1 Mpanjaka 20
20
Ny mpanjakan’i Siria manao fahirano an’i Samaria
1Novorin’i Bena-Hadada mpanjakan’i Siria ny tafiny manontolo izay nahitana mpanjaka 32 mpiandany aminy ary koa soavaly mbamin’ny kalesy maro. Dia nataony fahirano i Samaria ka notafihiny. 2Ary nandefa iraka tany an-tanàna ho any amin’i Ahaba mpanjakan’i Israely izy 3hanao aminy hoe: «Izao no lazain’i Bena-Hadada: Ny volafotsinao sy ny volamenanao dia ahy, ary toraka izany koa ny vady aman-janakao izay tsara indrindra dia ahy.» 4Ary ny mpanjakan’i Israely namaly hoe: «Araka ny teninao, ry andriamanjaka, dia anao ny tenako sy izay rehetra ananako.» 5Dia niverina indray ny iraka ka nanao hoe: «Izao no tenin’i Bena-Hadada: Nampilaza tatỳ aminao aho ny hanomezanao ahy ny volafotsinao sy ny volamenanao ary ny vady aman-janakao. 6Koa rahampitso amin’ny ora toy izao, dia hirahiko hankatỳ aminao ny mpanompoko hisava ny tranonao sy ny an’ny mpanomponao. Koa izay rehetra nahafinaritra ny masonao dia halainy ka hoentiny avokoa.»
7Dia nampiantsoin’ny mpanjakan’i Israely ny loholona rehetra teo amin’ny taniny ka nilazany hoe:
–Hitanareo tsara izao fa mitady hanisy ratsy antsika iny olona iny! Fa raha nitaky ny vady aman-janako mbamin’ny volafotsiko sy ny volamenako izy, dia tsy nisy nolaviko izany.
8Dia hoy ny loholona sy ny vahoaka rehetra taminy:
–Aza mihaino azy ary aza manaiky!
9Ary hoy i Ahaba tamin’ny irak’i Bena-Hadada:
–Lazao amin’ny andriamanjaka hoe: «Izay rehetra notakinao tamiko tamin’ny voalohany dia hataoko; fa izao lazainao amiko izao kosa tsy azoko ekena#20.9 Mba tsy hisian’ny ady, dia eken’i Ahaba ny hanolotra ny zava-drehetra amin’ny mpifanandrina aminy, saingy tsy ekeny kosa ny hahatongavan’ny fahavalony handroba ny renivohiny..»
Dia lasa ny iraka nitondra izany valinteny izany tany amin’i Bena-Hadada. 10Fa izy kosa mbola nampaniraka fanintelony ho amin’i Ahaba mpanjaka hoe: «Hataon’ireo andriamanitra amiko anie ny famaizana faran’izay mafy indrindra, raha avelako hisy hahafeno tanan’ilan’ny vahoaka rehetra manaraka ahy akory ny vovok’i Samaria!»
11Ary hoy ny navalin’ny mpanjakan’i Israely:
–Ampahatsiahivo an’i Bena-Hadada izay voalazan’ny ohabolana hoe: «Aoka izay vao miainga hiantafika tsy hirehareha toy ny efa avy nandresy.»
12Teo am-pisotroana niaraka tamin’ny mpanjaka hafa tao an-day i Bena-Hadada raha nahazo izany valinteny izany; koa nomeny baiko avy hatrany ny manamboninahiny mba hiomana hanafika ny tanàna. Dia nioman-kanao izany ireo.
Nandresy i Ahaba mpanjaka
13Fa nisy mpaminany nanatona an’i Ahaba mpanjakan’i Israely ka nanao hoe:
–Izao no lazain’ny TOMPO: «Hitanao va ireo miaramila marobe ireo? Hatolotro eo an-tananao ireo anio, ka dia ho fantatrao fa Izaho no TOMPO.»
14Dia hoy i Ahaba:
–Amin’ny alalan’iza anefa?
Ka novalian’ilay mpaminany hoe:
–Izao no lazain’ny TOMPO: «Amin’ny alalan’ireo tovolahy izay nofantenan’ny filoha isam-paritany.»
Fa hoy indray i Ahaba:
–Iza àry no hamaky ny ady?
Dia hoy ilay mpaminany hoe:
–Ianao ihany.
