Mak 7
7
Atsɛrɛ ètɛ sam
(Mat 15:1-9)
1Bɔ Farisii mane bàtee atsɛrɛ deʼ byɛ â nyɛrɛ zeʼe a Jerusalɛm ngɛ shunu ebara Yeso. 2Angɔ zɔ kpe bɔ deʼ abwaʼ bɔ bɛɛrɛ abwa Yeso ba nde nè ebwo di, éngɛ me ga kpe ebwo kè sò na aŋu etsɛrɛ yɛ me shi ngɛ bo. 3Bɔ Farisii mane bɔ Juu gimkpaʼ ne so ebwo àmɔ̀ na aŋu etsɛrɛ bɔ tɛbɛ me tee ngɛ bo, e ne nde. 4Angɔ à na dye ghɛɛbɛ ewu̧ e sô àmɔ̀ dye sa nde, gɛ̀rɛ̀ ma shi atsɛrɛ tsɛrɛ na é sò ǹtoʼro, ekɔʼ ndim mane ela tsɛrɛ ne etan mane ala deʼ yɛ e me ndeere ene atɔrɔ akapɛ ngɛ. 5Éngɛ bɔ Farisii mane bàtee atsɛrɛ biiri ebe Yeso kpe, “Ayɛ me le bɔ bɛɛrɛ abwa mbyɛ ne ma shi etsɛrɛ na é sò ebwo de sa nde na aŋu etsɛrɛ bɔ tɛbɛ me tee ngɛ bo, e ba sa tsɔmɔ me nè ebwo di?” 6Engɔ gíì kpe, “Azaya àmɛnɛkɔn Ngwe à ne koʼro é ŋwɛ̀ʼrɛ̀ tòʼrò mbɔʼ mbɔn bɔ ndooro aghɔɔ kpe ‘Ngwe ga kpe abɔ bɔnɔ na ghɔ angu me ene eklo, bɛʼngɛ ńtara angɔ shi me tsɛʼ ene mmɛ bo. 7Angɔ na ghɔ angu bli. Angɔ na tee etsɛrɛ bɔ ne etsɛrɛ ndza nɔ.’ 8Mbɔn shi waʼ etsɛrɛ Ngwe sa klini ma abwa abɛ ndzɔn” 9Engɔ gâ ebe angɔ kpe “Mbɔn be le aghɛʼ é ndooro aghɔɔ é bɛ̀ʼrɛ̀ etsɛrɛ Ngwe mbɔʼtye mbɔn zo andzɔn abwa abɛ. 10Mose à ga kpe ghɔ àtɛ ngwɛ mane áʼɔ̧̀ ngwɛ, gɛrɛ gà kpe gho deʼ ga ebwa bɔɔbɔɔ ebe àtɛ kà áʼɔ̧̀ mɔ e zhudu engɔ. 11Bɛʼngɛ mbɔn gà mbɔn kpe ma gho ga ebe àtɛ kà ebe áʼɔ̧̀ kpe ‘Ka mwɔ ekpede ze yɛ ngwo à ye nu ena ngɛ na Kɔɔban, éngɛ me ga kpe, e ngɔɔ ebe Ngwe.’ 12Ma mbɔn ga éngɛ mbɔn ke wu shi angɔ le ala deʼ kà ebwa é kpèdè àtɛ kà áʼɔ̧̀ bo. 13Éngɛ, mbɔn nyiimi ega Ngwe ene abwa abɛ yɛ mbɔn ma mɛ̀nɛ̀ ebe bwɔ ngɛ, mbɔn na le abwa kɛkɛ éngɛ.”
Abwa yɛ a ma le gho ne me pɛ efàarà Ngwe bo ngɛ
(Mat 15:10-20)
14Éngɛ Yeso zɔʼ ebaŋabɔ ebara mɔ gà ebe angɔ kpe, “Mbɔn zhuru ena mbɔn bɔ gimkpaʼ, gɛ̀rɛ̀ nɛɛ ǹji ene ebwa wunɔ. 15Tsɛ̀ʼ ala deʼ ekwa gho ese tyè a nyii ekwa ngɔ è lè engɔ di efàarà Ngwe bo, bɛʼngɛ na ma angɔ yɛ a ma glì efwɔ ekwa gho ngɛ a ma lè engɔ di.” 16“Egho wɛ me le ètimi é zo ngɛ zhuru.” 17Èndzobo chɛ engɔ à nyɛrɛ abwaʼ bɔ è nyii a ndɔ ngɛ, bɔ bɛɛrɛ abwa biiri ǹji nklama timi fɔnɔ ebe engɔ. 18Yeso biiri ebe angɔ kpe, “Mbɔn gɛrɛ ke ma zhuŋu bo, mbɔn ke zɔ kpe tsɛʼ ala deʼ yɛ a ma nyii efwɔ gho zeʼe ese ngɛ a me né lè engɔ di efàarà Ngwe bo bo? 19Ewunɔ na mbɔʼnga a ke ma ngɔ̀ɔ efwɔ etaa ngɔ bo, a na ngɔ̀ɔ me efwɔ atoo è fɔɔ glì ekwa ngɔ ngɔ̀ɔ ese efwɔ akwad.” Yeso à ga nɔ ma tee kpe ande gimkpaʼ yɛ pɛ. 20Engɔ fɔɔ embè gà kpe, “Ala yɛ a ma glì à zeʼe efwɔ gho ngɛ, na angɔ a ma lè gho di efàarà Ngwe. 21Mbɔʼnga ezhuŋu bɔɔbɔɔ na zeʼ efwɔ etaa gho, è sa lè abwa bɔɔbɔɔ na andɔŋɔ ene aye, ejii, enɔgho, andɔb, 22é tsamma ala gho, m̀pɛ̀ʼ, é fɛfi, emyɛ̀nɛ̀, m̀bog, akɔɔ, egere, atii. 23Abwa bɔɔbɔɔ zɔnɔ gimkpaʼ na glì à zeʼe efwɔ gho mà lè engɔ di efàarà Ngwe.”
