Zaa 11
11
Zezu -sɛ Laza glu
1'Nyɔkpɔ -bholo pa- 'awɔ -lɔ Laza. 'Ɔyi 'ye gu 'lɔbhɔ 'awɔ -lɔ. Mali "ne 'ɔ "nɔyɔ Mate 'wa 'luku Betani 'na 'nyɔkpɔ yɔ 'awɔ -lɔ. 2Mali, 'ŋɔnɔ -ɔ 'slu- 'awɔ Anyinɛnyɔ -lasiklɔ bhopopɛ "ku, "ne 'ɔ 'yi 'awɔ 'ɔnɛɛ 'nyi 'nu siɛle- -wɛ yɔ 'awɔ -lɔ. "Ɛ Mali -wɛ, 'ɔ "nɔwli Laza "ne 'awɔ -lɔ -yɛ. 3"Ne "ɛ "nɔyoa "sɔ -wɛ yi -lɔ 'nyɔkpɔ Zezu "ku lebhele- nɛɛ: «Anyinɛnyɔ, -neɛ' -ye -e -wa -wɛ "ne -yɛ.» 4Zezu 'no- lɛ "ɛ weli -wɛ "me ne, 'ɔ nɛɛ: «Laza 'na gu -wɛ -kɔ 'lɔbhɔ "ne 'ɔ "kɛ "ku, -mɔ, Lagɔ 'na 'bhɛloɛ "kɛ 'yli 'wlole za 'ɛ ylɛle -lɔ sɔbhɔ. "Naa-, 'ɛyi "me 'ye Lagɔ Yowli "kɛ -lɔ 'ŋlu me -le.»
5Zezu -wa nɛ Mate, Mali "ne 'wa "nɔwli Laza. 6-Mɔ, 'ɔ 'no- lɛ "me -gbɔ Laza ne -yɛ ne, "ɛ -dee 'ɔ -ko nɛ -wɛ, 'ɔ -sɛ lɔbhɔ 'yli "sɔ "bhuɔ 7"ne 'ɔ yi -la -lɔ 'ɔnɛɛ gɛlenya bhulɛle- nɛɛ: «'A -ya zi Zude 'wlizɔ.» 8Lɔbhɔ 'ye 'ɔnɛɛ gɛlenya -bhulɛlo -lɔ nɛɛ: «"Bhenyɔ, 'yli -bholo "me, Zufonya tɛle nɛ -eyi siɛ -se 'wa "kɛ nɛ -eyi 'tiyi "pɔ -se -e "kɛ "ku, "ne -e "kɛ -lɔ "bhle 'wlizɔ zi?» 9"Ne Zezu yua -lɔ bhulɛle- nɛɛ: «'Yli "ne bhɔ glee kogbɔ "sɔ "me -ko 'a? -Ɔ 'nɔŋo- zlegɛ -wɛ, 'ɔ "ne 'gɔzɔ- -da, "naa-, dodo ne "ku 'na zle lelo "ku zɛ. 10-Mɔ, -ɔ 'nɔŋo- titiɛ "me -wɛ, 'ɔɔ 'gɔzɔ -lɔ, "naa- 'ɔ "ne 'ye siɛ zɛ.» 11'Ɔ "kɛ soɔ lɛ "bhuɔ ne, "ne 'ɔ yi 'lelee -lɔ no nɛɛ: «-Anyɛɛ 'tito Laza 'ŋɔŋo-, -mɔ, 'e "kɔɔ- golia- -ka me.» 12"Ne 'ɔnɛɛ gɛlenya yu -lɔ bhulɛle- nɛɛ: «Anyinɛnyɔ, 'ɔ kɛ 'ŋɔŋo- ne, 'ɔ yi yamale-.» 13'Ɔnɛɛ gɛlenya -tɔle 'awɔ -gbɔ 'yɛlɛ 'na -yɛlɛ 'ye 'ɔ ga. -Zɛglɛgbɔ, sɛne 'ye Zezu lɛ- 'awɔ -lɔ nɛɛ: Laza "ku-. 14"Ne Zezu yua -la -lɔ gbɛklɛklɛ bhulɛle- nɛɛ: «Laza "ku-. 15"Ne 'ɔ yi -lɔ no nɛɛ: 'Ŋwɛnɛ 'lɔbhɔ -ame 'anyɛɛ za, -ye 'e "ne lɔbhɔ -ko -me -wɛ, "naa-, 'a "kɛ -da -ame 'dleku kɛle-. -A -ya me Laza yɔko.» 16"Ne Toma, -ye 'wa la Didime -wɛ, bhulɛle -lɔ gɛlenya 'na vinoa -wɛ nɛɛ: «-A -ya "mɔme- -se -anyɛɛ "bhenyɔ "bhaa -a "kɛ 'gɔme "kule!»
