Malke 4
4
'Lɛɛglonyɔ 'na nunɛ
(Matie 13.1-9; Luke 8.4-8)
1Zezu -mele "kusɔ Galile 'na jinyɛ yɔko. 'Nyakpa 'na -zakpɛ "yitɛ -suɛlo. "Ne 'ɔ yi -lɔ gɔlo "me 'gblɛ-, "ne 'ɔ yi -lɔ -duku 'gli-, "ne 'ɔ yi -lɔ -wa -ko 'cicɛku -wɛ Lagɔweli 'sloa-. 2Zezu sloale- nunɛ "me -li 'na -bɛɛ'. 'Ɔ -ko sloa dɛku 'na -see 'ɔ bhulɛ -wɛ, 'ɔ nɛɛ: 3«'A 'fo -kɛ 'yukwli! 'Gloglonyɔ -me 'awɔ -lɔ lilɛ -glo -ka. 4'Ɔ -ko lilɛ glo dɛku, "ne 'yo 'na -bedi yi -lɔ -gwe 'yukwli -zɔ bhli-. "Ne 'zea 'yi -lɔ li. 5'Ɔ 'glo "ne "ɛ 'yo 'na -bedi -bhli 'kpɛslɛ "klo, -dee dodo ne -zu -wɛ, "ne 'ɛ yi -lɔ 'kwɛle 'gba cuu, sɛko -wɛ, dodo "ne lɔbhɔ -zu zɛ. 6-Mɔ, ylo "kɛ "po ne, 'ɛ "ne 'tli 'na 'tli zɔ -ko za 'ɛ -si "ku "ne 'ɛ yi -lɔ "ku. 7'Yo 'na -bedi -bhli -kpɛcɛ "me. 'Ɛ 'wlo- zɔ 'tee, -mɔ -kpɛcɛ 'miɛle- 'wli "ku za 'ɛ "ne -tlo. 8'Yo 'na -bedi -bhli dodo 'na dodo "me 'ɛ 'wlo- zɔ, "ne 'ɛ yi -lɔ 'fete-, "ne 'ɛ yi -lɔ "me yi. 'Wlɛ -bholo -ko yɛ -glo -bholo yɛ kogbɔ 'yli, -ɛwɛ -ko yɛ -glo ta 'yli, "ne -ɛwɛ -ko yɛ -glo 'umgbu 'yli.» 9"Ne Zezu yi -lɔ sɛne lɛ nɛɛ: «-Ɔ kɛ 'yukwli -kɛ, 'ɔ 'no -kɛ "me!»
-Ɛ gbɔ bhɔ "ne Zezu 'pɔ nunɛ 'yiɛ 'a?
(Matie 13.10-17; Luke 8.9-10)
10Zezu "kɛ -zejilɛ "guɔ 'ylile- ne, 'ɔnɛɛ gɛlenya kogbɔ "sɔ -wɛ, "ne 'nyakpa -wa 'yɔbhɔlo- nɛ yɔko 'wli -wɛ, 'waa- -yu -lɔ lo 'yɔbhɔ ka. Ŋwɛnɛɛ: «Sɔɔbɛɛza, -e kɛ bhɔ 'sloa- "ne -e 'pɔ nunɛ 'yiɛ 'a?» 11Zezu nɛɛ: «'Anye 'po- -lɔ 'nu, "naa-, Lagɔ 'na 'Kamalezikpɛ "me 'na diɛweli, 'a -yi zɛ. -Mɔ, 'nyakpa 'na -wawɛ nunɛ 'wa "pɔloa -lɔ.
12"Ɛ dɛku,
'wa yi "fu 'yli lea-, -mɔ, 'wa -ka 'siɛ 'ye,
'wa no gbo, -mɔ, 'wa "ne -bɛɛ' "me -nyini.
"Naa-, 'ɛ "mɔ nɛ -kɛ soɔ -ko ne, 'wa yi nɛ -kɛ Lagɔ lo 'yli-,
"ne Lagɔ yi nɛ -kɛ 'wanɛɛ 'nyinyonoli 'na gbo "ku 'titli.»
13"Ne 'ɔ yua -lɔ sɛne bhulɛle- nɛɛ: «'Anye 'a "ne nunɛ ne "me 'no-! Zaa, "ɛ nunɛ ne 'klekle -see 'a 'cɛ bhɔ "me 'no 'a?»
