Malke 2
2
Zezu 'fuɔ- -gbolulɔbhɔnyɔ
(Matie 9.1-8; Luke 5.17-26)
1'Yli yɛ "kɛ "ple ne, Zezu -zi Kapanaɔmedu "me 'wlizɔ. "Ne 'nyakpa yi -lɔ 'ɔnɛɛ sueme yi -de 'no. 2'Nyakpa -kwleyia "zo- 'wli, 'wanɛɛ zinɔ -za, ylɛledɛ -kpakpɛ "ne 'awɔ -bhudu-gbanuɛ "ku -ko, "ne Zezu sloaloa 'awɔ -lɔ lɔbhɔ Lagɔweli. 3'Wa 'na 'wolo ne, 'nyakpa -mɔɔnɔ yi, 'wa -su -gbolulɔbhɔnyɔ "ne 'wa nɔmo -lɔ Zezu. 4-Mɔ, 'nyakpa -zu 'awɔ kpɛnyee 'na 'ylime, 'wa "ne 'awɔ 'bhɛle- "ne 'wa "kɛ 'awɔ Zezu "ku "wlo. Zaa, -bhuduwliji 'wa 'gblɛle- -lɔ, "ne 'wa yi -lɔ -dee Zezu 'gli- -wɛ 'na "nɔgɔ "ku 'nuɔ 'di. "Ɛ -gbolulɔbhɔnyɔ 'pe- -gbɔto "klo, "ne 'wa yu -lɔ -gwe "me 'ylalea-, "ne 'wa yu -lɔ Zezu 'dle "me 'piɛ. 5Zezu 'ye- lɛ -see "ɛ 'nyakpa -wɛ -kɛ 'dleku -wɛ 'ylime ne, 'ɔ yi -lɔ "ɛ 'gwizinyɔ -wɛ bhulɛle- nɛɛ: «'Na yu, -Neɛ' 'nyinyonoli 'na gbo -bhiɛ.» 6-Lɔsloanya 'na yɛ 'gli- -me "ɛ -zakpɛ -wɛ "me, "ne 'wa bhulɛle -lɔ sɛne 'dlezɔ nɛɛ: 7«"Ɛ 'nyɔ -wɛ, sɔɔbɛɛza 'ɔ bhulɛ bhɔ soɔ 'a? Lagɔ 'ɔ ziɛ -lɔ doɔ 'dii. 'Nyɔkpɔ 'na -ɔ 'bhɛle- bhɔ -se 'ɔ "kɛ 'ɔluyu -nyɔkpɔ 'na 'nyinyonoli "ku titli 'a? 'Ɛ "mɔ Lagɔ -bholo -kpee yɔ.» 8Zezu -yibhlele 'wanɛɛ 'dlepɔsɛ cuu. 'Ɛza, 'ɔ 'yɔbhɔa- -lɔ sɛne lo nɛɛ: «Sɔɔbɛɛza 'a 'pɔ bhɔ "ɛ soɔ 'dle 'a? 9'Wa kɛ sɛne 'gwizinyɔ -bhulɛle: -Neɛ' 'nyinyonoli 'na gbo bhiɛ-, "ne: -Sɔ "ku, libhi -neɛ' -gbɔto "ku, -se 'nɔŋo, -se me. "Ɛ welicibhi "sɔ -wɛ 'glɛme, -bɛɛ' 'na -ɛ yɔle- bhɔ "me "ne -ɛ zi "ɛ -ɛwɛ "ku 'a? 10-Mɔ, 'a yibhlele- -kɛ 'sɛ nɛɛ: 'Nyɔkpɔ Yowli 'bhɛle- 'ɔ "kɛ 'nyinyonoli 'na gbo 'yi 'tale- dodo ne "ku.» "Ne Zezu yi -lɔ "ɛ 'gbolulɔbhɔnyɔ -wɛ bhulɛle-. 11'Ɔ nɛɛ: «-Sɔ "ku! 'Libhi -neɛ' -gbɔto -wɛ "ku, -se me sueme.»
