2 Mpanjaka 8
8
Ny fiafaran’ny tantaran’ilay vehivavy sonemita
1Indray andro dia niteny tamin’ilay vehivavy nanan-janakalahy maty nefa novelominy#8.1 Jereo 4.8-37. indray i Elisà, ka nanao hoe:
–Mialà eto ianao sy ny fianakavianao ka mifindrà monina any amin’izay azonareo onenana; fa ny TOMPO handefa mosary eto amin’ny tanin’i Israely, ary efa ho tonga izany ka haharitra fito taona.
2Dia niala teo ilay vehivavy ka nanao araka ny tenin’ilay olon’Andriamanitra taminy; ary lasa izy sy ny fianakaviany nifindra monina nandritra ny fito taona tany amin’ny tanin’ny Filistinina. 3Nony afaka fito taona dia nody avy tany amin’ny tanin’ny Filistinina ravehivavy ka nangataka hihaona amin’ny mpanjaka mba hitaky ny tranony sy ny taniny#8.3 Nalain’ny mpifanolo-bodirindrina tamin’ny tsy nahateo azy ny tany..
4Tamin’izay kosa ny mpanjaka dia niresaka tamin’i Gehazỳ mpanompon’i Elisà. Nangatahiny izy mba hilaza aminy izay zava-dehibe rehetra nataon’ny mpaminany. 5Raha mbola notantarain’i Gehazỳ tamin’ny mpanjaka ny amin’ilay zaza maty izay novelomin’i Elisà, dia indro tonga nitaky ny tranony sy ny taniny tamin’ny mpanjaka ilay vehivavy. Ary hoy i Gehazỳ:
–Io ilay vehivavy sy ny zanany izay novelomin’i Elisà indray, ry andriamanjaka!
6Dia nanontanian’ny mpanjaka ilay vehivavy, ka nitantara ny zava-drehetra. Ary nasain’ny mpanjaka nokarakarain’ny manamboninahitra iray ny raharahan-dravehivavy, ka hoy izy:
–Avereno aminy avokoa ny fananany rehetra ary onero ny vokatry ny taniny manomboka amin’ny andro nandaozany azy ka mandraka ankehitriny.
I Elisà sy i Hazaela
7Indray andro dia tonga tany Damasy i Elisà. Narary i Bena-Hadada mpanjakan’i Siria tamin’izay; ary rehefa nisy nilaza taminy fa ao an-tanàna ilay olon’Andriamanitra, 8dia hoy izy tamin’i Hazaela#8.8 Jereo 1 Mp 19.15. Mety ho niasa tao amin’ny lapan’ny mpanjaka tao Damasy i Hazaela.:
–Mitondrà fanomezana ka mandehana mihaona amin’i Elisà; dia asaivo manontany ny TOMPO izy raha toa ka ho sitrana amin’izao aretiko izao ihany aho.
9Dia lasa nihaona tamin’i Elisà i Hazaela nombàm-panomezana nentin’ny rameva efapolo, dia izay zava-tsoa isan-karazany tao Damasy. Rehefa tonga izy, dia nitsangana teo anatrehan’ny mpaminany sady nanao hoe:
–I Bena-Hadada, mpanoa anao sady mpanjakan’i Siria, no naniraka ahy hankatỳ aminao mba hanontany anao raha ho sitrana amin’izao aretina izao ihany izy.
10Ka hoy ny navalin’i Elisà:
–Mandehana lazao izy fa ho sitrana marina tokoa! Kanefa ny TOMPO efa nanambara tamiko fa ho faty izy.
11Dia nifantoka fijery sy ankona endrika#8.11 Marika mampiseho fa ny mpaminany dia eo am-pandraisana hafatra avy amin’ny Tompo ao anaty fahitana. ilay olon’Andriamanitra; avy eo izy vao nitomany. 12Fa nanontany azy i Hazaela hoe:
–Nahoana ianao no mitomany, tompoko?
Ka hoy ny navalin’i Elisà:
–Satria fantatro ny ratsy izay hataonao amin’ny Israelita: hodoranao ny tanànamimandany; hovonoinao ho faty amin’ny sabatra ny tanorany, homontsaninao ny ankizikeliny, ary hotatahinao kibo ny vehivavy bevohòka eo aminy.
13Dia hoy i Hazaela:
–Fa zinona moa ity tenako tsy manam-pahefana sady bitika ity no dia hahavita zavatra toy izany?
Ary i Elisà namaly hoe:
–Efa nambaran’ny TOMPO tamiko fa ho mpanjakan’i Siria#8.13 Jereo 1 Mp 19.15. ianao.
14Dia nandao an’i Elisà i Hazaela ka niverina tany amin’ny tompony izay nanontany azy hoe:
–Ahoana hoy i Elisà taminao?