Zezu -sɛ 'lɛɛglonyɔ 'na nunɛ zɔ
(Matie 13.18-23; Luke 8.11-15)
14'Gloglonyɔ, Lagɔweli 'ye 'ɔ 'glo -lɔ. 15'Yo 'na -bedi -ɛ -bhli -gwe 'yukwli -zɔ -wɛ, 'nyakpa 'na -wa 'no Lagɔweli "me "ne Sata soa 'dlezɔ cuu 'waa -lɔ. 16'Yo 'na -ɛ -bhli 'kpɛslɛ "klo -wɛ, 'nyakpa 'na -wa 'no- Lagɔweli "me "ne 'wa 'sɛ- kɔ 'bhobhlo 'ŋwanasɛ 'waa -lɔ. 17-Mɔ, Lagɔweli "noa -kpulu "me -mile, zaa, kɔ 'ye 'wa 'bheliɔ -lɔ cuu. 'Ɛnɛɛ 'ylime, 'wa "koa Lagɔweli za 'gbapea-, "ne 'wa "koa "nyɛzezia- ne, keyi 'wa glɛɛ -lɔ cuu. 18'Yo 'na -bedi -ɛ -bhli 'kpɛcɛ 'glɛme -wɛ 'nyakpa -wa -fo Lagɔweli 'yukwli 'waa -lɔ, 19-mɔ 'wanɛɛ 'wli -zu zikpɛ ne "ku 'na -li 'klekle 'na mɔ kpɛnyee: "Bhle 'na -klɔgbɔ -ɛ no ylo -wɛ, "ne 'wanɛɛ 'dle 'yɔbhɔ dodo ne "ku 'na -li 'klekle. -Ɛwɛ 'klekle ploa -lɔ "me "ne 'ɛ wale -lɔ Lagɔweli "ku. -Ɛwɛza Lagɔweli "ne 'bhɛle- "ne 'ɛ "kɛ bhi tlo. 20'Yo 'na -bedi -ɛ -bhli dodo 'na -dodo "me, 'nyakpa -wa -fo Lagɔweli 'yukwli 'tee 'waa -lɔ. 'Wa 'sale- 'dle "namanɔ "me kɔ. 'Wa -ko lɛ lilɛ 'na -nyɔ 'na 'wlɛ -bholo -tlo yɛ -glo -bholo yɛ kogbɔ, -ɛwɛ -tlo yɛ -glo ta, "ne -ɛwɛ, yɛ -glo 'umgbu.
Napɛ 'na nunɛ
(Matie 5.15; 10.26; Luke 6.38; 8.16-18)
21"Ne Zezu yua 'lelee -lɔ sɛne bhulɛle- nɛɛ: «'Wa kɛ 'napɛ -nɛme ne, -gbɛɛ 'wlime 'wa 'gbli bha? -Mɔ, -gbɔto zɔ? 'Bhɔ -kɛ, "nɔgo "ku 'wa glɛ -lɔ. 22-Bɛɛ' 'na -ɛ zizɔ- "ku "ne -ɛ -ka lɛ yibhleleɔ- "ne -le, "ne -ɛ -ko 'diɛɛ "me "ne -ɛ -ka lɛ zɔ 'wlo "ne -le. 23'Nyɔkpɔ 'na -ɔ kɛ 'yukwli -kɛ, 'ɔ 'no -kɛ "me.» 24"Ne Zezu bhulɛloa nɛ 'lelee sɛne: «'A 'luɔle- -kɛ weli -ye 'a 'no -wɛ "ku! -Mee -e wɔkɔle -wɛ "bhle Lagɔ "kɛ -lɔ -neɛ' wɔkɔle- -me. "Ne -ye 'ɔ "kɛ 'anye "nyɛ -wɛ yi 'ce lɔbhɔ 'ple. 25"Naa-, -ɔ -kɛ -wɛ, 'ɔnɛɛ 'wa "kɛ -lɔ "ku zimalea-. "Ne -ɔ "ne -bɛɛ' -kɛ -wɛ, 'tekeyi 'na -ye 'ɔ kɛ nɛ -kɛ, 'wa yu kɔ -sɛ.
Lilɛ -ye 'wa -glo -wɛ, 'ɛyigɛsɛ 'ɛ mi -lɔ "ku
26"Ne Zezu yi 'lelee -lɔ sɛne lɛ nɛɛ: -Ye 'wa "kɛ Lagɔ 'na 'Kamalezikpɛ 'wɔkɔle- 'ɛɛ ne lɛ: 'Nyɔkpɔ -bholo -me -lɔ glo -ka. 27'Ɔ -glo 'lɛɛ "bhuɔ ne, -se 'ɔ ŋɔŋo sabo "ne 'ɔ glɔ 'ylokwɛ "ɛ gloglo -li -wɛ 'ɛ mi, "ne 'ɛ 'bhoɔ, -mɔ, 'ɔ "ne -see 'ɛ ylɛle -yi. 28Dodo 'ɛyigɛsɛ "ne 'ɛ wloa -lɔ lilɛ zɔ, 'ɛ mi, 'ɛ 'bhoɔ, 'ɛ 'fete "ne 'ɛ yi -lɔ "me. 29"Ɛ 'ble kɛ -zɛle ne, "di ka 'wa me -lɔ. "Naa-, 'ɛnɛɛ 'di dɛku -ylɛ -lɔ zɛ.»