12"Ɛ doɔ cuu, 'nyakpa 'klekle 'yliku, "ɛ 'gwizinyɔ -wɛ, "ku 'ɔ -sɔ -lɔ "ne 'ɔ yi -lɔ 'ɔnɛɛ -gbɔto "ku 'libhi, "ne 'ɔ yi -lɔ zɔ 'wlo, "ne 'ɔ yi -lɔ me. Geji 'bhoa- "ku "ne 'wa yi -lɔ Lagɔ 'ŋlu 'kwa-. Ŋwɛnɛɛ: «-A -na 'ce -zɛ soɔ 'na -li 'ylime 'ye.»
Zezu la- Levi
(Matie 9.9-13; Luke 5.27-32)
13Zezu "kɛ 'awɔ Galile 'na jinyɛ yɔko 'wli zɔzi ne, 'nyakpa 'na 'kwleyia -yu yɔko 'titale- -ka, "ne 'ɔ yua -lɔ lɔbhɔ Lagɔweli 'sloale-. 14Zezu 'ple "ne 'ɔ yi -lɔ Alefe yowli Levi 'ylime 'ye. 'Ɔ 'gli- nɛ 'lɛposa-bhudu "me. Zezu yu -lɔ bhulɛle- nɛɛ: «Levi, gɛle- -ame.» Levi -sɔ "ku "ne 'ɔ yi -lɔ Zezu gɛle-.
15"Ɛ -zlewɛ, Zezu -me Levi 'na sueme lilɛ -li -ka. "Ne -lɛposanya -kwleyia, "ne "nyinyonolinonya 'wɔ -nyɛ 'ɔnɛɛ gɛlenya 'wɔ "bhaa lili 'awɔ 'gɔme. "Naa-, 'wayi -wɛ 'klekle -gɛle 'awɔ -lɔ Zezu "ɛ -zlewɛ. 16-Lɔsloanya 'na -wa -noɔ -me Faliziɛnya 'waa -wɛ, 'wa 'na 'wolo-, Zezu -nyɛ "nyinyonolinonya "ne -lɛposanya "bhaa lile 'gɔme. "Ne 'wa yi -lɔ 'ɔnɛɛ gɛlenya "klo 'glɛ. Ŋwɛnɛɛ: «'Anyɛɛ "Bhenyɔ -nyɛ -lɛposanya "ne "nyinyonolinonya "bhaa 'wa lili bhɔ 'gɔme 'a?»
17Zezu 'no- "ɛ welicibhɛ -wɛ "me "ne 'ɔ yua -lɔ bhulɛle- nɛɛ: «-Wa -yɛ -wɛ 'waa -na 'nyakpononyɔ 'siɛ tɛle-, -mɔ, 'gwizinya 'tɛle -lɔ 'nyakpononyɔ 'siɛ. 'E -na "meŋwinɛlenya la -ka -yi, -mɔ, "nyinyonolinonya za 'e -yi -lɔ.»
Zezu -bhulɛ nuɛteweli
(Matie 9.14-17; Luke 5.33-39)
18'Yli -bholo "me, Zaa Batise 'na gɛlenya "ne Faliziɛnya 'wa te 'awɔ -lɔ nuɛ. 'Ɛza, 'nyakpa -yi 'awɔ -lɔ Zezu lo 'yɔbhɔ ka. Ŋwɛnɛɛ: «Zaa Batise 'na gɛlenya "ne Faliziɛnya 'na gɛlenya, 'wa te nuɛ, "ne -neɛ' gɛlenya 'wa "ne te -me nuɛ. Sɔɔbɛɛza bhɔ?» 19Zezu nɛɛ: «'Nyakpa -ye 'wa lale- ŋukwɔjajo "ku -wɛ, 'ŋulele "luwli kɛ -na lɔbhɔ -ko ne, 'wa yi bhɔ nuɛ te 'a? 'Ŋulele 'luwli koa -na 'glɛme -ko ne, -wa -ka -na nuɛ te. 20-Mɔ, 'yli -bholo "me, 'wa yu 'wayi 'glɛme -sɛ, "ne 'ɔ yi me. "Ɛ -zlewɛ, 'wa yi nuɛ te.