Hoy kosa ny navalin’i Hazaela:
–Nilaza tamiko izy fa ho sitrana tokoa ianao.
15Nony ampitso anefa, dia naka bodofotsy anankiray i Hazaela; natsobony tao anaty rano izany ka nasarony ny tavan’i Bena-Hadada hanempotra azy. Dia maty ny mpanjaka, ary i Hazaela no nanjaka nandimby azy.
I Jôrama mpanjakan’i Joda
(Jereo 2 Tan 21.2-20)
16Tamin’ny taona fahadimy nanjakan’i Jôrama zanakalahin’i Ahaba sady mpanjakan’i Israely no tonga mpanjakan’i Joda i Jôrama zanakalahin’i Jôsafata, na dia mbola mpanjakan’i Joda aza i Jôsafata#8.16 na dia... Jôsafata: mety midika izany fa nanankim-pahefana tamin’i Jôrama zanany lahy i Jôsafata ka tonga mpanjaka alohan’ny tena hahafatesan’i Jôsafata izy.. Feno 32 taona izy fony vao nanjaka, 17ary naharitra valo taona no nanjakany tao Jerosalema. 18Ny toetran’ireo mpanjakan’i Israely no narahiny, dia tahaka ny fanaon’ny taranak’i Ahaba#8.18 I Hatalià no ambara amin’izany, jereo and 26., satria nanambady ny zanakavavin’i Ahaba izy ka nanao izay ratsy eo imason’ny TOMPO. 19Tsy nandringana an’i Joda anefa ny TOMPO noho ny amin’i Davida mpanompony, izay efa nampanantenainy fa ny taranany dia hanjaka mandrakizay ao Jerosalema#8.19 Jereo 2 Sam 7.12-16; 1 Mp 11.36..
20Tamin’ny andron’i Jôrama no nikomian’ny Edômita tamin’ny fahefana jodeanina ka nananganany mpanjaka#8.20 Jereo Gen 27.40. ho azy. 21Nankany Tsahirà#8.21 Tsahirà: toerana tsy fantatra mazava, saingy mety ho any amin’ny tanin’i Edôma na akaikiny. niaraka tamin’ny kalesiny rehetra manko i Jôrama. Nony voahodidin’ny Edômita ny tenany mbamin’ireo komandin-kalesiny, dia voatery nitsoaka nanao latsaka alina tamin’ny Edômita; ary nandositra nankany an-dainy ny tafika jodeanina. 22Hatreo dia nanohitra ny fahefana jodeanina ny Edômita mandraka androany.
Tamin’izay fotoana izay koa no nikomian’ny tanànan’i Libnà#8.22 Libnà: tanàna sahabo ho 40 km andrefan’i Jerosalema; lasa teo ambany fifehezan’ny Filistinina i Libnà tamin’izay..
23Ny sisa amin’ny tantaran’i Jôrama ary koa ny zavatra hafa rehetra nataony dia voasoratra ao amin’ny boky milohateny hoe Asan’ireo mpanjakan’i Joda. 24Rehefa lasa nodimandry any amin’ny razany i Jôrama, dia nalevina tao amin’ny fasam-pianakaviany tao an-tanànan’i Davida; ary i Ahazià zanany lahy no nanjaka nandimby azy.
I Ahazià, mpanjakan’i Joda
(Jereo 2 Tan 22.1-6)
25Tamin’ny taona faha-12 nanjakan’i Jôrama zanakalahin’i Ahaba sady mpanjakan’i Israely no tonga mpanjakan’i Joda i Ahazià zanakalahin’i Jôrama. 26Feno 22 taona i Ahazià fony vao nanjaka, ary herintaona ihany no nanjakany tany Jerosalema. Hatalià no anaran-dreniny izay vavimatoan’i Hômrỳ mpanjakan’i Israely. 27Ny toetran’ireo taranak’i Ahaba no narahin’i Ahazià; ka nanao izay ratsy eo imason’ny TOMPO tahaka ny nataon’ireo izy sady vinanton’ny taranak’i Ahaba ihany.
28Niara-dia tamin’i Jôrama zanakalahin’i Ahaba izy mba hiady amin’i Hazaela mpanjakan’i Siria tany Ramôta Gilehada kanjo naratran’ny Sirianina i Jôrama. 29Ary niverina tao Jizrehela i Jôrama mpanjaka mba hotsaboina tamin’ny ratra nahavoa azy tany Ramôta, fony izy niady tamin’i Hazaela mpanjakan’i Siria. Dia nankany Jizrehela i Ahazià, zanakalahin’i Jôrama sady mpanjakan’i Joda, mba hamangy an’i Jôrama zanakalahin’i Ahaba noho izy narary.
Voafantina amin'izao fotoana izao:
2 Mpanjaka 8: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.