Mak 9
9
1Yeso gâ ebe angɔ kpe, “Mmɛ gâ éŋwaʼa endɔn, bɔ deʼ be tamma abwaʼ ndzɔn anɔ byɛ e ne ma ngo zhweʼre ewu bo ngɛ, bwɛn èndzobo chɛ angɔ ma zɔ ebwa m̀fɔ̀ Ngwe zèʼ nè ekama ngɛ.”
Aŋu ezɔɔrɔ Yeso à kobo ngɛ
(Mat 17:1-13; Luk 9:28-36)
2Enji à fɔɔ mfo, Yeso nu Petoro, Jems mane Eyɔɔ ngɔ̀ɔ edɔm egu kɛ́ deʼ wɛ â tye aŋu àmɔ̀ àmɔ̀ ngɛ. Aŋu angɔ à ma kede Yeso ngɛ, ezɔɔrɔ ngɔ klàda sa kobo. 3Ǹdi ngɔ klada sa nɛŋɛrɛ ma bla fɔɔ na aŋu gho deʼ edɔm chwâ me né le è nɛŋɛrɛ ngɛ. 4Éngɛ Elayja mane Mose bum efàarà angɔ klada sa gà nè Yeso. 5Petoro gâ ebe Yeso kpe, “Àtee abwa, e we nara aŋu ntsɔ mwɔ anɔ ngɛ! Ntsɔ byɛ enkpɛʼ tɛd anɔ, aŋwaʼ engɛ̂, àbi ebe Mose mane azê ebe Elayja.” 6Engɔ à ke nɛɛ ebwa é gà bo, mbɔʼnga èklɔ̀ à bere Petoro mane asɔrɔ mɔ. 7Éngɛ m̀bɛ̀ʼ kla koo angɔ, ega deʼ gà efwɔ m̀bɛ̀ʼ yɛ kpe, “Ewùnɔ na ŋwɔanɔm etaa ngu mbɔn zhuru ebe engɔ.” 8E sa klikɔ̀ʼ, e ke wu zɔ gho deʼ abwaʼ angɔ bo à tye Yeso. 9Èndzobo chɛ angɔ à sa kla edɔm egu ngɛ, Yeso ndɛ̀ʼ etsɛrɛ ebe angɔ kpe e ke toʼro ebwa wɛ angɔ à zɔ ngɛ ebe gho deʼ bo bwɛn èndzobo chɛ Ŋwɔ Gho ma ngo zhwɛm ene ewu ngɛ. 10Angɔ à shi ebwa wɛ àmɔ̀ àmɔ̀ gɛ̀rɛ̀ sa biiri àmɔ̀ àmɔ̀ ǹji ene é zhwɛm ene ewu. 11Bɔ bɛɛrɛ abwa ngɔ biiri ebe engɔ kpe. “Ayɛ me le bàtee atsɛrɛ ma ga kpe Elayja a ma dye zeʼe?” 12Yeso gâ ebe angɔ kpe, “Elayja wa dye zèʼ é ndèerè abwa gimkpaʼ aŋu e me ŋwɛʼrɛ mbɔʼ Ŋwɔ Gho kpe engɔ zɔ enyii ene abwa akɛkɛ e gɛrɛ bɛ̀ʼrɛ̀ engɔ ngɛ? 13Bɛʼngɛ, mmɛ gà endɔn kpe, Elayja shi zeʼe, bɔ lè abwa yɛ angɔ à me doʼo ngɛ ekwa ngɔ na aŋu â me ŋwɛʼrɛ mbɔʼ engɔ ngɛ.”
