2 Mpanjaka 15
15
I Hazarià mpanjakan’i Joda
(Jereo 2 Tan 26.3-4, 21-23)
1Tamin’ny taona faha-27 nanjakan’i Jerôbohama tamin’i Israely no tonga mpanjakan’i Joda i Hazarià zanakalahin’i Amatsià; 2feno 16 taona izy fony vao nanjaka, ary naharitra 52 taona no nanjakany tao Jerosalema. Ny anaran-dreniny dia i Jekôlià izay avy ao Jerosalema ihany. 3Nanao izay mahitsy eo imason’ny TOMPO i Hazarià, tahaka izay rehetra nataon’i Amatsià rainy; 4nefa tsy mba nofoanany ny toeram-panasinana, ka mbola nanao sorona sy nandoro azy hanetona teny ihany ny olona.
5Namely ny mpanjaka tamin’ny aretina ny TOMPO; ka tonga boka mandra-pahafatiny izy ary voatery nitoka-monina tao amin’ny trano anankiray. Ka dia i Jôtama, zanany lahy sady efa mpifehy ny tao an-dapa no nitondra ny tany sy ny fanjakana.
6Ny sisa amin’ny tantaran’i Hazarià ary koa ny zavatra hafa rehetra nataony dia voasoratra ao amin’ny boky milohateny hoe Asan’ireo mpanjakan’i Joda. 7Rehefa lasa nodimandry any amin’ny razany i Hazarià#15.7 Jereo Is 6.1., dia nalevina tao amin’ny fasam-pianakaviany tao an-Tanànan’i Davida; ary i Jôtama zanany lahy no nanjaka nandimby azy.
I Zakarià, mpanjakan’i Israely
8Tamin’ny taona faha-38 nanjakan’i Hazarià tamin’i Joda no tonga mpanjakan’i Israely tao Samaria i Zakarià zanakalahin’i Jerôbohama; ary enim-bolana ihany no nanjakany tao. 9Nanao izay ratsy eo imason’ny TOMPO tahaka ny nataon’ireo razany izy, satria tsy nialany ny fahotana izay nitarihan’i Jerôbohama zanakalahin’i Nebata ireo Israelita. 10Fa nikomy taminy kosa i Saloma zanakalahin’i Jabesa ka nahafaty azy tao Jiblehama#15.10 tao Jiblehama: araka ny dkt tranainy grika. Jereo 9.27 sy nta. ary nanjaka nandimby azy. 11Ny sisa amin’ny tantaran’i Zakarià dia voasoratra ao amin’ny boky milohateny hoe Asan’ireo mpanjakan’i Israely.
12Izany ilay nolazain’ny TOMPO tamin’i Jehò hoe: «Hitoetra eo amin’ny sezafiandrianan’i Israely hatramin’ny taranaka fahefatra ny taranakao#15.12 Jereo10.30. I Zakarià dia zafin-dohalik’i Jehò., ka dia tanteraka.»
I Saloma mpanjakan’i Israely
13Tamin’ny taona faha-39 nanjakan’i Hazarià tamin’i Joda no tonga mpanjakan’i Israely i Saloma zanakalahin’i Jabesa; ary iray volana ihany no nanjakany tao Samaria. 14Fa tonga tao Samaria avy any Tiritsà kosa i Menahema zanakalahin’i Gadỳ ka nahafaty an’i Saloma tao, ary dia nandrombaka ny fahefana.
15Ny sisa amin’ny tantaran’i Saloma ary koa ny fiokoany nanohitra an’i Zakarià dia voasoratra ao amin’ny boky milohateny hoe Asan’ireo mpanjakan’i Israely.
16Tamin’izay no niala tao Tiritsà i Menahema ka nanafika ny tanànan’i Tifsa, ary nandringana ny mponina tao sy nandrava ny faritaniny manontolo. Rehefa misy tanàna tsy amohana vavahady an’i Menahema, dia tafihiny; ary tatahany koa ny kibon’ny vehivavy bevohòka rehetra ao#15.16 Tifsa: tanànan’i Palestinina saingy tsy voafaritra mazava ny misy azy (tanàna hafa noho ilay Tifsa any Siria avaratra, jereo 1 Mp 5.4); ny dkt tranainy grika dia manao hoe Tapoa. .
I Menahema, mpanjakan’i Israely
17Tamin’ny taona faha-39 nanjakan’i Hazarià tamin’i Joda no tonga mpanjakan’i Israely i Menahema zanakalahin’i Gadỳ; ary naharitra folo taona no nanjakany tao Samaria. 18Nandritra ny androm-piainany rehetra, dia nanao izay ratsy eo imason’ny TOMPO izy, fa tsy nialany ny fahotana izay nitarihan’i Jerôbohama zanakalahin’i Nebata ireo Israelita.
19Niditra an-keriny tao amin’ny tanin’i Israely i Pola mpanjakan’i Asiria#15.19 Araka ny tahirin-tsoratra asirianina, i Pola sy i Tiglata-Pilesera (and 29) dia anarana roa manondro olona iray ihany. –Ny fotoana nampahatanjaka fatratra an’i Asiria dia tanelanelan’ny taona 745 sy 612 tal J.K. tany ho any.; ka nomen’i Menahema volafotsy telopolo taonina izy mba hanampiany azy hanamafy orina ny fahefàm-panjakany. 20Mba hahazoana izany volafotsy izany, dia nampandoavin’i Menahema hetra ny mpanankarena rehetra tany Israely, dia sekela volafotsy dimampolo avy mba homena ny mpanjakan’i Asiria. Rehefa nandray izany izy, dia niverina nody fa tsy nijanona teo amin’ny tany.