Aye deʼ wɛ à me le ebɛrɛtaa ngɛ
(Mat 15:21-28)
24Yeso à nyɛrɛ afwɔ yɛ è ngɔɔ ebara abɛ Taya. È nyii a ndɔ deʼ ne ke kpe gho deʼ nɛɛ kpe mbè wa aŋu bo. Éngɛ a da me tsɛʼ aghɛʼ ebe engɔ é namma bo. 25Aye deʼ wɛ aŋwɔaye mɔ wɛ à me le azhwɛɛrɛ bɔɔbɔɔ ngɛ zo mbɔʼ Yeso è go elo ngɔ. 26Aye wunɔ à na aye ebɛbɔ. Â be engɔ a Sirya shi mà gho Fɔnɛsiya. Engɔ buʼ ebwo ebe Yeso kpe è fli azhwɛɛrɛ bɔɔbɔɔ ene ŋwɔaye ngbe. 27Yeso gíì ebe engɔ kpe, “Shi àbwɔ byɛ dye nde ala yɛ e me ke ngɛ mbɔʼnga e ke me koʼro é nu ende bwɔ è ndɛ̀ʼ ebe boro bo.” 28Aye wɛ gíì kpe, “Masakɛ, ka de ma boro chɛ enji echud ngɛ tsa pɛ̀dɛ̀ ntsɔbɔ.” 29Yeso shi gà ebe engɔ kpe, ene egiiga ǹchwɔ̀ zɔnɔ, ngɔ̀ɔ anjɛ, azhwɛɛrɛ bɔɔbɔɔ yɛ shi saara ŋwɔaye ngwɛ. 30Aye wɛ klo è dù zɔ ŋwɔ mɔ me bwɛrɛ edɔm etan, azhwɛɛrɛ bɔɔbɔɔ yɛ shi ngɔɔ.
Yeso glì àkoo ètimi
31Éngɛ Yeso nyɛrɛ efwɔ antiri abɛ Taya fɔɔ efwɔ abɛ Sidɔn kla nyii a Galilii gɛ̀rɛ̀ ngɔ̀ɔ efwɔ abɛ Dekapolis. 32Â nu eganyì deʼ wɛ à gɛrɛ mwɔ àkoo ètimi ngɛ zeʼe ebe Yeso è bii kpe engɔ tɛʼ ebwo mɔ ekwa engɔ. 33Yeso nu engɔ tini nyɛrɛ ebara ebaŋagho wɛ, gè etoobwo mɔ efwɔ ètimi ngɔ gɛ̀rɛ̀ tùdù emɛn mɔ̀mɔ̀ enɛmɛ ngɔ anyi. 34Engɔ kɔʼɔ ezob gɛ̀rɛ̀ gà akɛkɛ kpe, “Efata” wɛ me ga kpe fuʼu ngɛ. 35Enyɛrɛ ene ega wunɔ, ètimi egho wunɔ à fuʼ, enɛmɛ ngɔ zɛ̀ɛrɛ̀ engɔ klada sa ga anchwɔnchwɔ. 36Yeso tsɛrɛ ebe angɔ kpe e ke sɛɛrɛ ebe gho deʼ bo. Aŋu engɔ à ma ga éngɛ ngɛ, ne éngɛ â ma ga ngɔɔ ngɔɔ embè. 37Bɔ a na gɛnɛ àmɔ̀ tsà ene abwa zodo zodo zɔnɔ, angɔ gà kpe, “Engɔ le àkoo ètimi zo ebwa, eganyì gɛrɛ sa gà.”
Voafantina amin'izao fotoana izao:
Mak 7: nbt
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
