Ezekiela 23
23
Nijangajanga i Samaria
1Ary nisy tenin’ny TOMPO tamiko nanao hoe: 2«Ry ilay taranak’olombelona, nisy vehivavy roa mirahavavy iray tampo#23.2 iray tampo: jereo 16.3, 44-46.. 3Fony mbola tanora izy, dia efa lasa vehivavy janga tany Ejipta izay nonenany. Tany no nisafosafoana ny tratrany sy nitsapatsapana ny nonony somondrara. 4I Ôhôlà no anaran’ny zokiny ary i Ôhôliba no anaran’ny zandriny#23.4 Ôhôlà sy Ôhôlibà dia mety ho anarana mifono hevi-miafina saingy tsy fantatsika intsony ankehitriny ny heviny.. Ny voalohany dia manondro an’i Samaria fa ity faharoa kosa manondro an’i Jerosalema. Samy nalaiko ho vady izy roa, ary niteraka zanakalahy sy zanakavavy ho ahy. 5Kinanjo nijangajanga i Ôhôlà na dia efa Ahy aza. Maimay izy tamin’ireo lehilahy sakaizany, dia ny Asirianina 6izay niakanjo jaky avokoa noho ny maha governora sy mpitsara azy, sady tovolahy bikàna sy kinga fitaingin-tsoavaly. 7I Ôhôlà dia nanome tombony manokana ireo manampahefana asirianina ireo, ka tamin’izay naha maimay azy dia nandoto tena tamin’ny fanompoana ny sampiny rehetra izy. 8Notohizany ny fiainam-pijangajangana efa nataony tany Ejipta. Fa tany, fony mbola tanora izy, dia nisy lehilahy nandry taminy sy nitsapatsapa ny nonony somondrara ka nanaram-po nijangajanga taminy. 9Noho izany dia navelako ho eo an-tanan’ny Asirianina sakaizany izay nahamaimay azy izy. 10Koa naboridany tanteraka izy#23.10 naboridany tanteraka izy: filazana an-kolaka ny fandrobana an’i Samaria tamin’ny 722-721 tal J.K. sy ny fanaovana sesitany ny mponina tao aminy, jereo 16.37; 2 Mp 17.6; Hôs 2.5., ary novonoiny ho faty tamin’ny sabatra; fa ny zanany lahy sy vavy kosa nentiny. Niharan’ny famaizana izy mba hatao ohatra ho an’ny vehivavy hafa.»
Nijangajanga i Jerosalema
11«Nahita izany i Ôhôlibà rahavaviny, kanefa vao mainka ratsy kokoa noho i Ôhôlà izy tamin’ny fahamaimaizany, ary dia nijangajanga manoatra azy. 12Fa nahamaimay azy koa ireo asirianina mpifanila aminy, dia ireo governora sy mpitsara mareva-pitafiana sady kinga fitaingin-tsoavaly; samy tovolahy bikàna izy rehetra. 13Ary nandoto tena tamin’izany koa izy; eny, hitako fa nitovy fitondrantena izy mirahavavy. 14Kanefa lasa lavitra kokoa i Ôhôlibà tamin’ny fanaranam-po. Indray andro izy dia nahita sarin-dehilahy voaloko mena teo amin’ny rindrina, dia sary nampiseho ny Babilônianina. 15Samy nisy fehikibo teny an-tehezany ary fehiloha misoratsoratra teny an-dohany. Hoatry ny mpiady mahery no fijery azy; ary ny bikabikan’izy rehetra dia tahaka ireo Babilônianina miaina any Kaldea izay tany nahaterahany. 16Maimay tamin’ny Babilônianina i Ôhôlibà raha vao nahita ny sary ka nandefa iraka tany amin’ny taniny#23.16 nandefa iraka: mety ho filazana an-kolaka ny fifandraisana nisy teo amin’i Hezekià sy Merodaky Baladàna, jereo 2 Mp 20.12-19; Is 39.. 17Koa tonga mba handry aminy ireo Babilônianina ary nandoto azy tamin’ny fanaranam-pijangajanganay; saingy nony efa voalotony kosa i Ôhôlibà, dia naharikoriko azy. 18Niseho ampahibemaso ho vehivavy janga izy ary nampiseho ny fitanjahany; ka narikoriko azy aho tahaka izay namparikoriko ahy tamin’ny rahavaviny. 19Kanefa vao mainka nijangajanga kokoa aza izy ka nahatsiaro ny androm-pahatanorana izay nijangajangany tany Ejipta. 20Fa maimay tamin’ireo lehilahiny izy, dia lehilahy mitrifana sy mitroatra toa boriky na soavaly miandra vavy.»