Zezu -noɔ -lɔ zikpɛ yɔ
17Zezu -ylɛ lɛ 'du ne, 'ɔ 'na wolo-, 'wa zizi- Laza "bhuɔ, 'yli -mɔɔnɔ 'ple-. 18Betani -nyɛ Zeluzalɛme "bhaa "ne 'awɔ dɛtlo -tlole. 19'Ɛza Zufonya -kwleyia -yi -lɔ Mate -nyɛ Mali "bhaa 'bhɛle- -ka, 'wa "nɔwli 'na "lugbu za. 20-Sɔɔdɛku Mate 'no- "me -gbɔ Zezu -ko yi dɛku -wɛ, 'ɔ -mo 'sibhɔle- -ka "ne Mali gli- nɛ -bhudu "me. 21"Ne Mate yi -lɔ Zezu bhulɛle- nɛɛ: «Anyinɛnyɔ, -e kɛ nɛ -kɛ lɔbhɔ -ko ne, -ame "nɔwli -ka nɛ "ku. 22-Mɔ, 'e -yi sɛ -gbɔ -dɛme 'na dɛku, -ye -e kɛ Lagɔ -zlɛ, 'ɔ 'yi -eyi kɔ 'je.» 23"Ne Zezu yu -lɔ bhulɛle- nɛɛ: «-E "nɔwli yi gluzɔ 'wlo.» 24Mate nɛɛ: «-Ɛɛ, 'e -yi sɔbhɔ sɛ, -mɔ, -glukonya kɛ 'ce gluzɔ 'wlo ne, 'ɔ yi gluzɔ 'wlo me, 'be -bhiɛle -yli "me.» 25"Ne Zezu yu -lɔ no nɛɛ: «-Ame, 'mɔɔ -noɔ -lɔ gluzɔwloɛ yɔ, "ne 'e -noɔ -lɔ zikpɛ yɔ. -Ɔ kɛ -ame 'dleku -kɛ ne, "ku 'ɔ kɛ se 'ku- -ce, 'ɔ yi 'ce lele-. 26"Ne 'nyɔkpɔ 'na -ɔ -kɛ -ame 'dleku -dee 'ɔ -yɛ -na -wɛ, 'ɔ -ka 'ce 'kwiɛ yle gou. -E -cɛ bhɔ sɔbhɔ 'dleku -a?» 27Mate nɛɛ: «-Ɛɛ, Anyinɛnyɔ, 'e -kɛ 'dleku -gbɔ -mɔɔ -noɔ -lɔ Lagɔ 'na 'Fuɔnyɔ yɔ, "ne -e -noɔ -lɔ Lagɔ 'na Yu yɔ, -ɔ "kɛ nɛ dodo ne "ku yi -wɛ.»
Zezu tu Laza 'na 'kwiɛ za
28Mate -bhulɛ lɛ "bhuɔ ne, "ne 'ɔ yi -lɔ 'ɔ "nɔyɔ Mali la -ka me, "ne 'ɔ yu -lɔ 'diɛ "me bhulɛle nɛɛ: «Anyinɛnyɔ -ko -kɛ lɔbhɔ. 'Ɔ la -eyi.»
