मत्ती 8
8
यीशु यक कोढ़ी ठीक करण
मरकुस 1:40-45; लूका 5:12-16
1जिखेईं यीशु फाट पुठा उणिहां आ, त तसे पता पता हुसुड़ा बि आ। 2तोउं यक कोढ़ी भेएड़ एई कइ तसे खुर बिने त बोलु, “ए प्रभु! अगर तु चहाल त मोउं शुचा कइ सकता।#8:2 तपल मेह्णु मानतेथ कि कोढ़ी होरी जुए बिशुण जे त पुजापाठ करण जे जुठा भुन्ते।” 3यीशु अपु हथे बइ से छुआ त बोलु, “अउं चहन्ता कि तु शुचा भोई गा।” त से तपले ईं कोढ़ केआं ठीक भोई गा। 4तोउं यीशु तेस जे बोलु, “शुण, एसे बारे केसे जे न बोलुण। पर घेई कइ अपु अपफ पुजारी हराल। होर जेस भकते बारे मूसे नियमे कताब अन्तर लिखो असु, तेस दे ताकि मेह्णु तें शुचा भुणे पता लगियाल।”#पुजारोठि 14:1-32
यक सुबेदारे विश्वास
लूका 7:1-10; यूहन्ना 4:43-54
5जपल यीशु कफरनहुम शेहर वापिस आ त यक सुबेदारे तसे छनेअरे किउ। 6“ए प्रभु! में नौखर अदरंगे बीमारी बेलि सुआ कष्ट अन्तर असा।” 7यीशु बोलु, “अउं तें गी एई कइ तस ठीक कता।” 8एस पुठ सुबेदारे जवाब दिता, “ए प्रभु! अउं अत धर्मी नेईं कि तु में गी आई। पर तुस इठिआ सद निआंग दिआल त में नौखर सुसुरी घेन्ता। 9किस कि अउं बि होरी पड्डे कम कता, त में पड्डे बि होरे सपाही कम कते। जपल अउं यक जेईं जे बोता कि ‘गा!’ से घेन्ता; त होरे जे बोता ‘आई!’ त से एन्ता; जपल अउं अपु नौखरी जे बोता ‘इस कम कर!’ त से तस कता।”
10ईं शुण कइ यीशु हैरान भोई गा। होर जे तसे पता थिए तेन्हि जे बोलुण लगा, “अउं तुसी जे बोता कि मेईं पूरे इस्राएली मेह्णु अन्तर बि अत विश्वास करणे बाड़ा न काआ। 11होर अउं तुसी जे बोता कि हर कनारी बइ सुआ मेह्णु स्वर्गे राज्य अन्तर एई कइ तुं पुरखे अब्राहम, इसहाक त याकूबे भेएड़ बिश्ते।#लूका 13:29 12पर सुआ इस्राएली मेह्णु नर्क अन्तर छेईंन्ते, जेठि रोलुण शींकुण त मगिर चठ देण भुण असी।”#मत्ती 22:13; 25:30; लूका 13:28 13तोउं यीशु सुबेदार जे बोलु, “गा, जीं तें विश्वास असा, तिहांणि तोउ जोई भो लौतु।” तिखेईंए तसे नौखर ठीक भोई गा।
यीशु सुआ बीमार मेह्णु ठीक करण
मरकुस 1:29-34; लूका 4:38-41
14यीशु जपल पतरसे गी पूजा, त तेन हेरु कि पतरसे शशु सेक भुणे बेलि बीमार असी। 15तेन तसे हतेउ टातु त तसे सेक मुक गा त से खड़ी कइ तसे सेवा करण लगी। 16जपल झवादी भुई त तठियाणि मेह्णु तेस केईं दुष्ट आत्मा धरो सुआ मेह्णु घिन आए। तेन से दुष्ट आत्माई निआंग दी कइ बाहर किढ़ छेई त सोब बीमार मेह्णु सुसुरेरि छड़े। 17ईं करणे बेलि यशायाह भविष्य वक्ते जे बोलो थिउ, से पूरु भु। तेन बोलो थिउ कि