Ny famaizana an’i Jerosalema
21«Niverina nijangajanga indray ianao, ry Ôhôlibà, ka nanao toy ny tamin’ny fahatanoranao, fony ireo Ejiptianina nisafosafo ny tratranao sy nitsapatsapa ny nononao somondrara. 22Koa izao no lazain’ny Tompo ANDRIANANAHARY aminao: ‹Indro hotairiko hamely anao ireo lehilahinao. Ankehitriny efa namparikoriko anao izy, ka hoentiko avy any amin’ny manodidina mba hamely anao. 23Hotaomiko hikomy aminao avokoa ny mponin’i Babilôna sy ny Kaldeanina rehetra, ny mponina ao Pekôda sy Sôha ary Kôha#23.23 Pekôda dia foko aramianina iray tany atsinanan’i Babilônia (jereo Jer 20.21). Sôha sy Kôha dia mety ho foko aramianina roa hafa amin’iny faritra iny ihany. mbamin’ny Asirianina rehetra: Tovolahy bikàna izy rehetra, dia governora sy mpitsara, mpiady voafantina sy olo-manan-kaja, samy kinga fitaingin-tsoavaly. 24Ho tonga avy any avaratra izy, miaraka amin’ny kalesy sy fitaovana isan-karazany ary koa tafika goavana hamelezana anao. Hanemitra anao izy, mitondra ampinga lehibe sy kely ary fiarovan-doha; hoentiko eo anatrehany ny raharahanao ary hotsarainy araka ny fitsipiny ianao#23.24 avy any avaratra: araka ny dkt tranainy grika izany. –araka ny fitsipiny: i Jerosalema sy i Samaria dia tsy ho voaaron’ny lalànany intsony; nefa raha ny tokony ho izy, izay meloka dia tsaraina araka ny fitsipiky ny taniny.. 25Noho ny fahatezerako aminao dia havelako hanao herisetra aminao ireo: hotapahiny ny oronao sy ny sofinao ary hovonoiny ho faty amin’ny sabatra ianao. Halainy ho babo ny zanakao lahy sy ny vavy fa holevonin’ny afo kosa ireo olona sisa tavela aminao. 26Horobainy ny fitafianao sy ny firavaka fihaingoanao. 27Hatsahatro ny filibànao amam-pijangajangana izay natombokao tany Ejipta. Tsy hangata-maso olona intsony ianao ary tsy hahatsiaro ny Ejiptianina intsony.›
28«Izao no lazain’ny Tompo ANDRIANANAHARY aminao: ‹Indro hatolotro eo an-tanan’ireo halanao ianao, dia ireo namparikoriko anao. 29Hamely anao amim-pankahalana izy ka haka ny vokatry ny asanao. Havelany hitanjaka sy hiboridana ianao ary hiharihary eo imason’ny rehetra toy ny vehivavy janga. Ny filibànao sy ny fanaranam-batanao 30no nahatonga anao toy izany. Nijangajanga tamin’ireo lehilahin’ny tany hafa ianao ary nandoto tena tamin’ny fanompoana ireo sampiny. 31Nanaraka ny lalana nalehan’ny rahavavinao ianao; ka dia hampisotroiko amin’ny tsatokatim-pahatezerako tahaka azy#23.31 ny tsatokatim-pahatezerako: jereo Is 51.17,22; Jer 25.15-17,28; 49.12..›
32«Izao no lazain’ny Tompo ANDRIANANAHARY aminao:
‹Ny tsatokaty hisotroanao
dia mitovy amin’ny an-drahavavinao,
dia tsatokaty lehibe sady lalina.
Hihomehezana sy hoesoina ianao
noho ny tsatokatinao feno mihatihaty.