Yeso glì aŋwɔanɔm deʼ wɛ a me le azhwɛɛrɛ bɔɔbɔɔ ngɛ
(Mat 17:14-21; Luk 9:37-43a)
14Èndzobo chɛ Yeso mane bɔ bɛɛrɛ abwa mɔ Petoro Jems mane Eyɔɔ angɔ à kla abɔ bɛɛrɛ abwa abê ngɛ, angɔ zɔ engwa enɔrɔ bɔ mane bàtee atsɛrɛ me kɛɛrɛ engɔ sa fɛ̀ɛrɛ abwa nè angɔ. 15Aŋu bɔ gimkpaʼ à zɔ Yeso ngɛ, angɔ kɔ̂n, è dɔrɔ ngɔ̀ɔ é gamma ebe engɔ. 16Yeso biiri ebe bɔ bɛɛrɛ abwa mɔ kpe, “Ne ebwa yɛ mbɔn ma fɛ̀ɛrɛ nè angɔ?” 17Egho bi efwɔ enɔrɔ bɔ gii kpe, “Àtee abwa, mmɛ à ne zeʼe nè ŋwɔanɔm ngu éngɛ wɛ è me le azhwɛɛrɛ bɔɔbɔɔ deʼ à ma lè engɔ sa mo gà tsɛ̀ʼ. 18A na de bere engɔ, a ndwa engɔ a chwâ, efuu sa gli eklo ngɔ, è sa kwo ashwɔ mɔ gɛ̀rɛ̀ fum. Mmɛ à ga ebe bɔ bɛɛrɛ abwa mbyɛ kpe e chi azhwɛɛrɛ yɛ, angɔ mo tsɛ̀ʼ.” 19Yeso gíì kpe, “Ooh! Ekyɛ kè lè ebɛrɛ, mmɛ wa ngo tsɔmɔ nè mbɔn efwɔ endzobo ene? Mmɛ wa nu endzobo ene é lè shi mbɔn kwaʼ koʼ ene mmɛ? Nu eŋwɔanɔm wɛ zeʼe ena.” 20Éngɛ e nu engɔ ndɛ̀ʼ ebe Yeso. Èndzobo chɛ azhwɛɛrɛ bɔɔbɔɔ yɛ à zɔ Yeso ngɛ, a wuru eŋwɔ wɛ ekyɛ ŋwaʼ. Engɔ go a chwâ sa bìiŋi amɔ efuu sa gli eklo. 21Yeso biiri ebe àtɛ ngɔ kpe, “Engɔ shi tsɔmɔ énde efwɔ endzobo ene?” 22Engɔ gíì kpe, “Enyɛrɛ ene adɔ̀kpara. A ya doʼo à wuru engɔ ndwa edzɔ kà eji ma ke é zhudu engɔ. Bɛʼngɛ, mala ngwo me né lè ka me ebwa we, le eklasɔn ene mbyɛɛ gɛ̀rɛ̀ kpèdè angbɛɛ.” 23Yeso gâ ebe engɔ kpe, “Ma ngwo me bɛrɛ, abwa gimkpaʼ ya fwɛʼ ebe engɔ wɛ è me le ebɛrɛ ngɛ.” 24Àtɛ eŋwɔ wɛ gâ ekyɛ ŋwaʼ kpe, “Mmɛ we bɛrɛ, kpede angu shi mmɛ fɔɔ kè lè ebɛrɛ yɛ mmɛ me le ngɛ!” 25Èndzobo chɛ Yeso à zɔ kpe enɔrɔ bɔ à sa dɔrɔ zeʼe aŋu ngɛ, engɔ bwe gà ebe azhwɛɛrɛ bɔɔbɔɔ yɛ kpe, “Azhwɛɛrɛ kèzobwa mane kè ga, mmɛ tsɛrɛ engɛ̂, gli efwɔ ekwa ngɔ gɛ̀rɛ̀ ne yaa wu nyii efwɔ ekwa ngɔ ekyɛ tsɛrɛ bo.” 26Azhwɛɛrɛ yɛ kwaʼ wuru engɔ, è tsɛɛ, azhwɛɛrɛ yɛ gli. Eŋwɔ wɛ shi na akudugho nɔ. Bɔ sa gà kpe, “Engɔ shi ku.” 27Bɛʼngɛ, Yeso klini engɔ ene abwo è too sàa ekere. Engɔ gɛrɛ tam ene elo mɔ. 28Aŋu Yeso à shi ngɔɔ efwɔ ndɔ ngɛ, bɔ bɛɛrɛ abwa ngɔ biiri ebe engɔ achimchim kpe, “Ayɛ â le mbyɛɛ mo fli azhwɛɛrɛ zɔnɔ tsɛ̀ʼ?” 29Yeso gíì ebe angɔ kpe, “E na fli m̀pè zɔnɔ tye me ene atsaʼra Ngwe.”
Yeso wu gà mbɔʼ ewu mɔ
(Mat 17:22, 23; Luk 9:43b-45)
30Angɔ à nyɛn afwɔ yɛ gɛ̀rɛ̀ fɔɔ anji Galilii. Yeso ne me doʼo kpe gho deʼ nɛɛ afwɔ yɛ angɔ mwɔ ngɛ bo, 31mbɔʼnga engɔ à na tee abwa ebe bɔ bɛɛrɛ abwa mɔ. Engɔ gâ ebe angɔ kpe, “E ba ngo fɛ̀n enji Ŋwɔ Gho ebe bɔ. Angɔ ba zhudu engɔ. Enji fɔɔ ètɛd, engɔ wa zhwɛm.” 32Bɛʼngɛ, angɔ à ke nɛɛ ǹji ene ebwa wɛ engɔ à ga ngɛ bo, gɛrɛ ma bumu é biiri mbɔʼ ebwa mombwo ebe engɔ.
