Kisary famantarana ny YouVersion
Kisary fikarohana

मत्ती 14

14
बतिस्मा ए-माय एहुन्‍ना कू पूजा तेडा
(मरकुस 6:14-29; लूका 9:7-9)
1हेना तोलोग गलील देस रेनिय हेरोदेस राजा, ईसु राः बारे तेय अँजोम तेडा। 2अवुर हेंय अनेज रेनकू नोकरकू थरेय कहनी तेडा, “नेय बतिस्मा ए-माय एहुन्‍ना हवे। हेंय गोजकेन वरिय जियो रिमकेना। हेनाते हेंय नआँ घियाआ अहचरज राः कामिय तिब यडा।” 3#लूका 3:19,20 कहेकि हेरोदेस दो अनेज बोहोत फिलिप्पुस कन्याँ हेरोदियास राः चलते ते एहुन्‍ना एर सबके डियते जेहेल रेय डलो तेडिया। 4कहेकि एहुन्‍ना हेंय थरेय कहनी तेडा, अम बोहोम कन्याँम असुल यडा, हेना जयेज कोवाआ। 5हेरोदेस एहुन्‍नाय एर ञेंड गोज मेनतेय पसींद तडा, लेकिन हेंय होड़कुय बोरोवा दोहो एनु, कहेकि होड़कू एहुन्‍ना भविस्यवक्‍ता हवे मेनते कू मनोविय दोहो एनु।
6हेरोदेस राः जनम दिन रे हेरोदियास कोड़ी होपोन, जवर तनकू मड़ंग रे एनेज केनते, हेरोदेसिय खुस तेडा। 7हेनाते हेंय कीरिया केनते नआँ घयतेय जबान वडियू, “अम जे-नाम असियू, इंञ हेनांञ ओवा मिआँ।” 8इंगत मतर तेडिया तेय कहनी तेडा, “मियाँटंग टठिया रे बतिस्मा ए-मय एहुन्‍ना भोः ने-डेम असी वञूँ।” 9तहाँ राजा राः जीव होडिंञ यनु, लेकिन अनेज राः कीरिया पूरा लगड अवुर दुड़ूब तनकू राः चलते ते, ओवाय लगाडिय हुकूम तेडा। 10अवुर जेहेल रे होड़कू कुलकेड ते एहुन्‍ना भोईय एर पूजा तेडा। 11अवुर हेंय भोः मियाँटंग टठिया तेकू अगतेडा, अवुर हेंय कोड़ी चोंडिजकू ओवाडू, हेना वरी हेंय इंगत थरेय इदी तेडा। 12तहाँ एहुन्‍ना रेनकू चेलाकू मेजकेनते, लास कू गोःतेडा, अवुर कू हर तेडा, अवुर हेंकू सेनकेन ते ईसु कू लाय वडू।
ईसु पाँच हजार कोड़ाकुय खियो तेडा
(मरकुस 6:30-44; लूका 9:10-17; एहुन्‍ना 6:1-14)
13ईसु नआँ टेबोईय अँजोम तेडा, तहाँ डोंगा रे रकब केनते सुनहर ओत हनतेय चलो यनु। लेकिन होड़कू नआँ अँजोम केते, सहर सहर वरी पयदल ते हेंय तयोम तेकू सेनेना। 14हेना वरी हेंय डोंगा वरिय अगड़ू एना, तहाँ अखीर जवर तन हेंकू होड़कू ञेंलके तेय सोग वडकुआ, अवुर हेंकू बीच रेनकू बेमारिया कुय चिकन तेडा।
15अयूब एन तहाँ, चेला कुतय हेंय थरे सेनकेन तेकू कहनी तेडा, “नआँ सुनहर ओत हवे, अवुर मुलुक ते अयुब यना, होड़कू गाँव रे सेनकोःते जो-मे लगड कनारा कू तिला जोम लगड मी कुल गोत्तेकू।” 16तहाँ ईसु कहनी तेडा, “नेकू चलोः लगड जरूरत कोवाआ! जो-मे लगड नेकू अनापे ओवाकू।” 17हेना वरी चेलाकू कहनी तेडा, “अले थरे पाँच गोटंग रोटी अवुर बाटंग हकुकींञ छोड़ अवुर कनर कोवाआ।” 18तहाँ हेंय कहनी तेडा, “हेना इंञ थरे पे अगुयू।” 