“हें कमजोरी त सोब बीमारी तेन अपफ पुठ नी छेई।”#यशायाह 53:4
यीशु चेला बणणे मुल
लूका 9:57-62
18अपु चोहरो कना हुसुड़ा हेर कइ यीशु अपु चेली जे बोलु, “चले, तथे ओस पार घेन्ते”। 19तपल यक धर्मशास्त्री तसे भेएड़ एई कइ बोलु, “ए गुरु! जेठि कोठि बि तु घेन्ता, अउं तें पतोती एन्ता।” 20यीशु तेस जे बोलु, “सुगालि के खोपर त चड़ी चखुरु के गुल्हे असे; पर अउं जे मनखे कुआ भो, मोउं अपु मगिर नियोकाण जे बि जगाह नेईं।” 21तपल यक होरे चेले तेस जे बोलु, “ए प्रभु, पेहले मोउं घेण दिए कि अउं अपु बोउए जीण मरुण कइ एऊं।” 22पर यीशु तेस जे बोलु, “तु में पता आई। होर जे मरोरी के ईं असे, तेन्हि अपु मुड़दे पथण दिए।”
यीशु तुफान शान्त करण
मरकुस 4:35-41; लूका 8:22-25
23तोउं जपल यीशु घेण जे नाव पुठ चढ़ा त तसे चेले बि तसे पता पता चढ़ गे। 24तोउं धिक पता, अजगता, तथ अन्तर अत बोडा तुफान आ कि छल्हारे नाव अन्तर एण लगे। पर से उंघ गो थिआ। 25त चेले तसे भेएड़ एई कइ से खड़ेरा त बोलु, “ए प्रभु, असी बचा। अस मरणे बाड़े असे!” 26तेन तेन्हि जे बोलु, “ए कमजोर विश्वासीओ! तुस किस अत डरो असे?” तोउं तेन खड़ी कइ पुओणि त तुफान जड़का त से सोब डम्हरी गा। 27चेले हैरान भोई कइ बोलुण लगे, “ए की बंदा असा बारा, तुफान त पुओणि बि असे बोक मानते, आं?”
यीशु दुष्ट आत्मा धरो मेह्णु ठीक करण
मरकुस 5:1-20; लूका 8:26-39
28जपल यीशु पार गदरेनि के इलाके अन्तर पुजा, त दुष्ट आत्माई धरो दुई मेह्णु कब्र केआं एई कइ तेस जोई मीईए। से अतर खतरनाक थिए कि तेस बते बइ कोई बि घेई ना बटताथ। 29तेन्हि हुशेरि दी कइ बोलु, “ए परमेश्वरे कोईया! हें इठि तु किस अओ असा? तु कि टेम केआं पेहलाई असी दुख देण जे अओ असा ना?” 30तेन्हि केआं धिक दूर ईं सुआ सूरी के यक मुहारा चरुण लगो थिआ। 31त दुष्ट आत्माई यीशु छनेअरे किउ त बोलु, “अगर तु असी नशाणता त असी सूरी के अन्तर घेण दिए।” 32तेन तेन्हि जे बोलु, “घिए”। त से निस कइ सूरी के अन्तर घेई गे। तोउं भु ईं कि सोब सूर फाट पुठा दौड़ दी कइ पाणि अन्तर झड़ कइ मर गे। 33तेन्के गुवाल नश गे त शेहर घेई कइ दुष्ट आत्माई धरो तेन्हि मेह्णु त अपु सूरी के पूरा हाल शुणाई छड़ा। 34तोउं, शेहरे सोब मेह्णु यीशु जोई मीण जे ए, त तेस हेर कइ तेन्के शेहर केआं बाहर घेण जे तसे छनेअरे करण लगे।
Voafantina amin'izao fotoana izao:
मत्ती 8: pgg
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2023 (Active) Wycliffe Bible Translators, Inc. All rights reserved.
