2 Samoela 11
11
I Davida sy i Bàty-Sèba
1Ny taona manaraka, rehefa tonga ny fotoana fandehanan’ny mpanjaka hiady, dia naniraka an’i Jôaba sy ny manamboninahiny ary ny tafika israelita manontolo i Davida mba handringana ny Hamônita sy hanao fahirano an’i Rabà. I Davida kosa nijanona tany Jerosalema ihany#11.1 Jereo 1 Tan 20.1..
2Indray takariva dia niarina avy teo am-pandriany i Davida ka nitsangantsangana teo an-tafon-trano marin-tampon’ny lapam-panjakana. Avy teny no nahatazanany vehivavy iray nandro. Tsara tarehy aoka izany ravehivavy. 3Dia naniraka olona i Davida hanadihady ny momba io vehivavy io, ka izao no voalaza: «I Bàty-Sèba, zanakavavin’i Eliama ary vadin’i Orià ilay Hetita io!» 4Nampanalain’i Davida izy, ka tonga tao aminy, dia niraisany, ary nody tany an-tranony indray. Vao avy nanadio ny tenany noho ny fadimbolana ravehivavy tamin’izay#11.4 Ity fehezanteny farany ity dia sady manazava ny fidiovana ao amin’ny and 2, sy ny tsy isalasalana fa i Davida no rain’ilay zaza (and.5)..
5Bevohòka anefa ravehivavy ka naniraka olona hilaza amin’i Davida hoe:
–Manana anaka aho.
6Nanafatra haingana an’i Jôaba i Davida hoe:
–Alefaso atỳ amiko i Orià ilay Hetita. Dia nalefan’i Jôaba nankany amin’i Davida i Orià. 7Rehefa tonga teo amin’i Davida izy, dia nanontanian’i Davida izay vaovao momba an’i Jôaba sy ny miaramila ary ny fizotry ny ady. 8Dia hoy i Davida tamin’i Orià:
–Mandehana mody ary makà aina kely. Nandao ny lapan’ny mpanjaka i Orià narahina fanomezana avy taminy. 9Kanefa nandry teo am-bavahadin’ny lapam-panjakana niaraka tamin’ny mpiambina ny mpanjaka i Orià, fa tsy nandeha nody tany an-tranony. 10Rehefa nambara tamin’i Davida fa tsy nody tany aminy akory i Orià, dia nilazany hoe:
–Tsy avy lavitra ve ianao? Koa nahoana no tsy nody tany an-tranonao ianao?
11Fa hoy i Orià tamin’i Davida:
–Ny Vatamasina ary koa ny tafik’i Israely sy i Joda dia mitoetra an-day; i Jôaba filohan-tafika sy ireo manamboninahiny dia mitoby any an-tsaha, koa izaho kosa ve hody any an-tranoko hihinana sy hisotro ary handry amin’ny vadiko? Raha velona koa ianao, ary raha velona koa ny ainao, dia mianiana aminao aho fa tsy hanao izany.
12Ary hoy i Davida tamin’i Orià:
–Mijanòna ihany àry atỳ anio. Fa rahampitso dia halefako ianao.
Dia nijanona tao Jerosalema hatramin’ny ampitson’iny i Orià. 13Nanasa azy i Davida mba hihinana sy hisotro teo amin’ny latabany, ka dia nomamoiny; kanefa nony hariva ny andro, dia lasa nandry teo anilan’ireo mpiambina ny mpanjaka ihany izy fa tsy nandeha nody tany aminy.
14Ny ampitso maraina, dia nanoratra taratasy ho an’i Jôaba i Davida, ka nampitondrainy an’i Orià izany. 15Izao no voalazany tao amin’ilay taratasy: «Apetraho amin’ny voalohan-daharana i Orià, dia amin’izay toerana mahamafy indrindra ny ady, dia mihemora aoriany ianareo mba hamelezam-pahavalo azy ho faty.»
Ny nahafatesan’i Orià vadin’i Bàty-Seba
16Rehefa nanara-maso ny fahiranon’ny tanàna i Jôaba, dia nametraka an’i Orià tamin’ny toerana izay fantany fa nisy ny fahavalo mahery fo. 17Nivoaka ny tanàna voafahirano ny miaramila tao ka nanafika an’i Jôaba. Nisy tamin’ny tafik’i Davida sy ireo manamboninahiny no tavela; ary maty koa i Orià ilay Hetita. 18Dia nandefa tatitra tany amin’i Davida momba ny fizotry ny ady i Jôaba, 19ka nanome baiko ilay iraka hoe:
–Rehefa voatantaranao an-tsipiriany amin’ny mpanjaka ny fizotry ny ady, 20dia mety ho tezitra ny mpanjaka ka hiteny aminao hoe: «Nahoana no nanakaiky ny tanàna ianareo raha niady? Tsy fantatrareo ve fa hisy hitifitra anareo avy eny amin’ny manda? 21Fa iza no namely an’i Abimelèka zanakalahin’i Jerobahala, tao Tebetsy#11.21 Fampahatsiarovana izay voatantara ao amin’ny Mpits 9.50-54.? Moa tsy vehivavy anankiray no nanjera vato fikoseham-bary taminy avy teny ambony manda ka nahafaty azy? Koa nahoana no nanakaiky ny manda ianareo?» Raha izany no tenin’ny mpanjaka, dia valio hoe: «Maty koa i Orià, ilay Hetita manamboninahitra».
22Dia lasa ilay iraka, ka tonga nanambara tamin’i Davida ny tatitra nampitondrain’i Jôaba azy 23ary niteny taminy hoe:
–Nahery noho izahay ireo fahavalo sady nivoaka ny tanàna hiady taminay teny an-tanety; kanefa dia voatosikay hatreo am-bavahady ihany izy. 24Saingy nisy namely anay ny mpitifitra zana-tsipîka avy teny amin’ny manda; ka izay no nahafaty ny manamboninahitrao sasany, ary anisan’ireo i Orià ilay Hetita.
25Dia hoy i Davida tamin’ilay iraka:
–Lazao amin’i Jôaba hoe: «Aza malahelo amin’izany ianao, fa na ny an-kilany na ny an-daniny dia mety misy maty an’ady. Hamafiso hatrany ny fanafihanao ny tanàna ka ravao izy.» Izany no hampaherezanao an’i Jôaba.
26Rehefa fantatry ny vadin’i Orià fa maty ny vadiny, dia nitomany azy izy. 27Nony afa-tsaona izy, dia nampiantsoin’i Davida hankany aminy, ka nalainy ho vady ary niteraka zazalahy taminy.
Voafantina amin'izao fotoana izao:
2 Samoela 11: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.