1 Mpanjaka 3
3
I Salômôna manambady ny zanakavavin’ny Farao
1Tonga vinantolahin’ny Farao mpanjakan’i Ejipta i Salômôna tamin’ny nanambadiany ny zanany vavy. Nentiny nankany an-tanànan’i Davida ny vadiny mandra-pahavita ny lapany sy ny tranon’ny TOMPO ary ny manda manodidina an’i Jerosalema.
2Kanefa tamin’izay ny olona dia mbola nanao sorona teny amin’ny toeram-panasinana ihany, satria tsy mbola nisy ny trano voatokana hanajana ny TOMPO. 3Notiavin’i Salômôna ny TOMPO ka ny toromarik’i Davida rainy no nizorany; nefa izy koa mbola nanao sorona sy nandoro zava-manitra teny amin’ny toeram-panasinana.
I Salômôna mangataka fahendrena amin’Andriamanitra
(Jereo 2 Tan 1.2-13)
4Indray andro dia nankany Gibehôna#3.4 Toerana 10 km avaratra andrefan’i Jerosalema. ny mpanjaka mba hanao sorona, fa tany no toeram-pisoronana malaza indrindra. Sorona dorana manontolo arivo no naterin’i Salômôna teo amin’izany alitara izany. 5Fa raha mbola tao Gibehôna i Salômôna, dia nisehoan’ny TOMPO Andriamanitra tamin’ny nofy, ka nilazany hoe:
–Angataho izay tianao homeko anao.
6Dia hoy i Salômôna:
–Efa nanehoanao fitia lehibe i Davida raiko sady mpanomponao, araka ny nizorany teo anatrehanao tamin’ny toetra mahatoky sy marina sady mahitsy fo; ary notehirizinao ho azy izany fitia lehibe izany, fa nomenao zanakalahy izay mipetraka eo amin’ny sezafiandrianany izy tahaka izao hita anio izao. 7Ankehitriny, ry TOMPO Andriamanitro ô, efa nampanjaka ahy mpanomponao handimby an’i Davida raiko Ianao, kanefa izaho dia mbola tanora loatra ka tsy mahay mitondra akory. 8Izaho mpanomponao no filohan’ny vahoaka izay nofidinao, dia vahoaka betsaka tsy tambo isaina noho ny hamaroany. 9Koa omeo ahy mpanomponao ny saina mahiratra hifehezako ny vahoakanao sy hahaizako manavaka ny soa sy ny ratsy; fa, raha tsy eo izany, iza moa no hahay mifehy izao vahoakanao marobe izao?
10Sitraky ny Tompo Andriamanitra ny nangatahan’i Salômôna izany zavatra izany; 11ka dia hoy Izy tamin’ny mpanjaka:
–Nangataka izany zavatra izany ianao; tsy ny ho ela velona na ny harena, na koa ny hahafaty ireo fahavalonao no nangatahinao fa kosa fahaiza-manavaka hitondrana ny vahoaka amim-pahamarinana. 12Koa indro fa araka ny teninao no ataoko: omeko saina hendry sy mahay manavaka ianao, ka tsy hisy tahaka anao na ny olona tany alohanao na ny olona any aorianao. 13Ary na izay tsy nangatahinao aza dia omeko anao koa, dia ny harena amam-boninahitra, ka tsy hisy mpanjaka hitovy aminao amin’ny andronao rehetra. 14Ary raha mizotra amin’ny sori-dalako ianao ka mitandrina ny lalànako sy ny didiko tahaka ny nataon’i Davida rainao, dia hohalavaiko ny andronao.
15Rehefa nifoha i Salômôna, dia nahatsapa fa nitenenan’Andriamanitra tamin’ny nofy. Niverina tany Jerosalema izy, ary nitsangana teo anoloan’ny Vatamasina mirakitra ny fanekempihavanan’ny TOMPO ka nanatitra sorona dorana manontolo sy sorom-pihavanana; avy eo izy dia nanao fanasana ho an’ny tandapany rehetra.
Fitsaran’i Salômôna
16Indray andro dia nisy vehivavy mpivaro-tena roa tonga niseho teo anatrehan’ny mpanjaka. 17Dia hoy ilay vehivavy voalohany:
–Miray trano izaho sy ity vehivavy ity, ry andriamanjaka, ary teraka tao an-trano aho tamin’ny fotoana nahatao azy koa. 18Fa telo andro taorian’ny fiterahako, dia mba teraka ny zanany koa io vehivavy io. Izahay roa vavy ihany no tao an-trano fa tsy nisy olon-kafa ankoatra anay. 19Tamin’io alina io anefa, dia maty ny zanak’ity vehivavy ity fa voatsindriny. 20Koa tamin’ny misasakalina dia niarina izy naka ny zanako teo anilako raha ilay mbola natory iny aho, ka nampandriany teo anilany; fa ny azy maty kosa no nataony teo anilako. 21Rehefa nifoha hampinono ny zanako aho anikeheo maraina, dia indro fa maty izy. Kanjo rehefa nofantariko nony nazava ny andro, dia hitako fa hay tsy ny zanako naterako akory io.
22Tamin’izay, dia hoy kosa ilay vehivavy faharoa:
–Tsia! Ny velona no zanako, fa ny maty no anao!
Dia hoy ilay voalohany:
–Tsia! Ny maty no zanakao, fa ny velona no ahy!
Nifanditra toy izany teo anatrehan’ny mpanjaka izy roa. 23Fa hoy kosa ny mpanjaka:
–Ny iray manao hoe: «Ny velona no zanako fa ny maty no anao!» Dia mamaly ny iray hoe: «Tsia! Ny maty no zanakao fa ny velona no ahy!» 24Ka hoy aho hoe: «Itondray sabatra aho».
Rehefa tonga ny sabatra, 25dia hoy indray ny mpanjaka:
–Zarao roa ny zaza velona, ka samy omeo ny antsasany avy ireo vehivavy ireo!
26Fa onena mafy an-janany kosa ilay vehivavy renin’ny zaza velona, ka niteny tamin’ny mpanjaka hoe:
–Ry andriamanjaka ô, aoka re homena azy ihany ny zaza velona, fa aza dia vonoina ho faty!
Fa hoy kosa ny iray:
–Zarao roa mihitsy ny zaza, fa amin’izay dia samy tsy manana.
27Dia namaly ny mpanjaka, ka nanao hoe:
–Aza vonoina ho faty ny zaza, fa omeo ilay vehivavy voalohany; izy mihitsy no reniny.
28Ren’ny Israelita rehetra izany fitsarana nataon’ny mpanjaka izany; ka dia nanaja azy ny olona, satria nahatsapa fa misy fahendren’Andriamanitra ao aminy hoentiny mitsara.
Voafantina amin'izao fotoana izao:
1 Mpanjaka 3: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.