33Hahatonga anao ho leom-pahoriana
io tsatokatin’ny tahotra amam-pijaliana io,
izay efa nisotroan’i Samaria rahavavinao.
34Hosotroinao hatramin’ny farany izy
ary hovakînao amin’ny nifinao;
ka ny vakivakiny no handratranao ny nononao
Izaho no manambara izany,
hoy ny teny hentitra avy amiko Tompo ANDRIANANAHARY.›
35«Izao manko no lazain’ny Tompo ANDRIANANAHARY: ‹Satria nanadino Ahy ianao ka niodina tamiko, dia hizaka ny vokatry ny filibàna amam-pijangajanganao›. »
Melohin’ny Tompo i Samaria sy i Jerosalema
36Ary hoy ny TOMPO tamiko: «Ry ilay taranak’olombelona, miomàna hitsara an’i Ôhôlà sy i Ôhôlibà. Vakio bantsilana ireo asany maharikoriko. 37Fa vehivavy mpanitsakitsa-bady sy mpamono olona ireo. Nanitsakitsa-bady tamin’ny fanompoan-tsampy#23.37 Ny fakam-badin’olona sy ny fijangajangana dia matetika sary fampisehoana ny fanompoan-tsampy, jereo and 2.10; 16.17; Hôs 3.1-5. izy sy namono olona ho faty tamin’ny nanaovany sorona ny zanany lahy izay efa naterany ho Ahy. 38Sady izao koa no nataony tamiko: Andro iray ihany no nandotoany ny toerako masina sady nanimbazimbany ny sabatako. 39Fa ny andro nanaovany sorona ny zanany lahy tamin’ny sampiny iny ihany no nidirany tao amin’ny toerako masina, teo anivon’ny tranoko, ka nandotoany azy. 40Ankoatra izany, nandefa iraka hanasa lehilahy avy any an-tany lavitra izy. Raha vao naharay hafatra ireny, dia nirohotra ho atỳ amin’i Ôhôlà sy i Ôhôlibà izay samy efa nandro sy nandoko maso ary nametaka firavaka rahateo. 41Dia nipetraka tamina farafara mirenty izy roa vavy, ary namelatra latabatra nametrahany vovo-javamanitra mifangaro sy ilomanitra izay samy avy amiko. 42Marobe ny olona tonga tao aminy, ka re tao ny kotaban’olona tsy manana ahiahy. Tonga tao koa ireo lehilahy avy amin’ireo toerana rehetra any an-taniefitra, ary nametaka haba teny amin’ny hato-tanan’izy mirahavavy sy nametraka satroboninahitra mahafinaritra teny an-dohany. 43Dia hoy Aho anakampo: ‹Na dia izay efa tontan’ny fanitsakitsaham-bady hatry ny ela aza, dia mbola mirotsaka hijangajanga ihany ankehitriny!› 44Misy lehilahy mankao aminy toy ny ankanesana amin’ny vehivavy mpivarotena. Toy izany no ankanesany tao amin’i Ôhôlà sy i Ôhôlibà izay vehivavy janga! 45Fa hisy kosa lehilahy marina hanameloka ireo vehivavy roa ireo ho mpanitsakitsa-bady sy mpamono olona, satria mpanitsakitsa-bady tokoa izy sady misy ra eny an-tanany.
46«Izao manko no lazain’ny Tompo ANDRIANANAHARY: ‹Anaingao famoriam-bahoaka hanafay azy roa, ary aoka hatolotra hampihorohoroina sy horobaina izy. 47Torahy vato izy ary tetiteteho amin’ny sabatra, vonoy ho faty ny zanany lahy sy vavy ary doroy ny tranony. 48Hatsahatro ny filibàna mihanaka eo amin’ity tany ity. Hahazo fampitandremana ny vehivavy rehetra ka tsy hanahaka ny filibàn’izy roa vavy intsony. 49Fa hovaliana aminy kosa ny filibàny ary hozakainy ny vokatry ny fanompoan-tsampiny. Amin’izay dia hoekenareo fa Izaho no Tompo ANDRIANANAHARY›. »
Voafantina amin'izao fotoana izao:
Ezekiela 23: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.