15Ary nalahatr’i Ahaba ireo zatovo nofantenan’ny filoha isam-paritany ka nahitana 232. Nalahany nanarakaraka an’ireo koa ny miaramila israelita rehetra ka nisy fito arivo. 16Nanao fanafihana izy tamin’ny mitataovovonana, raha ilay nisotro ka mamo tao an-day iny i Bena-Hadada sy ny mpanjaka 32 mpanampy azy. 17Ny zatovo voafantina isam-paritany no nanafika voalohany; dia nandefa miaramila mpisafo i Bena-Hadada hijery izay mitranga any, ka nilazana izy hoe: «Misy olona mivoaka hanafika avy any Samaria.»
18Dia hoy izy hoe:
–Na fihavanana na ady no hiaviany, dia ataovy sambo-belona izy#20.18 Noho ny hamamoany dia toa tsy tena fantatr’i Bena-Hadada tsara intsony izay zavatra tadiaviny..
19Dia nivoaka ny tanàna ny zatovo voafantina sy ny miaramila nanaraka azy, 20ka samy namely izay nifanandrina taminy; ary nitsoaka nandositra ny Sirianina, nefa nenjehin’ny Israelita. Fa i Bena-Hadada mpanjakan’i Siria kosa nandositra nitaingin-tsoavaly niaraka tamin’ny mpitaingin-tsoavaly hafa. 21Nivoaka nanafika koa ny mpanjakan’i Israely ka namely ny mpitaingin-tsoavaly mbamin’ny kalesy; ary dia marobe ny Sirianina matiny.
22Dia nankany amin’ny mpanjakan’i Israely ilay mpaminany ka nanao taminy hoe:
–Mahereza ary diniho tsara izay tokony hataonao, fa amin’ny herintaona dia hiakatra hanafika anao indray ny mpanjakan’i Siria.
Mandresy indray i Ahaba
23Hoy ny minisitry ny mpanjakan’i Siria taminy:
–Ny Andriamanitr’i Israely dia Andriamanitry ny tendrombohitra, koa izany no nahareseny antsika. Fa raha eny an-tany lemaka kosa no hiadiantsika aminy dia tsy maintsy ho resintsika ireo. 24Koa izao no ataovy: esory amin’ny toerany avokoa ny mpanjaka mpanampy anao ka soloy governora. 25Makà miaramila maro sahala amin’ireo miaramilanao resy teo ary koa soavaly sy kalesy marobe toy ny teo aloha; dia hiady amin’ny tafik’i Israely eny an-tany lemaka isika, ka azo antoka fa isika indray no hahery amin’izay.
Neken’i Bena-Hadada ny torohevitr’ireo minisitra ka narahiny. 26Rehefa niherina ny taona, dia nampanaovin’i Bena-Hadada matso ny tafika sirianina ka nentiny hankany Afeka#20.26 I Afeka dia mety ho ao amin’ny faritra lemaka atsinanan’ny farihy Genesareta. hiady amin’i Israely. 27Nampanaovin’i Ahaba matso koa ny miaramila israelita sady nandray vatsy, ary niainga hifanehatra amin’ny fahavalo. Nitoby nanao antokony roa teo anoloan’ny Sirianina izy; tahaka ny osy andiany roa kely ny Israelita, fa ny Sirianina kosa nanenika ny tany. 28Dia nanatona ilay olon’Andriamanitra#20.28 Ilay olon’Andriamanitra dia toa ilay mpaminany voalaza etsy aloha and 13, 22. ka niteny tamin’ny mpanjakan’i Israely hoe:
–Izao no lazain’ny TOMPO: «Satria nataon’ny Sirianina fa Andriamanitry ny tendrombohitra ihany ny TOMPO fa tsy mba Andriamanitry ny tany lemaka koa, dia hatolotro eo an-tananao ireo miaramila marobe ireo, ka ho fantatrao fa Izaho no TOMPO.» 29Nandritra ny fito andro dia nitoby nifanatrika teo foana izy roa tonta, ka raikitra ny ady tamin’ny andro fahafito; ary nahafaty miaramila sirianina mpandeha an-tongotra antokony zato ny Israelita tao anatin’ny iray andro monja. 30Izay sisa tsy maty dia nandositra nankany Afeka ary nisy antokony 27, nefa nianjeran’ny mandan’ny tanàna avokoa ireny.
