Mateus 28
28
Yeesus sayn peleepung
Markus 16.1-8; Lukas 24.1-12; Yohan 20.1-10
1Noo em samstach, sontachs moynts kans frii, sin Maria Matalena un ti aner Maria es kraap pesuuche kang. 2Uf mool, is en kroos eyert xuter paseyert. En ëngel fom Hër is fom himel runer khom, hot te xteen wech kerolt un hot sich truf kesetst. 3Tee waar eenlich wii en plits, un sayn tsaych waar ways wii te xnee. 4Ti soltaate hon ketsitert fon pang fom ëngel un waare wii toot. 5Tan saat te ëngel fer ti fraae:
— Praycht khee pang hon! Ich wees tas teyer Yeesus am suuche sayt, woo pekraytst kep waar, 6awer tee is net hier; is xon peleept kep, wii eyer kesaat hat. Khomt tas plats kuke woo eyer hiin ketuun kep waar. 7Yets keet xnel un saat tas fer tëm sayn tisiple: “Tee is peleept kep un keet foer aych pis Kalilëya. Tort kriit teyer em se siin. Tas is es was ich saan must fer aych.”
8Ti fraae sin xnel fom kraap fort kang, wayl se pang hate, awer aarich froo. Un sin kelaaf fer ales fer ti tisiple fertseele. 9Uf mool, hot Yeesus mit tëne sich pekeechent un saat:
—Tas te friite mit aych sich ferhalt!
Tii sin ticht pay em khom, hon sayn fiis umkeaaremt un hon em atoreyert.
10Tan saat Yeesus:
— Praycht khee pang hon! Keet fer mayn priiter saan tas se sole noo Kalilëya keen, un tort tuun se mich siin.
Te soltaate sayn falx kexpreech
11Wii ti fraae noch uf em weech waare, sin phaar soltaate woo tas kraap am uf pase waare tsurik in ti xtat kang un hon fer ti xëfe fon te priister fertseelt ales was paseyert waar. 12Ti xëfe hon sich fersamelt mit te yute fiirer un hon sayn pleen kemach. Tan hon se fiil kelt fer ti soltaate kep 13un hon tii ortnung kep:
— Saat tas tëm sayn tisiple iwer nacht khom sin, wii teyer am xloofe waart, un hon te khërwer kextool. 14Wën te Kowerneyer tas se wise kriit, tuun meyer iim fersichere tas tas wërklich paseyert is, un teyer wërt khee eene propleem hon.
15Ti soltaate hon tas kelt kehool un hon kemach was ti xëfe fon te priister kexikt hate. Un tas falx kexpreech hot sich ferprayt unich te yute pis hayt tsu taach.
Yeesus khomt tsum foerxayn fer ti elef tisiple
Markus 16.14-18; Lukas 24.36-49; Yohan 20.19-23; Akte 1.6-8
16Ti elef tisiple sin noo Kalilëya kang un sin an te përich khom woo Yeesus aan kesaat hat. 17Un, wii se Yeesus kesiin hon, hon se em atoreyert; awer phaar waare net sicher. 18Tan is Yeesus tichter khom un saat:
— Hërkot hot mich ti macht im himel un uf te eyert kep. 19Tesweche, keet noo ale foleke fon te welt un macht tas tii mayn tisiple wëere, un taaft se im naame fom Fater, fom Soon un fom Hayliche Kayst 20un lërnt se noo keen ales was ich aych uf kep hon. Un ich sin yeete taach pay aych, pis am ën fon te tsayte.
Voafantina amin'izao fotoana izao:
Mateus 28: NTHunsrik
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
2022 Sociedade Bíblica do Brasil