Awɛ mwɔ gho kɛ̀
(Mat 18:1-5; Luk 9:46-48)
33Angɔ bwɛn a Kapɛnaum, èndzobo chɛ engɔ à me efwɔ ndɔ ngɛ, engɔ biiri ebe bɔ bɛɛrɛ abwa mɔ kpe, “A ne ebwa yɛ mbɔn à ma zhiri à fɛ̀ɛrɛ anji?” 34Angɔ ba tuuu mbɔʼnga â ma zhiri à fɛ̀ɛrɛ mbɔʼ egho wɛ mwɔ gho kɛ̀ ngɛ. 35Yeso tsɔmɔ a chwâ, zɔ̀ʼ bɔ bɛɛrɛ abwa wum ǹchwɔ̀ fyee, è gà ebe angɔ kpe, “Mala gho deʼ ma ke mwɔ gho embè, engɔ mwɔ gho ngùdu gɛrɛ mwɔ gho afwɛʼ ebe bɔ gimkpaʼ.” 36Engɔ nu adɔ̀kpara è too aghɛɛghɛɛ angɔ. Nu engɔ kpèrè gà ebe angɔ kpe, 37“Egho wɛ ma chɛdɛ adɔ̀kpara ene ekumu ngu ngɛ, shi chɛdɛ angu. Egho gɛrɛ ma chɛdɛ angu ngɛ, ke me chɛdɛ ma angu bo, è ne chɛdɛ me engɔ wɛ à tɔm angu ngɛ.”
Egho wɛ ne ma gwe abɔ bo ngɛ we mwɔ nè ntsɔ
(Luk 9:49, 50)
38Eyɔɔ gâ kpe, “Àtee abwa, mbyɛɛ à zɔ gho deʼ ma fli ezhwɛɛrɛ bɔɔbɔɔ ene ekumu ngwɛ, mbyɛɛ kɔrɔ engɔ kpe è ke wu lè bo, mbɔʼnga engɔ ke mwɔ egho bi abwaʼ bɔ bo.” 39Yeso gâ kpe, “Mbɔn ke engɔ kɔn, mbɔʼnga tsɛʼ gho deʼ eŋwàʼ wɛ ma lè ebwa zodo zodo deʼ ene ekumu ngu ngɛ me né wu gà ebwa bɔɔbɔɔ deʼ mbɔʼ mmɛ bo. 40Enga egho wɛ è ne ma gà mbɔʼ bɔ bo ngɛ we mwɔ nè ntsɔ.” 41Mmɛ na gà éŋwaʼa endɔn, gho wɛ è ndɛʼɛ ǹtoʼndim endɔn ene ekumu ngu mbɔʼnga mbɔn mwɔ nè Yeso Kristo ngɛ wa ngo lè enɛrɛ mɔ.
Akwa̧ʼra é le abwa bɔɔbɔɔ
(Mat 18:6-9; Luk 17:1, 2)
42“Mala gho deʼ le eŋwɔ wunɔ deʼ wɛ è me bɛrɛ ene mmɛ ngɛ è nyim ebwa, e wa ngo me nara fɔɔ kpe e koro etye adwɔ ngɔ è ŋwɛɛrɛ engɔ saa efwɔ ebɔrɔndim. 43Mala abwo njɛ àbi le kpe ngwo le enyimebwa, gɔ waʼ. E we nara fɔɔ kpe ngwo nde etyê Ngwe nè abwo ŋwaʼ, ankɔmɔ é tye nè ebwo fyee è nyii efwɔ éwu asatan, 44wɛ éwu ne ma nyim aŋu ekyɛ deʼ bo ngɛ. 45Mala alo njɛ àbi le kpe ngwo le enyimebwa, gɔ waʼ. E we nara fɔɔ engɛ̂ é nyii efwɔ etyê Ngwe nè alo ŋwaʼ, ankɔmɔ é tye nè elo fyee wɛ e ma ndwa awɛ efwɔ éwu asatan ngɛ. 46#9:46 Eŋwɛʼrɛ sam deʼ ke le mpweʼe 46 bo. 47Mala eghɔɔ njɛ ebi le kpe ngwo le enyimebwa chi waʼ. E we nara fɔɔ engɛ̂ é nyii efwɔ ebwa m̀fɔ̀ Ngwe nè eghɔɔ ŋwaʼ, ankɔmɔ é tye nè aghɔɔ fyee ngɔ̀ɔ fe efwɔ edzɔwu asatan ngɛ. 48Aŋu endwâ angɔ ne ma ku bo, éwu wɛ gɛrɛ ne ma nyimi bo. 49E yà zhwaʼa gho ŋwàʼaŋwàʼ ene éwu è pɛ na e ma zhwaʼa ala ene ńgbaa a pɛ nɔ. 50Ńgbaa fe nara, mala e sodo ngwo wa lè ene kpe e wu sa nàm? Le ńgbaa efwɔ ekwa ngwɛ gɛ̀rɛ̀ tsɔmɔ a m̀bwarambwad nè abɔ abê.”
Voafantina amin'izao fotoana izao:
Mak 9: nbt
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