Mutadeyɛ 'na nunɛ
(Matie 13.31-32; Luke 13.18-19)
30Zezu nɛɛ: «-Ye 'wa "kɛ bhɔ Lagɔ 'na 'Kamalezikpɛ 'wɔkɔle- 'a? 'Nunɛ 'na -ye 'wa "kɛ bhɔ 'nyakpa "me 'pɔle 'a? 31'Ɛ -ko sɛgbɛɛ su -ye 'wa la mutade -wɛ 'na yɛ. 'Ɛɛ -noɔ -lɔ 'glogloli 'klekle 'glɛme 'na yɛ -ɛ "ne 'kpɔ dodo ne "ku yɛ. 32-Mɔ, 'wa 'cɛ -la -glo ne, 'ɛ 'bhoɔ "ne 'ɛ 'kpɔmale, "ne 'ɛ zi 'laabhuɛyi "me 'na lilisu 'klekle "ku, 'ɛnɛɛ klɛ 'kpɔmale, sɔbhɔ za 'zea 'bhɛle- 'wa "kɛ "bhle 'wanɛɛ -lolɛ sɔbhɔle.» 33Soɔ 'na nunɛ -kwleyi "me, 'ye Zezu sloa -lɔ 'nyakpa Lagɔweli. -See 'wa 'cɛ "me 'no -wɛ, sɔbhɔ 'ye 'ɔ ylaleɛ -lɔ. 34-See 'ɔ bhulɛloa -wɛ, sɔbhɔ 'ɔ 'pɔloa 'ce -lɔ nunɛ -godogodo 'ɛ "mɔ "ɛ nunɛ yɛ, 'ɔ "ne bhulɛloa nɛ -visɛ. -Mɔ, 'ɔ kɛ -la 'ɔnɛɛ gɛlenya 'na -kpakpɛ 'glɛme -ko ne, "ɛ nunɛ -wɛ 'wɔ 'ye 'ɔ -sɛloa -lɔ zɔ 'klekle.
Zezu 'sa- -pepe "yitɛ
(Matie 8.18,23-27; Luke 8.22-25)
35"Ɛ -zlewɛ 'na kugbedɛku, Zezu -bhulɛle 'ɔnɛɛ gɛlenya nɛɛ: «-A me pɛ 'na -ɛce "ku!» 36'Wa 'bha- "ɛ -zakpɛ -wɛ yɔko. "Ne 'ɔnɛɛ gɛlenya yi -lɔ Zezu gɔlo -mee 'ɔ -ko -na nɛ -wɛ "me kɔmele-. Gɔlo 'na -bedi 'wɔ 'kwɛlo me nɛ -gwe "ku. 37"Ɛ doɔ cuu, -pepe "yitɛ -bhli zɔ. 'Ŋu 'na -gbɔkɔle -bhli gɔlo "me "ne gɔlo 'yiɛ 'ŋu "ku. 38'Ɛ dɛ -wɛ "ku, Zezu 'ŋɔŋole- gɔlo 'na guɛ "me, 'ɔ 'piɛ- 'wli 'wlitlelelɛ "ku. "Ne gɛlenya yu -lɔ golia-, ŋwɛnɛɛ: «Anyinɛnyɔ, 'a ku -kɛ 'ce ɛɛ, "ɛ no -eyi -bɛɛ'?» 39Zezu -glɔ lɛ ne, 'ɔ -gbɔtɔle -pepe "ku, "ne 'ɔ yi jinyɛ 'klo glɛ, 'ɔ nɛɛ: «'Tli -dɛme doɔ "ku, -se ko -vlee!» "Ne -pepe yi -lɔ 'diɔle- "ne 'ŋu "klo yi -lɔ -vlee ko. 40"Ne 'ɔ yi -lɔ 'ɔnɛɛ gɛlenya bhulɛle- nɛɛ: «Sɔɔbɛɛza, 'a gu bhɔ soɔ? 'A "ne -nazɛ 'dleku -kɛ?» 41-Mɔ, 'wayi, nyanɔ za 'wa "ne 'awɔ ku -kɛ. "Ne 'wa 'yɔbhɔyɔbhɔle -lɔ lo nɛɛ: «Unn! "Ɛ 'nyɔkpɔ ne, sɔɔnyɔ yɔ bhɔ? "Ne -pepe -nyɛ jinyɛ 'nabhɛ "bhaa "zo bhɔ 'plome 'a!»
Voafantina amin'izao fotoana izao:
Malke 4: btg
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2024 (Active), Wycliffe Bible Translators, Inc. All rights reserved.