29Mali 'no- lɛ "ɛ weli -wɛ "me, 'ɔ -sɔ "ku cuu, "ne 'ɔ yi -lɔ Zezu 'na laweli "ku me. 30Zezu -na nɛ mlɛ 'du "me plɛ-. -Mɔ, 'ɔ -ko nɛ -dee "ɛ Mate -mo nɛ 'sibhɔle- -ka -wɛ. 31Zufonya -wa -nɔmo "lugbu "ku -wɛ -ko -me nɛ "ɛ -bhudu -wɛ "me. 'Wa 'na wolo Mali -sɔ "ku cuu "ne 'ɔ wlo- zɔ. Zaa, 'wa -tɔle nɛ -biɛglo "ku 'ye 'ɔ me "tule -ka, "ne 'wa yu -lɔ gɛlele-. 32"Ne Mali yi -lɔ Zezu yɔko ylɛ. 'Ɔ 'yo- lɛ 'ylime ne, 'ɔ 'pɔ- -kokomni, "ne 'ɔ yu -lɔ bhulɛle- nɛɛ: «Anyinɛnyɔ, -e kɛ nɛ -kɛ lɔbhɔ -ko, -ame "nɔwli -ka nɛ "ku.» 33Zezu -gɔ 'yli -gbɔ 'ɔ 'tu. "Ne Zufonya -wa -yi -wɛ 'tu -me ne, 'nyɛze yu -lɔ 'lɔbhɔ-. 34"Ne 'ɔ yua -lɔ lo 'yɔbhɔ- nɛɛ: «-Dee 'a 'piɔ- bhɔ?» "Ne 'wa yi -lɔ no nɛɛ: «Anyinɛnyɔ, yi -se -e "kɔ 'ylime 'ye.» 35"Ne Zezu yi -lɔ 'tu. 36"Ɛ Zufonya -wɛ nɛɛ: «'A -gɛyli, 'ɔ -wɔ nɛ -kɛ 'ce kpɛnyee 'ɛɛ!» 37"Ne, -bedia yi -lɔ no nɛɛ: «'Ɛ "ne bhɔ -ɔ -vulu -kpelɔbhɔnyɔ 'na 'yli "ku -wɛ yɔ? Sɔɔbɛɛza 'ɔ -ko bhɔ lɔbhɔ "ne Laza yi "ku 'a?»
Zezu -sɛ Laza glu
38"Ne "ɛ Zezu, 'nyɛze yu -lɔ "kusɔ 'lɔbhɔle, "ne 'ɔ yi -lɔ -biɛ "ku ylɛ. -Gbogbo yɛ 'awɔ -lɔ "ne 'wa 'piɛ- nɛ 'tiyi -zabhuɛ 'nuɔ "ku. 39"Ne Zezu yi -lɔ no nɛɛ: «'A -sɛ lɔbhɔ "ɛ 'tiyi -wɛ.» Laza 'ɔ "nɔyɔ Mate nɛɛ: «Anyinɛnyɔ, 'ɔ yi -la 'ŋɛnɛ "pɔ. 'Ɔ -ko -biɛ "me 'na 'yli -mɔɔnɔ ne lɛ.» 40"Ne Zezu yu -lɔ bhulɛle- nɛɛ: «'E "ne nɛ bhɔ -eyi -bhulɛle -gbɔ -e kɛ 'dlekukɛleɛ -kɛ ne, -e yi Lagɔ 'na 'ŋlu 'ylime 'ye 'a?»
41"Ne 'wa yi -lɔ "ɛ 'tiyi -wɛ lɔbhɔ -sɛ. "Ne Zezu yi -lɔ "nɔgɔ "me wolo-, "ne 'ɔ yi -lɔ no nɛɛ: «-Ame To, 'e bhɛle -eyi -se -e kɛ -kɛ 'neɛ bhubhɔweli 'yukwli fo! 42'E -yi sɛ -gbɔ -e fo 'neɛ bhubhɔweli 'yukwli -godogodo. -Mɔ, -ye 'e bhulɛ ne, 'nyakpa -wa -bli -ame ne za yɛ -lɔ. 'Wa "kɛ 'dleku kɛle- -gbɔ -mɔɔ -lebhe -lɔ -ame 'diɛɛ.» 43Zezu -bhulɛ lɛ "bhuɔ ne, "ne 'ɔ yi -lɔ "me "kpa "yitɛ "ku nɛɛ: «Laza, "wlo zɔ!» 44"Ne "ɛ Laza yi -lɔ -biɛ "me zɔ "wlo-, 'ɔnɛɛ bho -nyɛ 'ɔnɛɛ sɔ "bhaa -gbɛteɔ, "ne 'ɔnɛɛ 'klo 'waleɔ- "ku lokwi 'nu. "Ne Zezu yua -lɔ bhulɛle- nɛɛ: «'A vulu- "ɛ -ɛwɛ 'klekle -se 'ɔ me.»
