia tsy nisy niakatra hanjera anay intsony.»
9Mihotakotaka noho ny aminao, ry ilay mpanjakazaka,
ny any amin’ny fonenan’ny maty any ambany any.
Fohazina hitsena ny fiavianao ireo ambiroa,
dia ireo lehibe rehetra fony tetỳ an-tany.
Ampitsanganina hiala eo amin’ny sezafiandrianany
ireo mpanjaka rehetra nifehy firenena fahizay.
10Samy hiteny izy rehetra ka hanao aminao hoe:
«Ianao koa hay malemy tahaka anay,
efa tonga mitovy aminay!»
11Atỳ amin’ny fonenan’ny maty atỳ
no navarina ny fireharehànao
niaraka tamin’ny feom-balihanao.
Kankana no ho kidoronao
ary olitra no ho firakotrao.
12Fa nahoana ianao no latsaka
avy any an-danitra ambony any,
ry ilay kintana mamirapiratra
toy ny kintana fitarikandro#14.12 Ampit Apôk 8.10; 9.1.!
Nazera amin’ny tany ianao ity,
ry ilay nandresy firenena maro!
13Fa hoy ianao anakampo hoe:
«Hiakatra any an-danitra any aho
ka hametraka ny sezafiandrianako
ho avo noho ny kintan’Andriamanitra;
dia eo amin’ilay tendrombohitra fivoriana,
izay any am-parany avaratra, no hipetrahako#14.13 ilay tendrombohitra... avaratra: toa misy famohapohazana ny mitôlôjia kanahanita izay milaza fa eo amin’ny tendrombohitra iray any an-tendrony avaratra no ivorian’ireo andriamanitra mba hanapa-kevitra ny amin’ny fitantanana izao tontolo izao..
14Hiakatra eny an-tampon’ny rahona aho
ka hitovy amin’Andriamanitra Avo Indrindra.»
15Kanjo any amin’ny fonenan’ny maty,
any amin’ny fanambanin’ny lavaka,
no tsy maintsy nidinanao#14.15 And 13-15: ampit Mt 11.23; Lk 10.15..
16Izay mahita anao any dia hibanjina anao,
sy handinika anao fatratra ka hanao hoe:
«Ity tokoa ve ilay lehilahy
izay nampihorohoro ny tany
sy nandrodana fanjakana maro,
17nanova izao tontolo izao ho taniefitra
fa sady nandrava tanàna
no tsy nandefa ireo gadra hody!»
18Ny mpanjaka rehetra nifehy firenena fahizay
dia samy mandry amim-boninahitra ao am-pasany avy.
19Ianao kosa dia nariana ivelan’ny fasanao#14.19 ivelan’ny fasanao: jereo Jer 8.1-2; 22.19; 36.30.
toy ny zaza rano maharikoriko;
tahaka ny razana voahitsakitsaka ianao,
fa olona voavono ho faty no manindry anao,
dia ireo olona voatrobaky ny sabatra.
Ka naidina eo ambony lampivato ao am-pasana ireny,
20nefa tsy mba halevina miaraka aminy ianao
satria nanimba ny taninao
sady namono ny vahoakanao.
Tsy ho voatonona mandrakizay
ny anaran’ny taranakao mpanao ratsy.
21Miomàna handringana ny zanany ianareo
noho ny heloka bevava nataon’ny rainy,
fandrao hitsangana haka ny tany indray ireny
ka handrakotra tanàna an’izao tontolo izao.
22«Hitsangana hamely ny Babilônianina Aho, hoy ny teny hentitry ny TOMPOn’izao rehetra izao; hofoanako ny anaran’i Babilôna sy ny dindony mbamin’ny zanany sy ny taranany rehetra. 23Fa hataoko tonga honahona fonenan-tsokina izy, hofafako amin’ny kifafa i Babilôna ka ho levona, hoy ny teny hentitry ny TOMPOn’izao rehetra izao.
Mifarana ny famoretana rehetra
24Ny TOMPOn’izao rehetra izao
dia efa nanao fianianana hoe:
«Izay noheveriko no ho tonga,
izay notapahiko no hiseho.
25Ao amin’ny taniko no hanamontsanako ny Asirianina,
eny an-tendrombohitro no hanosihoseko azy.
Hoesoriko ny zioga nampitondrainy ny vahoakako#14.25 Jereo Is 10.5-34 sy ny naoty tandrifin’ny Is 10.5.,
hoesoriko eny an-tsorony ny entana namesarany azy.»
26Fanapahan-kevitry ny TOMPO
ho an’ny tany tontolo izany,
ary hinji-tanana fandrahonana#14.26 hinji-tanana fandrahonana: jereo and 27; 5.25; 9.11; 16.20; 10.4.
ataony amin’ny firenena rehetra.
27Rehefa nanapa-kevitra ny TOMPOn’izao rehetra izao,
iza no hahafoana izany?
Rehefa naninji-tanana handrahona Izy,
iza no hampihemotra izany?
Fampitandremana ny Filistinina
28Tamin’ny taona nahafatesan’i Ahaza#14.28 taona nahafatesan’i Ahaza: jereo 2 Mp 16.20; 2 Tan 28.27. Iadian-kevitra ny daty. Misy mandraikitra izany eo amin’ny taona 716 tal J.K. eo ho eo; amin’izay ny and 29b dia fomba fiteny ilazana fa miharatsy hatrany ny toe-javatra (ampit Ham 5.19). Misy kosa mandraikitra izany eo amin’ny taona 727 eo ho eo; amin’izay ny and 29b dia manondro ireo dimbin’ilay mpanjaka asirianina Tiglato-Pilesera III, maty tamin’izany vaninandro izany. mpanjaka no nisy izao hafatra izao:
29Aza mifaly ambony ihany ianareo,
ry Filistinina#14.29 Ny amin’ny Filistinina , dia jereo Jer 47.1-7; Ezek 25.15-17; Jôb 4.4-8; Ham 1.6-8; Tsef 2.4-7; Za 9.5-7. rehetra,
na dia tapaka aza ny tsorakazo
izay nikapohana anareo,
satria hisy menarana hipoitra
avy amin’ny fatin’ny bibilava
ary hisy dragona manidina hipoitra
avy amin’ny atodin’ny menarana.
30Ireo olona faran’izay fadiranovana
dia ho tahaka ny ondrikely miraotra,
ary ireo mahantra hiadana sy handry feizay;
fa hataon’ny fahavalo matin-kanoanana
hatrany ifotony kosa ianao, ry Filistia,
ary izay sisa ao aminao dia haringana.
31Midradradradrà, ry tanàna mimanda,
ka manaova antsoantsom-pitarainana.
Ketraka ny Filistinina rehetra,
fa misy setroka miakatra avy any avaratra#14.31 avy any avaratra: jereo Jer 1.14 sy nta.;
tsy misy mitsoaka an-daharana ny fahavalo.
32Koa inona no havaly ireo iraky ny Filistinina?
–Izao ihany: Ny TOMPO no nanorina an’i Tsiôna
ary ao no hialofan’ireo mahantra amin’ny vahoakany.
Voafantina amin'izao fotoana izao:
Isaià 14: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.