I Ahaba mitsimbina ny ain’ny mpanjakan’i Siria
Fa afa-nandositra i Bena-Hadada ka niditra tao an-tanàna ary niery tao an’efitrano anatiny indrindra tamin’ny trano anankiray. 31Hoy iretsy minisitra taminy:
–Renay fa mpanjaka antra olona ireo mpanjakan’i Israely ireo; koa aoka hisikina lamba gony izahay, ary aoka hofatorana mahazaka eo ambony lohanay ny tananay, dia hankany amin’ny mpanjakan’i Israely izahay, sao mba hitsimbina ny ainao izy.
32Dia nisikina lamba gony ireo ary ny tanany nofatorana mahazaka teo ambony lohany, dia nankany amin’ny mpanjakan’i Israely izy sady nanao hoe:
–Mitalaho aminao i Bena-Hadada mpanomponao mba hitsimbina ny ainy.
Fa hoy i Ahaba:
–Moa mbola velona ve izy? Rahalahiko manko izy!
33Fambara tsara ho azy ireo izany ka dia nohararaotiny haingana nanaovana hoe:
–Rahalahinao hoe i Bena-Hadada!
Dia hoy indray i Ahaba:
–Mandehana ka alao izy.
Dia nankany aminy i Bena-Hadada ka nampitaingeniny tamin’ny kalesiny. 34Hoy kosa i Bena-Hadada tamin’i Ahaba:
–Haveriko aminao ny tanàna izay nalain’ny raiko tamin-drainao; ary afa-manao varotra any Damasy toy izay nataon-draiko tany Samaria ianao.
Ary hoy i Ahaba:
–Hanao izany fifanekena izany aminao aho, dia hamela anao handeha avy eo.
Rehefa nahavita izany fifanekena izany i Ahaba, dia namela azy handeha.
Andriamanitra manameloka ny fahalemen’i Ahaba
35Ary tao anatin’ny andia-mpaminany anankiray dia nisy lehilahy niteny tamin’ny namany araka ny baikon’ny TOMPO hoe: «Asio aho!», nefa tsy nety namely azy ilay namany. 36Dia hoy ralehilahy taminy:
–Satria tsy nankatoavinao ny TOMPO, dia hisy liona hamely anao raha vao miala eto amiko ianao.
Koa raha vao niala teo aminy izy, dia tojo liona izay namono azy ho faty. 37Sendra olon-kafa indray ilay mpaminany ka niteny taminy hoe:
–Asio aho!
Dia nasian’ilehio izy ka naratra. 38Fa lasa ilay mpaminany nipetraka teo amoron-dalana niandry izay handalovan’ny mpanjaka, ary notakonany volon-doha ny handriny mba tsy hahafantarany azy. 39Koa rehefa nandalo ny mpanjaka, dia nitarainany nataony hoe:
–Ry andriamanjaka ô, tao anatin’ny ady aho no indro nisy olona nivoaka an-daharana nitondra mpigadra iray teo amiko sady niteny hoe: «Ambeno ity lehilahy ity! Fa raha mandositra io, dia ianao no ho faty hisolo azy, na koa handoa volafotsy 35 kilao amiko ianao.» 40Kanjo raha mbola sahirana nivezivezy tetsy sy teroa iny aho, dia lasa nitsoaka izy.
Dia hoy ny mpanjakan’i Israely taminy:
–Ianao ihany izany no nilaza ny fanamelohana ny tenanao.
41Ary nakarin’ilay mpaminany haingana ny volon-doha nanakona ny handriny, ka fantatry ny mpanjakan’i Israely fa isan’ny andia-mpaminany izy#20.41 Ireo mpaminany miara-mitoetra ireo dia mety mitondra marika eo an-kandrina na sola kely eo an-tampon-doha. Nafenin’ity mpaminany ity tamin’ny taovolony izany famantarana manokana izany.. 42Dia hoy ilay mpaminany taminy:
–Izao no lazain’ny TOMPO: «Satria navelanao handeha ilay lehilahy nohelohiko ho faty, dia ianao kosa no ho faty hisolo azy, ary ny vahoakanao no ho faty hisolo ny vahoakany.»
43Ary nalahelo sady tezitra ny mpanjakan’i Israely no niverina sady nody tany an-tranony, tao Samaria.
Voafantina amin'izao fotoana izao:
1 Mpanjaka 20: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.