Ezekiela 31
31
Oharina amin’ny hazo sedera iray ny mpanjakan’i Ejipta
1Tamin’ny taona faha-11 taorian’ny fahababoana, nony andro voalohan’ny volana fahatelo#31.1 Izany hoe Mey-Jona 587 tal J.K., dia nisy tenin’ny TOMPO tamiko nanao hoe: 2«Ry ilay taranak’olombelona, lazao amin’ny Farao mpanjakan’i Ejipta sy amin’ireo vahoaka maro izay feheziny hoe:
‹Inona no azo anoharana anao
fa lehibe tokoa ianao, ry Farao?
3Indro ianao tahaka ny sederan’i Libano#31.3 Indro ianao: toa izany no mitombina fa ny RM kosa manao hoe Indro i Asiria.
izay misy rantsana mahafinaritra
sady misandrahaka manalokaloka,
dia sedera iray nisandratra avo
ka mitehi-drahona ny tendrony.
4Ny ranonorana no nahalehibe azy;
ny ranobe ao ambany tany no nampitombo azy,
satria namonto ony nanodidina ny fakany,
vao nikoriana tamin’ny lakan-drano
hankamin’ny hazo hafa rehetra any an-tsaha.
5Izany no nisandratany ho avo be
noho ny hazo rehetra any an-tsaha.
Nihamaro ny sampan’ilay sedera
sady nisandrahaka ny rantsany,
satria ny ranobe any ambany any no nanesikaazy hamoaka tsimoka.
6Teo amin’ny sampany no nanao akany,
ny voro-manidina isan-karazany;
teo ambanin’ny rantsany
no niterahan’ny bibidia rehetra;
ary teo ambanin’ny alokalony
no nipetrahan’ny firenena marobe.
7Hazo goavana mahafinaritra izy,
sady misandrahaka ny rantsany,
satria hatrany amin’ny ranobe ambany any
no nilentehan’ny fakany.
8Tsy nisy sedera nitovy aminy
tao an-jaridainan’Andriamanitra#31.8 Ny zaridainan’Andriamanitra dia i Hedèna, jereo and 9,18 sy Gen 2.8-9.;
tsy nisy kipreso tsara sampana tahaka azy;
tsy nisy platana mba nanan-drantsana toa azy;
tsy nisy hazo nitovy hatsara aminy
tao an-jaridainan’Andriamanitra.
9Nataoko tsara tarehy izy
noho ny habetsahan’ny rantsany;
ka dia nialona azy ny hazo rehetra
tao Hedèna, zaridainan’Andriamanitra›. »
Ho potika toy ny sedera ny mpanjakan’i Ejipta
10«Koa izao no lazain’ny Tompo ANDRIANANAHARY: Nisandratra avo ilay sedera ka nitehi-drahona ny tendrony, dia nihaniavonavona ny fony. 11Izany no hanolorako azy eo an-tanan’ny filohan’ireo firenena mba hamaliany azy araka ny faharatsiany#31.11 Ny filohan’ireo firenena: i Nebokadnetsara mpanjakan’i Babilôna izany.. 12Nokapain’ireo vahiny faran’izay masiaka amin’ireo firenena izy, dia nilaozany. Teny an-tendrombohitra sy teny an-dohasaha rehetra no nianjeran’ny sampany; ary teny amin’ny lalan-driaka rehetra amin’ny tany no nahatapatapaka ny rantsany. Ka ny sarambabembahoaka rehetra izay nipetraka teo ambany alokalony dia voatery niala sy nandositra. 13Nipetraka teo amin’ny vatany nianjera ny voromanidina isan-karazany, ary nisitrika tanaty rantsany ny bibidia rehetra. 14Izany no nataoko dia mba tsy hisy intsony hazo tsara tondraka sy vonton-drano, izay ho avo mijoalajoala ka hitehi-drahona ny tendrony, ary hiavonavona noho ny haavony. Fa ny hazo rehetra dia toy ny olona ka natao ho faty sy hankany ambanin’ny tany eo akaikin’ireo efa tafidina any.
15«Izao no lazain’ny Tompo ANDRIANANAHARY : Tamin’ny andro izay nidinan’ilay sedera tany amin’ny toeran’ny maty, dia nataoko nisaona azy ny ranobe ao ambany tany. Noho ilay sedera no nanampenako ny renirano avy amin’ny ranobe ary nampijanonako azy tsy hikoriana amin’ny sakeliny. Nataoko nalahelo azy ny tendrombohitr’i Libano ary izany no nampalazo ny hazo rehetra teny an-tsaha. 16Rehefa nataoko izay hianjeran’io hazo io mba hidinany any amin’ny toeran’ny maty ho tafaraka amin’ireo efa tafidina any, dia nampihorohoroiko ireo firenena nony nandre ny fianjerany. Fa tany ambanin’ny tany kosa dia samy afa-po avokoa ireo hazon’i Hedèna, dia ireo hazo voafantina sady soa indrindra ary vonton-drano tao Libano. 17Fa ireo hazo ireo dia nidina niaraka tamin’ilay sedera ho any amin’ny toeran’ny maty eo akaikin’izay maty an’ady; satria ireo no hery manohana ilay sedera sy nivelona tambanin’ny alokalony teo anivon’ny firenen-tsamihafa.
18«Tsy nisy hazon’i Hedèna nitovy famirapiratana sy fahalehibiazana taminao. Kanefa hazera any ambanin’ny tany miaraka amin’ireny hazon’i Hedèna ireny ianao, ka hiampatra eo anivon’ireo olona tsy voafora izay maty an’ady. Izany no ho anjaran’ny Farao sy ny mponina marobe rehetra any Ejipta; teny hentitra avy amiko Tompo ANDRIANANAHARY izany.»
Voafantina amin'izao fotoana izao:
Ezekiela 31: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.