21'Wa "ne "kplɛle -la lokwilele 'na 'pɛɛ lokwi-gɔgɔ "klo. 'Wa 'cɛ sɔbhɔ 'sa-, "ɛ 'pɛɛ lele -wɛ yi lokwi-gɔgɔ 'na 'pɛɛ lɔbhɔ -sɛ, "ne lɔbhɔ 'na -gwe yi -la "me 'kpɔmale- kpɛnyee. 22'Wa "ne 'slu -la duvɛ lele kutu#2.22 "Kutu: 'Nɛmɛ 'na "ku 'wa no -lɔ 'bhotiɛ 'nasɛ "ne 'wa "zo -lɔ "bhle no "ne 'ŋu. -gɔgɔ "me. 'Wa 'cɛ sɔbhɔ 'sa- ne, duvɛ yi kutu 'ylɛ, "ne "ɛ duvɛ yi 'siɛ slu. Lɔbhɔ 'na dɛku kutu kɛ -ylɔ, duvɛ yi 'siɛ 'slu. -Mɔ, duvɛ 'lele 'bhe- -lɔ kutulele.»
Zezu "ne -gbajɛ
(Matie 12.1-8; Luke 6.1-5)
23-Gbajɛzle, Zezu ylɛle 'awɔ 'blelɛɛ "me. "Ne -see 'wa me 'awɔ 'yiɛ -wɛ, sɔbhɔ 'ɔnɛɛ gɛlenya 'di 'awɔ -lɔ 'ble#2.23 'Ble: 'Ɛnɛɛ yɛ -ko sɛgbɛɛ sɛka "ne -nyɔɔ 'na yɛ, 'ɛnɛɛ bhobho 'wa no -lɔ "fɔlɔ "ku. 'na 'gwlɛ. 24Faliziɛnya yoa- 'ylime, "ne 'wa yi -lɔ 'ɛza Zezu 'kabha-. Ŋwɛnɛɛ: «-Neɛ' gɛlenya 'na -ye 'wa no -wɛ, -e -gɛ 'yli? -Ye -lɔ no -gbɔ 'wa te -gbajɛzle no -wɛ, 'ɛyi 'wa no -lɔ.» 25"Ne Zezu yi -lɔ no nɛɛ: «-Ye Davide -no 'awɔ -wɛ, 'a "ne "me -zɛle -me? 'Ɔyi "ne 'nyakpa -ye 'ɔ -su 'awɔ -wɛ "bhaa ŋɔŋo 'lɔbhoa 'awɔ. 26"Ne 'ɔ yi -lɔ Lagɔ 'na -bhudu "me plɛ, "ne "bhle 'na "fɔlɔbhi -ye 'wa bɔbɔle Lagɔ -wɛ, 'ɔ 'yi -lɔ "ku 'libhi, "ne 'ɔ 'yi -lɔ 'ɔnɛɛ 'nyakpa "nyɛ "ne 'wa 'yi -lɔ 'gɔme lile-. "Ɛ "tɛnye -wɛ "me, 'ye Abiata -noɔ 'awɔ -lɔ bɔbɔnyɔ "yitɔ yɔ. "Ne "ɛ soɔ 'na "fɔlɔ -wɛ bɔbɔnya 'wayikɔ 'li -lɔ!» 27"Ne Zezu yua 'lelee -lɔ sɛne bhulɛle-. 'Ɔ nɛɛ: «'Nyɔkpɔ za 'wa -no -lɔ -gbajɛ, -mɔ, -gbajɛ za 'wa "ne 'nyɔkpɔ -no. 28-Ɛwɛza, 'Nyɔkpɔ Yowli 'bhe- -lɔ -gbajɛ 'nabhɛ.»
Voafantina amin'izao fotoana izao:
Malke 2: btg
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2024 (Active), Wycliffe Bible Translators, Inc. All rights reserved.