Zufonya nɛɛ 'wa ''kɛ Zezu 'lɔbhɔ
(Matie 26.1-5; Malke 14.1-2; Luke 22.1-2)
45Zufonya -wa -nɛme 'awɔ Mali "lugbu "ku -wɛ 'na 'glɛme 'na "gbagboa 'ye- -ye Zezu -no -wɛ 'ylime. "Ne 'wa yu -lɔ 'dleku kɛle-. 46-Mɔ, 'wanɛɛ 'glɛme 'na -bedia -me -ye Zezu -no -wɛ 'na 'de Faliziɛnya -sɛle -ka. 47"Ne, bɔbɔnya "yitia -nyɛ Faliziɛnya "bhaa yi -lɔ 'wli "zo. Ŋwɛnɛɛ: «-See -a "kɛ bhɔ "zo -tiaa? "Ɛ 'nyɔkpɔ -wɛ, 'ɔ 'pɔ -kɛ zɛzɛ -kwleyi! 48Zaa, -a "kɔ -kɛ soɔ 'yi 'tale-, "ne 'ɔ 'cɛ -kɛ no 'yiɛ ne, 'nyakpa -kwleyia yu -kɛ 'dleku kɛle-, "ne Wlɔmo 'na 'nyakpa yi -kɛ -anyɛɛ "Mebɔbɔlebhudu wlɛ, "ne 'wa yi -kɛ -anyɛɛ 'du "ku bhia-.»
49'Wanɛɛ 'glɛme 'na 'nyɔkpɔ -bholo -ye 'wa la Kayifo -wɛ, "ne 'ɔ -noɔ 'awɔ "ɛ 'ylobɛ -wɛ "me 'na bɔbɔnyɔ "yitɔ yɔ -wɛ, 'ɔɔ -no -lɔ nɛɛ: «'A "ne -bɛɛ' "me -nyini! 50'A "pɔ -na 'se 'dle! 'Ɛ -ŋwa sɔbhɔ -gbɔ 'nɔkpɔ -bholo -na "ku -glɔnya 'na 'ylime. Lɔbhɔ 'na dɛku -anyɛɛ -glɔ -ka 'wli bhiɛ.»
51"Ɛ Kayifo 'na -ye 'ɔ -bhulɛ -wɛ, 'ɔyigɛsɛ 'ye 'ɛ -na "me 'bhale-. -Mɔ, 'ɔɔ -noɔ nɛ -lɔ "ɛ 'ylobɛ -wɛ "me 'na bɔbɔnyɔ "yitɔ yɔ. 'Ɛza 'ɔ bhulɛ 'awɔ -lɔ guɔkwɔmenyɔ 'nasɛ, "ne 'ɔ no 'awɔ -lɔ nɛɛ Zezu yi "ku, Zufonya za. 52"Ne 'ɛ "ne 'lelee Zufonya 'wayikɔ za yɛ, -mɔ, 'ɔ "kɛ -glɔnya 'wli "zo -se 'wa "kɛ -bholo yle-, 'wayi "ne Lagɔ 'na yua -wa -ŋwɛne -glɔ 'klekle keyi -wɛ.
53"Ɛ zle -wɛ 'wa "zo- -lɔ 'de -gbɔ 'wa "kɛ Zezu 'lɔbhɔ -se 'ɔ "kɛ "ku. 54'Ɛza, Zezu "ne me 'awɔ -da -lɔ "ɛ Zufonya 'glɛme, "ne 'ɔ yi -lɔ 'du -ye 'wa la Eflayime -wɛ "gule -ka me, "ne 'ɔ -nyɛ 'ɔnɛɛ gɛlenya "bhaa yi -lɔ "bhle ko. 55'Ɛ dɛ -wɛ "ku, Zufonya 'na Paake 'na -jajo 'na 'yli "ne 'awɔ dɛtlo. "Ne 'nyakpa -kwleyia yi -lɔ Zeluzalɛme bɔbɔ -ka me, -se 'wa "kɛ 'wayi 'wlele "zoa-. 56'Wa -ko "ɛ "Mebɔbɔlebhudu "me, "ne 'wa 'pɔ -lɔ Zezu za 'yli. Ŋwɛnɛɛ: «-See 'a 'pɔ bhɔ 'dle 'a? "Ɛ Zezu yi bhɔ "ɛ -jajo ne "ku yi -me -a?» 57Bɔbɔnya "yitia -nyɛ Faliziɛnya "bhaa, -piɛ nɛ 'nyakpa -gbɔ -bɛsɛza, -ɔ kɛ -kɛ Zezu 'ylime 'ye-, 'ɔ yi -se 'ɔ "koa bhulɛle- -se 'wa "kɔ "sa.
Voafantina amin'izao fotoana izao:
Zaa 11: btg
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2024 (Active), Wycliffe Bible Translators, Inc. All rights reserved.