19हेना वरी हेंय होड़कू घाँस ओत रे दुड़ूब लगाडिय कहनी वडकू, अवुर हेंय पाँच गोटंग रोटी अवुर बाटंग हकुकींञ सबकेते, सरग हन तको केते भगवानिय धन्यावाद वडा, अवुर हेंय टुटका टुटका ते चेला कुय ओवाडू, अवुर चेलाकू दुड़ूब तन कुकू परोस वडू। 20सींड़ कुकू जोम पिटो यन तहाँ, चेलाकू बारह छनवाँ बंचो तना टुटकत कू जवर तेडा। 21अवुर जोजोमकू मेंडे रे कोड़िकू अवुर चोंडिजकू छोड़ ते पाँच हजार मेनमोट कोड़ाकू दोहो एना।
ईसु दाः तेय सेनतेडा
(मरकुस 6:45-52; एहुन्‍ना 6:16-21)
22हेना वरी तुरेत्ते ईसु चेला कुतय डोंगा रे जिद्हय तेय एर रकब तेडकुआ, अवुर होड़कू अनायीनिय बिदा कू मेन दिन अनेज वरी मड़ंग ते समुन्धर परोम चलोः लगाडिय कहनी वडकुआ। 23हेंय होड़कुय बिदा केडते, बिनतीः लगड एनेटाः बुरू रेय रकब यनु; अवुर अयुब जुवर हेना रे मियाँहोड़ तेय दोहो एना। 24हेना तोलोग डोंगा समुन्धर मँझर रे हिलकोस तुते डगमगोः दोहो एनु, कहेकि गरा घटा मड़ंग हनवरी मेजुः दोहो एनु। 25अवुर ईसु करीब करीब चार बजे ञींद समुन्धर ते चेलाकू हनतेय सेन अगुय दोहो एनु। 26चेलाकू हेंय समुन्धर तेय से-ने तोलोग ञेंलकेडिय तेकू बोरो यनु। अवुर कू कहनियू, “मेय भूत हवे!” अवुर बोर राः मार तेदो कू अहीजू। 27तहाँ ईसु तुरेत्ते हेंकू थरेय कहनी तेडा, “हिम्मातेपे, अलोपे बो-रू, इंञ हवे!” 28हेना वरी पतरस कहनी तेडा, “ए परभु, अगर अम हवे रेदो, इंञ अम थरे दाः ते सेन अगुय लगड मी हुकूम वञूँ।” 29तहाँ हेंय कहनी तेडा, “मेजुः मी!” तहाँ पतरस डोंगा वरी अगड़ू केनते ईसु हनते सेनुः लगड दाः तेय सेनतेडा। 30लेकिन गरा घटा ञेंल तेय बोरो यनु, अवुर डुबोः तोलोगिय हाक एना, “ओ परभु, बंचोविंञ मी!” 31ईसु तुरेत्ते सुहरू केतेय सब टेको तेडिया, अवुरिय कहनी वडियू, “ए दमभर ते बिसवासेअय, अम ची लगड मी संखा तेडा?” 32हेंकींञ डोंगा रेकींञ रकब एन तहाँ, गरा घटा थबदो यनु। 33अवुर डोंगा रे दोहोएन हेंकू, ईसु उकड़ूम#14:33 ग्रीक भासा ते उकड़ुम कोःते मेनाआँ, तबेर कोःते जोहार वयू। वडिय तेकू कहनी तेडा, “सहिच मेते अम, भगवान होपोन हवे।”
ईसु गन्‍नेसरत रे रोगिया कुय चिकन तेडा
(मरकुस 6:53-56)
34हेंकू समुन्धर खँडा केनते गन्‍नेसरत एरिया कू तयाः तेडा। 35हेना रेनकू होड़कू हेंय कू चिन्हों गोत्तेडियू, अवुर आस पास राः गाँव ते खभेर कू कुलतेडा, अवुर बेमारियाकू भर दो हेंय थरे कू अगतेड कुआ। 36अवुर हेंकू कपड़ा छोर तय भर इकम छुयों वकू लगड ईसु थरे कू अरजी एना; अवुर जेतना होड़कू छुयों तेडा हेंकू सींड़ कुकू चिकन यनु।

Voafantina amin'izao fotoana izao:

मत्ती 14: ksz

Asongadina

Hizara

Dika mitovy

None

Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra

Horonantsary ho an'i मत्ती 14