21Ny sisa amin’ny tantaran’i Menahema ary koa ny zavatra hafa rehetra nataony dia voasoratra ao amin’ny boky milohateny hoe Asan’ireo mpanjakan’i Israely. 22Rehefa lasa nodimandry any amin’ny razany izy, dia i Pekahià zanany lahy no nanjaka nandimby azy.
I Pekahià mpanjakan’i Israely
23Tamin’ny taona fahadimampolo nanjakan’i Hazarià tamin’i Joda no tonga mpanjakan’i Israely tao Samaria i Pekahià zanakalahin’i Menahema; ary roa taona ihany no nanjakany tao. 24Nanao izay ratsy eo imason’ny TOMPO izy, satria tsy nialany ny fahotana izay nitarihan’i Jerôbohama zanakalahin’i Nebata ireo Israelita. 25Ary nikomy tamin’i Pekahià i Peka dekàny sady zanakalahin’i Remalià, ka nanafika azy mbamin’i Argôba sy Aria tao amin’ny tilikambon’ny tranon’ny mpanjaka#15.25 tilikambon’ny tranon’ny mpanjaka: jereo 1 Mp 16.18 sy nta.; tamin’izay i Peka dia nombàn’ny vatan-dehilahy dimampolo taranaky ny Gilehadita; rehefa avy namono an’i Pekahià ho faty izy, dia nanjaka nandimby azy.
26Ny sisa amin’ny tantaran’i Pekahià ary koa ny zavatra hafa rehetra nataony dia voasoratra ao amin’ny boky milohateny hoe Asan’ireo mpanjakan’i Israely.
I Peka mpanjakan’i Israely
27Tamin’ny taona faha-52 nanjakan’i Hazarià tamin’i Joda no tonga mpanjakan’i Israely i Peka zanakalahin’i Remalià; ary naharitra roapolo taona no nanjakany tao Samaria. 28Nanao izay ratsy eo imason’ny TOMPO izy, satria tsy nialany ny fahotana izay nitarihan’i Jerôbohama zanakalahin’i Nebata ireo Israelita.
29Tamin’ny andro nanjakan’i Peka tamin’i Israely no nahatongavan’i Tiglata-Pilesera mpanjakan’i Asiria haka ny tanànan’i Hiôna sy i Abela-Bety-Mahakà mbamin’i Janôka sy i Kedesa ary i Hatsôra; nalainy koa i Gilehada sy i Galilea mbamin’ny tanin’i Naftalỳ#15.29 mpanjakan’i Asiria: jereo and 19 sy nta. –i Gilehada... Naftalỳ: ny faritra avaratra atsinanana amin’ny fanjakan’i Israely. manontolo, ary dia nataony sesitany tany Asiria ny mponin’ireo. 30Fa nikomy tamin’i Peka zanakalahin’i Remalià i Hôsea zanakalahin’i Elà ka nahafaty azy; ary nanjaka nandimby azy izy tamin’ny taona faharoapolo nanjakan’i Jôtama zanakalahin’i Hozià.
31Ny sisa amin’ny tantaran’i Peka ary koa ny zavatra hafa rehetra nataony dia voasoratra ao amin’ny boky milohateny hoe Asan’ireo mpanjakan’i Israely.
I Jôtama mpanjakan’i Joda
(Jereo 2 Tan 27.1-3, 7-9)
32Tamin’ny taona faharoa nanjakan’i Peka zanakalahin’i Remalià tamin’i Israely no tonga mpanjakan’i Joda i Jôtama zanakalahin’i Hazarià. 33Feno 25 taona izy fony nanjaka; ary naharitra 16 taona no nanjakany tao Jerosalema. Ny anaran-dreniny dia i Jerosà zanakavavin’i Tsadôka. 34Nanao izay mahitsy eo imason’ny TOMPO i Jôtama, tahaka izay rehetra nataon’i Hozià rainy. 35Kanefa ny toeram-panasinana tsy noravany ka mbola nanao sorona sy nandoro azy hanetona teny ihany ny olona.
I Jôtama no nanamboatra ny vavahady ambony tamin’ny tranon’ny TOMPO#15.35 vavahady ambony: ity angamba ilay voalaza ao amin’ny Jer 20.2 sy Ezek 9.2..
36Ny sisa amin’ny tantaran’i Jôtama ary koa ny zavatra hafa rehetra nataony dia voasoratra ao amin’ny boky milohateny hoe Asan’ireo mpanjakan’i Joda. 37Tamin’ny andro nanjakan’i Jôtama no nanombohan’ny TOMPO nandefa an’i Retsina mpanjakan’i Siria sy i Peka mpanjakan’i Israely hanafika an’i Joda#15.37 Momba an’i Retsina sy i Peka dia jereo Is 7–8.. 38Rehefa lasa nodimandry any amin’ny razany i Jôtama, dia nalevina tao amin’ny fasam-pianakaviany tao an-Tanànan’i Davida; ary i Ahaza zanany lahy no nanjaka nandimby azy.
Voafantina amin'izao fotoana izao:
2 Mpanjaka 15: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.